1 עַל־כֵּ֗ן אֵֽינְךָ֤ מְנֻקֶּה֨ הָֽאָדָ֔ם כָּל־אִ֖ישׁ הַשּׁוֹפֵ֑ט כִּ֡י בְּזֹאת֩ אֲשֶׁ֨ר אַתָּ֜ה שֹׁפֵ֣ט אֶת־הָֽאַחֵ֗ר אֶת־עַצְמְךָ֨ אַתָּ֣ה מַרְשִׁ֔יעַ כִּ֗י אֶת־עֶ֨צֶם֨ הַדְּבָרִ֣ים הָאֵ֔לֶּה אַתָּ֥ה פֹעֵ֖ל הַשּׁוֹפֵֽט ׃ 2 וְיָדַ֗עְנוּ כִּי֩ מִשְׁפַּ֨ט הָֽאֱלֹהִ֥ים הוּא֨ כְּפִ֣י הָֽאֱמֶ֔ת עַ֖ל הַפֹּֽעֲלִ֣ים כָּאֵֽלֶּה ׃ 3 אַ֞ךְ הַֽחֹשֵׁ֣ב ׀ אַתָּ֣ה הָֽאָדָ֗ם הַשּׁוֹפֵט֨ אֶת־הַפֹּֽעֲלִ֣ים כָּאֵ֔לֶּה וְעֹשֶׂ֖ה אֶת־עַצְמָ֑ם כִּ֛י אַתָּ֥ה תָנ֖וּס מִמִּשְׁפַּ֥ט הָֽאֱלֹהִֽים ׃ 4 א֠וֹ הֲבֹזֶ֨ה אַתָּ֜ה אֶת־עֹ֧שֶׁר טוּב֛וֹ וְאֹ֥רֶךְ אַפּ֖וֹ וְאֹ֣רֶךְ רוּח֑וֹ מִבְּלִ֣י דַ֗עַת כִּ֛י ט֥וּב הָֽאֱלֹהִ֖ים מוֹלִֽיכְךָ֥ לִתְשׁוּבָֽה ׃ 5 אַ֡ךְ כְּפִ֣י קָ֠שֽׁוּתְךָ וּלְבָ֨בְךָ֜ אֲשֶׁ֣ר ׀ אֵינֶ֣נּוּ שָׁ֗ב אַתָּ֨ה צֹבֵ֤ר לְעַצְמְךָ֨ חָר֔וֹן לְי֨וֹם חָר֧וֹן ׀ וְהִתְגַּלּ֛וּת מִשְׁפַּ֥ט צֶ֖דֶק הָֽאֱלֹהִֽים ׃ 6 אֲשֶׁ֛ר יְשַׁלֵּ֥ם לְכָל־אִ֖ישׁ כְּמַֽעֲשָֽׂיו ׃ 7 אָמְנָ֣ם ׀ לָאֵ֗לֶּה הַמְּבַקְשִׁ֞ים בְּתוֹחֶ֨לֶת פְּעֻלָּ֥ה טּוֹבָ֛ה כָּב֥וֹד וִיקָ֖ר וְאַל־שָׁ֑חַת חַיֵּ֖י עֽוֹלָמִֽים ׃ 8 אַ֣ךְ לָאֵלֶּה֩ אֲשֶׁ֨ר הֵ֜ם מִמְּרִיבָ֗ה וּבִלְתִּ֤י נִפְתִּים֨ אֶל־הָֽאֱמֶ֔ת כִּ֥י אִם־נִפְתִּ֖ים אֶל־הָֽעַוְלָ֑ה רֹ֖גֶז וְחֵמָֽה ׃ 9 צָרָ֣ה וְצוּקָ֔ה עַ֛ל כָּל־נֶ֥פֶשׁ אָדָ֖ם הַפֹּעֵ֣ל אֶת־הָרָ֑ע עַל־נֶ֤פֶשׁ יְהוּדִי֨ בָּרִֽאשֹׁנָ֔ה גַּ֖ם נֶ֥פֶשׁ יְוָנִֽי ׃ 10 אַ֗ךְ כָּב֥וֹד וִיקָ֛ר