לפרק הקודם

הבשורה על-פי מתי
פרק יג

משל הזורע

1 בַּ֣יּוֹם הַה֔וּא יָצָ֥א יֵשׁ֖וּעַ מִן־הַבַּ֑יִת וַיֵּ֖שֶׁב עַל־שְׂפַ֥ת הַיָּֽם : 2 וַיִּקָּֽהֲל֤וּ אֵלָיו֨ הֲמוֹנִ֣ים רַבִּ֔ים עַ֛ד כִּֽי־יָרַ֥ד בָּֽאֳנִיָּ֖ה וַיֵּשֵׁ֑ב וְכָ֨ל־הֶֽהָמ֔וֹן עֹמֵ֖ד עַל־ח֥וֹף הַיָּֽם : 3 וַיְדַבֵּ֨ר אֲלֵיהֶ֥ם רַבּ֛וֹת בִּמְשָׁלִ֖ים לֵאמֹ֑ר הִנֵּ֕ה יָצָ֥א הַזּוֹרֵ֖עַ לִזְרֽוֹעַ : 4 וּבְזָרְע֕וֹ אֲחָדִ֥ים נָֽפְל֖וּ עַל־יַ֣ד הַדָּ֑רֶךְ וַיָּבֹ֥א הָע֖וֹף וַיֹּ֥אכַל אֹתָֽם : 5 וַֽאַחֵרִ֤ים נָֽפְלוּ֨ עַל־מְקוֹמ֣וֹת הַסֶּ֔לַע בַּֽאֲשֶׁ֛ר לֹא־הָֽיְתָ֥ה לָהֶ֖ם אֲדָמָ֣ה הַרְבֵּ֑ה וּכְרֶ֣גַע צָֽמְח֔וּ מִבְּלִ֛י הֱי֥וֹת לָהֶ֖ם עֹ֥מֶק אֲדָמָֽה : 6 וְכַֽאֲשֶׁ֛ר זָֽרְחָ֥ה הַשֶּׁ֖מֶשׁ וַיֵּחָ֑רוּ וּמִבְּלִ֨י הֱי֥וֹת לָהֶ֛ם שֹׁ֖רֶשׁ יָבֵֽשׁוּ : 7 וַֽאֲחֵרִ֥ים נָֽפְל֖וּ בֵּ֣ין הַקּוֹצִ֑ים וַיַּֽעֲלוּ֨ הַקּוֹצִ֔ים וַיְחַנְּק֖וּ אֹתָֽם : 8 וַֽאֲחֵרִ֣ים נָֽפְל֔וּ עַ֖ל הָֽאֲדָמָ֣ה הַטּוֹבָ֑ה וַיִּתְּנ֣וּ פְרִ֔י זֶ֣ה ׀ מֵאָ֣ה שְׁעָרִ֗ים וְזֶה֨ שִׁשִּׁ֣ים שְׁעָרִ֔ים וְזֶ֖ה שְׁלֹשִׁ֥ים שְׁעָרִֽים : 9 מִ֗י אֲשֶׁ֥ר יֵֽשׁ־ל֛וֹ אָזְנַ֥יִם לִשְׁמֹ֖עַ יִשְׁמָֽע :

