הבשורה על-פי מתי
פרק ו

גמילות חסדים

1 הִשָׁמְרוּ לָכֶם מֵעֲשׂוֹת צִדְקַתְכֶם לִפְנֵי בְּנֵי אָדָם לְהֵרָאוֹת לָהֶם כִּי אִם-כֵּן אֵין-לָכֶם שָׂכָר מֵאֵת אֲבִיכֶם שֶׁבַּשָׁמָיִם׃ 2 לָכֵן בַּעֲשׂוֹתְךָ צְדָקָה אַל-תָּרִיעַ לְפָנֶיךָ בַּשׂוֹפָר כַּאֲשֶׁר יַעֲשׂוּ הַחֲנֵפִים בְּבָתֵּי כְנֵסִיּוֹת וּבָרְחֹבוֹת לְמַעַן יְהַלֲלוּ אוֹתָם הָאֲנָשִׁים אָמֵן אֹמֵר אֲנִי לָכֶם הֵמָּה נָשְׂאוּ אֶת שְׂכָרָם׃ 3 וְאַתָּה בַּעֲשׂוֹתְךָ צְדָקָה אַל-תֵּדַע שְׂמֹאלְךָ אֵת אֲשֶׁר עֹשָׂה יְמִינֶךָ׃ 4 לְמַעַן תִּהְיֶה צִדְקָתְךָ בַּסָּתֶר וְאָבִיךָ הָרֹאֶה בַּמִּסְתָּרִים הוּא [בַּגָּלוּי] יִגְמְלֶךָ׃(תהילים קלט' ב')

תפילה

(לוקס יא' 4-2)

5 וְכִי תִתְפַּלֵּל אַל-תְּהִי כַּחֲנֵפִים הָאֹהֲבִים לְהִתְפַּלֵּל בְּעָמְדָם בְּבָתֵּי כְנֵסִיּוֹת וּבְפִנּוֹת הַשְׁוָקִים לְמַעַן יֵרָאוּ לִבְנֵי אָדָם אָמֵן אֹמֵר אֲנִי לָכֶם הֵמָּה נָשְׂאוּ אֶת שְׂכָרָם׃ 6 וְאַתָּה כִּי תִתְפַּלֵּל בּוֹא בְחֶדְרְךָ וּסְגֹר דְּלָתְךָ בַּעַדְךָ וְהִתְפַּלֵּל אֶל-אָבִיךָ אֲשֶׁר בַּסָּתֶר וְאָבִיךָ הָרֹאֶה בַּמִּסְתָּרִים הוּא [בַּגָּלוּי] יִגְמְלֶךָ׃(מלכים ב', ד' לג'; דניאל ו' יא') 7 וּבְהִתְפַּלֶּלְכֶם אַל-תְּפַטְפְּטוּ כַּגּוֹיִם הָאֹמְרִים בִּלְבָבָם בְּרֹב דְּבָרֵינוּ נִשָׁמֵעַ׃(מלכים א', יח' כו'-כט'; קוהלת ה' א'-ב') 8 וְאַתֶּם אַל-תִּדַּמּוּ לָהֶם כִּי יוֹדֵעַ אֲבִיכֶם כָּל-צָרְכְּכֶם בְּטֶרֶם תִּשְׁאֲלוּ מִמֶּנּוּ׃ 9 לָכֵן כֹּה תִתְפַּלָּלוּ אָבִינוּ שֶׁבַּשָׁמַיִם (ישעיהו סג' טז') יִתְקַדַּשׁ שְׁמֶךָ׃(ישעיהו כט' כג') 10 תָּבֹא מַלְכוּתֶךָ יֵעָשֶׂה רְצוֹנְךָ כַּאֲשֶׁר בַּשָׁמַיִם גַּם בָּאָרֶץ׃ 11 אֶת-לֶחֶם חֻקֵּנוּ תֵּן-לָנוּ הַיּוֹם׃(משלי ל' ח') 12 וּמְחַל-לָנוּ עַל-חֹבוֹתֵינוּ כַּאֲשֶׁר מָחַלְנוּ גַּם-אֲנַחְנוּ לְחַיָּבֵינוּ׃ 13 וְאַל-תְּבִיאֵנוּ לִידֵי נִסָּיוֹן כִּי אִם-תְּחַלְּצֵנוּ מִן-הָרָע [כִּי לְךָ הַמַּמְלָכָה וְהַגְּבוּרָה וְהַתִּפְאֶרֶת לְעוֹלְמֵי עוֹלָמִים אָמֵן]׃ 14 כִּי אִם-תִּמְחֲלוּ לִבְנֵי-אָדָם עַל-חַטֹּאתָם יִמְחַל גַּם-לָכֶם אֲבִיכֶם שֶׁבַּשָׁמָיִם׃ 15 וְאִם לֹא תִמְחֲלוּ לִבְנֵי אָדָם גַּם-אֲבִיכֶם לֹא-יִמְחַל לְחַטֹּאתֵיכֶם׃

צום

16 וְכִי תָצוּמוּ אַל-תִּהְיוּ זֹעֲפִים כַּחֲנֵפִים הַמְשַׁנִּים אֶת-פְּנֵיהֶם לְהֵרָאוֹת צָמִים לִבְנֵי אָדָם אָמֵן אֹמֵר אֲנִי לָכֶם הֵמָּה נָשְׂאוּ אֶת-שְׂכָרָם׃ 17 וְאַתָּה כִּי תָצוּם סוּךְ אֶת-רֹאשְׁךָ וּרְחַץ אֶת-פָּנֶיךָ׃ 18 אֲשֶׁר לֹא-תֵרָאֶה צָם לִבְנֵי אָדָם כִּי אִם-לְאָבִיךָ בַּסָּתֶר (ישעיהו נח' ה') וְאָבִיךָ הָרֹאֶה בַּמִּסְתָּרִים הוּא [בַּגָּלוּי] יִגְמְלֶךָ׃

