1 יְלָדַ֕י אֶת־אֵ֗לֶּה אֲנִ֤י כֹתֵב֨ אֲלֵיכֶ֔ם לְמַ֖עַן לֹ֣א תֶֽחֱטָ֑אוּ וְאִ֣ים ׀ יֶֽחֱטָ֣א אִ֗ישׁ יֵֽשׁ־לָ֤נוּ מֵלִיץ֨ אֵ֣צֶל הָאָ֔ב יֵשׁ֥וּעַ הַמָּשִׁ֖יחַ הַצַּדִּֽיק ׃ 2 וְה֥וּא כֹ֖פֶר בְּעַ֣ד חֲטָאֵ֑ינוּ וְלֹ֞א בְּעַ֤ד חֲטָאֵ֨ינוּ֨ לְבַ֔ד כִּ֥י אִם־גַּ֛ם בְּעַ֖ד חַטְּא֥וֹת כָּל־הָֽעוֹלָֽם ׃ 3 וּבְזֹאת֨ אֲנַ֣חְנוּ יֽוֹדְעִ֔ים כִּ֥י יָדַ֖עְנוּ אֹת֑וֹ אִ֥ם נִשְׁמֹ֖ר אֶת־מִצְוֹתָֽיו ׃ 4 הָֽאֹמֵר֨ יָדַ֣עְתִּי אֹת֔וֹ וְאֶת־מִצְוֹתָ֖יו אֵינֶ֣נּוּ שֹׁמֵ֑ר כֹּזֵ֣ב ה֔וּא וּבָזֶ֖ה הָֽאֱמֶ֥ת אֵינֶֽנָּה ׃ 5 אַ֚ךְ כָּל־הַשֹּׁמֵ֣ר אֶת־דְּבָר֔וֹ אָמְנָ֕ם בָּזֶ֛ה אַֽהֲבַ֥ת הָֽאֱלֹהִ֖ים נִשְׁלָ֑מָה בְּזֹאת֨ אֲנַ֣חְנוּ יֽוֹדְעִ֔ים כִּ֥י ב֖וֹ אֲנָֽחְנוּ ׃ 6 הָֽאֹמֵ֕ר כִּ֥י ה֖וּא שֹׁכֵ֣ן בּ֑וֹ חַיָּ֨ב גַּ֥ם הוּא֨ כָּ֣כָה לְהִתְהַלֵּ֔ךְ כַּֽאֲשֶׁ֖ר ה֥וּא הִתְהַלֵּֽךְ ׃
7 אַחַ֕י לֹ֣א ׀ מִצְוָ֣ה חֲדָשָׁ֗ה אֲנִ֣י כֹתֵב֘ אֲלֵיכֶם֒ כִּ֚י אִם־מִצְוָ֣ה יְשָׁנָ֔ה אֲשֶׁ֛ר הָֽיְתָ֥ה לָכֶ֖ם מֵֽרֵאשִׁ֑ית הַמִּצְוָ֣ה הַיְשָׁנָ֔ה הִ֣יא הַדָּבָ֔ר אֲשֶׁ֥ר שְׁמַעְתֶּ֖ם מֵֽרֵאשִֽׁית ׃ 8 ע֕וֹד מִצְוָ֣ה חֲדָשָׁ֗ה אֲנִ֤י כֹתֵב֨ אֲלֵיכֶ֔ם אֲשֶׁ֕ר אֱמֶ֥ת ה֖וּא בּ֣וֹ וּבָכֶ֑ם יַ֚עַן הַחֹ֣שֶׁךְ עֹבֵ֔ר וְהָא֥וֹר הָֽאֲמִתִּ֖י עַתָּ֥ה מֵאִֽיר ׃ 9 הָֽאֹמֵ֗ר כִּ֚י בָּא֣וֹר ה֔וּא וְאֶת־אָחִ֖יו ה֣וּא שֹׂנֵ֑א בַּחֹ֥שֵׁךְ ה֖וּא עַד־עָֽתָּה ׃ 10 הָֽאֹהֵב֨ אֶת־אָחִ֔יו בָּא֖וֹר ה֣וּא שֹׁכֵ֑ן וּמִכְשֹׁ֖ל אֵ֥ין בּֽוֹ ׃ 11 וְהַשֹּׂנֵ֨א אֶת־אָחִ֜יו בַּחֹ֣שֶׁךְ ה֗וּא וּבַחֹ֨שֶׁךְ֨ ה֣וּא מִתְהַלֵּ֔ךְ וְאֵינֶ֣נּוּ יוֹדֵ֔עַ אָ֖נָה ה֣וּא הוֹלֵ֑ךְ כִּ֥י הַחֹ֖שֶׁךְ עִוֵּ֥ר אֶת־עֵינָֽיו ׃ 12 אֲנִ֥י כֹתֵ֛ב אֲלֵיכֶ֖ם יְלָדִ֑ים כִּ֣י נִסְלְח֤וּ לָכֶם֨ חַטּֽאוֹתֵיכֶ֔ם בַּֽעֲב֖וּר שְׁמֽוֹ ׃ 13 אֲנִ֞י כֹּתֵ֤ב אֲלֵיכֶם֨ אָב֔וֹת כִּ֣י יְדַעְתֶּ֗ם אֵ֣ת אֲשֶׁ֣ר הוּא֘ מֵֽרֵאשִׁית֒ אֲנִ֞י כֹּתֵ֤ב אֲלֵיכֶם֨ בַּֽחוּרִ֔ים כִּ֥י נִצַּחְתֶּ֖ם אֶת־הָרָ֑ע אֲנִ֞י כֹּתֵ֤ב אֲלֵיכֶם֨ יְלָדִ֔ים כִּ֥י יְדַעְתֶּ֖ם אֶת־הָאָֽב ׃ 14 כָּתַ֤בְתִּי אֲלֵיכֶם֨ אָב֔וֹת כִּ֣י יְדַעְתֶּ֔ם אֵ֛ת אֲשֶׁ֥ר ה֖וּא מֵֽרֵאשִׁ֑ית כָּתַ֤בְתִּי אֲלֵיכֶם֨ בַּֽחוּרִ֔ים כִּי֩ חֲזָקִ֨ים אַתֶּ֜ם וּדְבַ֤ר הָֽאֱלֹהִים֨ שֹׁכֵ֣ן בָּכֶ֔ם וְנִצַּחְתֶּ֖ם אֶת־הָרָֽע ׃ 15 אַל־תֶּאֶֽהֲבוּ֨ אֶת־הָֽעוֹלָ֔ם גַּם־לֹ֥א אֶת־הַדְּבָרִ֖ים אֲשֶׁ֣ר בָּֽעוֹלָ֑ם אִם־אִישׁ֙ יֶֽאֱהַ֣ב אֶת־הָֽעוֹלָ֔ם אֵ֥ין בּ֖וֹ אַֽהֲבַ֥ת הָאָֽב ׃ 16 כִּ֞י כֹּ֣ל ׀ אֲשֶׁ֣ר בָּֽעוֹלָ֗ם תַּֽאֲוַ֧ת הַבָּשָׂ֛ר וְתַֽאֲוַ֥ת הָֽעֵינַ֖יִם וּגְא֣וֹן הַֽחַיִּ֑ים אֵינֶ֣נָּה מִן־הָאָ֔ב כִּ֛י אִם־מִ֥ן הָֽעוֹלָ֖ם הִֽיא ׃ 17 וְהָֽעוֹלָ֥ם עֹבֵ֖ר וְתַֽאֲוָת֑וֹ אַ֗ךְ הָֽעֹשֶׂה֨ אֶת־רְצ֣וֹן הָֽאֱלֹהִ֔ים עֹמֵ֖ד לָנֶֽצַח ׃
18 יְלָדִ֕ים הַשָּׁעָ֥ה הָאַֽחֲרוֹנָ֖ה הִ֑יא וְכַֽאֲשֶׁ֣ר שְׁמַעְתֶּ֡ם כִּ֣י יָבוֹא֩ יְרִ֨יב מָשִׁ֜יחַ גַּ֣ם עַ֠תָּה יְרִבֵ֨י מָשִׁ֤יחַ רַבִּים֨ נִהְי֔וּ אֲשֶׁ֤ר מִזֹּאת֨ יָדַ֔עְנוּ כִּ֛י הַשָּׁעָ֥ה הָאַֽחֲרוֹנָ֖ה הִֽיא ׃ 19 מֵֽאִתָּ֣נוּ יָֽצְא֗וּ אַ֠ךְ לֹ֣א הָיוּ֘ מִמֶּנּוּ֒ כִּ֗י אִ֤ם הָיוּ֨ מִמֶּ֔נּוּ נִשְׁאֲר֖וּ עִמָּ֑נוּ אָכֵ֕ן לְמַ֣עַן יְגֻלּ֔וּ כִּ֛י לֹֽא־הָי֥וּ כֻלָּ֖ם מִמֶּֽנּוּ ׃ 20 וְאַתֶּ֕ם יֵ֥שׁ לָכֶ֛ם מִשְׁחָ֖ה