מטרת המשלים

10 וַיִּגְּשׁ֥וּ הַתַּלְמִידִ֖ים וַיֹּֽאמְר֣וּ אֵלָ֑יו לָ֗מָּה אַתָּ֛ה מְדַבֵּ֥ר אֲלֵיהֶ֖ם בִּמְשָׁלִֽים : 11 וַיַּ֖עַן וַיֹּ֣אמֶר אֲלֵיהֶ֑ם יַ֠עַן לָכֶ֨ם נִתַּ֜ן לָדַ֗עַת אֶת־סוֹדוֹת֨ מַלְכ֣וּת הַשָּׁמַ֔יִם וְלָהֶ֖ם לֹ֥א נִתָּֽן : 12 כִּ֗י כֹּ֤ל אֲשֶׁ֣ר יֵּ֣שׁ ל֔וֹ יִנָּ֥תֶן ל֖וֹ וְיַעְדִּ֑יף וּמִי֨ אֲשֶׁ֣ר אֵֽין־ל֔וֹ גַּ֗ם אֵ֛ת אֲשֶׁ֥ר יֶשׁ־ל֖וֹ יֻקַּ֥ח מִמֶּֽנּוּ : 13 עַל־כֵּ֔ן אֲנִ֛י מְדַבֵּ֥ר אֲלֵיהֶ֖ם בִּמְשָׁלִ֑ים יַ֗עַן בִּרְאוֹתָם֨ אֵינָ֣ם רֹאִ֔ים וּבְשָׁמְעָם֨ אֵינָ֣ם שֹֽׁמְעִ֔ים וְגַ֖ם אֵינָ֥ם מְבִינִֽים : 14 וּבָהֶ֧ם הִתְמַלְּאָ֛ה נְבוּאַ֥ת יְשַׁעְיָ֖הוּ הָֽאֹמָ֑רֶת שִׁמְע֤וּ שָׁמ֨וֹעַ֨ וְאַל־תָּבִ֔ינוּ וּרְא֥וּ רָא֖וֹ וְאַל־תֵּדָֽעוּ : 15 כִּ֗י שָׁמֵן֨ לֵ֚ב הָעָ֣ם הַזֶּ֔ה וְאָזְנֵיהֶם֨ הִכְבִּ֣ידוּ מִשְּׁמ֔וֹעַ וְעֵֽינֵיהֶ֖ם הֵשָׁ֑עוּ פֶּן־יִרְא֨וּ בְעֵֽינֵיהֶ֜ם וּבְאָזְנֵיהֶ֣ם יִשְׁמְע֗וּ וּבִלְבָבָ֥ם יָבִ֛ינוּ וְשָׁב֖וּ וְאֶרְפָּאֵֽם : 16 אַ֕ךְ אַשְׁרֵ֥י עֵֽינֵיכֶ֖ם כִּ֥י רֹא֑וֹת וְאָזְנֵיכֶ֖ם כִּ֥י שֹֽׁמְעֽוֹת : 17 כִּ֚י אָמְנָ֔ם אֲנִ֖י אֹמֵ֣ר לָכֶ֑ם כִּ֡י נְבִיאִ֣ים וְצַדִּיקִ֣ים רַ֠בִּים אִוּ֨וּ לִרְא֜וֹת אֵ֠ת אֲשֶׁ֨ר אַתֶּ֤ם רֹאִים֨ וְלֹ֣א רָא֔וּ וְלִשְׁמֹ֗עַ אֵ֛ת אֲשֶׁר־אַתֶּ֥ם שֹֽׁמְעִ֖ים וְלֹ֥א שָׁמֵֽעוּ :

