הבשורה על-פי מתי
פרק כד

ישוע מנבא חורבן וצרות

(מרקוס יג' 13-1;לוקס כא' 19-5)

1 וַיֵּצֵא-יֵשׁוּעַ מִן-הַמִּקְדָּשׁ לָלֶכֶת לְדַרְכּוֹ וַיִּגְּשׁוּ תַּלְמִידָיו לְהַרְאוֹתוֹ אֶת-בִּנְיְנֵי הַמִּקְדָּשׁ׃ 2 וַיַּעַן יֵשׁוּעַ וַיֹּאמֶר אֲלֵיהֶם הַרְאִיתֶם אֶת-כָּל-אֵלֶּה אָמֵן אֹמֵר אֲנִי לָכֶם לֹא-תִשָׁאֵר פֹּה אֶבֶן עַל-אֶבֶן אֲשֶׁר לֹא תִתְפָּרָק׃(מלכים א', ט' ז'-ח') 3 וַיֵּשֵׁב עַל-הַר הַזֵּיתִים וַיִּגְּשׁוּ אֵלָיו הַתַּלְמִידִים לְבַדָּם וַיֹּאמְרוּ אֱמָר-נָא לָנוּ מָתַי תִּהְיֶה זֹאת וּמָה אוֹת בּוֹאֲךָ וְאוֹת קֵץ הָעוֹלָם׃ 4 וַיַּעַן יֵשׁוּעַ וַיֹּאמֶר לָהֶם רְאוּ פֶּן-יַתְעֶה אֶתְכֶם אִישׁ׃ 5 כִּי רַבִּים יָבֹאוּ בִּשְׁמִי לֵאמֹר אֲנִי הוּא הַמָּשִׁיחַ וְהִתְעוּ רַבִּים׃(ירמיהו יד' יד') 6 וְאַתֶּם עֲתִידִים לִשְׁמֹעַ מִלְחָמוֹת וּשְׁמֻעוֹת מִלְחָמָה רְאוּ פֶּן-תִּבָּהֵלוּ כִּי-הָיוֹ תִהְיֶה כָּל-זֹאת אַךְ עֲדֶן אֵין הַקֵּץ׃ 7 כִּי יָקוּם גּוֹי עַל-גּוֹי וּמַמְלָכָה עַל-מַמְלָכָה וְהָיָה רָעָב וְדֶבֶר וָרַעַשׁ הֵנָּה וָהֵנָּה׃(דברי הימים ב', טו' ו'; ישעיהו יט' ב') 8 וְכָל-אֵלֶּה רַק רֵאשִׁית הַחֲבָלִים׃ 9 אָז יַסְגִּירוּ אֶתְכֶם לַצָּרָה וְהֵמִיתוּ אֶתְכֶם וִהְיִיתֶם שְׂנוּאִים לְכָל-הַגּוֹיִם לְמַעַן שְׁמִי׃ 10 וְאָז יִכָּשְׁלוּ רַבִּים וּמָסְרוּ אִישׁ אֶת-רֵעֵהוּ וְשָׂנְאוּ אִישׁ אֶת-אָחִיו׃ 11 וּנְבִיאֵי שֶׁקֶר רַבִּים יָקוּמוּ וְהִתְעוּ רַבִּים׃(***) 12 וּמִפְּנֵי אֲשֶׁר יִרְבֶּה הַפֶּשַׁע תָּפוּג אַהֲבַת הָרַבִּים׃ 13 וְהַמְחַכֶּה עַד-עֵת קֵץ הוּא יִוָּשֵׁעַ׃ 14 וַתִקָּרֵא בְּשׂוֹרַת הַמַּלְכוּת הַזֹּאת בְּכָל-הָאָרֶץ לְעֵדוּת לְכָל-הַגּוֹיִם וְאַחַר יָבוֹא הַקֵּץ׃

צרה גדולה

(מרקוס יג' 23-14;לוקס כא' 24-20)

