הבשורה על-פי מרקוס
פרק ו

אין נביא בעירו

(מתי יג' 58-53;לוקס ד' 30-16)

1 וַיֵּצֵא מִשָּׁם וַיָּבֹא אֶל-אֶרֶץ מוֹלַדְתּוֹ וְתַלְמִידָיו הָלְכוּ אַחֲרָיו׃ 2 וַיְהִי בְּיוֹם הַשַּׁבָּת וַיָּחֶל לְלַמֵּד בְּבֵית-הַכְּנֵסֶת וְרַבִּים שָׁמְעוּ וַיִּתְמְהוּ לֵאמֹר מֵאַיִן לָזֶה כָּל-אֵלֶּה מַה-מְּנַת חָכְמָתוֹ וְאֵיךְ נִפְלָאוֹת כָּאֵלֶּה תַּעֲשֶׂינָה יָדָיו׃(ישעיהו יא' ב'; ירמיהו ג' טו') 3 הֲלֹא זֶה הוּא הֶחָרָשׁ בֶּן-מִרְיָם וַאֲחִי יַעֲקֹב וְיוֹסֵי וִיהוּדָה וְשִׁמְעוֹן וְגַם-אַחְיוֹתָו הֲלֹא כֻלָּן אִתָּנוּ פֹּה כִּי הוּא הָיָה לָהֶם לְאֶבֶן נֶגֶף׃(ישעיהו נג' ב') 4 וַיֹּאמֶר אֲלֵיהֶם יֵשׁוּעַ אֵין נָבִיא בִּבְלִי כָבוֹד זוּלָתִי בְּאֶרֶץ מוֹלַדְתּוֹ בְּקֶרֶב מִשְׁפַּחְתּוֹ וּבְתוֹךְ בֵּיתוֹ׃ 5 וְלֹא יָכֹל לַעֲשׂוֹת נִפְלָאוֹת שָׁמָּה בִּלְעֲדֵי חוֹלִים אֲחָדִים אֲשֶׁר שָׂם יָדָיו עֲלֵיהֶם וַיִּרְפָּאֵם׃ 6 וְשַׁמָּה הֶהֱזִיקַתְהוּ מִפְּנֵי חֹסֶר אֱמוּנָתָם וַיֵּלֶךְ וַיָּסָב לְלַמֵּד בַּכְּפָרִים׃

ישוע שולח את שנים-עשר השליחים

(מתי י' 1, 15-5;לוקס ט' 6-1)

7 וַיִּקְרָא אֶל-שְׁנֵים הֶעָשָׂר וַיָּחֶל לִשְׁלֹחַ אֹתָם שְׁנַיִם שְׁנָיִם (קוהלת ד' ט') וְכֹחַ נָתַן בְּיָדָם עַל-רוּחוֹת הַטֻּמְאָה׃ 8 וַיְצַו אֹתָם לְבִלְתִּי יִשְׂאוּ צֵדָה לְדַרְכָּם זוּלָתִי מַטֶּה לְבַדּוֹ וְלֹא לֶחֶם וְלֹא יַלְקוּט וְלֹא כֶסֶף בַּכִּיס׃ 9 כִּי אִם-לְהַנְעִיל סַנְדָּל לְכַף רַגְלָם וַחֲלִיפוֹת בְּגָדִים בַּל-יִלְבָּשׁוּ׃ 10 וַיֹּאמֶר אֲלֵיהֶם כִּי תָבֹאוּ לְאַחַד הַבָּתִּים בְּאַחַד הַמְּקוֹמוֹת שְׁבוּ בַבַּיִת הַהוּא עַד-אֲשֶׁר תַּעֲבֹרוּן׃ 11 וְכָל-אֲשֶׁר לֹא-יַאַסְפוּ אֶתְכֶם הַבַּיְתָה וְלֹא יִשְׁמְעוּ בְקֹלְכֶם צְאוּ מִשָּׁם וּנְעַרְתֶּם אֶת-הָאָבָק מֵעַל רַגְלֵיכֶם לְעֵדוּת לָהֶם אָמֵן אֲנִי אֹמֵר לָכֶם לִסְדֹם וְלַעֲמֹרָה יֵקַל בְּיוֹם הַדִּין מִן-הָעִיר הַהִיא׃ 12 וַיֵּצֵאוּ וַיִּקְרְאוּ אֶל-הָעָם לָשׁוּב׃ 13 וַיְגָרְשׁוּ רוּחוֹת רָעוֹת רַבּוֹת וְאֶת-חוֹלִים רַבִּים סָכוּ בְשֶׁמֶן וַיִּרְפְּאוּ אֹתָם׃

מות יוחנן המטביל

(מתי יד' 12-1;לוקס ט' 9-7)

