לפרק הקודם

הבשורה על-פי מתי
פרק ט

ריפוי איש משותק

1 וַיֵּ֤רֶד בָּֽאֳנִיָּה֨ וַיַּֽעֲבֹ֔ר וַיָּבֹ֖א אֶל־עִירֽוֹ : 2 וְהִנֵּ֧ה הֵבִ֣יאוּ אֵלָ֗יו אִ֚ישׁ נְכֵ֣ה אֲבָרִ֔ים מֻשְׁכָּ֖ב עַל־מִטָּ֑ה וּבִרְא֨וֹת יֵשׁ֜וּעַ אֶת־אֱמֽוּנָתָ֗ם וַיֹּ֨אמֶר֨ אֶל־נְכֵ֣ה הָֽאֲבָרִ֔ים חֲזַ֣ק בְּנִ֔י נִסְלְח֥וּ לְךָ֖ חַטֹּאתֶֽיךָ : 3 וְ֠הִנֵּה אֲחָדִ֤ים מִן־הַסּֽוֹפְרִים֨ אָֽמְר֣וּ בְקִרְבָּ֔ם זֶ֥ה ה֖וּא מְגַדֵּֽף : 4 וַיֵּ֧דַע יֵשׁ֛וּעַ אֶת־מַחְשְׁבוֹתָ֖ם וַיֹּאמַ֑ר לָ֛מָּה תַּחְשְׁב֥וּ רָעָ֖ה בְּלִבּֽוֹתֵיכֶֽם : 5 כִּ֕י מָ֖ה נָקֵ֣ל יֶ֑תֶר אִ֤ם לֵאמֹר֨ נִסְלְח֣וּ חַטֹּאתֶ֔יךָ א֣וֹ לֵאמֹ֔ר ק֖וּם וְהִתְהַלֵּֽךְ : 6 אַךְ֩ לְמַ֨עַן תֵּֽדְע֜וּ כִּ֣י יֵ֧שׁ לְבֶן־הָֽאָדָ֛ם שָׁלְטָ֥ן בָּאָ֖רֶץ לִסְלֹ֣חַ חֲטָאִ֑ים אָ֗ז אָמַר֨ אֶל־נְכֵ֣ה הָֽאֲבָרִ֔ים ק֚וּמָה וְשָׂ֣א אֶת־מִטָּֽתְךָ֔ וְלֵ֖ךְ אֶל־בֵּיתֶֽךָ : 7 וַיָּ֕קָם וַיֵּ֥לֶךְ ל֖וֹ אֶל־בֵּיתֽוֹ : 8 וַיִּרְא֥וּ הַֽהֲמוֹנִ֖ים וַיִּשְׁתָּא֑וּ וַיְכַבְּדוּ֨ אֶת־הָֽאֱלֹהִ֔ים אֲשֶׁ֥ר נָתַ֛ן שָׁלְטָ֥ן כָּזֶ֖ה לִבְנֵ֥י הָֽאָדָֽם :

ישוע קורא למתי המוכס

9 וַיַּֽעֲבֹ֣ר יֵשׁוּעַ֘ מִשָּׁם֒ וַיַּ֗רְא אִ֥ישׁ אֶחָ֛ד יוֹשֵׁ֥ב בְּבֵֽית־הַמֶּ֖כֶס וּשְׁמ֣וֹ מַתְיָ֑א וַיֹּ֤אמֶר אֵלָיו֨ לֵ֣ךְ אַֽחֲרַ֔י וַיָּ֖קָם וַיֵּ֥לֶךְ אַֽחֲרָֽיו : 10 וַיְהִי֨ בַּֽהֲסִבּ֣וֹ בַבַּ֔יִת וְהִנֵּ֗ה מֽוֹכְסִ֛ים וְחַטָּאִ֥ים רַבִּ֖ים בָּ֑אוּ וַיָּסֵ֥בּוּ עִם־יֵשׁ֖וּעַ וְתַלְמִידָֽיו : 11 וּבִרְא֤וֹת הַפְּרוּשִׁים֨ וַיֹּֽאמְר֣וּ לְתַלְמִידָ֔יו לָ֚מָּה אֹכֵ֣ל מֽוֹרְכֶ֔ם עִ֥ם הַמּֽוֹכְסִ֖ים וְהַֽחַטָּאִֽים : 12 וַיִּשְׁמַ֥ע יֵשׁ֖וּעַ וַיֹּ֣אמֶר לָהֶ֑ם הַֽחֲזָקִ֗ים אֵי֣ן צֹ֤רֶךְ לָהֶם֨ לְרֹפֵ֔א כִּ֖י אִם־הַֽחוֹלִֽים : 13 וְאַתֶּ֗ם לְכ֤וּ לִמְדוּ֨ מַה־זֹּ֣את הִ֔יא חֶ֥סֶד חָפַ֖צְתִּי וְלֹ֣א זֶ֑בַח כִּ֗י לֹא־בָ֨אתִי לִקְרֹ֧א צַדִּיקִ֛ים כִּ֥י אִם־חַטָּאִ֖ים לִתְשׁוּבָֽה :

