1 כָּל־הַמַּֽאֲמִ֗ין כִּ֤י יֵשׁ֨וּעַ֨ ה֣וּא הַמָּשִׁ֔יחַ נוֹלַ֖ד מֵאֵ֣ת הָֽאֱלֹהִ֑ים וְכֹ֤ל הָֽאֹהֵב֨ אֶת־הַמּוֹלִ֔יד אֹהֵ֛ב גַּ֖ם אֶת־הַנּוֹלָ֥ד מֵֽאִתּֽוֹ ׃ 2 בְּזֹ֣את יָדַ֔עְנוּ כִּ֛י אֲנַ֥חְנוּ אֹֽהֲבִ֖ים אֶת־בְּנֵ֣י הָֽאֱלֹהִ֑ים כַּֽאֲשֶׁ֤ר נֶֽאֱהַב֨ אֶת־הָֽאֱלֹהִ֔ים וְנִשְׁמֹ֖ר אֶת־מִצְוֹתָֽיו ׃ 3 כִּ֣י זֹ֥את הִיא֨ אַֽהֲבַ֣ת הָֽאֱלֹהִ֔ים כִּ֥י נִשְׁמֹ֖ר אֶת־מִצְוֹתָ֑יו וּמִצְוֹתָ֕יו לֹ֥א כְבֵד֖וֹת הֵֽנָּה ׃ 4 כִּ֣י כֹ֤ל הַנּוֹלָד֨ מֵאֵ֣ת הָֽאֱלֹהִ֔ים מְנַצֵּ֖חַ אֶת־הָֽעוֹלָ֑ם וְזֶ֨ה ה֧וּא הַנִּצָּח֛וֹן הַמְּנַצֵּ֥חַ אֶת־הָֽעוֹלָ֖ם אֱמֽוּנָתֵֽנוּ ׃ 5 מִ֥י ה֛וּא זֶ֖ה הַמְּנַצֵּ֣חַ אֶת־הָֽעוֹלָ֑ם אִם־לֹא֨ הַמַּֽאֲמִ֔ין כִּ֥י יֵשׁ֛וּעַ ה֖וּא בֶּ֥ן הָֽאֱלֹהִֽים ׃
6 זֶ֣ה ה֗וּא הַבָּ֞ה בְּמַ֤יִם וּבְדָם֨ יֵשׁ֣וּעַ הַמָּשִׁ֔יחַ לֹ֚א בַּמַּ֣יִם לְבַ֔ד כִּ֖י אִם־בַּמַּ֣יִם וּבַדָּ֑ם וְהָר֨וּחַ֨ ה֣וּא הַמֵּעִ֔יד כִּ֥י הָר֖וּחַ ה֥וּא הָֽאֱמֶֽת ׃ 7 כִּ֗י שְׁלֹשָׁ֥ה הֵ֨מָּה֨ הַמְּעִידִ֣ים בַּשָּׁמַ֔יִם הָאָ֥ב הַדָּבָ֖ר וְר֣וּחַ הַקֹּ֑דֶשׁ וּשְׁלֹשָׁ֥ה אֵ֖לֶּה אֶחָ֥ד הֵֽמָּה ׃ 8 וּשְׁלֹשָׁ֥ה הֵ֨מָּה֨ הַמְּעִידִ֣ים בָּאָ֔רֶץ הָר֥וּחַ וְהַמַּ֖יִם וְהַדָּ֑ם וּשְׁלֹשָׁ֥ה אֵ֖לֶּה לָֽאֶחָ֥ד הֵֽמָּה ׃ 9 אִ֣ם אֶת־עֵד֤וּת הָֽאֲנָשִׁים֨ אֲנַ֣חְנוּ מְקַבְּלִ֔ים עֵד֥וּת הָֽאֱלֹהִ֖ים גְּדוֹלָ֣ה מִמֶּ֑נָּה כִּ֣י זֹ֥את הִיא֨ עֵד֣וּת הָֽאֱלֹהִ֔ים אֲשֶׁ֥ר הֵעִ֖יד עַל־בְּנֽוֹ ׃ 10 הַמַּֽאֲמִין֨ בְּבֶ֣ן הָֽאֱלֹהִ֔ים יֵ֥שׁ ל֛וֹ הָֽעֵד֖וּת בְּנַפְשׁ֑וֹ אֲשֶׁר֩ אֵינֶ֨נּוּ מַֽאֲמִ֜ין לָֽאֱלֹהִ֗ים לְכֹזֵב֨ שָׂ֣ם אֹת֔וֹ יַ֗עַן לֹ֤א הֶֽאֱמִין֨ בָּֽעֵד֔וּת אֲשֶׁ֛ר הֵעִ֥יד הָֽאֱלֹהִ֖ים עַל־בְּנֽוֹ ׃ 11 וְזֹ֥את הִיא֙ הַתְּעוּדָ֔ה כִּ֣י