14 וַיִּשְׁמַע הַמֶּלֶךְ הוֹרְדוֹס עַל-יֵשׁוּעַ כִּי נוֹדַע הָיָה שְׁמוֹ בָּאָרֶץ וַיֹּאמֶר כִּי יוֹחָנָן הַמְטַבֵּל קָם מִן-הַמֵּתִים עַל-כֵּן גָּבְרָה יָדוֹ לַעֲשׂוֹת נִפְלָאוֹת׃ 15 וְיֵשׁ אֲשֶׁר אָמְרוּ כִּי-הוּא אֵלִיָּהוּ וַאֲחֵרִים אָמְרוּ כִּי-הוּא נָבִיא אוֹ כְּאַחַד הַנְּבִיאִים׃ 16 וְהוֹרְדוֹס שָׁמַע וַיֹּאמַר זֶה הוּא יוֹחָנָן אֲשֶׁר נָשָׂאתִי אֶת-רֹאשׁוֹ מֵעָלָיו הוּא קָם מִן-הַמֵּתִים׃ 17 הוּא הוֹרְדוֹס אֲשֶׁר שָׁלַח וַיִּתְפֹּשׂ בְּיוֹחָנָן וַיַּאַסְרֵהוּ וַיִּתְּנֵהוּ בְּבֵית הַסֹּהַר עַל-דְּבַר הוֹרוֹדְיָה אֵשֶׁת פִּילִפּוֹס אָחִיו אֲשֶׁר אֹתָהּ לָקַח לוֹ לְאִשָּׁה׃ 18 כִּי יוֹחָנָן אָמַר אֶל-הוֹרְדוֹס לֹא כַתּוֹרָה לָקַחַת אֵשֶׁת אָחִיךָ לְךָ לְאִשָּׁה׃(ויקרא יח' טז') 19 וַתִּשְׂטֹם אֹתוֹ הוֹרוֹדְיָה וַתְּבַקֵּשׁ לַהֲמִיתוֹ וְלֹא יָכְלָה לּוֹ׃ 20 כִּי הוֹרְדוֹס הָיָה יָרֵא אֶת-יוֹחָנָן בַּאֲשֶׁר יָדַע כִּי אִישׁ צַדִּיק וְקָדוֹשׁ הוּא וַיָּגֶן עָלָיו וְרַבּוֹת עָשָׂה לְפִי דְבָרוֹ אֲשֶׁר אִוָּה לִשְׁמֹעַ לוֹ׃ 21 וַיְהִי הַיּוֹם הוּא יוֹם הֻלֶּדֶת אֶת-הוֹרְדוֹס וַיַּעַשׂ מִשְׁתֶּה לִגְדֹלָיו לְשָׂרֵי אֲלָפָיו וּלְרָאשֵׁי הַגָּלִיל׃ 22 וַתָּבֹא בַת-הוֹרוֹדְיָה וַתְּרַקֶּד-שָׁם בְּמָחוֹל וַתִּיטַב בְּעֵינֵי הוֹרְדוֹס וּבְעֵינֵי הַיּשְׁבִים בִּמְסִבּוֹ וַיֹּאמֶר הַמֶּלֶךְ אֶל-הַנַּעֲרָה שַׁאֲלִי מִמֶּנִּי וְאֶתֶּן-לָךְ כָּל-בַּקָּשָׁתֵךְ׃ 23 וַיִּשָּׁבַע לָהּ לֵאמֹר כָּל-אֲשֶׁר תִּשְׁאֲלִי מִמֶּנִּי גַּם עַד-חֲצִי הַמַּלְכוּת כֵּן אֶעֱשֶׂה לָּךְ׃(אסתר ה' ג', ו') 24 וַתֵּצֵא וַתֹּאמֶר אֶל-אִמָּהּ מָה אֶשְׁאָל וַתַּעַן לֵאמֹר אֶת-רֹאשׁ יוֹחָנָן הַמְטַבֵּל׃ 25 וַתְּמַהֵר וַתָּשָׁב אֶל-הַמֶּלֶךְ וַתֹּאמַר שְׁאֵלָתִי כִּי תִתֶּן-לִי כַּיּוֹם בַּסֵּפֶל אֶת-רֹאשׁ יוֹחָנָן הַמְטַבֵּל׃ 26 וַיִּתְעַצֵּב הַמֶּלֶךְ עַד-מְאֹד אֶפֶס בַּעֲבוּר הַשְּׁבוּעָה וְהַיּשְׁבִים עִמּוֹ בִּמְסִבּוֹ לֹא אָבָה לְהָשִׁיב אֶת-פָּנֶיהָ׃ 27 וַיְמַהֵר הַמֶּלֶךְ וַיִּשְׁלַח אֶחָד מִן-הַטַּבָּחִים וַיְצַוֵּהוּ לְהָבִיא אֶת-רֹאשׁ יוֹחָנָן וַיֵּלֶךְ וַיִּכְרֹת אֶת-רֹאשׁוֹ בְּבֵית הַסֹּהַר׃ 28 וַיְבִיאֵהוּ בַסֵּפֶל וַיִּתְּנֵהוּ לַנַּעֲרָה וְהַנַּעֲרָה נָתְנָה אֹתוֹ לְאִמָּהּ׃ 29 וַיִּשְׁמְעוּ תַלְמִידָיו וַיָּבֹאוּ וַיִּשְׂאוּ אֶת-הֶחָלָל וַיִּקְבְּרֻהוּ בְּמוֹ-קָבֶר׃

