לפרק הקודם

הבשורה על-פי מתי
פרק ז

שפיטת הזולת

1 אַל־תִּשְׁפְּט֔וּ לְמַ֖עַן לֹ֥א תִּשָּׁפֵֽטוּ : 2 כִּ֣י בַּמִּשְׁפָּ֗ט אֲשֶׁ֥ר אַתֶּ֛ם שֹֽׁפְטִ֥ים בּ֖וֹ תִּשָּׁפֵ֑טוּ וּבַמִּדָּה֨ אֲשֶׁ֣ר תָּמֹ֣דּוּ בָ֔הּ ע֖וֹד יִמַּ֥ד לָכֶֽם : 3 וְלָמָּה֨ תִּרְאֶ֣ה אֶת־הַקֵּיסֶ֔ם אֲשֶׁ֖ר בְּעֵ֣ין אָחִ֑יךָ וְאֶל־הַקֹּרָ֛ה אֲשֶׁ֥ר בְּעֵֽינְךָ֖ לֹ֥א תִתְבּוֹנֵֽן : 4 וְאֵיכָ֞ה תֹּאמַ֣ר לְאָחִ֗יךָ הֶ֛רֶף אַשְׁלִי֥כָה אֶת־הַקֵּיסֶ֖ם מֵֽעֵינֶ֑ךָ וְהִנֵּ֖ה הַקֹּרָ֥ה בְעֵינֶֽךָ : 5 חָנֵ֗ף הַשְׁלֵ֧ךְ בָּרִֽאשׁוֹנָ֛ה אֶת־הַקֹּרָ֖ה מֵֽעֵינֶ֑ךָ וְאָז֨ תִּרְאֶ֣ה בָר֔וּר לְהַשְׁלִ֥יךְ אֶת־הַקֵּיסֶ֖ם מֵעֵ֥ין אָחִֽיךָ : 6 לֹֽא־תִתְּנ֤וּ אֶת־הַקֹּ֨דֶשׁ֨ לַכְּלָבִ֔ים וְלֹֽא־תַשְׁלִ֥יכוּ פְנִֽינֵיכֶ֖ם לִפְנֵ֣י הַֽחֲזִירִ֑ים פֶּן־יִרְמְס֤וּ אֹתָם֨ בְּרַגְלֵיהֶ֔ם וְיִפְנ֖וּ וְיִטְרְפ֥וּ אֶתְכֶֽם :

בקשה ומענה

7 שַֽׁאֲלוּ֨ וְיִנָּתֵ֣ן לָכֶ֔ם בַּקְּשׁ֖וּ וְתִמְצָ֑אוּ דִּפְק֖וּ וְיִפָּתַ֥ח לָכֶֽם : 8 כִּ֤י כָל־השֹּׁאֵל֨ יִקַּ֔ח וְהַמְּבַקֵּ֖שׁ יִמְצָ֑א וְהַדֹּפֵ֖ק יִפָּ֥תַח לֽוֹ : 9 א֠וֹ מִ֞י אִ֣ישׁ מִכֶּ֗ם אֲשֶׁ֤ר אִם־בְּנוֹ֨ יִשְׁאָלֵ֣הוּ לְלֶ֔חֶם יִתֵּ֥ן ל֖וֹ אָֽבֶן : 10 וְאִ֤ם יִשְׁאַל֨ לְדָ֔ג הֲיִתֵּ֥ן ל֖וֹ נָחָֽשׁ : 11 לָ֠כֵן אִם־אַתֶּ֞ם בִּהְיֽוֹתְכֶ֤ם רָעִים֨ תֵּֽדְע֗וּ לָתֵ֛ת מַתָּנ֥וֹת טוֹב֖וֹת לִבְנֵיכֶ֑ם אַ֗ף כִּ֤י אֲבִיכֶם֨ אֲשֶׁ֣ר בַּשָּׁמַ֔יִם יִתֵּ֥ן טוֹב֖וֹת לִשֹֽׁאֲלָיֽו : 12 לָכֵ֜ן כָּל־אֲשֶׁ֣ר תַּחְפְּצ֗וּ כִּ֣י יַֽעֲשׂ֤וּ לָכֶם֨ בְּנֵ֣י הָֽאָדָ֔ם כֵּ֛ן עֲשׂ֥וּ גַם־אַתֶּ֖ם לָהֶ֑ם כִּ֣י זֹ֥את הִ֛יא הַתּוֹרָ֖ה וְהַנְּבִיאִֽים :

הפתח הצר

13 בֹּ֗אוּ בְּעַד֘ הַשַּׁ֣עַר הַצָּר֒ כִּי֣ ׀ רָחָ֣ב הַשַּׁ֗עַר וּמְרֻוָּח֨ הַדֶּ֔רֶךְ הַמֵּבִ֖יא אֶל־הָֽאֲבַדּ֑וֹן וְרַבִּ֣ים הֵ֔מָּה הַבָּאִ֖ים בַּֽעֲדֽוֹ : 14 כִּ֣י צַ֤ר הַשַּׁ֨עַר֨ וְאָ֣ץ הַדֶּ֔רֶךְ הַמֵּבִ֖יא אֶל־הַֽחַיִּי֑ם וּמְעַטִּ֣ים הֵ֔מָּה הַמֹּֽצְאִ֖ים אֹתֽוֹ :

