לפרק הקודם

הבשורה על־פי מתי
פרק כא

ישוע נכנס לירושלים

1 וְכַֽאֲשֶׁר֨ קָֽרְב֣וּ אֶל־יְרֽוּשָׁלִַ֔ם וּבָ֛אוּ אֶל־בֵּ֥ית פַּגִּ֖י עַל־הַ֣ר הַזֵּיתִ֑ים וַיִּשְׁלַ֥ח יֵשׁ֖וּעַ שְׁנֵ֥י תַלְמִידִֽים ׃ 2 וַיֹּ֨אמֶר֨ אֲלֵיהֶ֔ם לְכ֥וּ אֶל־הַכָּפָ֖ר אֲשֶׁ֣ר לְנֶגְדְּכֶ֑ם וּכְרֶ֣גַע תִּמְצְא֗וּ אָת֤וֹן אֲסוּרָה֨ וְעַ֣יִר עִמָּ֔הּ הַתִּ֖ירוּ וְהָבִ֥יאוּ אֵלָֽי ׃ 3 וְאִם־אִ֞ישׁ יֹאמַ֤ר אֲלֵיכֶם֨ מְא֔וּמָה אִמְר֕וּ כִּ֥י הָֽאָד֖וֹן צָרִ֣יךְ לָהֶ֑ם וּכְרֶ֖גַע יְשַׁלַּ֥ח אֹתָֽם ׃ 4 וְכָל־זֹ֖את הָיָ֑תָה לְמַ֣עַן יִמָּלֵ֗א הַנֶּֽאֱמָ֛ר בְּפִ֥י הַנָּבִ֖יא לֵאמֹֽר ׃ 5 אִמְר֖וּ לְבַ֣ת צִיּ֑וֹן הִנֵּ֤ה מַלְכֵּךְ֨ יָ֣בוֹא לָ֔ךְ עָנִי֨ וְרֹכֵ֣ב עַל־חֲמ֔וֹר וְעַל־עַ֖יִר בֶּן־אֲתֹנֽוֹת ׃ 6 וַיֵּֽלְכ֖וּ הַתַּלְמִידִ֑ים וַיַּֽעֲשׂ֕וּ כַּֽאֲשֶׁ֛ר צִוָּ֥ה אֹתָ֖ם יֵשֽׁוּעַ ׃ 7 וַיָּבִ֤יאוּ אֶת־הָֽאָתוֹן֨ וְאֶת־הָעַ֔יִר וַיָּשִׂ֥ימוּ עֲלֵיהֶ֖ם אֶת־בִּגְדֵיהֶ֑ם וַיּוֹשִׁ֥יבוּ אֹת֖וֹ עֲלֵיהֶֽם ׃ 8 וְרֹ֧ב הֶֽהָמ֛וֹן פָּֽרְשׂ֥וּ אֶת־בִּגְדֵיהֶ֖ם בַּדָּ֑רֶךְ וַֽאֲחֵרִ֗ים כָּֽרְת֤וּ עֲנָפִים֨ מִן־הָֽעֵצִ֔ים וַיִּזְר֖וּ בַּדָּֽרֶךְ ׃ 9 וְהַֽהֲמוֹנִ֗ים הַהֽוֹלְכִ֨ים לְפָנָ֜יו וְהַבָּאִ֤ים אַֽחֲרָיו֨ צָֽעֲק֣וּ לֵאמֹ֔ר הוֹשַׁ֥עְנָ֖א לְבֶן־דָּוִ֑ד בָּר֤וּךְ הַבָּא֨ בְּשֵׁ֣ם יְהוָֹה֔ הוֹשַׁ֥עְנָ֖א בַּמְּרוֹמִֽים ׃ 10 וּבְבוֹא֖וֹ אֶל־יְרֽוּשָׁלָ֑םִ וַתִּרְעַ֤שׁ כָּל־הָעִיר֨ לֵאמֹ֔ר מִ֖י ה֥וּא זֶֽה ׃ 11 וַיֹּֽאמְר֖וּ הַֽהֲמוֹנִי֑ם זֶ֥ה הוּא֨ יֵשׁ֣וּעַ הַנָּבִ֔יא מִנָּצָ֖רֶת אֲשֶׁ֥ר בַּגָּלִֽיל ׃