פשר משל הזורע

18 לָכֵן֨ שִׁמְע֣וּ אַתֶּ֔ם אֵ֖ת מְשַׁ֥ל הַזֹּרֵֽעַ : 19 כֹּ֣ל אֲשֶׁ֣ר יִשׁמַע֩ אֶת־דְּבַ֨ר הַמַּלְכ֜וּת וְלֹ֣א יָבִ֗ין יָבוֹא֨ הָרָ֔ע וְיַחְטֹ֕ף אֶ֛ת אֲשֶׁ֥ר נִזְרַ֖ע בִּלְבָב֑וֹ זֶ֣ה ה֔וּא הַנִּזְרָ֖ע עַל־יַד֥ הַדָּֽרֶךְ : 20 וְהַנִּזְרָ֖ע עַל־מְקוֹמ֣וֹת הַסָּ֑לַע זֶ֣ה ה֗וּא הַשֹּׁמֵ֨עַ֨ אֶת־הַדָּבָ֔ר וּכְרֶ֛גַע מְקַבֵּ֥ל אֹת֖וֹ בְּשִׂמְחָֽה : 21 אַ֗ךְ אֵֽין־ל֥וֹ שֹׁ֨רֶשׁ֨ בְּעַצְמ֔וֹ כִּ֖י אִם־זְמַנִּ֣י ה֑וּא אַ֡ךְ בִּהְיוֹת֩ צָרָ֨ה א֤וֹ רְדִיפָה֨ בִּגְלַ֣ל הַדָּבָ֔ר כְּרֶ֖גַע ה֥וּא נִכְשָֽׁל : 22 וְהַנִּזְרָע֨ בֵּ֣ין הַקּוֹצִ֔ים זֶ֣ה ה֔וּא הַשּׁוֹמֵ֖עַ אֶת־הַדָּבָ֑ר וְדַֽאַגַ֣ת ׀ הָֽעוֹלָ֣ם הַזֶּ֗ה וְהַדָּחַ֥ת הָעֹ֛שֶׁר מְחַנְּקָ֥ה אֶת־הַדָּבָ֖ר וּבְלִֽי־פְרִ֥י יהְיֶֽה : 23 וְהַנִּזְרָע֨ עַל־הָֽאֲדָמָ֣ה הַטּוֹבָ֔ה זֶ֥ה ה֛וּא הַשֹּׁמֵ֥עַ אֶת־הַדָּבָ֖ר וּמֵבִ֑ין וְה֣וּא נֹשֵׂ֣א פְ֠רִי וְעֹשֶׂ֞ה זֶ֣ה ׀ מֵאָ֣ה שְׁעָרִ֗ים וְזֶה֨ שִׁשִּׁ֣ים שְׁעָרִ֔ים וְזֶ֖ה שְׁלֹשִׁ֥ים שְׁעָרִֽים :

משל החיטים והעשבים הרעים

24 מָשָׁ֣ל אַחֵ֛ר שָׂ֥ם לִפְנֵיהֶ֖ם לֵאמֹ֑ר דָּֽמְתָה֨ מַלְכ֣וּת הַשָּׁמַ֔יִם לְאִ֗ישׁ זֹרֵ֛עַ זֶ֥רַע ט֖וֹב בְּשָׂדֵֽהוּ : 25 וּבִשׁ֖וֹן הָֽאֲנָשִׁ֑ים בָּ֣א אֽוֹב֗וֹ וַיִּזְרַ֥ע זוֹנִ֛ין בֵּ֥ין הַֽחִטִּ֖ים וַיֵּ֥לֶךְ לֽוֹ : 26 וְכַֽאֲשֶׁ֛ר צָמַ֥ח הָעֵ֖שֶׂב וְעָ֣שָׂה פֶּ֑רִי אָ֥ז נִרְא֖וּ גַּ֥ם הַזּוֹנִֽין : 27 וַיִּגְּשׁ֛וּ עַבְדֵ֥י בַֽעַל־הַבַּ֖יִת וַיֹּֽאמְר֣וּ אֵלָ֑יו אֲדֹנִ֗י הַֽאִם־לֹ֨א זֶ֤רַע טוֹב֨ זָרַ֣עְתָּ בְשָׂדֶ֔ךָ מֵאַ֧יִן אֵפ֛וֹא יֵ֥שׁ ל֖וֹ הַזּוֹנִֽין : 28 וַיֹּ֨אמֶר֨ אֲלֵיהֶ֔ם אִ֥ישׁ אוֹיֵ֖ב עָ֣שָׂה זֹּ֑את וַיֹּֽאמְר֨וּ אֵלָ֜יו הָֽעֲבָדִ֗ים הֲתַחְפֹּץ֨ אֵפ֔וֹא כִּ֥י נֵלֵ֖ךְ וּנְלַקֵּ֥ט אֹתָֽם : 29 וַיֹּ֖אמֶר לֹ֑א פֶּ֗ן בְּלַקֶּטְכֶם֨ אֶת־הַזּוֹנִ֔ין תְּשָֽׁרְשׁ֥וּ אֶת־הַֽחִטִּ֖ים עִמָּהֶֽם : 30 הַנִּ֣יחוּ אֶת־שְׁנֵיהֶ֗ם לִגְדַּ֣ל יַחְדָּיו֘ עַד־הַקָּצִיר֒ וּבְעֵ֨ת הַקָּצִ֜יר אֹמַ֣ר אֶל־הַקֹּֽצְרִ֗ים לַקְּט֤וּ בָרִֽאשֹׁנָה֨ אֶת־הַזּוֹנִ֔ין וְאִגְד֥וּ אֹתָ֛ם אֲגֻדּ֖וֹת לְשָׂרְפָ֑ם וְאֶ֨ת־הַֽחִטִּ֔ים אִסְפ֖וּ לַֽאֲסָמִֽי :

