לפרק הקודם

הבשורה על-פי מתי
פרק יז

ישוע לובש הדר

1 וְאַֽחֲרֵי֨ שֵׁ֣שֶׁת יָמִ֔ים לָקַ֨ח יֵשׁ֧וּעַ אֵלָ֛יו אֶת־פֶּטְר֥וֹס וְאֶת־יַֽעֲקֹ֖ב וְאֶת־יֽוֹחָנָ֣ן אָחִ֑יו וַיַּֽעֲלֵ֛ם אֶל־הַ֥ר גָּבֹ֖הַּ לְבָדָֽד : 2 וַיִּתְחַלֵּ֖ף לִפְנֵיהֶ֑ם וַיַּזְהִ֤ירוּ פָנָיו֨ כַּשֶּׁ֔מֶשׁ וּמַלְבּוּשָׁ֖יו הִלְבִּ֥ינוּ כָאֽוֹר : 3 וְהִנֵּ֨ה נִרְא֧וּ אֲלֵיהֶ֛ם מֹשֶׁ֥ה וְאֵלִיָּ֖הוּ נִדְבָּרִ֥ים אִתּֽוֹ : 4 וַיַּ֨עַן פֶּטְר֜וֹס וַיֹּ֣אמֶר אֶל־יֵשׁ֗וּעַ אֲדֹנָ֛י ט֥וֹב לָ֖נוּ לִהְי֣וֹת פֹּ֑ה אִם־תִּרְצֶ֗ה נַעֲשֶׂ֨ה נָ֥א פֹּה֨ שָׁלֹ֣שׁ סֻכּ֔וֹת לְךָ֥ אַחַ֛ת וּלְמֹשֶׁ֥ה אַחַ֖ת וּלְאֵֽלִיָּ֥הוּ אֶחָֽת : 5 עוֹדֶ֨נּוּ֨ מְדַבֵּ֔ר וְהִנֵּ֛ה עָנָ֥ן בָּהִ֖יר הֵצֵ֣ל עֲלֵיהֶ֑ם וְהִנֵּ֞ה ק֤וֹל מִן־הֶֽעָנָן֨ אֹמֵ֔ר זֶ֣ה ׀ בְּנִ֣י יְדִידִ֗י אֲשֶׁר֨ רָצִ֣יתִי ב֔וֹ אֵלָ֖יו שְׁמָֽעוּ : 6 וְכַֽאֲשֶׁר֨ שָֽׁמְע֣וּ הַתַּלְמִידִ֔ים נָֽפְל֖וּ עַל־פְּנֵיהֶ֑ם וַיִּֽירְא֖וּ מְאֹֽד : 7 וַיִּגַּ֥שׁ יֵשׁ֛וּעַ וַיִּגַּ֥ע בָּ֖ם וְיֹּאמַ֑ר ק֖וּמוּ וְאַל־תִּירָֽאוּ : 8 וַיִּשְׂא֖וּ אֶת־עֵֽינֵיהֶ֑ם וְלֹ֤א רָאוּ֨ אִ֔ישׁ בִּלתִּ֥י אֶת־יֵשׁ֖וּעַ לְבַדּֽוֹ : 9 וּבְרִדְתָּם֨ מִן־הָהָ֔ר צִוָּ֥ה אֹתָ֛ם יֵשׁ֖וּעַ לֵאמֹ֑ר אַל־תֹּֽאמְר֤וּ לְאִישׁ֨ אֶת־הַמַּֽחֲזֶ֔ה עַ֛ד כִּֽי־יָק֥וּם בֶּן־הָֽאָדָ֖ם מֵעִ֥ם הַמֵּתִֽים : 10 וַיִּשְׁאָל֥וּהוּ תַלְמִידָ֖יו לֵאמֹ֑ר מַדּ֤וּעַ אֵפוֹא֨ אֹֽמְרִ֣ים הַסּֽוֹפְרִ֔ים כִּ֚י צָרִ֣יךְ ה֔וּא אֲשֶׁ֥ר אֵֽלִיָּ֖הוּ יָב֥וֹא בָרִֽאשׁוֹנָֽה : 11 וַיַּ֥עַן יֵשׁ֖וּעַ וַיֹּ֣אמֶר אֲלֵיהֶ֑ם אָכֵ֗ן אֵלִיָּ֨הוּ֨ יָב֣וֹא בָרִֽאשׁוֹנָ֔ה וְיָשִׁ֖יב אֶת־הַכֹּֽל : 12 אַ֣ךְ אֲנִ֞י אֹמֵ֣ר לָכֶ֗ם כִּ֣י אֵֽלִיָּ֜הוּ כְּבָ֥ר בָּא֨ וְלֹ֣א הִכִּיר֔וּהוּ כִּ֚י אִם־עָ֣שׂוּ ב֔וֹ אֵ֖ת כָּל־אֲשֶׁ֣ר חָפֵ֑צוּ כָּ֗כָה גַּ֚ם בֶּן־הָֽאָדָ֔ם עָתִ֖יד לְעֻנּ֥וֹת מֵהֶֽם : 13 אָ֖ז הֵבִ֣ינוּ הַתַּלְמִידִ֑ים כִּ֛י עַל־יֽוֹחָנָ֥ן הַמְּטַבֵּ֖ל דִּבֶּ֥ר אֲלֵיהֶֽם :

