אגרת יוחנן הראשונה
פרק ד

רוח האמת לעומת הרוח המתעה

1 אֲהוּבִ֗ים אַל־תַּֽאֲמִ֨ינוּ֨ לְכָל־ר֔וּחַ כִּ֚י אִם־בַּֽחֲנ֣וּ אֶת־הָֽרוּח֔וֹת אִ֛ם מֵאֵ֥ת הָֽאֱלֹהִ֖ים הֵ֑נָּה כִּ֣י נְבִ֥יאֵי שֶׁ֛קֶר רַבִּ֖ים יָֽצְא֥וּ בָֽעוֹלָֽם ׃ 2 בְּזֹ֥את תֵּֽדְע֖וּ אֶת־ר֣וּחַ הָֽאֱלֹהִ֑ים כָּל־ר֜וּחַ הַמּוֹדֶ֣ה ׀ אֶת־יֵשׁ֣וּעַ הַמָּשִׁ֗יחַ כִּ֥י בָא֨ בַּבָּשָׂ֔ר מֵאֵ֥ת הָֽאֱלֹהִ֖ים הֽוּא ׃ 3 וְכָל־ר֡וּחַ אֲשֶׁר֩ אֵינֶ֨נּוּ מוֹדֶ֜ה אֶת־יֵשׁ֣וּעַ הַמָּשִׁ֗יחַ כִּ֥י בָא֨ בַּבָּשָׂ֔ר אֵינֶ֖נּוּ מֵאֵ֣ת הָֽאֱלֹהִ֑ים וְזֶ֨ה ה֜וּא ר֣וּחַ ׀ יְרִ֣יב מָשִׁ֗יחַ אֲשֶׁ֨ר שְׁמַעְתֶּ֤ם עָלָיו֨ כִּ֣י יַב֔וֹא וְעַתָּ֛ה כְּבָ֥ר ה֖וּא בָּֽעוֹלָֽם ׃ 4 אַתֶּ֞ם מֵאֵ֨ת הָֽאֱלֹהִ֤ים ׀ אַתֶּ֣ם יְלָדִ֔ים וְנִצַּחְתֶּ֖ם אֹתָ֑ם כִּ֗י גָּד֥וֹל הוּא֨ אֲשֶׁ֣ר בָּכֶ֔ם מִמֶּ֖נּוּ אֲשֶׁ֥ר בָּֽעוֹלָֽם ׃ 5 הֵ֖מָּה מִן־הָֽעוֹלָ֣ם הֵ֑ם בַּֽעֲב֣וּר זֹ֗את מִן־הָֽעוֹלָם֨ הֵ֣ם מְדַבְּרִ֔ים וְהָֽעוֹלָ֖ם שֹׁמֵ֥עַ אֹתָֽם ׃ 6 אֲנַ֗חְנוּ מֵאֵ֣ת הָֽאֱלֹהִים֘ אֲנַחְנוּ֒ הַיּוֹדֵ֤עַ אֶת־הָֽאֱלֹהִים֨ שֹׁמֵ֣עַ אֹתָ֔נוּ וַֽאֲשֶׁ֤ר אֵינֶ֨נּוּ֨ מֵאֵ֣ת הָֽאֱלֹהִ֔ים אֵינֶ֥נּוּ שֹׁמֵ֖עַ אֹתָ֑נוּ מִזֹּ֣את ׀ אֲנַ֣חְנוּ יֽוֹדְעִ֗ים אֵ֚ת ר֣וּחַ הָֽאֱמֶ֔ת וְאֵ֖ת ר֥וּחַ הַתָּעֽוּת ׃

