הבשורה על-פי מרקוס
פרק ג

ריפוי בעל היד היבשה

(מתי יב' 14-9;לוקס ו' 11-6)

1 וַיּוֹסֶף וַיָּבֹא אֶל-בֵּית-הַכְּנֵסֶת וְשָׁם-אִישׁ אֲשֶׁר יָדוֹ יְבֵשָׁה׃ 2 וְהֵם אָרְבוּ לוֹ אִם-יִרְפָּאֵהוּ בַּשַּׁבָּת לְמַעַן תִּמְצָא יָדָם לְשִׂטְנוֹ׃ 3 וַיֹּאמֶר אֶל-הָאִישׁ אֲשֶׁר יָדוֹ יְבֵשָׁה קוּם וַעֲמֹד בְּתוֹךְ הַקָּהָל׃ 4 אָז אָמַר אֲלֵיהֶם הֲכִי כַדָּת לְהֵיטִיב בַּשַּׁבָּת אוֹ לְהָרַע לְהַצִּיל נֶפֶשׁ אוֹ לְשַׁחֲתָהּ וַיַּחֲרִישׁוּ׃ 5 וַיַּשְׁקֵף אֲלֵיהֶם מִסָּבִיב בְּפָנִים זֹעֲפִים כִּי מַר-לוֹ מְאֹד מִקְּשִׁי לִבָּם (תהילים קיט' נג') וַיֹּאמֶר אֶל-הָאִישׁ הַהוּא הוֹשֵׁט אֶת-יָדֶךָ וַיֹּשֶׁט אֹתָהּ וַתָּשָׁב יָדוֹ לְאֵיתָנָהּ כָּאַחֶרֶת׃ 6 וְהַפְּרוּשִׁים יָצְאוּ וַיָּחִישׁוּ לְהִוָּעֵץ עִם-אַנְשֵׁי הוֹרְדוֹס בַּמֶּה לְהַשְׁחִיתוֹ׃(תהילים לא' יד')

המונים באים אל ישוע

7 וַיִּפֶן יֵשׁוּעַ וַיַּעֲבֹר מִשָּׁם עִם-תַּלְמִידָיו דֶּרֶךְ הַיָּם וַהֲמוֹן עַם-רָב הָלְכוּ אַחֲרָיו מִן-הַגָּלִיל וּמִן-יְהוּדָה׃ 8 וּמִירוּשָׁלַיִם וּמֵאֱדוֹם וּמֵעֵבֶר לַיַּרְדֵּן וּמִסְּבִיבוֹת צֹר וְצִידוֹן קָהָל גָּדוֹל בָּאוּ אֵלָיו כִּי שָׁמְעוּ אֵת כָּל-אֲשֶׁר עָשָׂה׃ 9 וַיֹּאמֶר אֶל-תַּלְמִידָיו לְהָכֶן-לוֹ אֳנִיָּה קְטַנָּה מִפְּנֵי הֲמוֹן הָעָם לְבִלְתִּי יִדְחֲקוּן אֹתוֹ׃ 10 כִּי הֶעֱלָה אֲרֻכָה לָרַבִּים עַד-אֲשֶׁר הִתְמַלְּאוּ עָלָיו כָּל-הַמְנֻגָּעִים בִּרְצוֹתָם לִנְגֹּעַ בּוֹ׃ 11 וְאֵלֶּה אֲשֶׁר רוּחַ טֻמְאָה בָּם בִּרְאוֹתָם אֹתוֹ נָפְלוּ לְפָנָיו וַיִּצְעֲקוּ לֵאמֹר אַתָּה הוּא בֶּן-הָאֱלֹהִים׃ 12 וְהוּא גָעֹר גָּעַר בָּם לְבִלְתִּי יוֹדִיעוּ מִי הוּא׃

בחירת שנים-עשר השליחים

(מתי י' 4-1;לוקס ו' 16-12)

13 וַיַּעַל אֶל-הָהָר וַיִּקְרָא אֶל-אֵלֶּה אֲשֶׁר חָפֵץ בָּם וַיָּבֹאוּ אֵלָיו׃ 14 וַיִּפְקֹד שְׁנֵים עָשָׂר אֲנָשִׁים לִהְיוֹת אֶצְלוֹ וְלִקְרֹא אֶת-בְּשׂוֹרָתוֹ בְּכֹל אֲשֶׁר יִשְׁלָחֵם׃ 15 וְכֹחַ נָתַן בְּיָדָם לִרְפֹּא אֶת-הַתַּחֲלֻאִים לְגָרֵשׁ רוּחוֹת רָעוֹת׃ 16 וַיְכַנֶּה אֶת-שִׁמְעוֹן בְּשֵׁם פֶּטְרוֹס׃ 17 וְאֶת-יַעֲקֹב בֶּן-זַבְדִּי וְאֶת-יוֹחָנָן אֲחִי יַעֲקֹב כִּנָּה בְּשֵׁם בְּנֵי-רָגֶשׁ אֲשֶׁר הוּא כְּשֵׁם בְּנֵי-רָעַם׃ 18 וְאֶת-אַנְדְּרַי וְאֶת-פִּילִפּוּס וְאֶת-בַּר-תַּלְמַי וְאֶת-מַתִּתְיָהוּ וְאֶת-תּוֹמָא וְאֶת-יַעֲקֹב בֶּן-חַלְפַי וְאֶת-תַּדַּי וְאֶת-שִׁמְעוֹן הַכְּנַעֲנִי׃ 19 וְאֶת-יְהוּדָה אִישׁ-קְרִיּוֹת הוּא הַמַּסְגִּיר אֹתוֹ וַיָּבֹא הַבָּיְתָה׃