העץ ופריו

15 הִשָּֽׁמְרוּ֨ מִנְּבִ֣יאֵי שֶׁ֔קֶר הַבָּאִ֥ים אֲלֵיכֶ֖ם בִּלְבוּשֵׁ֣י כְבָשִׂ֑ים וּבְקִרְבָּ֕ם הֵ֖ם זְאֵבִ֥ים טֹֽרְפִֽים : 16 בְּפִרְיָ֖ם תַּכִּ֣ירוּ אֹתָ֑ם הֲיֵאָֽסְפ֤וּ עֲנָבִים֨ מִקּוֹצִ֔ים א֥וֹ תְאֵנִ֖ים מִדַּרְדָּרִֽים : 17 כֵּ֚ן כָּל־עֵ֣ץ ט֔וֹב עֹשֶׂ֖ה פְּרִ֣י ט֑וֹב וְעֵ֣ץ נִשְׁחָ֔ת עֹשֶׂ֖ה פְּרִ֥י רָֽע : 18 עֵ֣ץ ט֔וֹב לֹ֥א יוּכַ֛ל לַֽעֲשׂ֖וֹת פְּרִ֣י רָ֑ע וְעֵ֣ץ נִשְׁחָ֔ת לֹ֥א יוּכַ֛ל לַֽעֲשׂ֖וֹת פְּרִ֥י טֽוֹב : 19 כָּל־עֵ֗ץ אֲשֶׁ֨ר אֵינֶנּ֤וּ עֹשֶׂה֨ פְּרִ֣י ט֔וֹב יִכָּרֵ֖ת וְיֻשְׁלַ֥ךְ אֶל־הָאֵֽשׁ : 20 עַל־כֵּ֕ן בְּפִרְיָ֖ם תַּכִּ֥ירוּ אֹתָֽם :

מעולם לא הכרתי אתכם

21 לֹ֣א כָל־הָֽאֹמֵ֤ר אֵלַי֨ אֲדֹנָ֣י ׀ אֲדֹנָ֔י יָב֖וֹא אֶל־מַלְכ֣וּת הַשָּׁמָ֑יִם כִּ֚י אִם־הָֽעֹשֶׂ֔ה אֶת־רְצ֥וֹן אָבִ֖י בַּשָּׁמָֽיִם : 22 רַבִּ֞ים יֹֽאמְר֣וּ אֵלַי֘ בַּיּ֣וֹם הַהוּא֒ אֲדֹנָ֣י ׀ אֲדֹנָ֗י הַאִ֨ם לֹ֤א בְשִׁמְךָ֨ נִבֵּ֔אנוּ וּבְשִׁמְךָ֖ גֵּרַ֣שְׁנוּ שֵׁדִ֑ים וּבְשִׁמְךָ֥ עָשִׂ֖ינוּ נִפְלָא֥וֹת רַבּֽוֹת : 23 וְאָז֨ אוֹדֶ֣ה לָהֶ֔ם כִּ֛י מֵֽעוֹלָ֥ם לֹֽא־יָדַ֖עְתִּי אֶתְכֶ֑ם ס֥וּרוּ מִמֶּ֖נִּי פֹּֽעֲלֵ֥י אָֽוֶן :

יסוד איתן ויסוד רעוע

24 לָכֵ֗ן כָּל־הַשֹּׁמֵ֜עַ דְּבָרַ֥י אֵ֨לֶּה֨ וְעֹשֶׂ֣ה אֹתָ֔ם אֲדַמֶּ֥ה אֹת֖וֹ לְאִ֣ישׁ נָב֑וֹן אֲשֶׁ֛ר בָּנָ֥ה בֵית֖וֹ עַל־הַסָּֽלַע : 25 וַיֵּ֨רֶד הַגֶּ֜שֶׁם וַיָּב֣וֹאוּ הַנְּהָרִ֗ים וַיִּשְּׁבוּ֨ הָֽרוּח֔וֹת וַיִּתְנַפְּל֛וּ עַל־הַבַּ֥יִת הַה֖וּא וְלֹ֣א נָפָ֑ל כִּ֥י יֻסַּ֖ד עַל־הַסָּֽלַע : 26 וְכָל־הַשֹּׁמֵ֨עַ֨ דְּבָרַ֣י אֵ֔לֶּה וְאֵינֶנּ֥וּ עֹשֶׂ֖ה אֹתָ֑ם ה֗וּא יִדָּמֶה֨ לְאִ֣ישׁ סָכָ֔ל אֲשֶׁ֛ר בָּנָ֥ה בֵית֖וֹ עַל־הַחֽוֹל : 27 וַיֵּ֨רֶד הַגֶּ֜שֶׁם וַיָּב֣וֹאוּ הַנְּהָרִ֗ים וַיִּשְּׁבוּ֨ הָֽרוּח֔וֹת וַיִּפְגְּע֛וּ בַּבַּ֥יִת הַה֖וּא וַיִּפֹּ֑ל וַתְּהִ֥י מַפַּלְתּ֖וֹ גְּדוֹלָֽה : 28 וַיְהִי֨ כְּכַלּ֣וֹת יֵשׁ֔וּעַ אֵ֥ת הָֽאֲמָרִ֖ים הָאֵ֑לֶּה וַיִּשְׁתּֽוֹמְמ֥וּ הַֽהֲמוֹנִ֖ים עַל־לִקְחֽוֹ : 29 כִּ֗י הָיָה֨ מְלַמֵּ֣ד אֹתָ֔ם כְּאִ֕ישׁ אֲשֶׁ֥ר ל֖וֹ שָׁלְטָ֑ן וְלֹ֖א כַּסּֽוֹפְרִֽים :

לפרק הבא








להפעלת המסגרות
load frameset