לאגרת שאול השניה אל התסלוניקים

אגרת שאול הראשונה אל טימותיאוס
פרק א

1 פָּא֞וּל שְׁלִ֣יחַ ׀ יֵשׁ֣וּעַ הַמָּשִׁ֗יחַ כְּפִ֤י פְקֻדַּת֨ אֱלֹהִ֣ים מֽוֹשִׁיעֵ֔נוּ וְהָֽאָד֛וֹן יֵשׁ֥וּעַ הַמָּשִׁ֖יחַ תִּקְוָתֵֽנוּ ׃ 2 אֶל־טִמֽוֹתִיּ֛וֹס בְּנִ֥י הַזַּ֖ךְ בָּֽאֱמוּנָ֑ה חֶ֣סֶד ׀ רַֽחֲמִ֣ים וְשָׁל֗וֹם מֵאֵת֨ הָֽאֱלֹהִ֣ים אָבִ֔ינוּ וְיֵשׁ֥וּעַ הַמָּשִׁ֖יחַ אֲדֹנֵֽינוּ ׃

אזהרה על תורה אחרת

3 כַּֽאֲשֶׁר֨ שָׁאַ֣לְתִּי אֹֽתְךָ֔ לָשֶׁ֥בֶת בְּאֶֽפֶס֖וֹס בְּלֶכְתִּ֣י לְמַקֶּדֹֽנִיָּ֑א לְמַ֤עַן תְּצַוֶּה֨ אֲחָדִ֔ים לְבִלְתִּ֥י הוֹר֖וֹת לֶ֥קַח אַחֵֽר ׃ 4 וּלְבִלְתִּ֣י הַקְשִׁ֔יב לִשְׁמוּע֥וֹת הֶ֖בֶל וּלְתֽוֹלְד֣וֹת בְּלִי־קֵ֑ץ הַמְּפִיק֣וֹת שְׁאֵל֔וֹת יוֹתֵ֛ר מֵֽהִבַּנ֥וּת אֱלֹהִ֖ים אֲשֶׁ֥ר בָּֽאֱמוּנָֽה ׃ 5 וְתַכְלִ֨ית הַמִּצְוָ֜ה הִ֗יא אַֽהֲבָ֞ה מִלֵּ֤ב טָהוֹר֨ וּמֵֽרַעְי֣וֹן ט֔וֹב וּמֵֽאֱמוּנָ֖ה בִּלְתִּ֥י מְחֻנָּֽפֶת ׃ 6 אֲשֶׁ֥ר מֵהֶ֣ם שָׂט֣וּ אֲחָדִ֑ים וְנֶֽהֶפְכ֖וּ אֶל־שִׂ֥יחַת הָֽבֶל ׃ 7 בְּחָפְצָ֥ם לִהְי֖וֹת מוֹרֵ֣י הַתּוֹרָ֑ה בִּבְלִ֣י הֲבִינָ֗ם אֵ֣ת אֲשֶׁ֥ר הֵם֨ מְדַבְּרִ֔ים גַּם־לֹ֕א אֵ֛ת אֲשֶׁ֥ר הֵ֖ם מַֽחֲלִיטִ֥ים עֲלֵיהֶֽם ׃ 8 אַ֣ךְ יָדַ֔עְנוּ כִּ֥י טוֹבָ֖ה הַתּוֹרָ֑ה אִם־אִ֛ישׁ יִשְׁתַּמֵּ֥שׁ בָּ֖הּ כְּפִ֥י הַתּוֹרָֽה ׃ 9 בְּדַעְתּ֣וֹ זֹ֔את כִּ֣י לְצַדִּ֔יק תּוֹרָ֖ה לֹ֣א הוּשָׂ֑מָה כִּי֩ אִם־לַֽעֲוִילִ֨ים וּלְמַמְרִ֜ים לִרְשַׁעִ֤ים וּלְחַטָּאִים֨ לִטְמֵאִ֣ים וְלַֽחֲלָלִ֔ים לִמְרַצְּחֵ֥י אָב֛וֹת וְלִמְרַצְּחֵ֥י אִמּ֖וֹת לְהֹֽרְגֵ֥י אָדָֽם ׃ 10 לְזֹנִ֞ים לְשֹֽׁכְבֵ֤י זָכָר֨ לְגֹֽנְבֵ֣י אָדָ֔ם לְכֹֽזְבִ֖ים לְנִשְׁבָּ֣עֵי שָׁ֑קֶר וְאִ֗ם אֵי־זֶה֨ דָּבָ֣ר אַחֵ֔ר עֹמֵ֛ד נֶ֖גֶד הַלֶּ֥קַח הַשָׁלֵֽם ׃ 11 כְּפִ֧י בְשׂוֹרַ֛ת כְּב֖וֹד הָֽאֱלֹהִ֣ים הַמְּבֹרָ֑ךְ אֲשֶׁ֥ר הָפְקְדָ֖ה אִתִּֽי ׃

