אגרת שאול הראשונה אל טימותיאוס
פרק ב

הוראות בנוגע לתפילה ולהתנהגות

1 לָכֵ֖ן אֲנִ֣י מְבַקֵּ֑שׁ כִּ֣י ׀ רִֽאשׁוֹנָ֣ה לַכֹּ֗ל תֵּֽעָשֶׂ֜ינָה תְּחִנּ֤וֹת תְּפִלּוֹת֨ תַּֽחֲנוּנִ֣ים וְתוֹד֔וֹת בְּעַ֖ד כָּל־בְּנֵ֥י אָדָֽם ׃ 2 בְּעַ֣ד מְלָכִ֔ים וְכֹ֛ל אֲשֶׁ֥ר הֵ֖ם בִּגְדֻלָּ֑ה לְמַ֨עַן נִהְיֶ֜ה חַיֵּ֤י שַׁלְוָה֨ וְהַשְׁקֵ֔ט בְּכָל־יִרְאַ֥ת אֱלֹהִ֖ים וְכִבּֽוּד ׃ 3 כִּ֣י זֹ֥את הִיא֨ יָפָ֣ה וְנִרְצָ֔ה לִפְנֵ֥י הָֽאֱלֹהִ֖ים מֽוֹשִׁיעֵֽנוּ ׃ 4 אֲשֶׁ֣ר הָפֵ֔ץ כִּ֛י כָּל־בְּנֵ֥י אָדָ֖ם יִוָּשֵׁ֑עוּ וְיָב֖וֹאוּ אֶל־הַכָּרַ֥ת הָֽאֱמֶֽת ׃ 5 כִּ֥י אֶחָ֖ד הָֽאֱלֹהִ֑ים וְאֶחָ֣ד ׀ מְמַצֵּ֗עַ בֵּ֤ין אֱלֹהִים֨ וּבֵ֣ין בְּנֵֽי־אָדָ֔ם הָאִ֖ישׁ יֵשׁ֥וּעַ הַמָּשִֽׁיחַ ׃ 6 אֲ֠שֶׁר נָתַ֧ן אֶת־נַפְשׁ֛וֹ פִּדְי֖וֹן בְּעַ֣ד הַכֹּ֑ל הַתְּעוּדָ֖ה בְּעִתּוֹתֶֽיהָ ׃ 7 אֲשֶׁ֨ר אֵלֶ֜יהָ הוּשַׂ֤מְתִּי אֲנִי֨ מְבַשֵּׂ֣ר וְשָׁלִ֔יחַ אֱמֶ֞ת אָֽנֹכִ֧י מְדַבֵּ֛ר בַּמָּשִׁ֖יחַ אֵינֶ֣נִּי מְכַזֵּ֑ב מוֹרֵ֥ה הַגּוֹיִ֖ם בֶּֽאֱמוּנָ֥ה וּבָֽאֱמֶֽת ׃ 8 עַל־כֵּן֨ חָפֵ֣ץ אֲנִ֔י כִּ֛י יִתְפַּלְל֥וּ הָֽאֲנָשִׁ֖ים בְּכָל־מָק֑וֹם בְּהָרִים֨ יָדַ֣יִם טְהוֹר֔וֹת בִּבְלִ֥י רֹ֖גֶז וּתְפוּנָֽה ׃ 9 וּכְמוֹ־כֵ֗ן כִּ֣י גַ֤ם הַנָּשִׁים֨ תַּעְדֶּ֨ינָה֨ מַֽעֲטֵ֣ה עֶ֔דִי בְּבֹ֥שֶׁת פָּנִ֖ים וּבִצְנִיע֑וּת לֹ֣א בְמַחְלָפ֗וֹת א֤וֹ בְזָהָב֨ א֣וֹ בְמַרְגָּֽלִיּ֔וֹת א֖וֹ בְּמַלְבּ֥וּשׁ יַקִּֽיר ׃ 10 כִּ֚י אִם־כְּנָאוָ֣ה לְנָשִׁ֔ים הַמַּֽאֲמִיר֖וֹת יִרְאַ֣ת אֱלֹהִ֑ים בְּמַֽעֲשִׂ֖ים טוֹבִֽים ׃ 11 אִשָּׁ֛ה בְּדֽוּמִיָּ֥ה תִלְמ֖וֹד בְּכָל־כְּנִיעָֽה ׃ 12 אַ֣ךְ לְאִשָּׁ֗ה אֵינֶ֖נִּי מַרְשֶׁה֨ לְלַמֵּ֔ד וְגַם־לֹ֖א לְהִשְׂתָּרֵ֣ר עַל־הָאִ֑ישׁ כִּ֖י אִם־לִהְי֥וֹת בְּדֽוּמִיָּֽה ׃ 13 כִּ֥י אָדָ֖ם רִאשׁ֣וֹן נוֹצָ֑ר אַֽחֲרֵי־כֵ֖ן חַוָּֽה ׃ 14 וְאָדָ֖ם לֹ֣א הֻשָּׁ֑א כִּ֤י אִם־הָֽאִשָּׁה֨ הַמֻּשָּׁאָ֔ה בַּֽעֲבֵרָ֖ה הָיָֽתָה ׃ 15 אַ֥ךְ תִּוָּשַׁ֖ע בְּלֶ֣דֶת בָּנִ֑ים אִ֣ם תַּֽעֲמֹ֗דְנָה בֶּֽאֱמוּנָ֧ה וְאַֽהֲבָ֛ה וּקְדֻשָּׁ֖ה עִ֥ם צְנִיעֽוּת ׃