ישוע מאכיל חמשת אלפים איש

(מתי יד' 21-13;לוקס ט' 17-10;יוחנן ו' 13-1)

30 וַיִּקָּבְצוּ הַשְּׁלִיחִים אֶל-יֵשׁוּעַ וַיַּגִּידוּ לוֹ אֶת-כָּל-אֲשֶׁר עָשׂוּ וְאֵת אֲשֶׁר לִמֵּדוּ׃ 31 וַיֹּאמֶר אֲלֵיהֶם לְכוּ וְנֵלְכָה אֶל-מָקוֹם שָׁמֵם וְתַרְגִּיעוּ שָׁם מְעָט כִּי רַבּוּ הַבָּאִים וְהַשָּׁבִים עַד-אֲשֶׁר לֹא מָצְאוּ לָהֶם עֵת לֶאֱכָל-לָחֶם׃ 32 וַיֵּלְכוּ בָאֳנִיָּה לְבַדָּם אֶל-מָקוֹם שָׁמֵם׃ 33 כִּרְאוֹת הֲמוֹן הָעָם אֹתָם הֹלְכִים הִכִּירוּ אֹתוֹ רַבִּים מֵהֶם וַיָּרוּצוּ דֶּרֶךְ הַיָּבָּשָׁה מִכָּל-הֶעָרִים וַיַּקְדִּימוּ לָבֹא אֵלָיו׃ 34 וַיֵּצֵא יֵשׁוּעַ וַיַּרְא הֲמוֹן עַם-רָב וְרַחֲמָיו נִכְמְרוּ עֲלֵיהֶם כִּי הָיוּ כַּצֹּאן אֲשֶׁר אֵין-לָהֶם רֹעֶה (במדבר כז' יז'; יחזקאל לד' ה') וַיָּחֶל לְהוֹרֹתָם דְּבָרִים שׁוֹנִים׃ 35 וַיְהִי כִּי-פָנָה הַיּוֹם וַיָּבֹאוּ אֵלָיו תַּלְמִידָיו וַיֹּאמְרוּ הַמָּקוֹם שָׁמֵם וְהַיּוֹם רַד מְאֹד׃ 36 שַׁלְּחֵם מֵעַל פָּנֶיךָ וְיֵלְכוּ אֶל-הֶעָרִים וְחַצְרֵיהֶן מִסָּבִיב לִקְנוֹת לָהֶם לֶחֶם כִּי אֵין לָהֶם מַה-שֶׁיּאֹכֵלוּ׃ 37 וַיַּעַן וַיֹּאמֶר אֲלֵיהֶם תְּנוּ לָהֶם אַתֶּם לֶאֱכֹל וַיֹּאמְרוּ אֵלָיו וְכִי נֵלֵךְ לִקְנוֹת לָהֶם לֶחֶם בְּמָאתַיִם דִּינָר וּמָצָא לָהֶם׃ 38 וַיֹּאמֶר אֲלֵיהֶם כַּמָּה כִּכְּרוֹת-לֶחֶם לָכֶם לְכוּ וּרְאוּ וַיִּרְאוּ וַיֹּאמְרוּ חֲמִשָּׁה לֶחֶם וְדָגִים שְׁנָיִם׃ 39 וַיְצַו אֹתָם כִּי ישִׁבוּם כֻּלָּם חֶבֶל חֶבֶל בִּנְאוֹת דֶּשֶׁא׃ 40 וַיֵּשְׁבוּ לָהֶם שׁוּרָה עַל-שׁוּרָה מֵאָה מֵאָה אִישׁ וַחֲמִשִּׁים חֲמִשִּׁים אִישׁ׃ 41 וַיִּקַּח אֶת-חֲמֵשֶׁת הַלֶּחֶם וְאֶת-שְׁנֵי הַדָּגִים וַיִּשָּׂא עֵינָיו לַמָּרוֹם וַיְבָרֶךְ וַיִּפְרֹס אֶת-הַלֶּחֶם וַיִּתֶּן לְתַלְמִידָיו לָשׂוּם לִפְנֵיהֶם וְאֶת-שְׁנֵי הַדָּגִים חִלַּק לְכֻלָּם׃ 42 וַיֹּאכְלוּ כֻלָּם וַיִּשְׂבָּעוּ׃ 43 וַיִּשְׂאוּ שְׁנֵים עָשָׂר סַלִּים מְלֵאִים מִן-הַפְּתוֹתִים הַנּוֹתָרִים וּמִן-הַדָּגִים׃ 44 וְאֵלֶּה אֲשֶׁר לָחֲמוּ בַּלֶּחֶם הַהוּא הָיוּ כַּחֲמֶשֶׁת אַלְפֵי אִישׁ׃