וְשָׁל֖וֹם לְכָל־הַפֹּעֵ֣ל אֶת־הַטּ֑וֹב גַּ֧ם יְהוּדִ֛י בָּרִֽאשֹׁנָ֖ה גַּ֥ם יְוָנִֽי ׃ 11 כִּ֗י אֵ֛ין מַשּׂ֥וֹא פָנִ֖ים עִם־הָֽאֱלֹהִֽים ׃ 12 כִּ֗י כֹּ֣ל אֲשֶׁ֤ר בְּאֵֽין־תּוֹרָה֨ חָֽטְא֔וּ גַּ֛ם בְּאֵ֥ין תּוֹרָ֖ה יֹאבֵ֑דוּ וְכֹ֗ל אֲשֶׁ֤ר בְּתוֹרָה֙ חָֽטְא֔וּ עַל־יְדֵ֥י תוֹרָ֖ה יִשָּׁפֵֽטוּ ׃ 13 כִּ֗י לֹ֚א שֹֽׁמְעֵ֣י הַתּוֹרָ֔ה צַדִּיקִ֖ים לִפְנֵ֣י הָֽאֱלֹהִ֑ים כִּ֛י אִם־עֹשֵׂ֥י הַתּוֹרָ֖ה יִצָּדֵֽקוּ ׃ 14 כִּ֗י כַּֽאֲשֶׁ֨ר גּוֹיִ֜ם בִּבְלִ֨י הֱי֤וֹת לָהֶם֨ תּוֹרָ֔ה מִטֶּ֕בַע עֹשִׂ֖ים אֶת־דִּבְרֵ֣י הַתּוֹרָ֑ה אֵ֗לֶּה בִּבְלִ֨י הֱי֤וֹת לָהֶם֨ תּוֹרָ֔ה לְעַצְמָ֖ם הֵ֥ם תּוֹרָֽה ׃ 15 אֲשֶׁר֩ הֵ֨מָּה מַרְאִ֜ים אֶת־פֹּ֤עַל הַתּוֹרָה֨ כָּת֣וּב בְּלִבּוֹתָ֔ם בְּהָעִ֖יד גַּ֣ם רַעְיוֹנָ֑ם בַּֽאֲשֶׁ֣ר גַּ֣ם מַחְשְׁבֽוֹתֵיהֶ֗ם מַשְׂטִינ֛וֹת א֥וֹ מְנַקּ֖וֹת אֵ֥לֶּה אֶת־אֵֽלֶּה ׃ 16 בַּיּ֗וֹם אֲשֶׁ֨ר יִשְׁפֹּ֤ט הָֽאֱלֹהִים֨ אֶת־תַּֽעֲלֻמּוֹת֨ בְּנֵי֣ הָֽאָדָ֔ם לְפִ֖י בְּשֽׂוֹרָתִ֑י עַל־יְדֵ֖י יֵשׁ֥וּעַ הַמָּשִֽׁיחַ ׃
17 הִנֵּ֗ה אַתָּה֨ יְהוּדִ֣י מְכֻנֶּ֔ה וְשֹׁקֵ֖ט עַל־הַתּוֹרָ֑ה וְאַתָּ֥ה מִתְהַלֵּ֖ל בֵּֽאלֹהִֽים ׃ 18 וְאַתָּ֤ה יוֹדֵ֨עַ֨ אֶת־רְצוֹנ֔וֹ וּבֹחֵ֖ן אֶת־הַמְּעֻלִּ֑ים בַּֽאֲשֶׁ֛ר אַתָּ֥ה מְלֻמָּ֖ד מִן־הַתּוֹרָֽה ׃ 19 וּבֹטֵ֣חַ אַתָּ֔ה לִהְיֽוֹתְךָ֥ עַצְמְךָ֖ נֹהֵ֣ג עִוְרִ֑ים א֕וֹר לָאֵ֖לֶּה אֲשֶׁ֥ר בַּחֹֽשֶׁךְ ׃ 20 מְיַסֵּ֣ר אֱוִילִ֔ים מְלַמֵּ֖ד