האלהים הוא אהבה

7 אֲהוּבִ֗ים נֶֽאֱהַ֥ב נָא֨ אִ֣ישׁ לְרֵעֵ֔הוּ כִּ֧י הָאַֽהֲבָ֛ה מֵאֵ֥ת הָֽאֱלֹהִ֖ים הִ֑יא וְכֹ֣ל הָֽאֹהֵ֗ב מֵאֵ֤ת הָֽאֱלֹהִים֨ נוֹלַ֔ד וְיוֹדֵ֖עַ אֶת־הָֽאֱלֹהִֽים ׃ 8 וַֽאֲשֶׁר֨ אֵינֶ֣נּוּ אֹהֵ֔ב לֹ֥א יָדַ֖ע אֶת־הָֽאֱלֹהִ֑ים כִּ֥י הָֽאֱלֹהִ֖ים ה֥וּא אַֽהֲבָֽה ׃ 9 בְּזֹ֣את נִגְלְתָ֔ה אַֽהֲבַ֥ת הָֽאֱלֹהִ֖ים לָ֑נוּ כִּי֩ שָׁלַ֨ח הָֽאֱלֹהִ֜ים אֶת־בְּנ֤וֹ יְחִידוֹ֨ אֶל־הַתֵּבֵ֔ל לְמַ֥עַן נִחְיֶ֖ה עַל־יָדֽוֹ ׃ 10 בְּזֹ֖את יֵ֣שׁ הָאַֽהֲבָ֑ה לֹ֠א כִּ֞י אֲנַ֣חְנוּ ׀ אָהַ֣בְנוּ אֶת־הָֽאֱלֹהִ֗ים כִּ֣י אִם־יַ֠עַן ה֤וּא אָהַ֣ב אֹתָ֔נוּ וְשָׁלַ֣ח אֶת־בְּנ֔וֹ כֹּ֖פֶר בְּעַ֥ד חַטּאוֹתֵֽינוּ ׃ 11 אֲהוּבִ֕ים אִ֥ם כָּ֛כָה אָהַ֥ב אֹתָ֖נוּ הָֽאֱלֹהִ֑ים גַּם־אֲנַ֣חְנוּ חַיָּבִ֔ים לְאַֽהֲבָ֖ה אִ֥ישׁ אֶת־רֵעֵֽהוּ ׃ 12 אֶת־הָֽאֱלֹהִ֕ים אִ֛ישׁ לֹ֥א רָאָ֖ה מֵֽעוֹלָ֑ם אִם־נֶֽאֱהַ֞ב אִ֣ישׁ אֶת־רֵעֵ֗הוּ הָֽאֱלֹהִים֨ שֹׁכֵ֣ן בָּ֔נוּ וְאַֽהֲבָת֛וֹ הִ֥יא נִשְׁלָמָ֖ה בָּֽנוּ ׃ 13 בְּזֹ֣את יָדַ֔עְנוּ כִּ֥י אֲנַ֛חְנוּ שֹֽׁכְנִ֥ים בּ֖וֹ וְה֣וּא בָ֑נוּ כִּ֥י מֵֽרוּח֖וֹ נָ֥תַן לָֽנוּ ׃ 14 וַֽאֲנַ֥חְנוּ רָאִ֖ינוּ וּמְעִידִ֑ים כִּ֣י הָאָ֔ב שָׁלַ֥ח אֶת־הַבֵּ֖ן מוֹשִׁ֥יעַ הָֽעוֹלָֽם ׃ 15 כָּל־אֲשֶׁ֣ר יוֹדֶ֔ה כִּ֛י יֵשׁ֥וּעַ ה֖וּא בֶּ֣ן הָֽאֱלֹהִ֑ים הָֽאֱלֹהִים֨ שֹׁכֵ֣ן בּ֔וֹ וְה֖וּא בָּֽאֱלֹהִֽים ׃ 16 וַֽאֲנַ֣חְנוּ ׀ יָדַ֣עְנוּ וְהֶֽאֱמַ֗נּוּ אֵ֚ת הָאַֽהֲבָ֔ה אֲשֶׁ֛ר יֵ֥שׁ לָֽאֱלֹהִ֖ים אֵלֵ֑ינוּ הָֽאֱלֹהִים֨ ה֣וּא אַֽהֲבָ֔ה וְהַשֹּׁכֵ֣ן בָּאַֽהֲבָ֗ה בָּֽאֱלֹהִים֨ שֹׁכֵ֔ן וְהָֽאֱלֹהִ֖ים בּֽוֹ ׃ 17 בְּזֹ֞את נִשְׁלָמָ֤ה הָאַֽהֲבָה֨ עִמָּ֔נּוּ לְמַ֗עַן תִּהְיֶ֥ה לָ֛נוּ בִּטְחָ֖ה בְּי֣וֹם הַמִּשְׁפָּ֑ט כִּ֗י כַּֽאֲשֶׁ֥ר הוּא֨ יֵ֔שׁ כֵּ֛ן גַּ֥ם אֲנַ֖חְנוּ בַּתֵּבֵ֥ל הַזֹּֽאת ׃ 18 אֵ֣ין מוֹרָא֘ בָּאַֽהֲבָה֒ כִּ֣י אִם־הָאַֽהֲבָ֤ה הַשְּׁלֵמָה֨ מְגָרֶ֣שֶׁת אֶת־הַמּוֹרָ֔א כִּ֣י הַמּוֹרָ֔א יֵ֥שׁ ל֖וֹ עֶ֑צֶב וְהַיָּרֵ֕א לֹ֥א נִשְׁלַ֖ם בָּאַֽהֲבָֽה ׃ 19 אֲנַ֖חְנוּ אֹֽהֲבִ֣ים אֹת֑וֹ כִּ֥י ה֛וּא רִאשׁ֖וֹן אָהַ֥ב אֹתָֽנוּ ׃ 20 אִם־אִ֣ישׁ יֹאמַ֗ר כִּ֠י אָֽנֹכִ֨י אֹהֵ֤ב אֶת־הָֽאֱלֹהִים֨ וְשֹׂנֵ֣א אֶת־אָחִ֔יו כֹּזֵ֖ב ה֑וּא כִּ֡י אֲשֶׁר֩ אֵינֶ֨נּוּ אֹהֵ֤ב אֶת־אָחִיו֨ אֵ֣ת אַשֶׁ֣ר רָאָ֔ה אֶת־הָֽאֱלֹהִ֗ים אֵ֚ת אֲשֶׁ֣ר לֹֽא־רָאָ֔ה אֵיכָ֥ה יוּכַ֖ל לְאַֽהֲבָֽה ׃ 21 וְהַמִּצְוָ֣ה הַזֹּ֔את יֵ֥שׁ לָ֖נוּ מֵֽאִתּ֑וֹ כִּ֚י הָֽאֹהֵ֣ב אֶת־הָֽאֱלֹהִ֔ים יֶֽאֱהַ֖ב גַּ֥ם אֶת־אָחִֽיו ׃