חַיֵּ֥י עוֹלָ֛ם נָ֥תַן לָ֖נוּ הָֽאֱלֹהִ֑ים וְהַֽחַיִּ֥ים הָאֵ֖לֶּה בִּבְנ֥וֹ הֵֽמָּה ׃ 12 מִ֗י אֲשֶׁ֨ר יֵ֥שׁ לוֹ֨ הַבֵּ֔ן יֵ֥שׁ ל֖וֹ הַֽחַיִּ֑ים וַֽאֲשֶׁ֨ר אֵ֥ין לוֹ֨ בֶּ֣ן הָֽאֱלֹהִ֔ים אֵ֥ין ל֖וֹ הַֽחַיִּֽים ׃ 13 אֶת־אֵ֨לֶּה֨ כָּתַ֣בְתִּי אֲלֵיכֶ֔ם הַמַּֽאֲמִינִ֖ים בְּשֵׁ֣ם בֶּן־הָֽאֱלֹהִ֑ים לְמַ֣עַן תֵּֽדְע֗וּ כִּ֣י יֵ֤שׁ לָכֶם֨ חַיֵּ֣י עֽוֹלָמִ֔ים וּלְמַ֣עַן תַּֽאֲמִ֔ינוּ בְּשֵׁ֖ם בֶּ֥ן הָֽאֱלֹהִֽים ׃ 14 וְזֹ֥את הִיא֨ הַבִּטְחָ֔ה אֲשֶׁ֛ר יֵ֥שׁ לָ֖נוּ אֵלָ֑יו כִּ֗י אִם־נִשְׁאַ֤ל מְא֨וּמָה֨ כְּפִ֣י רְצוֹנ֔וֹ יִשְׁמַ֖ע אֹתָֽנוּ ׃ 15 וְאִ֣ם נֵדַ֔ע כִּ֥י יִשְׁמַ֖ע אֹתָ֑נוּ כֹּ֞ל אֲשֶׁ֣ר ׀ אֲנַ֣חְנוּ שֹֽׁאֲלִ֗ים יָדַ֜עְנוּ כִּ֤י נְקַבֵּל֨ אֶת־הַשְּׁאֵל֔וֹת אֲשֶׁ֥ר שָׁאַ֖לְנוּ מִמֶּֽנּוּ ׃ 16 אִם־אִ֡ישׁ יִרְאֶ֣ה אֶת־אָ֠חִיו חֹטֵ֞א חֵ֣טְא ׀ לֹ֣א לַמָּ֗וֶת יִשְׁאַ֞ל וְיִתֵּ֥ן לוֹ֨ חַיִּ֔ים לַחֹֽטְאִ֖ים לֹ֣א לַמָּ֑וֶת יֵ֚שׁ חֵ֣טְא לַמָּ֔וֶת לֹ֣א בְעַ֥ד זֶ֛ה אֲנִ֥י אֹמֵ֖ר כִּ֥י יִשְׁאָֽל ׃ 17 כָּל־עַוְלָ֖ה חֵ֣טְא הִ֑יא וְיֵ֥שׁ חֵ֖טְא לֹ֥א לַמָּֽוֶת ׃ 18 יָדַ֕עְנוּ כִּ֣י כֹ֧ל הַנּוֹלָ֛ד מֵאֵ֥ת הָֽאֱלֹהִ֖ים אֵינֶ֣נּוּ חֹטֵ֑א כִּי֩ אִם־הַנּוֹלָ֨ד מֵאֵ֤ת הָֽאֱלֹהִים֨ שֹׁמֵ֣ר אֶת־נַפְשׁ֔וֹ וְהָרָ֖ע לֹֽא־יִגַּ֥ע בּֽוֹ ׃ 19 יָדַ֕עְנוּ כִּ֛י מֵאֵ֥ת הָֽאֱלֹהִ֖ים אֲנָ֑חְנוּ וְכָל־הָֽעוֹלָ֖ם בָּרָ֥ע מֻנָּֽח ׃ 20 וְיָדַ֜עְנוּ כִּ֣י ׀ בֶּן־הָֽאֱלֹהִ֣ים בָּ֗א וְנָתַ֨ן לָ֤נוּ תְבוּנָה֨ לְמַ֤עַן נֵדַע֨ אֶת־הָֽאֲמִתִּ֔י וַֽאֲנַ֣חְנוּ בָֽאֲמִתִּ֔י בִּבְנ֖וֹ יֵשׁ֣וּעַ הַמָּשִׁ֑יחַ זֶ֥ה ה֛וּא הָֽאֱלֹהִ֥ים הָֽאֲמִתִּ֖י וְחַיֵּ֥י הָעֽוֹלָמִֽים ׃ 21 יְלָדִ֕ים שִׁמְר֧וּ נַפְשְׁכֶ֛ם מִן־הָֽאֱלִילִ֖ים אָמֵֽן ׃
לאגרת יוחנן השניה