לפרק הקודם

הבשורה על-פי מתי
פרק י

ישוע שולח את שנים-עשר השליחים

1 וַיִּקְרָ֣א אֵלָ֔יו אֶת־שְׁנֵ֥ים עָשָׂ֖ר תַּלְמִידָ֑יו וַיִּתֵּן֩ לָהֶ֨ם שָׁלְטָ֜ן עַל־רוּח֤וֹת הַטֻּמְאָה֨ לְגָרֵ֣שׁ אֹתָ֔ן וְלִרְפֹּ֥א כָל־מַֽחֲלָ֖ה וְכָל־מַדְוֶֽה : 2 וְאֵ֕לֶּה שְׁמ֖וֹת שְׁנֵֽים-עָשָׂ֣ר הַשְּׁלִיחִ֑ים הָֽרִאשׁ֗וֹן שִׁמְע֨וֹן הַמְּכֻנֶּ֤ה פֶטְרוֹס֨ וְאַנְדְּרֵעַ֣ס אָחִ֔יו יַֽעֲקֹ֥ב בֶּן־זַבְדַּ֖י וְיֽוֹחָנָ֥ן אָחִֽיו : 3 פִּֽילִפּוֹס֨ וּבַר־תַּלְמַ֔י תּוֹמָ֖א וּמַתְיָ֣א הַמּוֹכֵ֑ס יַֽעֲקֹב֨ בֶּן־אַלְפַּ֔י וְלַבַּ֖י הַמְּכֻנֶּ֥ה תַדָּֽי : 4 שִׁמְעוֹ֙ן הַקַּנָּאִ֔י וִיֽהוּדָ֖ה אִֽישׁ־קְרִיּ֑וֹת אֲשֶׁ֖ר גַּם־הִסְגִּ֥יר אֹתֽוֹ : 5 אֶת־שְׁנֵ֧ים הֶֽעָשָׂ֛ר אֵ֖לֶּה שִׁלַּ֣ח יֵשׁ֑וּעַ וַיְצַ֨ו אֹתָ֜ם לֵאמֹ֗ר אֶל־דֶּ֤רֶךְ הַגּוֹיִם֨ אַל־תֵּ֣לְכ֔וּ וְאֶל־עִ֥יר שֽׁוֹמְרֹנִ֖ים אַל־תָּבֹֽאוּ : 6 אַ֚ךְ לְכ֣וּ בְיוֹתֵ֔ר אֶל־צֹ֥אן בֵּֽית־יִשְׂרָאֵ֖ל הָאֹֽבְדֽוֹת : 7 וּבְלֶכְתְּכֶ֖ם קִרְא֣וּ לֵאמֹ֑ר כִּ֥י קָֽרְבָ֖ה מַלְכ֥וּת הַשָּׁמָֽיִם : 8 רִפְא֨וּ אֶת־הַֽחוֹלִ֜ים טַֽהֲר֤וּ אֶת־הַמְּצֹֽרָעִים֨ הָקִ֣ימוּ אֶת־הַמֵּתִ֔ים גָּֽרְשׁ֖וּ אֶת־הַשֵּׁדִ֑ים חִנָּ֣ם לְקַחְתֶּ֔ם חִנָּ֖ם תֵּֽנוּ : 9 אַל־תִּקְנ֗וּ לֹ֣א זָהָ֧ב וְלֹא־כֶ֛סֶף וְלֹ֥א נְחֹ֖שֶׁת בַּֽאֲזֹרֵיכֶֽם : 10 וְלֹֽא־יַלְק֣וּט לַדֶּ֗רֶךְ וְלֹא֨ שְׁתֵּ֣י כֻתֳּנ֔וֹת וְלֹ֥א נְעָלִ֖ים וְלֹ֣א מַטֶּ֑ה כִּ֛י שֹׁוֶ֥ה הַפֹּעֵ֖ל בְּאָכְלֽוֹ : 11 וּבְכָל־עִ֤יר וְכָפָר֨ אֲשֶׁ֣ר תָּבֹ֣אוּ שָׁ֔מָּה דִּרְשׁ֕וּ מִ֥י ה֛וּא שֹׁוֶ֖ה בָּ֑הּ וְשָׁ֥ם שְׁב֖וּ עַ֥ד כִּֽי־תֵצֵֽאוּ : 12 וּבְבֹֽאֲכֶ֖ם אֶל־הַבָּ֑יִת שַֽׁאֲל֥וּ ל֖וֹ לְשָׁלֽוֹם : 13 וְאִ֤ם הַבַּ֙יִת֙ יִהְיֶ֣ה שֹׁוֶ֔ה יָב֥וֹא שְׁלֽוֹמְכֶ֖ם עָלָ֑יו וְאִם֨ לֹֽא־יִהְיֶ֣ה שֹׁוֶ֔ה שְׁלֽוֹמְכֶ֖ם אֲלֵיכֶ֥ם יָשֽׁוּב : 14 וְכֹ֗ל אֲשֶׁר֨ לֹֽא־יְקַבֵּ֣ל אֶתְכֶ֔ם וְלֹ֥א יִשְׁמַ֖ע אֶת־דִּבְרֵיכֶ֑ם בְּצֵֽאתְכֶ֗ם מִן־הַבַּ֤יִת הַהוּא֨ א֣וֹ מִן־הָעִ֣יר הַהִ֔יא נַעֲר֥וּ מִכֶּ֖ם אֶת־עֲפַ֥ר רַגְלֵיכֶֽם : 15 אָמְנָ֕ם אֲנִ֖י אֹמֵ֣ר לָכֶ֑ם יֵקַל֩ לְאֶ֨רֶץ סְדֹ֧ם וַֽעֲמֹרָ֛ה בְּי֥וֹם הַמִּשְׁפָּ֖ט מִלָּעִ֥יר הַהִֽיא :

