לפרק הקודם

הבשורה על־פי מתי
פרק טז

בקשה לראות אות

1 וַיִּגְּשׁ֥וּ אֵלָ֛יו הַפְּרוּשִׁ֥ים וְהַצַּדּוּקִ֖ים לְנַסּוֹת֑וֹ וַיִּשְׁאֲל֣וּ מֵֽאִתּ֔וֹ לְהַרְאוֹתָ֖ם א֥וֹת מִן־הַשָּׁמָֽיִם ׃ 2 וַיַּ֖עַן וַיֹּ֣אמֶר לָהֶ֑ם בִּהְי֨וֹת עֶ֜רֶב אַתֶּ֤ם אֹֽמְרִים֨ צַ֣ח ה֔וּא כִּ֥י אֲדַמְדַּמִּ֖ים הַשָּׁמָֽיִם ׃ 3 וּבַבֹּ֕קֶר הַיּוֹם֨ י֣וֹם סְתָ֔יו כִּ֛י אֲדַמְדַּמִּ֥ים בְּקַדְר֖וּת הַשָּׁמָ֑יִם הַֽחֲנֵפִ֗ים אֶת־פְּנֵ֤י הַשָּׁמַ֨יִם֨ תַּכִּ֣ירוּ לִבְחֹ֔ן וְאֶת־אוֹת֥וֹת הָֽעִתִּ֖ים לֹ֥א תוּכָֽלוּ ׃ 4 דּ֣וֹר ׀ רָ֣ע וּמְנָאֵ֗ף אוֹת֘ ה֣וּא מְבַקֵּשׁ֒ וְאוֹת֨ לֹֽא־יִנָּ֣תֶן ל֔וֹ זֽוּלָתִ֕י א֖וֹת יוֹנָ֣ה הַנָּבִ֑יא וַיַּֽעַזְבֵ֖ם וַיֵּ֥לֶךְ לֽוֹ ׃

שאור הפרושים והצדוקים

5 וְכַֽאֲשֶׁ֨ר בָּ֤אוּ תַלְמִידָיו֨ אֶל־הָעֵ֣בֶר הָֽאַחֵ֔ר שָֽׁכְח֖וּ לָקַ֥חַת לָֽחֶם ׃ 6 וַיֹּ֥אמֶר יֵשׁ֖וּעַ אֲלֵיהֶ֑ם רְאוּ֨ וְהִשָּׁ֣מְר֔וּ מִשְּׂאֹ֥ר הַפְּרוּשִׁ֖ים וְהַצַּדּוּקִֽים ׃ 7 וַיַּחְשְׁב֥וּ בְקִרְבָּ֖ם לֵאמֹ֑ר יַ֕עַן כִּ֛י לֹ֥א לָקַ֖חְנוּ לָֽחֶם ׃ 8 וּבְדַ֧עַת יֵשׁ֛וּעַ זֹ֖את וַיֹּ֣אמֶר אֲלֵיהֶ֑ם קְטַנֵּ֣י הָֽאֱמוּנָ֔ה לָ֚מָּה תַּחְשְׁב֣וּ בְקִרְבְּכֶ֔ם יַ֗עַן כִּ֛י לֹ֥א לְקַחְתֶּ֖ם לָֽחֶם ׃ 9 הַע֣וֹד ׀ לֹ֣א תָבִ֗ינוּ וְגַם֨ לֹ֣א תִזְכְּר֔וּ אֶת־חֲמֵ֥שֶׁת הַלֶּ֖חֶם לַֽחֲמֵ֣שֶׁת הָֽאֲלָפִ֑ים וְכַמָּ֥ה סַלִּ֖ים נְשָׂאתֶֽם ׃ 10 וְגַם־לֹ֛א אֶת־שִׁבְעַ֥ת הַלֶּ֖חֶם לְאַרְבַּ֣עַת הָֽאֲלָפִ֑ים וְכַמָּ֥ה דוּדִ֖ים נְשָׂאתֶֽם ׃ 11 אֵיךְ֩ לֹ֨א תָבִ֜ינוּ כִּ֠י לֹ֣א עַל־דְּבַ֥ר לֶ֨חֶם֨ אָמַ֣רְתִּי אֲלֵיכֶ֔ם לְהִשָּׁמֵ֕ר מִשְּׂאֹ֥ר הַפְּרוּשִׁ֖ים וְהַצַּדּוּקִֽים ׃ 12 אָ֚ז הֵבִ֔ינוּ כִּ֠י לֹ֣א אָמַ֧ר אֲלֵיהֶ֛ם לְהִשָּׁמֵ֖ר מִשְּׂאֹ֣ר הַלָּ֑חֶם כִּ֛י אִם־מִלֶּ֥קַח הַפְּרוּשִׁ֖ים וְהַצַּדּוּקִֽים ׃