טיהור בית המקדש

12 וַיָּבֹ֤א יֵשׁ֨וּעַ֨ אֶל־הֵיכַ֣ל הָֽאֱלֹהִ֔ים וַיְגָ֗רֶשׁ אֵ֛ת כָּל־הַמֹּֽכְרִ֥ים וְהַקֹּנִ֖ים בַּֽהֵיכָ֑ל וַיַּֽהֲפֹ֗ךְ אֶת־שֻׁלְחֲנוֹת֨ מַֽחֲלִיפֵ֣י הַכֶּ֔סֶף וְאֶת־מֽוֹשְׁב֖וֹת מֹֽכְרֵ֥י הַיּוֹנִֽים ׃ 13 וַיֹּ֖אמֶר אֲלֵיהֶ֑ם כָּת֗וּב בֵּיתִי֨ בֵּֽית־תְּפִלָּ֣ה יִקָּרֵ֔א וְאַתֶּ֕ם עֲשִׂיתֶ֥ם אֹת֖וֹ לִמְעָרַ֥ת פָּֽרִיצִֽים ׃ 14 וַיָּבֹ֧אוּ אֵלָ֛יו עִוְרִ֥ים וּפִסְחִ֖ים בַּֽהֵיכָ֑ל וַיִּרְפָּ֖א אֹתָֽם ׃ 15 וְכִרְאוֹת֩ רָאשֵׁ֨י הַכֹּֽהֲנִ֜ים וְהַסּֽוֹפְרִ֗ים אֶת־הַנִּפְלָאוֹת֨ אֲשֶׁ֣ר עָשָׂ֔ה וְאֶת־הַיְלָדִ֞ים צֹֽעֲקִ֤ים בַּֽהֵיכָל֨ לֵאמֹ֔ר הוֹשַׁ֥עְנָ֖א לִבֶן־דָּוִ֑ד וַיֵּ֖רַע לָהֶֽם ׃ 16 וַֽיֹּאמְר֣וּ אֵלָ֔יו הֲשֹׁמֵ֣עַ אַתָּ֔ה מָ֖ה אֵ֣לֶּה אֹֽמְרִ֑ים וַיֹּ֨אמֶר אֲלֵיהֶ֤ם יֵשׁ֨וּעַ֨ כֵּ֔ן הֲמֵֽעוֹלָם֨ לֹ֣א קְרָאתֶ֔ם כִּ֗י מִפִּ֧י עֽוֹלְלִ֛ים וְֽיוֹנְקִ֖ים יִסַּ֥דְתָּ עֹֽז ׃ 17 וַיַּֽעַזְבֵ֕ם וַיֵּצֵ֛א אֶל־מִח֥וּץ לָעִ֖יר אֶ֣ל בֵּֽית־עֲנִיָּ֑ה וַיָּ֖לֶן שָֽׁם ׃

עץ התאנה שהתייבש

18 וּבַבֹּ֗קֶר בְּשׁוּב֛וֹ לָלֶ֥כֶת אֶל־הָעִ֖יר וַיִּרְעָֽב ׃ 19 וּבִרְאוֹת֞וֹ תְּאֵנָ֨ה אַחַ֤ת בַּדֶּ֨רֶךְ֨ וַיִּגַּ֣שׁ אֵלֶ֔יהָ וְלֹא־מָ֤צָא בָהּ֨ מְא֔וּמָה בִּלְתִּ֖י עָלִ֣ים לְבָ֑ד וַיֹּ֣אמֶר לָ֗הּ אַל־יִצְמַח֩ מִמֵּ֨ךְ ע֤וֹד פְּרִי֨ עַד־עוֹלָ֔ם וַתִּיבַ֥שׁ הַתְּאֵנָ֖ה פִּתְאֹֽם ׃ 20 וּבִרְאוֹת֨ הַתַּלְמִידִ֔ים וַיִּתְמְה֖וּ לֵאמֹ֑ר מַה־פִּתְאֹ֖ם יָֽבְשָׁ֥ה הַתְּאֵנָֽה ׃ 21 וַיַּ֣עַן יֵשׁוּעַ֘ וַיֹּ֣אמֶר אֲלֵיהֶם֒ אָמְנָ֕ם אֲנִ֖י אֹמֵ֣ר לָכֶ֑ם אִם־תִּהְיֶ֣ה לָכֶ֣ם אֱמוּנָ֡ה וְלֹ֣א תְ֠סַפְּקוּ לֹ֣א לְבַ֞ד אֵ֣ת אֲשֶׁ֤ר לַתְּאֵנָה֨ תַּֽעֲשׂ֔וּ כִּ֣י אִם־גַּ֠ם אִם־תֹּֽאמְר֨וּ לָהָ֤ר הַזֶּה֨ הִנָּשֵׂא֙ וְהָשְׁלַ֣ךְ אֶל־הַיָּ֔ם הָיֹ֭ה יִהְיֶֽה ׃ 22 וְכָל־דָּבָר֩ אֲשֶׁ֨ר תִּשְׁאֲל֧וּ בִתְפִלָּ֛ה וְתַֽאֲמִ֖ינוּ תִּקָּֽחוּ ׃