ישוע נגד בעל-זבול

(מתי יב' 32-22;לוקס יא' 23-14;יב' 10)

20 וַהֲמוֹן הָעָם נִקְבְּצוּ שָׁם לָרֹב עַד כִּי-לֹא יָכְלוּ לֶאֱכָל-לָחֶם׃ 21 וְכַאֲשֶׁר שָׁמְעוּ בְנֵי מִשְׁפַּחְתּוֹ יָצְאוּ לְהַחֲזִיק בּוֹ כִּי אָמְרוּ סָר טַעְמוֹ׃ 22 וְהַסּוֹפְרִים אֲשֶׁר יָרְדוּ מִירוּשָׁלַיִם אָמְרוּ כִּי בַּעַל-זְבוּב (מלכים ב', א' ב') דָּבַק בּוֹ וְכִי עַל-יְדֵי שַׂר-הַשֵּׁדִים הוּא מְגָרֵשׁ אֶת-הַשֵּׁדִים׃ 23 וַיִּקְרָא אֲלֵיהֶם לָבֹא אֵלָיו וַיִּפְתַּח בְּמָשָׁל פִּיו לֵאמֹר אֵיךְ יוּכַל הַשָּׂטָן לְגָרֵשׁ אֶת-הַשָּׂטָן׃ 24 הֲלֹא מַמְלָכָה הַנִּפְלְגָה עַל-נַפְשָׁהּ הַמַּמְלָכָה הַהִיא לֹא תָקוּם׃ 25 וּבַיִת הַנִּפְלָג עַל-נַפְשׁוֹ הַבַּיִת הַהוּא לֹא-יוּכַל לָקוּם׃ 26 וְאִם-הַשָּׂטָן קָם עַל-נַפְשׁוֹ כִּי נִפְלְגָה רוּחוֹ לֹא-יוּכַל קוּם כִּי בָא עַד-קִצּוֹ׃ 27 לֹא יוּכַל אִישׁ לָבֹא בֵּית הַגִּבּוֹר וְלִשְׁלֹל אֶת-כֵּלָיו אִם-לֹא יֶאְסֹר אֶת-הַגִּבּוֹר רִאשֹׁנָה וְאַחַר יִשְׁלֹל אֵת אֲשֶׁר בְּבֵיתוֹ׃ 28 אָמֵן אֲנִי אֹמֵר לָכֶם הֵן יֵשׁ סְלִיחָה לִבְנֵי אָדָם עַל-כָּל-עֲוֹנוֹתָם וְגִדֻּפֹתָם אֶשֶׁר יְגַדֵּפוּן׃ 29 אֶפֶס הַמְגַדֵּף אֶת-רוּחַ הַקֹּדֶשׁ לֹא תִהְיֶה-לּוֹ סְלִיחָה עֲדֵי-עַד כִּי יִנָּתֵן לַמִּשְׁפָּט בִּפְּלִלִים לְעוֹלְמֵי עוֹלָמִים׃ 30 כִּי-הֵם אָמְרוּ רוּחַ טֻמְאָה דָבְקָה בּוֹ׃

אמו ואחיו של ישוע

(מתי יב' 50-46;לוקס ח' 21-19)

31 וַיָּבֹאוּ אִמּוֹ וְאֶחָיו וַיַּעַמְדוּ מִחוּץ וַיִּשְׁלְחוּ אֵלָיו לָצֵאת אֲלֵיהֶם׃ 32 וְעַם-רָב אֲשֶׁר יָשְׁבוּ סָבִיב לוֹ אָמְרוּ אֵלָיו הִנֵּה אִמְּךָ וְאַחֶיךָ מִחוּץ מְבַקְשִׁים לִרְאוֹתֶךָ׃ 33 וַיַּעַן וַיֹּאמֶר אֲלֵיהֶם מִי אִמִּי וּמִי אֶחָי׃ 34 וַיַּבֵּט כֹּה וָכֹה אֶל-הַיֹּשְׁבִים סָבִיב לוֹ וַיֹּאמַר הִנֵּה אִמִּי וְאֶחָי׃ 35 כִּי אִישׁ אִישׁ אֲשֶׁר יַעֲשֶׂה רְצוֹן הָאֱלֹהִים הוּא אָחִי וַאֲחֹתִי וְאִמִּי׃