שאלה בעניין צום

14 וַיִּגְּשׁ֥וּ אֵלָ֛יו תַּלְמִידֵ֥י יֽוֹחָנָ֖ן לֵאמֹ֑ר לָ֜מָּה אֲנַ֤חְנוּ וְהַפְּרוּשִׁים֨ צָמִ֣ים הַרְבֵּ֔ה וְתַלְמִידֶ֖יךָ אֵינָ֥ם צָמִֽים : 15 וַ֣יֹּאמֶר אֲלֵהֶם֘ יֵשׁוּעַ֒ הֲיֽוּכל֨וּ בְנֵ֤י הַֽחֲתֻנָּה֨ לְהִתְאַבֵּ֔ל כּל־ע֖וֹד הֶֽחָתָ֣ן עִמָּהֶ֑ם אַ֚ךְ יָבֹ֣אוּ ימִ֔ים כַּֽ֠אֲשֶׁר יֻקַּ֥ח מֵהֶ֛ם הֶֽחָתָ֖ן וְאָ֥ז יָצֽוּמוּ : 16 אֵ֥ין אִ֗ישׁ שָׂ֤ם טְלָאָה֨ מִבֶּ֣גֶד חָדָ֔שׁ עַל֭ שִׂמְלָ֣ה יְשָׁנָ֑ה כִּ֗י מְלוֹאָהּ֨ יִשָּׂ֣א מִן־הַשִּׂמְלָ֔ה וְתֵרַ֥ע יוֹתֵ֖ר הַקְּרִיעָֽה : 17 גַּ֗ם אֵֽין־שָׂמִ֨ים יַ֤יִן חָדָשׁ֨ בְּנֹאד֣וֹת יְשָׁנִ֔ים אִם־לֹ֕א יִבָּֽקְע֧וּ הַנֹּאד֛וֹת וְיִשָּׁפֵ֥ךְ הַיַּ֖יִן וְהַנֹּאד֣וֹת יֹאבֵ֑דוּ כִּ֠י אִם־שָׂמִ֨ים יַ֤יִן חָדָשׁ֨ בְּנֹאד֣וֹת חֲדָשִׁ֔ים וּשְׁנֵיהֶ֥ם יַחְדָּ֖יו יִשָּׁמֵֽרוּ :

ריפוי האישה שנגעה בבגדו של ישוע ותחיית בתו של אחד הנכבדים

18 ע֠וֹד ה֨וּא מְדַבֵּר֣ אֲלֵיהֶם֮ אֶת־אֵלֶּה֒ וְהִנֵּה֩ מֹשֵׁ֨ל אֶחָ֜ד בָּ֗א וַיִּשְׁתַּח֚וּ לוֹ֨ לֵאמֹ֔ר בִּתִּ֛י עַתָּ֥ה זֶ֖ה מֵתָ֑ה אַ֣ךְ בֹּ֗א וְשִׂ֧ים יָֽדְךָ֛ עָלֶי֖הָ וְתִחְיֶֽה : 19 וַיָּ֥קָם יֵשׁ֖וּעַ וַיֵּ֣לֶךְ אַֽחֲרָ֑יו וְגַ֖ם תַּלְמִידָֽיו : 20 וְהִנֵּ֡ה אִשָּׁה֩ אֲשֶׁ֨ר הָֽיְתָ֜ה זָבַ֣ת דָּ֗ם שְׁתֵּי֤ם עֶשְׂרֵה֨ שָׁנָ֔ה נִגְּשָׁ֖ה מֵאַֽחֲרָ֑יו וַתִּגַּ֖ע בִּכְנַ֥ף בִּגְדּֽוֹ : 21 כִּ֥י אָֽמְרָ֖ה בְּקִרְבָּ֑הּ אִ֣ם אַ֥ךְ אֶגַּ֛ע בְּבִגְדּ֖וֹ אִוָּשֵֽׁעָה : 22 וַיִּ֣פֶן יֵשׁ֗וּעַ וְכִרְאוֹת֣וֹ אֹתָהּ֮ ויֹּאמַר֒ חִזְקִ֣י בִתִּ֔י אֱמֽוּנָתֵ֖ךְ הוֹשִׁ֣יעָה אֹתָ֑ךְ וַתֵּרָפֵא֨ הָֽאִשָּׁ֔ה מִ֖ן השָּׁעָ֥ה הַהִֽיא : 23 וּכְב֨וֹא יֵשׁ֜וּעַ אֶל־בֵּ֣ית הַמֹּשֵׁ֗ל וּבִרְאוֹתוֹ֙ אֶת־הַמְחוֹלְלִ֔ים וְאֶת־הֶֽהָמ֖וֹן נֹהֵֽם : 24 וַיֹּ֤אמֶר אֲלֵיהֶם֨ ס֣וּרוּ מִפֹּ֔ה כִּ֣י לֹ֥א מֵ֨תָה֨ הַנַּֽעֲרָ֔ה כִּ֖י אִם־יְשֵׁ֣נָה הִ֑יא וַיִּלְעֲג֖וּ לֽוֹ : 25 וְכַֽאֲשֶׁר֨ שֻׁלַּ֣ח הֶֽהָמ֔וֹן וַיָּבֹ֥א פְנִ֖ימָה וַיֹּאחַ֣ז בְּיָדָ֑הּ וַתָּ֖קָם הַנַּֽעֲרָֽה : 26 וַתֵּצֵא֨ הַשְּׁמוּעָ֣ה הַזֹּ֔את בְּכָל־הָאָ֖רֶץ הַהִֽיא :