כיפא מכיר שישוע הוא המשיח

13 וּכְב֨וֹא יֵשׁ֜וּעַ אֶל־גְּלִיל֤וֹת קֵֽסַרְיָא֨ אֲשֶׁ֣ר לְפִֽילִפּ֔וֹס וַיִּשְׁאַ֥ל אֶת־תַּלְמִידָ֖יו לֵאמֹ֑ר מָ֣ה אֹֽמְרִ֧ים הָֽאֲנָשִׁ֛ים מִ֥י אֲנִ֖י בֶּן־הָֽאָדָֽם ׃ 14 וַיֹּ֣אמְר֔וּ אֵ֤לֶּה אֹֽמְרִים֨ יֽוֹחָנָ֣ן הַמְּטַבֵּ֔ל וַֽאֲחֵרִ֖ים אֵֽלִיָּ֑הוּ וַֽאֲחֵרִים֨ יִרְמְיָ֔הוּ א֖וֹ אֶחָ֥ד מִן־הַנְּבִיאִֽים ׃ 15 וַיֹּ֖אמֶר אֲלֵיהֶ֑ם וְאַתֶּ֕ם מָ֧ה אֹֽמְרִ֥ים אַתֶּ֖ם מִ֥י אָֽנִי ׃ 16 וַיַּ֖עַן שִׁמְע֣וֹן פֶּטְר֑וֹס אַתָּה֨ ה֣וּא הַמָּשִׁ֔יחַ בֶּ֖ן הָֽאֱלֹהִ֥ים הַֽחַיִּֽים ׃ 17 וַיַּ֥עַן יֵשׁ֖וּעַ וַיֹּ֣אמֶר אֵלָ֑יו אַשְׁרֶ֨יךָ֨ שִׁמְע֣וֹן בַּר־יוֹנָ֔ה כִּ֠י בָּשָׂ֨ר וָדָ֜ם לֹ֣א גִּלָּ֤ה לְךָ֨ זֹ֔את כִּ֥י אִם־אָבִ֖י אֲשֶׁ֥ר בַּשָּׁמָֽיִם ׃ 18 וְגַ֣ם אֲנִי֩ אֹמֵ֨ר לְךָ֜ כִּֽי־אַתָּ֥ה הוּא֨ פֶּטְר֔וֹס וְעַל֨ הַסֶּ֣לַע הַזֶּ֔ה אֶבְנֶ֖ה אֶת־קְהִלָּתִ֑י וְשַֽׁעֲרֵ֣י שְׁא֔וֹל לֹ֥א יִגְבְּר֖וּ עָלֶֽיהָ ׃ 19 וְאֶתֵּ֣ן לְךָ֔ אֶת־מַפְתְּחֵ֖י מַלְכ֣וּת הַשָּׁמָ֑יִם וְאֵת֩ אֲשֶׁ֨ר תֶּֽאֱסֹ֜ר עַל־הָאָ֗רֶץ אָס֤וּר יִהְיֶה֨ בַּשָּׁמַ֔יִם וְאֵת֨ אֲשֶׁ֣ר תַּתִּ֣יר עַל־הָאָ֔רֶץ מֻתָּ֥ר יִהְיֶ֖ה בַּשָּׁמָֽיִם ׃ 20 אָ֚ז הִזְהִ֣יר אֶת־תַּלְמִידָ֔יו כִּ֚י לֹא־יֹֽאמְ֣רוּ לְאִ֔ישׁ כִּ֥י ה֖וּא יֵשׁ֥וּעַ הַמָּשִֽׁיחַ ׃