ישוע משיב לשואלים בעניין סמכותו

23 וְכַֽאֲשֶׁ֥ר בָּא֨ אֶל־הַֽהֵיכָ֔ל וַיִּגְּשׁ֣וּ אֵלָיו֩ רָאשֵׁ֨י הַכֹּֽהֲנִ֜ים וְזִקְנֵ֥י הָעָ֛ם בְּלַמְּד֖וֹ וַיֹּאמֵ֑רוּ בְּאֵי־זֶ֣ה שָׁלְטָ֗ן עוֹשֶׂ֤ה אַתָּה֨ אֶת־אֵ֔לֶּה וּמִי֨ נָתַ֣ן לְךָ֔ אֵ֖ת הַשָּׁלְטָ֥ן הַזֶּֽה ׃ 24 וַיַּ֤עַן יֵשׁ֨וּעַ֨ וַיֹּ֣אמֶר אֲלֵיהֶ֔ם אֶשְׁאַ֥ל אֶתְכֶ֛ם גַּם־אָֽנֹכִ֖י דָּבָ֣ר אֶחָ֑ד אֲשֶׁר֨ אִם־תֹּֽאמְר֣וּ לִ֔י גַּם־אָֽנֹכִי֨ אֹמַ֣ר לָכֶ֔ם בְּאֵי־זֶ֥ה שָׁלְטָ֛ן אֲנִ֥י עֹשֶׂ֖ה אֶת־אֵֽלֶּה ׃ 25 טְבִילַ֤ת יֽוֹחָנָן֨ מֵאַ֣יִן הָֽיְתָ֔ה הֲמִ֨ן־הַשָּׁמַ֔יִם א֖וֹ מִבְּנֵ֣י אָדָ֑ם וַיַּחְשְׁב֨וּ בְקִרְבָּ֜ם לֵאמֹ֗ר אִם־נֹאמַר֨ מִן־הַשָּׁמַ֔יִם יֹאמַ֣ר אֵלֵ֔ינוּ מַדּ֧וּעַ אֵפ֛וֹא לֹ֥א הֶֽאֱמַנְתֶּ֖ם לֽוֹ ׃ 26 וְאִם־נֹאמַר֨ מִבְּנֵ֣י אָדָ֔ם יְרֵאִ֥ים אֲנַ֖חְנוּ אֶת־הֶֽהָמ֑וֹן כִּ֣י הַכֹּ֧ל חֹֽשְׁבִ֛ים אֶת־יֽוֹחָנָ֖ן כְּנָבִֽיא ׃ 27 וַיַּֽעֲנ֧וּ אֶת־יֵשׁ֛וּעַ וַיֹּֽאמְר֖וּ לֹ֣א יָדָ֑עְנוּ וַיֹּ֨אמֶר֨ אֲלֵיהֶ֔ם גַּם־אֲנִי֨ לֹֽא־אֹמַ֣ר לָכֶ֔ם בְּאֵי־זֶ֥ה שָׁלְטָ֛ן אֲנִ֥י עֹשֶׂ֖ה אֶת־אֵֽלֶּה ׃