אוצר בשמים

(לוקס יב' 34-33)

19 אַל תַּאַצְרוּ לָכֶם אוֹצָרוֹת בָּאָרֶץ אֲשֶׁר יֹאכְלוּם שָׁם סָס וְרָקָב וְגַנָּבִים יַחְתְּרוּ וְגָנָבוּ׃ 20 אֲבָל תַּאַצְרוּ לָכֶם אוֹצָרוֹת בַּשָׁמָיִם אֲשֶׁר סָס וְרָקָב לֹא-יֹאכְלוּם שָׁם וְגַנָּבִים לֹא יַחְתְּרוּ וְלֹא יִגְנֹבוּ׃ 21 כִּי בִמְקוֹם אֲשֶׁר-אוֹצַרְכֶם בּוֹ שָׁם יִהְיֶה גַם-לְבַבְכֶם׃

אור הגוף

(לוקס יא' 36-34)

22 נר הַגּוּף הָעָיִן וְאִם-עֵינְךָ תְמִימָה כָּל-גּוּפְךָ יֵאוֹר׃ 23 וְאִם-עֵינְךָ רָעָה כָּל-גּוּפְךָ יֶחְשָׁךְ וְאִם יֶחְשַׁךְ הָאוֹר אֲשֶׁר בְּקִרְבְּךָ מָה-רַב הַחשֶׁךְ׃

אלהים והממון

(לוקס טז' 13)

24 לֹא יוּכַל אִישׁ לַעֲבֹד שְׁנֵי אֲדֹנִים כִּי יִשְׂנָא אֶת-הָאֶחָד וְיֶאֱהַב אֶת הָאַחֵר אוֹ יִדְבַּק בְּאֶחָד וְיִבְזֶה אֶת-הָאַחֵר לֹא תּוּכְלוּ עֲבוֹד אֶת-הָאֱלֹהִים וְאֶת-הַמָּמוֹן׃

אל דאגה

(לוקס יב' 34-22)

25 עַל-כֵּן אֹמֵר אֲנִי לָכֶם אַל תִּדְאֲגוּ לְנַפְשְׁכֶם לֵאמֹר מַה-נֹּאכֵל וּמַה-נִּשְׁתֶּה וּלְגוּפְכֶם לֵאמֹר מַה-נִּלְבָּשׁ הֲלֹא הַנֶּפֶשׁ הִיא יְקָרָה מִן-הַמָּזוֹן וְהַגּוּף יָקָר מִן-הַמַּלְבּוּשׁ׃ 26 הַבִּיטוּ אֶל-עוֹף הַשָׁמַיִם וּרְאוּ הֵן לֹא יִזְרְעוּ וְלֹא יִקְצְרוּ וְלֹא יַאַסְפוּ לַאֲסָמִים וַאֲבִיכֶם שֶׁבַּשָׁמַיִם מְכַלְכֵּל אֹתָם (תהילים קמז' ט') הֲלֹא אַתֶּם נַעֲלֵיתֶם עֲלֵיהֶם מְאֹד׃ 27 וּמִי בָכֶָם בְּדַאֲגָתוֹ יוּכַל לְהוֹסִיף עַל-קומָתוֹ אַמָּהּ אֶחָת׃ 28 וְלִלְבוּשׁ לָמָּה תִדְאָגוּ הִתְבּוֹנֲנוּ-נָא אֶל-שׁוֹשַׁנֵּי הַשָּׂדֶה הַצֹּמְחוֹת׃ 29 לֹא יַעַמְלוּ וְלֹא יִטְווּ וַאֲנִי אֹמֵר לָכֶם כִּי גַם-שְׁלֹמֹה בְּכָל-הֲדָרוֹ לֹא-הָיָה לָבוּשׁ כְּאַחַת מֵהֵנָּה׃ 30 וְאִם-כָּכָה מַלְבִּישׁ הָאֱלֹהִים אֶת-חֲצִיר הַשָּׂדֶה אֲשֶׁר הַיּוֹם צּמֵחַ וּמָחָר יֻשְׁלַךְ לְתוֹךְ הַתַּנּוּר אַף כִּי-אֶתְכֶם קְטַנֵּי אֱמוּנָה׃ 31 לָכֵן אַל-תִּדְאֲגוּ לֵאמֹר מַה-נֹּאכַל וּמַה-נִּשְׁתֶּה וּמַה-נִּלְבָּשׁ׃ 32 כִּי אֶת-כָּל-אֵלֶּה מְבַקְשִׁים הַגּוֹיִם הֲלֹא יֹדֵעַ אֲבִיכֶם אֲשֶׁר בַּשָׁמַיִם כִּי צְרִיכִים אַתֶּם לְכָל-אֵלֶּה׃ 33 אַךְ דִּרְשׂוּ בָרִאשׁוֹנָה אֶת-מַלְכוּת אֱלֹהִים וְאֶת-צִדְקָתוֹ וְנוֹסַף לָכֶם כָּל-אֵלֶּה׃ 34 לָכֵן אַל-תִּדְאֲגוּ לְיוֹם מָחָר כִּי יוֹם מָחָר הוּא יִדְאַג לוֹ וְדַיָּהּ לַצָּרָה בְּשַׁעְתָּה׃