ישוע מדבר על מותו ותחייתו

21 מִן־הָעֵ֣ת הַהִ֗יא הֵחֵ֤ל יֵשׁ֨וּעַ֨ לְהַגִּ֣יד לְתַלְמִידָ֔יו כִּ֚י צָרִ֣יךְ ה֔וּא אֲשֶׁ֥ר יֵלֵ֖ךְ יְרֽוּשָׁלָ֑מֳה וִֽיעֻנֶּ֣ה רַ֠בּוֹת מֵאֵ֨ת הַזְּקֵנִ֜ים וְרָאשֵׁ֨י הַכֹּֽהֲנִ֤ים וְהַסּֽוֹפְרִים֙ וְיוּמָ֔ת וּבַיּ֥וֹם הַשְּׁלִישִׁ֖י יָקֽוּם ׃ 22 וַיִּקָּחֵ֨הוּ֨ פֶּטְר֔וֹס וַיָּ֛חֶל לִגְעֹ֥ר בּ֖וֹ לֵאמֹ֑ר חָלִ֤ילָה לְךָ֨ אֲדֹנָ֔י אַל־תְּהִ֥י לְךָ֖ זֹֽאת ׃ 23 אַ֣ךְ ה֣וּא פָנָה֘ וַיֹּ֣אמֶר אֶל־פֶּטְרוֹס֒ ס֣וּר לְךָ֤ מֵאַֽחֲרַי֨ שָׂטָ֔ן מִכְשׁ֖וֹל אַתָּ֣ה לִ֑י כִּ֗י אֵֽינְךָ֤ מַשְׂכִּיל֨ אֵ֣ת אֲשֶׁ֣ר לֵֽאלֹהִ֔ים כִּ֛י אִם־אֵ֖ת אֲשֶׁ֥ר לִבְנֵי־הָֽאָדָֽם ׃ 24 אָ֕ז אָמַ֥ר יֵשׁ֖וּעַ אֶל־תַּלְמִידָ֑יו אִם־יִרְצֶ֥ה אִישׁ֨ לָב֣וֹא אַֽחֲרַ֔י יְכַחֵ֧שׁ בְּנַפְשׁ֛וֹ וְיִשָּׂ֥א אֶת־צְלָב֖וֹ וְיֵלֵ֥ךְ אַֽחֲרָֽי ׃ 25 כִּ֠י כֹּ֣ל אֲשֶׁ֥ר יַחְפֹּ֛ץ לְהוֹשִׁ֥יעַ אֶת־נַפְשׁ֖וֹ יְאַבְּדֶ֑נָּה וְ֠כֹל אֲשֶׁ֨ר יְאַבֵּ֧ד אֶת־נַפְשׁ֛וֹ לְמַֽעֲנִ֖י יִמְצָאֶֽנָּה ׃ 26 כִּ֚י מַה־יוֹעִ֣יל לְאִ֔ישׁ אִם־יִקְנֶה֨ אֶת־כָּל־הַתֵּבֵ֔ל וְיִשָּׂ֖א אָבְדַּ֣ן נַפְשׁ֑וֹ א֛וֹ מַה־יִּתֵּ֥ן אִ֖ישׁ חֵ֥לֶף נַפְשֽׁוֹ ׃ 27 כִּ֗י בֶּן־הָֽאָדָ֨ם עָתִ֥יד לָב֛וֹא בִּכְב֥וֹד אָבִ֖יו עִם־מַלְאָכָ֑יו וְאָ֛ז יְשַׁלֵּ֥ם לְכָל־אִ֖ישׁ כְּמַֽעֲשֵֽׂהוּ ׃ 28 אָמְנָ֕ם אֲנִ֖י אֹמֵ֣ר לָכֶ֑ם יֵ֣שׁ אֲחָדִ֞ים מִן־הָעֽוֹמְדִ֣ים פֹּ֗ה אֲשֶׁ֤ר לֹֽא־יִטְעֲמוּ֨ מָ֔וֶת עַ֧ד כִּֽי־יִרְא֛וּ אֵ֥ת בֶּן־הָֽאָדָ֖ם בָּ֥א בְמַלְכוּתֽוֹ ׃

לפרק הבא








להפעלת המסגרות
load frameset