משל שני הבנים

28 וּמַה־תַּחְשְׁב֕וּ אִ֣ישׁ אֶחָ֔ד הָי֥וּ ל֖וֹ שְׁנֵ֣י בָנִ֑ים וַיָּבֹ֤א אֶל־הָֽרִאשׁוֹן֨ וַיֹּאמַ֔ר בְּנִ֕י לֵ֛ךְ וֵֽעֲבֹ֥ד הַיּ֖וֹם בְּכַרְמִֽי ׃ 29 וַיַּ֨עַן֨ וַיֹּ֔אמֶר אֵ֥ין אֲנִ֖י רֹצֶ֑ה וְאַֽחֲרֵי־כֵ֔ן נִחַ֖ם וְהָלָֽךְ ׃ 30 וַיָּבֹא֨ אֶל־הַשֵּׁנִ֔י וַיֹּ֖אמֶר כְּמוֹ־כֵ֑ן וַיַּ֤עַן וַיֹּ֨אמֶר֨ הִֽנְנִ֣י אֲדֹנִ֔י וְלֹ֖א הָלָֽךְ ׃ 31 מִ֞י מִן־הַשְּׁנַ֣יִם הָאֵ֗לֶּה עָשָׂה֨ אֶת־רְצ֣וֹן הָאָ֔ב וַיֹּֽאמְר֥וּ אֵלָ֖יו הָֽרִאשׁ֑וֹן וַיֹּ֨אמֶר אֲלֵיהֶ֜ם יֵשׁ֗וּעַ אָמְנָ֞ם אֲנִ֣י ׀ אֹמֵ֣ר לָכֶ֗ם כִּ֣י הַמּֽוֹכְסִ֤ים וְהַזֹּנוֹת֨ יְקַדְמ֣וּ אֶתְכֶ֔ם לָב֖וֹא אֶל־מַלְכ֥וּת הָֽאֱלֹהִֽים ׃ 32 כִּ֗י בָּ֣א אֲלֵיכֶ֤ם יֽוֹחָנָן֨ בְּדֶ֣רֶךְ צְדָקָ֔ה וְלֹ֤א הֶֽאֱמַנְתֶּם֨ ל֔וֹ וְהַמּֽוֹכְסִ֥ים וְהַזֹּנ֖וֹת הֶֽאֱמִ֣ינוּ ל֑וֹ וְאַתֶּ֞ם גַּ֣ם בִּרְאֹֽתְכֶ֗ם לֹ֤א נִֽחַמְתֶּם֨ אַֽחֲרֵי־כֵ֔ן לְמַ֖עַן תַּֽאֲמִ֥ינוּ לֽוֹ ׃