רדיפות צפויות לשליחים

16 הִנֵּ֗ה אָֽנֹכִי֨ מְשַׁלֵּ֣חַ אֶתְכֶ֔ם כְּצֹ֖אן בְּת֣וֹךְ זְאֵבִ֑ים לָכֵ֗ן הֳי֤וּ עֲרוּמִים֨ כַּנְּחָשִׁ֔ים וּתְמִימִ֖ים כַּיּוֹנִֽים : 17 אַ֕ךְ הִשָּֽׁמְר֖וּ מִפְּנֵ֣י הָֽאֲנָשִׁ֑ים כִּֽי־יַסְגִּי֤רוּ אֶתְכֶם֨ אֶל־בָּתֵּ֣י דִינִ֔ים וִֽייַסּר֥וּ אֶתְכֶ֖ם בְּבָתֵּ֥י כְנֵסִיּֽוֹתֵיהֶֽם : 18 וְלִפְנֵ֨י מֹֽשְׁלִ֧ים וּמְלָכִ֛ים תּֽוּבְא֖וּ לְמַֽעֲנִ֑י לְעֵד֥וּת בָּהֶ֖ם וּבַגּוֹיִֽם : 19 וְכַֽאֲשֶׁר֨ יַסְגִּ֣ירוּ אֶתְכֶ֔ם לֹ֣א תִדְאֲג֔וּ אֵ֥יךְ אוֹ־מָ֖ה תְּדַבֵּ֑רוּ כִּ֣י יִנָּתֵ֤ן לָכֶם֨ בַּשָּׁעָ֣ה הַהִ֔יא מָ֖ה אֲשֶׁ֥ר תְּדַבֵּֽרוּ : 20 כִּ֛י לֹ֥א אַתֶּ֖ם הַמְדַבְּרִ֑ים כִּ֛י אִם־ר֥וּחַ אֲבִיכֶ֖ם הַדֹּבֵ֥ר בָּכֶֽם : 21 וְיַסְגִּ֨יר אָ֤ח אֶת־אָחִיו֨ לַמָּ֔וֶת וְאָ֖ב אֶת־בְּנ֑וֹ וְיָק֧וּמוּ בָנִ֛ים עַל־יֽוֹלְדֵיהֶ֖ם וְיָמִ֥יתוּ אוֹתָֽם : 22 וְתִהְי֧וּ שְׂנוּאִ֛ים לַכֹּ֖ל לְמַ֣עַן שְׁמִ֑י אַ֗ךְ הַמְּיַהֵל֨ עַד־הַקֵּ֔ץ ה֖וּא יִוָּשֵֽׁעַ : 23 וְאִם־יִרְדְּפ֤וּ אֶתְכֶם֨ בָּעִ֣יר הַזֹּ֔את נ֖וּסוּ אֶל־אַחֶ֑רֶת כִּ֤י אָמְנָם֨ אֲנִ֣י אֹמֵ֣ר לָכֶ֔ם לֹ֤א תְכַלּוּ֨ אֶת־עָרֵ֣י יִשְׂרָאֵ֔ל עַ֥ד כִּֽי־יָּב֖וֹא בֶּן-הָֽאָדָֽם : 24 הַתַּלְמִ֕יד אֵינֶ֥נּוּ לְמַ֖עְלָה מִמּוֹרֵ֑הוּ גַּם־לֹ֥א הָעֶ֖בֶד לְמַ֥עְלָה מֵֽאֲדוֹנָֽיו : 25 דַּ֤י לַתַּלְמִיד֨ כִּֽי־יִּהְיֶ֣ה כְמוֹרֵ֔הוּ וְהָעֶ֖בֶד כַּֽאֲדֹנָ֑יו אִ֣ם לַֽאֲד֤וֹן הַבַּ֨יִת֨ קָֽרְא֣וּ בַֽעַל־זְב֔וּב אַ֖ף כִּֽי־לְאַנְשֵׁ֥י בֵיתֽוֹ :