הליכה על פני המים

(מתי יד' 33-22;יוחנן ו' 21-15)

45 אָז חָזַק דְּבָרוֹ עַל-תַּלְמִידָיו לָרֶדֶת בָּאֳנִיָּה וְלַעֲבֹר לְפָנָיו אֶל-עֵבֶר הַיָּם אֶל-בֵּית צָיְדָה בְּעוֹד הוּא יְשַׁלַּח אֶת-הָעָם׃ 46 וְאַחֲרֵי אֲשֶׁר פָּטַר אֹתָם עָלָה עַל-הָהָר לְהִתְפַּלֵּל׃ 47 וְהָאֳנִיָּה בָאָה בְּלֵב הַיָּם אַחֲרֵי בֹּא הָעָרֶב וַיִּוָּתֵר הוּא לְבַדּוֹ בַּיַּבָּשָׁה׃ 48 וַיַּרְא אֶת-הַשָּׁטִים בָּאֳנִיָּה בְּצָרָה גְדוֹלָה כִּי הַסַּעַר הוֹלֵךְ וְסֹעֵר נֶגֶד פְּנֵיהֶם וַיָּבֹא אֲלֵיהֶם בְּעוֹד לַיְלָה לְעֵת הָאַשְׁמֹרֶת הָרְבִיעִית דֹּרֵךְ עַל-פְּנֵי הַיָּם (איוב ט' ח') וַיּוֹאֶל לַעֲבֹר אֹתָם׃ 49 וְהֵם רָאוּ אֹתוֹ דֹּרֵךְ עַל-פְּנֵי הַיָּם וַיַּחְשְׁבוּ כִּי חֲזוֹן-רוּחַ הוּא וַיִּצְעָקוּ׃ 50 כִּי-כֻלָּם רָאוּ אֹתוֹ וְנִבְהָלוּ וַיְמַהֵר לְדַבֵּר עַל-לִבָּם וַיֹּאמֶר אֲלֵיהֶם חִזְקוּ אֲנִי הוּא אַל-תִּירָאוּ׃ 51 וַיֵּרֶד אֲלֵהֶם אֶל-תּוֹךְ הָאֳנִיָּה וְהָרוּחַ שָׁכָכָה וְהֵם כֵּן תָּמְהוּ בְּתִמְהוֹן לֵבָב יֶתֶר מְאֹד׃ 52 כִּי גַּם-בִּדְבַר-כִּכְּרוֹת הַלֶּחֶם עַד-כֹּה לֹא הִשְׂכִּילוּ כִּי הָיוּ כִּבְדֵי-לֵב׃

ריפוי חולים בגינוסר

(מתי יד' 36-34)

53 וַיַּעַבְרוּ וַיָּבֹאוּ אַרְצָה גִנֵּיסַר וַיִּקְרְבוּ אֶל-הַחוֹף׃ 54 וְעוֹד הֵם עֹלִים מִן-הָאֳנִיָּה וְאַנְשֵׁי הַמָּקוֹם הִכִּירֻהוּ כְּרָגַע׃ 55 וַיָּרֻצוּ בְּכָל-הַכִּכָּר וַיָּחֵלּוּ לָשֵׂאת אֶת-הַחוֹלִים עַל-מִשְׁכָּבָם לַהֲבִיאָם אֶל-הַמָּקוֹם אֲשֶׁר שָׁמְעוּ כִּי-הוּא שָׁם׃ 56 וּבְכָל-מָקוֹם אֲשֶׁר בָּא שָׁמָּה בִּכְפָרִים אוֹ בְעָרִים וְחַצְרֵיהֶן שָׁם שָׂמוּ אֶת-הַחוֹלִים לְפָנָיו עַל-פְּנֵי חוּצוֹת וַיִּתְחַנְּנוּ-לוֹ לְתִתָּם לָגַעַת בִּכְנַף בִּגְדוֹ (במדבר טו' לח') וַיְהִי כֹּל אֲשֶׁר נָגַע-בּוֹ וָחָי׃