משל בעל הכרם והחוכרים

33 שִׁמְעוּ֘ מָשָׁ֣ל אַחֵר֒ אִ֣ישׁ אֶחָ֞ד הָיָ֣ה ׀ בַּ֣עַל בַּ֗יִת אֲשֶׁ֣ר נָטַ֣ע כֶּ֡רֶם וְגֶדֶר֩ שָׂ֨ם סְבִֽיבוֹתָ֜יו וְחָ֤פַר בּוֹ֨ יֶ֔קֶב וּבָנָ֖ה מִגְדָּ֑ל וַיַּפְקִידֵ֨הוּ֨ לְאִכָּרִ֔ים וַיִּסַּ֖ע לַמֶּרְחָֽק ׃ 34 וּבְהַגִּ֖יעַ עֵ֣ת הַפֶּ֑רִי וַיִּשְׁלַ֤ח אֶת־עֲבָדָיו֨ אֶל־הָֽאִכָּרִ֔ים לָקַ֖חַת אֶת־פִּרְיֽוֹ ׃ 35 וַיִּקְח֥וּ הָֽאִכָּרִ֖ים אֶת־עֲבָדָ֑יו אֶת־זֶ֤ה הִכּוּ֨ וְאֶת־זֶ֣ה הָֽרְג֔וּ וְאֶת־זֶ֖ה סָקָֽלוּ ׃ 36 וַיִּשְׁלַ֥ח עוֹד֨ עֲבָדִ֣ים אֲחֵרִ֔ים רַבִּ֖ים מִן־הָרִֽאשׁוֹנִ֑ים וַיַּֽעֲשׂ֥וּ לָהֶ֖ם כְּמוֹ־כֵֽן ׃ 37 וּבָאַֽחֲרוֹנָ֔ה שָׁלַ֥ח אֲלֵיהֶ֖ם אֶת־בְּנ֑וֹ בְּאָמְר֕וֹ יֵֽעָנ֖וּ מִפְּנֵ֥י בְנִֽי ׃ 38 אַךְ֩ הָֽאִכָּרִ֨ים הָאֵ֜לֶּה בִּרְאוֹתָ֣ם אֶת־הַבֵּ֗ן אָֽמְרוּ֨ אִ֣ישׁ אֶל־רֵעֵ֔הוּ זֶ֥ה ה֖וּא הַיּוֹרֵ֑שׁ לְכוּ֨ וְנַֽהַרְגֵ֔הוּ וְנֹאחַ֖ז בִּֽירֻשָּׁתֽוֹ ׃ 39 וַיִּקְח֣וּ אֹת֔וֹ וַיַּשְׁלִיכ֖וּהוּ אֶל־מִח֣וּץ לַכָּ֑רֶם וַיַּֽהַרְגֽוּהוּ ׃ 40 וְעַתָּ֕ה כְּב֖וֹא בַּ֣עַל הַכָּ֑רֶם מַה־יַּֽעֲשֶׂ֖ה לָֽאִכָּרִ֥ים הָהֵֽם ׃ 41 וַיֹּֽאמְר֖וּ אֵלָ֑יו אֶת־הָֽרָעִ֗ים בְּרָעָה֨ יְאַבֵּ֣ד אֹתָ֔ם וְאֶת־הַכֶּ֗רֶם יַפְקִיד֨ לְאִכָּרִ֣ים אֲחֵרִ֔ים אֲשֶׁ֨ר יָשִׁ֥יבוּ ל֛וֹ אֶת־הַפְּרִ֖י בְּעִתּוֹתָֽם ׃ 42 וַיֹּ֤אמֶר אֲלֵיהֶם֨ יֵשׁ֔וּעַ הֲמֵֽעוֹלָ֖ם לֹֽא־קְרָאתֶ֣ם בַּכְּתָבִ֑ים אֶ֚בֶן מָֽאֲס֣וּ הַבּוֹנִ֔ים זֹ֥את הָֽיְתָ֖ה לְרֹ֥אשׁ פִּנָּֽה : מֵאֵ֥ת יְהוָֹ֖ה הָ֣יְתָה זֹ֑את וְהִ֖יא נִפְלָ֥את בְּעֵינֵֽינוּ ׃ 43 עַל־כֵּ֕ן אֲנִ֖י אֹמֵ֣ר לָכֶ֑ם כִּֽי־תֻקַּ֤ח מִכֶּם֨ מַלְכ֣וּת הָֽאֱלֹהִ֔ים וְתִנָּתֵ֥ן לְג֖וֹי הָֽעֹשֶׂ֥ה פִרְיָֽהּ ׃ 44 וְהַנּוֹפֵ֛ל עַל־הָאֶ֥בֶן הַזֹּ֖את יִשָּׁבֵ֑ר וְכֹ֨ל אֲשֶׁ֥ר תִּפּ֛וֹל עָלָ֖יו תָּדֵ֥ק אֹתֽוֹ ׃ 45 וְכִשְׁמֹ֗עַ רָאשֵׁ֧י הַכֹּֽהֲנִ֛ים וְהַפְּרוּשִׁ֖ים אֶת־מְשָׁלָ֑יו הֵבִ֕ינוּ כִּ֥י עֲלֵיהֶ֖ם דִּבֵּֽר ׃ 46 וְכַֽאֲשֶׁ֤ר בִּקְּשׁוּ֨ לְתָפְשׂ֔וֹ וַיִּיֽרְא֖וּ אֶת־הַֽהֲמוֹנִ֑ים כִּ֥י כְנָבִ֖יא חָֽשְׁב֥וּ אֹתֽוֹ ׃

לפרק הבא








להפעלת המסגרות
load frameset