ממי לפחוד

26 לָכֵ֖ן אַל־תֵּירְא֣וּ מֵהֶ֑ם כִּ֗י אֵי֣ן דָּבָ֤ר מְכֻסֶּה֨ אשֶׁ֣ר לֹֽא־יִגָּלֶ֔ה וְאֵ֣ין נֶעְלָ֗ם אֲשֶׁ֖ר לֹ֥א יִוָּדֵֽעַ : 27 אֵ֣ת אֲשֶׁר֩ אָֽנֹכִ֨י אֹמֵ֥ר לָכֶ֛ם בַּחֹ֖שֶׁךְ דַּבְּר֣וּ בָא֑וֹר וְאֵת֩ אֲשֶׁ֨ר אַתֶּ֧ם שֹֽׁמְעִ֛ים בָּאֹ֖זֶן הַשְׁמִ֥יעוּ עַל־הַגַּגּֽוֹת : 28 וְאַל־תִּֽירְא֗וּ מִן־הַהֹֽרְגִים֨ אֶת־הַגְּוִיָּ֔ה וְאֶת־הַנֶּ֛פֶשׁ אֵינָ֥ם יְכֹלִ֖ים לַֽהֲרֹ֑ג כִּ֚י אִם־יִרְ֣אוּ ביוֹתֵ֔ר אֶת־הַיָּ֣כוֹל לְאַבֵּ֗ד גַּ֧ם אֶת־הַנֶּ֛פֶשׁ וְגַ֥ם אֶת־הַגּויָּ֖ה בְּגֵֽיהִנֹּֽם : 29 הַאִ֨ם לֹ֧א תִמָּכַ֛רְנָה שְׁתֵּ֥י צִפֳּרִ֖ים בְּאִסָּ֑ר וְאַחַ֣ת מִהֵ֗ן לֹ֤א תִּפֹּל֨ עַל־הָאָ֔רֶץ מִבַּלְעֲדִ֖י אֲבִיכֶֽם : 30 וְגַ֨ם שַֽׂעֲר֧וֹת רֹֽאשְׁכֶ֛ם כֻּלָּ֖ן נִמְנ֥וֹת הֵֽנָּה : 31 לָכֵ֖ן אַל־תִּירָ֑אוּ יְקָרִ֣ים אַתֶּ֔ם מִצִּפֳּרִ֖ים רַבּֽוֹת :