מִן־הַקָּד֑וֹשׁ וְאַתֶּ֥ם יֽוֹדְעִ֖ים כָּל־דְּבָרִֽים ׃ 21 לֹ֤א כָתַ֨בְתִּי֨ אֲלֵיכֶ֔ם יַ֛עַן לֹ֥א יְדַעְתֶּ֖ם אֶת־הָֽאֱמֶ֑ת כִּ֗י אִם־יַ֚עַן יְדַעְתֶּ֣ם אֹתָ֔הּ וְיַ֛עַן כָּל־כָּזָ֖ב אֵינֶ֥נּוּ מִן־הָֽאֱמֶֽת ׃ 22 מִ֥י הוּא֨ הַכֹּזֵ֔ב זֽוּלָתִ֗י הַמְּכַחֵ֛שׁ כִּ֥י יֵשׁ֖וּעַ אֵינֶ֣נּוּ הַמָּשִׁ֑יחַ זֶ֥ה הוּא֨ יְרִ֣יב הַמָּשִׁ֔יחַ הַמְּכַחֵ֥שׁ בָּאָ֖ב וּבַבֵּֽן ׃ 23 כֹּ֚ל הַמְּכַחֵ֣שׁ בַּבֵּ֔ן גַּ֥ם הָאָ֖ב אֵ֣ין ל֑וֹ אַ֚ךְ הַמּוֹדֶ֣ה בַבֵּ֔ן גַּ֥ם הָאָ֖ב יֵ֥שׁ לֽוֹ ׃ 24 לָכֵ֣ן אַתֶּ֔ם אֵ֣ת אֲשֶׁ֧ר שְׁמַעְתֶּ֛ם מֵֽרֵאשִׁ֖ית יִשְׁכּ֣וֹן בָּכֶ֑ם אִם־יִשְׁכּ֣וֹן בָּכֶ֗ם אֵ֣ת אֲשֶׁ֤ר שְׁמַעְתֶּם֨ מֵֽרֵאשִׁ֔ית גַּ֥ם אַתֶּ֛ם בַּבֵּ֥ן וּבָאָ֖ב תִּשְׁכֹּֽנוּ ׃ 25 וְזֹ֥את הִיא֨ הַֽהַבְטָחָ֔ה אֲשֶׁ֥ר הִבְטִ֖יחַ לָ֑נוּ אֵ֖ת חַיֵּ֥י הָעֽוֹלָמִֽים ׃ 26 אֶת־אֵ֨לֶּה֨ כָּתַ֣בְתִּי אֲלֵיכֶ֔ם עַל־אֹד֖וֹת הַמַּתְעִ֥ים אֶתְכֶֽם ׃ 27 וְאַתֶּ֗ם הַמִּשְׁחָ֞ה אֲשֶׁ֨ר לְקַחְתֶּ֤ם מֵֽאִתּוֹ֨ שֹׁכֶ֣נֶת בָּכֶ֔ם וְאֵ֥ין צֹ֨רֶךְ֨ לָכֶ֔ם כִּ֥י אִ֖ישׁ יְלַמֵּ֣ד אֶתְכֶ֑ם כִּ֡י אִם־כַּֽאֲשֶׁר֩ תְּלַמֵּ֨ד אֶתְכֶ֜ם עֶ֣צֶם ׀ הַמִּשְׁחָ֣ה הַזֹּ֗את עַל־אֹדוֹת֨ כָּל־הַדְּבָרִ֔ים וֶֽאֱמֶ֥ת הִיא֨ וְאֵינֶ֣נָּה כָזָ֔ב וְכַֽאֲשֶׁר֨ לִמְּדָ֣ה אֶתְכֶ֔ם כֵּ֖ן תִּשְׁכְּנ֥וּ בֽוֹ ׃
28 וְעַתָּ֥ה יְלָדִ֖ים שִׁכְנ֣וּ ב֑וֹ לְמַ֣עַן ׀ כַּֽאֲשֶׁ֣ר יִגָּלֶ֗ה תִּהְיֶ֥ה לָ֨נוּ֨ בִּטְחָ֔ה וְלֹֽא־נָכְלַ֥ם מֵֽאִתּ֖וֹ בְּבִֽיאָתֽוֹ ׃ 29 אִ֣ם יְדַעְתֶּ֔ם כִּ֥י צַדִּ֖יק ה֑וּא דְּע֕וּ כִּ֛י כָּל־הָֽעֹשֶׂ֥ה אֶת־הַצְּדָקָ֖ה נוֹלַ֥ד מִמֶּֽנּוּ ׃
לפרק הבא