משלים על גרגיר החרדל ועל השאור

31 מָשָׁ֥ל אַחֵ֛ר שָׂ֥ם לִפְנֵיהֶ֖ם לֵאמֹ֑ר דֹּמָ֞ה מַלְכ֤וּת הַשָּׁמַ֨יִם֨ לְגַרְגַּ֣ר חַרְדָּ֔ל אֲשֶׁ֥ר אִ֛ישׁ לָקַ֖ח וְזָרַ֥ע בְּשָׂדֵֽהוּ : 32 אֲשֶׁ֛ר ה֥וּא קָטֹ֖ן מִכָּל־הַזְּרָעִ֑ים אַךְ֩ כַּֽאֲשֶׁ֨ר גָּדַ֜ל גָּד֥וֹל הוּא֨ מִכָּל־הַיְּרָק֔וֹת וְנִהְיֶ֣ה לְעֵ֔ץ עַ֥ד לְב֛וֹא ע֥וֹף הַשָּׁמַ֖יִם וּלְקַנֵּ֥ן בַּֽעֲנָפָֽיו : 33 מָשָׁ֥ל אַחֵ֖ר דִּבֶּ֣ר אֲלֵיהֶ֑ם דֹּמָ֞ה מַלְכ֤וּת הַשָּׁמַ֨יִם֨ לִשְׂאֹ֔ר אֲשֶׁר֩ אִשָּׁ֨ה לָֽקְחָ֜ה וְטָֽמְנָ֤ה אֹתוֹ֨ בִּשְׁלֹ֣שׁ סְאִ֣ים קֶ֔מַח עַ֥ד כִּֽי־חָמֵ֖ץ הַכֹּֽל : 34 אֶת־כָּל־אֵ֗לֶּה דִּבֶּ֥ר יֵשׁ֛וּעַ בִּמְשָׁלִ֖ים אֶל־הַֽהֲמוֹנִ֑ים וּבִבְלִ֣י מָשָׁ֔ל לֹ֥א דִּבֵּ֖ר אֲלֵיהֶֽם : 35 לְמַ֣עַן יִמָּלֵ֔א הַנֶּֽאֱמָ֛ר בְּפִ֥י הַנָּבִ֖יא לֵאמֹ֑ר אֶפְתְּחָ֤ה בְמָשָׁ֙ל פִּ֔י אַבִּ֣יעָה נִסְתָּר֔וֹת מִנִּ֖י הִוָּסֵ֥ד הַתֵּבֵֽל :