הכרת טובה על רחמי אלהים

12 וַֽאֲנִ֣י מוֹדֶ֗ה לְיֵשׁ֧וּעַ הַמָּשִׁ֛יחַ אֲדֹנֵ֖ינוּ הַמְּחַזֵּ֣ק אֹתִ֑י כִּ֤י לְנֶֽאֱמָן֨ חָשַׁ֣ב אֹתִ֔י בְּשׂוּמ֥וֹ אֹתִ֖י אֶל־הַשֵּׁרֽוּת ׃ 13 אֵ֠ת אֲשֶׁ֨ר מִלְּפָנִ֥ים הָיָ֛ה מְגַדֵּ֥ף וּמְרַדֵּ֖ף וּמְחָרֵ֑ף אַ֣ךְ רֻחַ֔מְתִּי כִּ֗י בִּבְלִ֥י דַ֛עַת עָשִׂ֖יתִי בְּלֹֽא־אֱמוּנָֽה ׃ 14 וְהֶעְדִּ֤יף מְאֹד֨ חֶ֣סֶד אֲדֹנֵ֔ינוּ עִ֖ם אֱמוּנָ֣ה וְאַֽהֲבָ֑ה אֲשֶׁ֥ר הִ֖יא בְּיֵשׁ֥וּעַ הַמָּשִֽׁיחַ ׃ 15 נֶֽאֱמָ֣ן הַדָּבָ֔ר וְשֹׁוֶ֖ה לְכֹ֣ל קַבָּלָ֑ה כִּי֩ יֵשׁ֨וּעַ הַמָּשִׁ֜יחַ בָּ֤א אֶל־הָֽעוֹלָם֨ לְהֽוֹשִׁ֣יעַ חַטָּאִ֔ים אֲשֶׁ֥ר מֵהֶ֖ם הָֽרִאשׁ֥וֹן אָנֹֽכִי ׃ 16 אוּלָ֕ם בַּֽעֲב֥וּר זֹ֖את רֻחָ֑מְתִּי לְמַ֡עַן בִּ֣י בָ֠רִֽאשׁוֹנָה יַרְאֶ֞ה יֵשׁ֣וּעַ הַמָּשִׁ֗יחַ אֵ֚ת כָּל־אֹ֣רֶךְ אַפַּ֔יִם לְתַבְנִ֗ית לָֽעֲתִידִ֛ים לְהַֽאֲמִ֥ין בּ֖וֹ לְחַיֵּ֥י עֽוֹלָמִֽים ׃ 17 אַךְ֩ לְמֶ֨לֶךְ הָעֽוֹלָמִ֜ים בִּלְתִּ֤י נִשְׁחָת֨ בִּלְתִּ֣י נִרְאֶ֔ה הָֽאֱלֹהִ֤ים הָֽאֶחָד֨ הֶֽחָכָ֔ם כָּב֥וֹד וְה֛וֹד לְעֽוֹלְמֵ֥י עֽוֹלָמִ֖ים אָמֵֽן ׃ 18 אֶת־הַפְּקֻדָּ֣ה הַזֹּ֗את אֲנִ֨י שָׂ֤ם לְפָנֶ֨יךָ֨ בְּנִ֣י טִמֽוֹתִיּ֔וֹס כְּפִ֧י הַנְּבוּא֛וֹת הַהֹֽלְכ֥וֹת לְפָנִ֖ים עָלֶ֑יךָ לְמַ֨עַן֨ תִּצְבָּ֣א בָהֵ֔ן אֶת־עֲבוֹדַ֥ת הַצָּבָ֖א הַטּוֹבָֽה ׃ 19 בְּאָחְזְךָ֥ אֱמוּנָ֖ה וְרַעְי֣וֹן ט֑וֹב אֲשֶׁ֤ר אֲחָדִים֨ כְּהַזְנִיחָ֣ם אֹתָ֔הּ עַל־אֹד֣וֹת הָֽאֱמוּנָ֔ה שֻׁבְּר֖וּ כְּשִׁבְר֥וֹן אֳנִיָּֽה ׃ 20 אֲשֶׁ֥ר מֵהֶ֖ם הֽוּמֶנֶא֣וֹס וַֽאֲלֶכְסַנְדָּ֑ר אֲשֶׁ֨ר מָסַ֤רְתִּי אֹתָם֨ אֶל־הַשָּׂטָ֔ן לְמַ֥עַן יִוָּֽסְר֖וּ לְבִלְתִּ֥י גַדֵּֽף ׃

לפרק הבא








להפעלת המסגרות
load frameset