אגרת יוחנן הראשונה
פרק ג

ילדי אלהים -- המשך

1 רְא֗וּ אֵי־ז֨וּ אַֽהֲבָ֜ה נָתַ֥ן לָ֨נוּ֨ הָאָ֔ב כִּ֥י נִקָּרֵ֖א בְּנֵ֣י אֱלֹהִ֑ים בַּֽעֲב֣וּר זֹ֗את הַֽעוֹלָ֞ם אֵינֶ֤נּוּ יוֹדֵ֨עַ֨ אֹתָ֔נוּ יַ֛עַן לֹ֥א יָדַ֖ע אֹתֽוֹ ׃ 2 אֲהוּבִ֗ים עַתָּ֞ה בְּנֵ֤י אֱלֹהִים֨ אֲנַ֔חְנוּ וְע֛וֹד לֹ֥א נִגְלָ֖ה מַה־נִּהְיֶ֑ה אַ֣ךְ יָדַ֔עְנוּ כִּ֣י ׀ כַּֽאֲשֶׁ֣ר יִגָּלֶ֗ה נִהְיֶ֤ה דֹמִים֙ ל֔וֹ כִּ֚י נִרְאֶ֣ה אֹת֔וֹ כַּֽאֲשֶׁ֖ר ה֥וּא יֵֽשׁ ׃ 3 וְ֠כֹל אֲשֶׁ֥ר יֵֽשׁ־ל֛וֹ הַתִּקְוָ֥ה הַזֹּ֖את אֵלָ֑יו מְטַהֵ֣ר אֶת־נַפְשׁ֔וֹ כַּֽאֲשֶׁ֥ר ה֖וּא טָהֽוֹר ׃ 4 כֹּ֚ל הָֽעֹשֶׂ֣ה אֶת־הַחֵ֔טְא גַּ֥ם אֶת־הַפֶּ֖שַׁע ה֣וּא עֹשֶׂ֑ה וְהַחֵ֖טְא ה֥וּא הַפָּֽשַׁע ׃ 5 וִֽידַעְתֶּ֗ם כִּ֚י ה֣וּא נִגְלָ֔ה לְמַ֥עַן יִשָּׂ֖א אֶת־חַטּאוֹתֵ֑ינוּ וְחֵ֖טְא אֵ֥ין בּֽוֹ ׃ 6 כֹּ֛ל הַשֹּׁכֵ֥ן בּ֖וֹ אֵינֶ֣נּוּ חֹטֵ֑א כֹּ֣ל הַֽחֹטֵ֗א לֹ֤א רָאָה֨ אֹת֔וֹ גַּ֛ם לֹ֥א יָדַ֖ע אֹתֽוֹ ׃ 7 יְלָדִ֕ים אִ֖ישׁ אַל־יַתְעֶ֣ה אֶתְכֶ֑ם הָֽעֹשֶׂ֤ה אֶת־הַצְּדָקָה֨ צַדִּ֣יק ה֔וּא כַּֽאֲשֶׁ֥ר ה֖וּא צַדִּֽיק ׃ 8 הָֽעֹשֶׂ֤ה אֶת־הַחֵטְא֨ מִן־הַשָּׂטָ֣ן ה֔וּא כִּ֥י מֵֽרֵאשִׁ֖ית הַשָּׂטָ֣ן חֹטֵ֑א לָזֹ֗את נִגְלָה֨ בֶּ֣ן הָֽאֱלֹהִ֔ים לְמַ֥עַן יְבַטֵּ֖ל אֶת־פָּֽעֳלֵ֥י הַשָּׂטָֽן ׃ 9 כֹּ֞ל הַנּוֹלָ֣ד ׀ מֵאֵ֣ת הָֽאֱלֹהִ֗ים אֵינֶ֤נּוּ עֹשֶׂה֨ חֵ֔טְא כִּ֥י זַרְע֖וֹ נִשְׁאָ֣ר בּ֑וֹ וְלֹ֤א יוּכַל֨ לַֽחֲט֔וֹא כִּ֛י מֵאֵ֥ת הָֽאֱלֹהִ֖ים נוֹלָֽד ׃ 10 בְּזֹאת֨ גְּלוּיִ֣ם הֵ֔ם בְּנֵ֥י הָֽאֱלֹהִ֖ים וּבְנֵ֣י הַשָּׂטָ֑ן כֹּ֡ל אֲשֶׁר֩ אֵינֶ֨נּוּ עֹשֶׂ֜ה צְדָקָ֗ה אֵינֶ֨נּוּ֨ מֵאֵ֣ת הָֽאֱלֹהִ֔ים וְכֹ֥ל אֲשֶׁ֛ר אֵינֶ֥נּוּ אֹהֵ֖ב אֶת־אָחִֽיו ׃