פשר משל החיטים והעשבים הרעים

36 אָ֠ז עָזַ֤ב יֵשׁ֨וּעַ֨ אֶת־הַֽהֲמוֹנִ֔ים וַיָּבֹ֖א אֶל־הַבָּ֑יִת וַיִּגְּשׁ֨וּ אֵלָ֤יו תַּלְמִידָיו֨ וְיֹּ֣אמְר֔וּ הָבִ֣ינָה לָּ֔נוּ אֶת־מְשַׁ֖ל זוֹנֵ֥י הַשָּׂדֶֽה : 37 וַיַּ֖עַן וַיֹּ֣אמֶר אֲלֵיהֶ֑ם הַזֹּרֵ֨עַ֨ אֶת־הַזֶּ֣רַע הַטּ֔וֹב ה֖וּא בֶּן־הָֽאָדָֽם : 38 וְהַשָּׂדֶ֖ה ה֣וּא הַתֵּבֵ֑ל וְהַזֶּ֣רַע הַטּ֗וֹב בְּנֵ֤י הַמַּלְכוּת֨ הֵ֔מָּה וְהָזּוֹנִ֕ין בְּנֵ֥י הָרָ֖ע הֵֽמָּה : 39 וְהָֽאוֹיֵב֨ הַזֹּרֵ֣עַ אֹתָ֔ם ה֖וּא הַשָּׂטָ֑ן וְהַקָּצִ֗יר ה֤וּא קֵ֣ץ הָֽעוֹלָ֔ם וְהַ֣קּוֹצְרִ֔ים הֵ֖מָּה הַמַּלְאָכִֽים : 40 לָכֵ֗ן כַּֽאֲשֶׁ֧ר הַזּוֹנִ֛ים מְלֻקָּטִ֖ים וְנִשְׂרָפִ֣ים בָּאֵ֑שׁ כֵּ֣ן יִהְיֶ֔ה בְּקֵ֖ץ הָֽעוֹלָ֥ם הַזֶּֽה : 41 יִשְׁלַ֥ח בֶּן־הָֽאָדָ֖ם אֶת־מַלְאָכָ֑יו וִֽילַקְּטוּ֨ מִמַּלְכוּת֔וֹ כָּל־הַמִּכְשֹׁלִ֖ים וּפֹֽעֲלֵ֥י הָאָֽוֶן : 42 וְיַשְׁלִ֥יכוּ אֹתָ֖ם אֶל־כִּבְשַׁ֣ן הָאֵ֑שׁ שָׁ֣ם יִהְיֶ֔ה בְּכִ֖י וַֽחֲרִיקַ֥ת שִּׁנָּֽיִם : 43 אָ֗ז יַזְהִ֧ירוּ הַצַּדִּיקִ֛ים כַּשֶּׁ֖מֶשׁ בְּמַלְכ֣וּת אֲבִיהֶ֑ם מִ֣י אֲשֶׁ֥ר יֵֽשׁ־ל֛וֹ אָזְנַ֥יִם לִשְׁמֹ֖עַ יִשְׁמָֽע :

שלושה משלים

44 ע֠וֹד דֹּמָ֞ה מַלְכ֣וּת הַשָּׁמַ֗יִם לְאוֹצָר֨ טָמ֣וּן בַּשָּׂדֶ֔ה אֲשֶׁ֛ר מְצָאָ֥הוּ אִ֖ישׁ וְהִסְתִּר֑וֹ וּמִשִּׂמְחָת֗וֹ ה֣וּא הֹלֵ֤ךְ וּמֹכֵר֨ אֶ֣ת כָּל־אֲשֶׁ֣ר יֶשׁ־ל֔וֹ וְקֹנֶ֖ה אֶת־הַשָּׂדֶ֥ה הַהֽוּא : 45 ע֕וֹד דֹּמָ֖ה מַלְכ֣וּת הַשָּׁמָ֑יִם לְאִ֣ישׁ סוֹחֵ֔ר הַמְּבַקֵּ֖שׁ מַרְגָּלִיּ֥וֹת טוֹבֽוֹת : 46 וְכַֽאֲשֶׁ֣ר מָצָ֔א מַרְגָּלִ֥ית אַחַ֖ת יְקָרָ֣ה מְאֹ֑ד הָלַ֕ךְ וּמָכַ֗ר אֵ֛ת כָּל־אֲשֶׁ֥ר יֶשׁ־ל֖וֹ וְקָנָ֥ה אֹתָֽהּ : 47 ע֕וֹד דֹּמָ֖ה מַלְכ֣וּת הַשָּׁמָ֑יִם לְמִכְמֶ֨רֶת֨ הַמֻּשְׁלָכָ֣ה בַיָּ֔ם וּמְאַסֶּ֖פֶת מִכָּל־מִֽין : 48 וְכַֽאֲשֶׁ֣ר נִמְלְאָ֔ה הֶֽעֱל֥וּ אֹתָ֖הּ אֶל־הַח֑וֹף וְיָֽשְׁב֗וּ וְלָֽקְט֤וּ אֶת־הַטּוֹבִים֨ אֶל־כֵּלִ֔ים וְאֶת־הָֽרָעִ֖ים הִשְׁלִ֥יכוּ הַחֽוּצָה : 49 כֵּ֥ן יִהְיֶ֖ה בְּקֵ֣ץ הָֽעוֹלָ֑ם יֵֽצְאוּ֨ הַמַּלְאָכִ֔ים וְיַבְדִּ֥ילוּ אֶת־הָֽרְשָׁעִ֖ים מִבֵּ֥ין הַצַּדִּיקִֽים : 50 וְיַשְׁלִ֥יכוּ אֹתָ֖ם אֶל־כִּבְשַׁ֣ן הָאֵ֑שׁ שָׁ֣ם יִהְיֶ֔ה בְּכִ֖י וַֽחֲרִיקַ֥ת שִׁנָּֽיִם : 51 וַיֹּ֤אמֶר אֲלֵיהֶם֨ יֵשׁ֔וּעַ הַאִ֥ם הֲבִֽינוֹתֶ֖ם אֶת־כָּל־אֵ֑לֶּה וַיֹּֽאמְר֣וּ אֵלָ֔יו כֵּ֖ן אֲדֹנָֽי : 52 וַיֹּ֖אמֶר אֲלֵיהֶ֑ם עַל־כֵּ֡ן כָּל־סוֹפֵר֩ מְלֻמָּ֨ד לְמַלְכ֤וּת הַשָּׁמַ֨יִם֨ דֹּמֶ֥ה הוּא֨ לְאִ֣ישׁ בַּֽעַל־בַּ֔יִת הַמּוֹצִ֥יא מֵאֽוֹצָר֖וֹ חֲדָשׁ֥וֹת וִֽישָׁנֽוֹת :