15 לָכֵן כַּאֲשֶׁר תִּרְאוּ אֶת-שִׁקּוּץ מְשֹׁמֵם אֲשֶׁר אָמַר דָּנִיֵּאל הַנָּבִיא עוֹמֵד בְּמָקוֹם קָדוֹשׁ (דניאל ט' כז'; יא' לא'; יב' יא') הַקֹּרֵא יָבִין׃ 16 אָז נוֹס יָנוּסוּ אַנְשֵׁי יְהוּדָה אֶל-הֶהָרִים׃ 17 וַאֲשֶׁר עַל-הַגָּג אַל-יֵרֵד לָשֵׂאת דָּבָר מִבֵּיתוֹ׃ 18 וַאֲשֶׁר בַּשָּׂדֶה אַל-יָשֹׁב הַבַּיְתָה לָשֵׂאת אֶת-מַלְבּוּשׁוֹ׃ 19 וְאוֹי לֶהָרוֹת וְלַמֵּינִיקוֹת בַּיָּמִים הָהֵם׃ 20 אַךְ הִתְפַּלֲלוּ שֶׁלּא תִּהְיֶה מְנוּסַתְכֶם בַּחֹרֶף וְלֹא בַּשַׁבָּת׃ 21 כִּי אָז תִּהְיֶה צָרָה גְדוֹלָה אֲשֶׁר כָּמוֹהָ לֹא-נִהְיְתָה מֵרֵאשִׁית הָוֹלָם וְעַד-עַתָּה וְכָמוֹהָ לֹא תוֹסִף׃ 22 וְלוּלֵא נִקְצְרוּ הַיָּמִים הָהֵם לֹא יִנָּצֵל כָּל-בָּשָׂר אַךְ לְמַעַן הַבְּחִירִים יִקָּצְרוּ הַיָּמִים הָהֵם׃(ישעיהו סט' ח') 23 וְכִי-יֹאמַר אֲלֵיכֶם אִישׁ בָּעֵת הַהִיא הִנֵּה-פֹה הַמָּשִׁיחַ אוֹ הִנּוֹ-שָׁם אַל-תַּאֲמִינוּ׃ 24 כִּי יָקוּמוּ מְשִׁיחֵי שֶׁקֶר וּנְבִיאֵי שֶׁקֶר וְיִתְּנוּ אֹתוֹת גְּדֹלוֹת וּמוֹפְתִים לְמַעַן הַתְעוֹת אַף אֶת-הַבְּחִירִים אִם-יוּכָלוּ׃ 25 הִנֵּה מֵרֹאשׁ הִגַּדְתִּי לָכֶם׃ 26 לָכֵן כִּי-יֹאמְרוּ אֲלֵיכֶם הִנּוֹ בַמִּדְבָּר אַל-תֵּצֵאוּ הִנּוֹ בַחֲדָרִים אַל-תַּאֲמִינוּ׃ 27 כִּי כַבָּרָק הַיּוֹצֵא מִמִּזְרָח וּמֵאִיר עַד-הַמַּעֲרָב כֵּן יִהְיֶה גַּם-בּוֹאוֹ שֶׁל-בֶּן-הָאָדָם׃ 28 כִּי בַאֲשֶׁר הֶחָלָל שָׁם יִקָּבְצוּ הַנְּשָׁרִים׃(איוב לט' ל')

בואו של בן-האדם

(מרקוס יג' 37-24;לוקס כא' 33-25;יז' 30-26, 36-34)