ריפוי העיוורים והאילם

27 וְכַֽאֲשֶׁר֩ נָסַ֨ע יֵשׁ֜וּעַ מִשָּׁ֗ם וַיֵּֽלְכ֤וּ אַֽחֲרָיו֨ שְׁנֵ֣י עִוְרִ֔ים צֹֽעֲקִ֣ים וְאֹֽמְרִ֔ים רַחֵ֥ם עָלֵ֖ינוּ בֶּן־דָּוִֽד : 28 וּכְבֹא֣וֹ הַבַּ֗יְתָה וַיִּגְּשׁ֣וּ אֵלָיו֘ הָֽעִוְרִים֒ וַיֹּ֤אמֶר יֵשׁ֨וּעַ֨ אֲלֵיהֶ֔ם הֲמַֽאֲמִינִ֣ים אַתֶּ֔ם כִּ֥י אוּכַ֖ל לַֽעֲשׂ֣וֹת זֹ֑את וַיֹּֽאמְר֣וּ אֵלָ֔יו כֵּ֖ן אֲדֹנֵֽינוּ : 29 וַיִּגַּ֥ע בְּעֵֽינֵיהֶ֖ם וַיֹּאמַ֑ר כְּפִ֥י אֱמֽוּנַתְכֶ֖ם יְהִ֥י לָכֶֽם : 30 וַתִּפָּקַ֖חְנָה עֵֽינֵיהֶ֑ם וַיִּגְעַ֨ר בָּ֤ם יֵשׁ֨וּעַ֨ לֵאמֹ֔ר רְא֖וּ אַל־יֵ֥דַע אִֽישׁ : 31 אַ֥ךְ הֵ֨מָּה֨ כְּצֵאתָ֔ם הִשְׁמִ֥יעוּ אֶת־שִׁמְע֖וֹ בְּכָל־הָאָ֥רֶץ הַהִֽיא : 32 וְכַֽאֲשֶׁ֣ר יָֽצְא֔וּ וְ֠הִנֵּה הֵבִ֧יאוּ אֵלָ֛יו אִ֥ישׁ חֵרֵ֖שׁ אֲחֻ֥ז שֵֽׁד : 33 וְכַֽאֲשֶׁ֤ר גֹּרַשׁ֨ הַשֵּׁ֔ד דִּבֵּ֖ר הַֽחֵרֵ֑שׁ וַיִּתְמְה֤וּ הַֽהֲמוֹנִים֨ לֵאמֹ֔ר כִּ֧י מֵֽעוֹלָ֛ם לֹֽא־נִרְאָ֥ה כָ֖כָה בְּיִשְׂרָאֵֽל : 34 וַיֹּֽאָמְר֖וּ הַפְּרוּשִׁ֑ים עַל־יְדֵי֨ שַׂ֣ר הַשֵּׁדִ֔ים מְגָרֵ֥שׁ ה֖וּא אֶת־הַשֵּׁדִֽים : 35 וַיָּ֨סָב יֵשׁ֜וּעַ בְּכָל־הֶֽעָרִ֣ים וְהַכְּפָרִ֗ים וַיִלַמֵּד֨ בְּבָתֵּ֣י כְנֵסִיּֽוֹתֵיהֶ֔ם וַיִּקְרָ֖א אֶת־בְּשׂוֹרַ֣ת הַמַּלְכ֑וּת וַיִּרְפָּ֛א כָּל־מַֽחֲלָ֥ה וְכָל־מַדְוֶ֖ה בָּעָֽם : 36 וּבִרְאוֹתוֹ֨ אֶת־הַֽהֲמוֹנִ֔ים וַיִּכָּֽמְר֥וּ רַֽחֲמָ֖יו עֲלֵיהֶ֑ם כִּ֣י הָי֤וּ עֲיֵפִים֨ וּנְפוֹצִ֔ים כְּצֹּ֕אן אֲשֶׁ֥ר אֵֽין־לָהֶ֖ם רֹעֶֽה : 37 וַיֹּ֖אמֶר אֶל־תַּלְמִידָ֑יו אָכֵן֨ הַקָּצִ֣יר רַ֔ב וְהַפֹּֽעֲלִ֖ים מְעַטִּֽים : 38 לָכֵ֗ן הַעְתִּ֨ירוּ֨ לַֽאֲד֣וֹן הַקָּצִ֔יר כִּ֛י יְּשַׁלַּ֥ח פֹּֽעֲלִ֖ים לִקְצִירֽוֹ :

לפרק הבא








להפעלת המסגרות
load frameset