אין נביא בעירו

53 וַיְהִ֗י כַּֽאֲשֶׁ֛ר כִּלָּ֥ה יֵשׁ֖וּעַ אֶת־הַמְּשָׁלִ֣ים הָאֵ֑לֶּה וַיַּֽעֲבֹ֖ר מִשָּֽׁם : 54 וַיָּבוֹא֨ אֶל־אַרְצ֔וֹ וַיִלַמְּדֵ֛ם בְּבֵ֥ית הַכְּנֶ֖סֶת אֲשֶׁ֣ר לָהֶ֑ם עַ֚ד אֲשֶׁ֣ר הִשְׁתּֽוֹמְמ֔וּ וְאָ֣מְר֔וּ מֵאַ֧יִן לָזֶ֛ה הַֽחָכְמָ֥ה הַזֹּ֖את וְהַגְּבוּרֽוֹת : 55 הַֽאִם־לֹ֥א אִמּוֹ֨ נִקְרֵ֣את מִרְיָ֔ם וְאֶחָ֕יו יַֽעֲקֹ֥ב וְיוֹסֵ֖י וְשִׁמְע֥וֹן וִֽיהוּדָֽה : 56 וְאַ֨חְיוֹתָ֔יו הַֽאִם־לֹ֥א כֻלָּ֖ן אִתָּ֣נוּ הֵ֑ן מֵאַ֧יִן אֵפ֛וֹא לָזֶ֖ה כָּל־אֵֽלֶּה : 57 וַיִּכָּֽשְׁל֖וּ בּ֑וֹ וַיֹּ֨אמֶר יֵשׁ֜וּעַ אֲלֵיהֶ֗ם אֵי֤ן נָבִיא֨ נִקְלֶ֔ה זֽוּלָתִ֕י בְּאַרְצ֖וֹ וּבְבֵיתֽוֹ : 58 וְלֹא־עָ֥שָׂה שָּׁ֖ם גְּבוּר֣וֹת רַבּ֑וֹת בַּֽעֲב֥וּר לֹֽא־אֵמ֖וּן אֲשֶׁ֥ר בָּהֶֽם :

לפרק הבא








להפעלת המסגרות
load frameset