אהבו זה את זה

11 כִּ֣י זֹ֥את הִיא֨ הַהֽוֹדָעָ֔ה אֲשֶׁ֥ר שְׁמַעְתֶּ֖ם מֵֽרֵאשִׁ֑ית כִּ֥י נֶֽאֱהַ֖ב אִ֥ישׁ אֶת־רֵעֵֽהוּ ׃ 12 לֹ֣א כְקַ֗יִן אֲשֶׁ֤ר הָיָה֨ מִן־הָרָ֔ע וְהָרַ֖ג אֶת־אָחִ֑יו וּבַֽעֲב֨וּר מָ֜ה הָרַ֣ג אֹת֗וֹ יַ֚עַן מַֽעֲשָׂיו֨ הָי֣וּ רָעִ֔ים וּמַֽעֲשֵׂ֥י אָחִ֖יו צֶֽדֶק ׃ 13 אַל־תִּתְמְה֣וּ אַחַ֔י אִ֛ם יִשְׂנָ֥א אֶתְכֶ֖ם הָֽעוֹלָֽם ׃ 14 אֲנַ֣חְנוּ יֽוֹדְעִ֗ים כִּ֣י עָבַ֤רְנוּ מִן־הַמָּ֨וֶת֨ אֶל־הַֽחַיִּ֔ים כִּ֛י אֲנַ֥חְנוּ אֹֽהֲבִ֖ים אֶת־הָֽאַחִ֑ים אֲשֶׁ֨ר אֵינֶ֤נּוּ אֹהֵב֨ אֶת־אָחִ֔יו יָלִ֖ין בַּמָּֽוֶת ׃ 15 כֹּ֚ל הַשֹּׂנֵ֣א אֶת־אָחִ֔יו רֹצֵ֥חַ אָדָ֖ם ה֑וּא וִֽידַעְתֶּ֗ם כִּ֚י כָּל־רֹצֵ֣חַ אָדָ֔ם אֵ֥ין ל֛וֹ חַיֵּ֥י עֽוֹלָמִ֖ים שֹֽׁכְנִ֥ים בּֽוֹ ׃ 16 בְּזֹ֤את יָדַ֨עְנוּ֨ אֶת־הָאַֽהֲבָ֔ה כִּ֥י ה֛וּא שָׂ֥ם אֶת־נַפְשׁ֖וֹ בַּֽעֲדֵ֑נוּ וַֽאֲנַ֣חְנוּ חַיָּבִ֔ים לָשׂ֥וּם אֶת־נַפְשׁוֹתֵ֖ינוּ בְּעַ֥ד הָֽאַחִֽים ׃ 17 וּמִ֡י אֲשֶׁר֩ תִּהְיֶ֨ה ל֜וֹ מִחְיַ֣ת הַתֵּבֵ֗ל וְיִרְאֶ֨ה אֶת־אָחִ֜יו בִּהְי֥וֹת לוֹ֨ מַחְס֔וֹר וְיִסְגֹּ֥ר אֶת־רַֽחֲמָ֖יו מִמֶּ֑נּוּ אֵ֛יךְ תִּשְׁכֹּ֥ן בּ֖וֹ אַֽהֲבַ֥ת הָֽאֱלֹהִֽים ׃ 18 יְלָדַ֕י אַל־נָ֧א נֶֽאֱהַ֛ב בְּמִלָּ֖ה גַּם־לֹ֣א בְלָשׁ֑וֹן כִּ֥י אִם־בְּפֹ֖עַל וּבֶֽאֱמֶֽת ׃

עוז ובטחון לפני אלהים

19 וּבְזֹאת֨ אֲנַ֣חְנוּ יֽוֹדְעִ֔ים כִּ֥י מִן־הָֽאֱמֶ֖ת אֲנָ֑חְנוּ וּלְפָנָ֖יו נְכוֹנֵ֥ן אֶת־לִבּוֹתֵֽינוּ ׃ 20 כִּ֛י אִ֥ם לִבֵּ֖נוּ יַרְשִׁיעֵ֑נוּ אָכֵ֗ן הָֽאֱלֹהִים֨ גָּד֣וֹל מִלִּבֵּ֔נוּ וְיוֹדֵ֖עַ אֶת־הַכֹּֽל ׃ 21 אֲהוּבִ֕ים אִ֥ם לִבֵּ֛נוּ לֹ֥א יַרְשִׁ֖יעַ אֹתָ֑נוּ יֵ֥שׁ לָ֛נוּ בִּטְחָ֖ה לִפְנֵ֥י הָֽאֱלֹהִֽים ׃ 22 וְכֹ֛ל אֲשֶׁ֥ר נִשְׁאַ֖ל נִקַּ֣ח מִמֶּ֑נּוּ כִּ֤י אֶת־מִצְוֹתָיו֨ אֲנַ֣חְנוּ שֹֽׁמְרִ֔ים וְאֵ֧ת הַדְּבָרִ֛ים הַנִּרְצִ֥ים לְפָנָ֖יו אֲנַ֥חְנוּ עֹשִֽׂים ׃ 23 וְזֹ֥את הִ֖יא מִצְוָת֑וֹ כִּ֣י נַֽאֲמִ֗ין בְּשֵׁ֤ם בְּנוֹ֨ יֵשׁ֣וּעַ הַמָּשִׁ֔יחַ וְנֶֽאֱהַב֨ אִ֣ישׁ אֶת־רֵעֵ֔הוּ כַּֽאֲשֶׁ֛ר נָתַ֥ן מִצְוָ֖ה לָֽנוּ ׃ 24 וְהַשֹּׁמֵ֣ר אֶת־מִצְוֹתָ֔יו שֹׁכֵ֥ן בּ֖וֹ וְה֣וּא ב֑וֹ וּבְזֹ֣את יָדַ֗עְנוּ כִּ֥י הוּא֙ שֹׁכֵ֣ן בָּ֔נוּ מִן־הָר֕וּחַ אֲשֶׁ֖ר נָ֥תַן לָֽנוּ ׃