הודאה לעומת התכחשות; פילוג ולא שלום

32 לָכֵ֗ן כָּל־אִ֞ישׁ אֲשֶׁ֨ר יוֹדֶ֥ה בִי֨ לִפְנֵ֣י בְנֵי־הָֽאָדָ֔ם אוֹדֶ֨ה ב֧וֹ גַם־אָֽנֹכִ֛י לִפְנֵ֥י אָבִ֖י אֲשֶׁ֥ר בַּשָּׁמָֽיִם : 33 וּמִ֗י אֲשֶׁר֨ יְכַחֵ֣שׁ בִּ֔י לִפְנֵ֖י בְּנֵ֣י הָֽאָדָ֑ם אֲכַחֵ֨שׁ בּ֧וֹ גַם־אָֽנֹכִ֛י לִפְנֵ֥י אָבִ֖י אֲשֶׁ֥ר בַּשָּׁמָֽיִם : 34 אַ֨ל־תַּחְשְׁב֔וּ כִּ֥י בָ֛אתִי לְשַׁלַּ֥ח שָׁלוֹ֖ם בָּאָ֑רֶץ לֹא־בָ֨אתִי֨ לְשַׁלַּ֣ח שָׁל֔וֹם כִּ֖י אִם־חָֽרֶב : 35 כִּ֥י בָ֨אתִי֨ לְהַפְרִ֔יד בֵּ֥ין אִ֖ישׁ לְאָבִ֑יו וּבֵ֥ין בַּת֨ לְאִמָּ֔הּ וּבֵ֥ין כַּלָּ֖ה לַֽחֲמֹתָֽהּ : 36 וְאֹֽיְבֵ֥י הָאִ֖ישׁ אַנְשֵׁ֥י בֵיתֽוֹ : 37 הָֽאֹהֵ֨ב אֶת־אָבִ֤יו וְאֶת־אִמּוֹ֨ יוֹתֵ֣ר מִמֶּ֔נִּי אֵינֶנּ֥וּ שֹׁוֶ֖ה לִ֑י וְהָֽאֹהֵ֨ב אֶת־בְּנ֤וֹ וְאֶת־בִּתּוֹ֨ יוֹתֵ֣ר מִמֶּ֔נִּי אֵינֶ֥נּוּ שֹׁוֶ֖ה לִֽי : 38 וַֽאֲשֶׁר֩ לֹ֨א יִקַּ֤ח אֶת־צְלָבוֹ֨ וְיֵלֵ֣ךְ אַֽחֲרַ֔י אֵינֶ֥נּוּ שֹׁוֶ֖ה לִֽי : 39 הַמּוֹצֵ֥א אֶת־נַפְשׁ֖וֹ יְאַבְּדֶ֑נָּה וְהַמְּאַבֵּ֧ד אֶת־נַפְשׁ֛וֹ לְמַֽעֲנִ֖י יִמְצָאֶֽנָּה :

שכר

40 הַמְּקַבֵּ֣ל אֶתְכֶ֔ם אֹתִ֖י ה֣וּא מְקַבֵּ֑ל וְהַמְּקַבֵּ֣ל אֹתִ֔י ה֥וּא מְקַבֵּ֖ל אֶת־הַשֹּׁלֵ֥חַ אֹתִֽי : 41 הַמְּקַבֵּ֤ל נָבִיא֨ בְּשֵׁ֣ם נָבִ֔יא שְׂכַ֥ר נָבִ֖יא יְקָּ֑ח וְהמְּקַבֵּ֤ל צַדִּיק֨ בְּשֵׁ֣ם צַדִּ֔יק שְׂכַ֥ר צַדִּ֖יק יִקָּֽח : 42 וְכֹ֩ל אֲשֶׁ֨ר יַשְׁקֶ֜ה אֶת־אַחַ֣ד ׀ הַקְּטַנִּ֣ים הָאֵ֗לֶּה אַ֛ךְ כּ֥וֹס קָרִ֖ים בְּשֵׁ֣ם תַּלְמִ֑יד אָמְנָם֨ אֲנִ֣י אֹמֵ֣ר לָכֶ֔ם לֹ֥א יְאַבֵּ֖ד אֶת־שְׂכָרֽוֹ :

לפרק הבא








להפעלת המסגרות
load frameset