29 וּמִיָּד אַחֲרֵי צָרַת הַיָּמִים הָהֵם תֶּחְשַׁךְ הַשֶׁמֶשׁ (יואל ד' טו'; עמוס ה' כ') וְהַיָּרֵחַ לֹא יַגִּיהַּ אוֹרוֹ וְהַכּוֹכָבִים יִפְּלוּ מִן-הַשָׁמָיִם וַחֲיָלֵי הַשָׁמַיִם יִתְמוֹטָטוּ׃(ישעיהו יג' ט'-י'; לד' ד') 30 אָז יֵרָאֶה אוֹת בֶּן-הָאָדָם בַּשָׁמָיִם וְסָפְדוּ כָּל-מִשְׁפְּחוֹת הָאָרֶץ (זכריה יב' י'-יד') וְרָאוּ אֶת-בֶּן-הָאָדָם בָּא עִם-עַנֲנֵי הַשָׁמַיִם בִּגְבוּרָה וְכָבוֹד רָב׃(דניאל ז' יג'-יד') 31 וְשָׁלַח אֶת-מַלְאָכָיו בְּקוֹל שׁוֹפָר גָּדוֹל וְקִבְּצוּ אֶת-בְּחִירָיו מֵאַרְבַּע הָרוּחוֹת לְמִקְצֵה הַשָׁמַיִם וְעַד קְצֵה הַשָׁמָיִם׃(דברים ל' ד'; ישעיהו יא' יב') 32 וּמִן-הַתְּאֵנָה לִמְדוּ אֶת-הַמָּשָׁל הַזֶּה כַּאֲשֶׁר יִרְטַב עֲנָפָהּ וּפָרְחוּ עָלֶיהָ יְדַעְתֶּם כִּי קָרוֹב הַקָּיִץ׃ 33 כֵּן גַּם-אַתֶּם בִּרְאוֹתְכֶם אֶת-כָּל-אֵלֶּה דְּעוּ כִּי-קָרוֹב הוּא בַּפָּתַח׃ 34 אָמֵן אֹמֵר אֲנִי לָכֶם כִּי לֹא יַעֲבֹר הַדּוֹר הַזֶּה עַד אֲשֶׁר-יִהְיוּ כָל-אֵלֶּה׃ 35 הַשָׁמַיִם וְהָאָרֶץ יַעֲבֹרוּ וּדְבָרַי לֹא יַעֲבֹרוּן׃(תהילים קב' כז'-כח'; ישעיהו נא' ו') 36 וְהַיּוֹם הַהוּא וְהַשָׁעָה הַהִיא אֵין אִישׁ יוֹדֵעַ גַּם-לֹא מַלְאָכֵי הַשָׁמַיִם [גַּם-לֹא הַבֵּן] בִּלְתִּי אָבִי לְבַדּוֹ׃ 37 וְכִימֵי נֹחַ כֵּן יִהְיֶה גַּם-בּוֹאוֹ שֶׁל-בֶּן-הָאָדָם׃(בראשית ו' יא'-יג) 38 כִּי כַּאֲשֶׁר לִפְנֵי יְמֵי הַמַּבּוּל הָיוּ אֹכְלִים וְשֹׁתִים נֹשְׂאִים נָשִׁים וְנֹתְנִים נָשִׁים לַאֲנָשִׁים עַד-הַיּוֹם אֲשֶׁר-בָּא נֹחַ אֶל-הַתֵּבָה׃(בראשית ז' ז') 39 וְלֹא יָדְעוּ עַד-בּוֹא הַמַּבּוּל וַיִּמַח אֶת-כֻּלָּם (בראשית ז' כא'-כג') כֵּן יִהְיֶה גַּם-בּוֹאוֹ שֶׁל-בֶּן-הָאָדָם׃ 40 אָז יִהְיוּ שְׁנַיִם בַּשָּׂדֶה וְיֵאָסֵף אֶחָד וְהָאֶחָד יַעָזֵב׃ 41 שְׁתַּיִם טוֹחֲנוֹת בָּרֵחָיִם וְתֵאָסֵף אַחַת וְאַחַת תֵּעָזֵב׃ 42 לָכֵן שְׁקֹדוּ כִּי אֵינְכֶם יוֹדְעִים בְּאֵי-זוֹ שָׁעָה יָבֹא אֲדֹנֵיכֶם׃ 43 וְאֶת-זֹאת דְּעוּ אֲשֶׁר לוּ-יָדַע בַּעַל הַבַּיִת בְּאֵי-זוֹ אַשְׁמוּרָה יָבֹא הַגַּנָּב כִּי-עַתָּה שָׁקַד וְלֹא הִנִּיחַ לַחְתֹּר אֶת-בֵּיתוֹ׃ 44 לָכֵן הֱיוּ נְכוֹנִים גַּם-אַתֶּם כִּי בְשָׁעָה אֲשֶׁר לֹא תְדַמּוּ יָבוֹא בֶּן-הָאָדָם׃

העבד הנאמן או הבלתי נאמן

(לוקס יב' 48-41)

45 מִי הוּא אֵפוֹא הָעֶבֶד הַנֶּאֱמַן וְהַנָּבוֹן אֲשֶׁר הִפְקִידוֹ אֲדֹנָיו עַל-עֲבָדָיו לָתֵת לָהֶם אֶת-אָכְלָם בְּעִתּוֹ׃ 46 אַשְׁרֵי הָעֶבֶד אֲשֶׁר יָבוֹא אֲדֹנָיו וְיִמְצָאֵהוּ עֹשֶׂה כֵּן׃ 47 אָמֵן אֹמֵר אֲנִי לָכֶם כִּי יַפְקִידֵהוּ עַל-כָּל-אֲשֶׁר-לוֹ׃ 48 וְאִם-יֹאמַר הָעֶבֶד הָרַע בְּלִבּוֹ מְאַחֵר אֲדֹנִי לָבוֹא׃(קוהלת ח' יא') 49 וְהִכָּה אֶת-חֲבֵרָיו וְאָכַל וְשָׁתָה עִם-הַסּוֹבְאִים׃ 50 בּוֹא יָבוֹא אֲדֹנֵי הָעֶבֶד הַהוּא בְּיוֹם לֹא יְצַפֶּה וּבְשָׁעָה לֹא יֵדָע׃ 51 וִישַׁסֵּף אֹתוֹ וַיָשִׂים אֶת-חֶלְקוֹ עִם-הַחֲנֵפִים שָׁם תִּהְיֶה הַיְלָלָה וַחֲרֹק הַשִׁנָּיִם׃