עֹֽלְלִ֑ים אֲשֶׁ֣ר יֵּֽשׁ־לְךָ֗ תַּבְנִ֥ית הַדַּ֛עַת וְהָֽאֱמֶ֖ת בַּתּוֹרָֽה ׃ 21 לָכֵ֗ן הַמְּלַמֵּד֨ אֶת־אַחֵ֔ר הַאִ֥ם אֶת־עַצְמְךָ֖ לֹ֣א תְלַמֵּ֑ד הִמַּגִּיד֨ לְבִלְתִּ֣י גְנֹ֔ב הַאִ֥ם אַתָּ֖ה גֹּנֵֽב ׃ 22 הָֽאֹמֵר֨ לְבִלְתִּ֣י נְאֹ֔ף הַֽאִם־אַתָּ֖ה נֹאֵ֑ף הַמְּתָעֵ֣ב אֶת־הָֽאֱלִילִ֔ים הַֽאִם־אַתָּ֖ה בֹּזֵ֥ז אֶת־הַקֳּדָשִֽׁים ׃ 23 אֲשֶׁ֥ר אַתָּ֖ה מִתְהַלֵּ֣ל בַּתּוֹרָ֑ה הַאִ֗ם עַל־יְדֵי֨ עֲבֵרַ֣ת הַתּוֹרָ֔ה אֶת־הָֽאֱלֹהִ֖ים אַתָּ֥ה מְנַבֵּֽל ׃ 24 כִּ֚י שֵׁ֣ם הָֽאֱלֹהִ֔ים בַּֽעֲבֽוּרְכֶ֖ם מְגֻדָּ֣ף בַּגּוֹיִ֑ם כַּֽאֲשֶׁ֖ר נִכְתָּֽב ׃ 25 כִּ֣י הַמִּילָ֗ה אָמְנָם֨ מוֹעֶ֣לֶת הִ֔יא אִם־אַתָּ֥ה עֹשֶׂ֖ה אֶת־הַתּוֹרָ֑ה אַ֗ךְ אִ֤ם תִּהְיֶה֙ עֹבֵ֣ר הַתּוֹרָ֔ה מִילָֽתְךָ֖ לְעָרְלָ֥ה נִהְיָֽתָה ׃ 26 לָכֵ֞ן אִ֤ם בֶּן־הָֽעָרְלָה֨ שֹׁמֵר֨ אֶת־צִדְק֣וֹת הַתּוֹרָ֔ה הַֽאִם־לֹ֥א עָרְלָת֖וֹ לְמוּלָ֥ה תֵֽחָשֵֽׁב ׃ 27 וְיִשְׁפֹּ֞ט בֶּן־הָֽעָרְלָ֧ה מִן־הַטֶּ֛בַע הַגֹּמֵ֥ר אֶת־הַתּוֹרָ֖ה אֹתָ֑ךְ אֲשֶׁ֗ר עַל־יְדֵי֨ הָא֣וֹת וְהַמִּילָ֔ה עֹבֵ֥ר הַתּוֹרָ֖ה אָֽתָּה ׃ 28 כִּ֣י לֹ֥א זֶ֛ה אֲשֶׁ֥ר בְּגָל֖וּי יְה֣וּדִי ה֑וּא גַּם־לֹ֣א זֹ֗את אֲשֶׁ֧ר בְּגָל֛וּי בַּבָּשָׂ֖ר מִילָ֥ה הִֽיא ׃ 29 כִּ֣י אִם־זֶ֞ה אֲשֶׁ֣ר בַּסֵּתֶר֘ יְהוּדִ֣י הוּא֒ וּמִילַ֥ת הַלֵּ֛ב בָּר֖וּחַ לֹ֣א בָא֑וֹת אֲשֶׁ֣ר ׀ תְּהִלָּת֗וֹ אֵינֶ֨נָּה֨ מֵאֵ֣ת אֲנָשִׁ֔ים כִּ֖י אִם־מֵאֵ֥ת הָֽאֱלֹהִֽים ׃
לפרק הבא