ריפוי נער אחוז שד

14 וּכְבוֹאָ֖ם אֶל־הֶֽהָמ֑וֹן וַיִּגַּ֤שׁ אֵלָיו֨ אִ֔ישׁ וַיִּכְרַ֥ע לְפָנָ֖יו וַיֹּאמַֽר : 15 אֲדֹנָי֨ רַחֵ֣ם עַל־בְּנִ֔י כִּ֣י מֻכֵּ֥ה יָרֵ֛חַ ה֖וּא וּמְעֻנֶּ֣ה מְאֹ֑ד כִּ֣י ׀ לִפְעָמִ֣ים רַבּ֗וֹת ה֤וּא נוֹפֵל֨ אֶל־הָאֵ֔שׁ וְלִפְעָמִ֥ים רַבּ֖וֹת אֶל־הַמָּֽיִם : 16 וָֽאָבֵ֥א אֹת֖וֹ אֶל־תַּלְמִידֶ֑יךָ וְלֹ֥א יָֽכְל֖וּ לִרְפֹּ֥א אֹתֽוֹ : 17 וַיַּ֣עַן יֵשׁוּעַ֘ וַיֹּאמַר֒ ה֗וֹי דּ֚וֹר בִּלְתִּי־מַֽאֲמִין֨ וְעִקֵּ֔שׁ עַד־מָתַי֨ אֶהְיֶ֣ה עִמָּכֶ֔ם עַד־מָתַ֖י אֶסְבֹּ֣ל אֶתְכֶ֑ם הָבִ֧יאוּ אֹת֛וֹ אֵלַ֖י הֵֽנָּה : 18 וַיִּגְעַ֥ר בּוֹ֨ יֵשׁ֔וּעַ וַיֵּצֵ֥א מִמֶּ֖נּוּ הַשֵּׁ֑ד וַיֵּֽרָפֵ֥א הַנַּ֖עַר מִן־הַשָּׁעָ֥ה הַהִֽיא : 19 אָ֠ז נִגְּשׁ֨וּ הַתַּלְמִידִ֧ים אֶל־יֵשׁ֛וּעַ בִּהְיוֹתָ֥ם לְבָדָ֖ד וַיֹּאמֵ֑רוּ מַדּ֗וּעַ אֲנַ֛חְנוּ לֹ֥א יָכֹ֖לְנוּ לְגָרֵ֥שׁ אֹתֽוֹ : 20 וַיֹּ֤אמֶר יֵשׁ֨וּעַ֨ אֲלֵיהֶ֔ם בַּֽעֲב֥וּר לֹֽא־אֵמֻ֖ן אֲשֶׁ֣ר בָּכֶ֑ם כִּ֣י אָמְנָ֞ם אֲנִ֣י ׀ אֹמֵ֣ר לָכֶ֗ם אִם־תִּהְיֶה֩ לָכֶ֨ם אֱמוּנָ֜ה כְּגַרְגַּ֣ר חַרְדָּ֗ל וְתֹֽאמְרוּ֩ לָהָ֨ר הַזֶּ֜ה עֲתַ֨ק מִזֶּ֤ה שָׁ֨מָּה֨ וְיֶעְתַּ֔ק וְלֹֽא־יִפָּלֵ֥א מִכֶּ֖ם דָּבָֽר : 21 וְהַמִּ֤ין הַזֶּה֨ לֹ֣א יֵצֵ֔א זֽוּלָתִ֖י בִּתְפִלָּ֥ה וּבְצֽוֹם :

ישוע מדבר שנית על מותו ותחייתו

22 וּבְהִתְגּֽוֹרְרָם֨ בַּגָּלִ֔יל אָמַ֥ר אֲלֵיהֶ֖ם יֵשׁ֑וּעַ עָתִ֧יד בֶּן־הָֽאָדָ֛ם לְהָסְגַּ֖ר בִּידֵ֥י אֲנָשִֽׁים : 23 וְיַֽהַרְג֔וּהוּ וּבַיּ֥וֹם הַשְּׁלִישִׁ֖י יָק֑וּם וַיִּתְעַצְּב֖וּ מְאֹֽד :

מס מחצית השקל לבית המקדש

24 וּכְבוֹאָם֨ אֶל־כְּפַר־נַח֔וּם נִגְּשׁ֨וּ לֹֽקְחֵ֥י הַבֶּ֛קַע אֶל־פֶּטְר֖וֹס וַיֹּאמֵ֑רוּ מ֣וֹרְכֶ֔ם הַאִ֥ם אֵינֶנּ֛וּ מְשַׁלֵּ֖ם אֶת־הַבָּֽקַע : 25 וַיֹּ֖אמֶר כֵּ֑ן וְכַֽאֲשֶׁר֩ בָּ֨א הַבַּ֜יְתָה הִקְדִּימָ֤הוּ יֵשׁ֨וּעַ֨ לֵאמֹ֔ר מַה־תַּחְשֹׁ֣ב שִׁמְע֗וֹן מַלְכֵ֨י הָאָ֜רֶץ מִמִּ֨י הֵ֤ם לֹֽקְחִים֨ מֶ֣כֶס וָמַ֔ס מִבְּנֵיהֶ֖ם א֥וֹ מִן־הַזָּרִֽים : 26 וַיֹּ֧אמֵר אֵלָ֛יו פֶּטְר֖וֹס מִן־הַזָּרִ֑ים וַיֹּ֤אמֶר אֵלָיו֨ יֵשׁ֔וּעַ לָכֵ֕ן הַבָּנִ֖ים חָפְשִׁ֥ים הֵֽמָּה : 27 אַ֗ךְ לְמַ֨עַן֨ לֹ֣א נַכְשִׁילֵ֔ם לֵ֣ךְ אֶל־הַיָּם֘ וְהַשְׁלֵ֣ךְ חַכָּה֒ וְאֶת־הַדָּ֨ג הָֽרִאשׁ֤וֹן הָֽעֹלֶה֨ שָׂ֔א וּבְפָתְחֲךָ֥ אֶת־פִּי֖ו תִּמְצָ֣א אִסְתִּירָ֑א אֹת֣וֹ קַ֔ח וְתֵ֥ן לָהֶ֛ם בַּֽעֲדִ֖י וּבַֽעֲדֶֽךָ :

לפרק הבא








להפעלת המסגרות
load frameset