אגרת שאול הראשונה אל טימותיאוס
פרק ה

חובות כלפי המאמינים

1 בְּזָקֵן֨ אַל־תִּגְעַ֔ר כִּ֥י אִם־הַזְהִיר֖וֹ כְּאָ֑ב צְעִירִ֖ים כְּאַחִֽים ׃ 2 זְקֵנ֖וֹת כְּאִמּ֑וֹת צְעִיר֛וֹת כְּאַחְי֖וֹת בְּכָל־טָֽהֳרָֽה ׃ 3 אַלְמָנ֖וֹת כַּבֵּ֑דָה אֲשֶׁ֥ר אָמְנָ֖ם אַלְמָנ֥וֹת הֵֽנָּה ׃ 4 וְאִ֡ם אֵי־ז֣וּ אַלְמָנָה֩ יִהְי֨וּ לָ֜הּ בָּנִים֘ א֣וֹ צֶֽאֱצָאִים֒ תִּלְמֹ֣דְנָה בָרִֽאשׁוֹנָ֗ה כִּ֣י בֵיתָ֤ן שֶׁלָּהֶן֨ יִֽירְא֣וּ אֶת־הָֽאֱלֹהִ֔ים וִֽישַׁלְּמ֥וּ גְמ֖וּל לְהֽוֹרֵיהֶ֑ם כִּ֣י זֹ֔את טוֹבָ֥ה וּרְצוּיָ֖ה לִפְנֵ֥י הָֽאֱלֹהִֽים ׃ 5 אַ֣ךְ אֲשֶׁ֥ר אָמְנָ֛ם אַלְמָ֥נָה הִ֖יא וְגַלְמוּדָ֑ה מְקַוָּ֣ה אֶל־הָֽאֱלֹהִ֗ים וּמַתְמֶ֧דֶת בִּתְחִנּ֛וֹת וּבִתְפִלּ֖וֹת לַ֥יְלָה וָיֽוֹם ׃ 6 אַ֚ךְ הַמִּתְעַנֶּ֔גֶת בַּֽחֲיוֹתָ֖הּ מֵֽתָה ׃ 7 וְאֶת־אֵ֖לֶּה צַ֑ו לְמַ֥עַן תִּהְיֶ֖ינָה בִּבְלִ֥י שִׁמְצָֽה ׃ 8 וְאִ֨ם אִ֜ישׁ לֹ֣א יַשְׁגִּ֗יחַ אֶל־אֵ֨לֶּה֨ אֲשֶׁ֣ר ל֔וֹ וּבְיוֹתֵ֖ר אֶל־בְּנֵ֣י בֵית֑וֹ בָּֽאֱמוּנָ֣ה כִחֵ֔שׁ וְרָ֥ע ה֖וּא מִבִּלְתִּי־מַֽאֲמִֽין ׃ 9 אַלְמָנָה֨ תִּבָּחֵ֔ר אֲשֶׁ֛ר אֵינֶ֥נָּה פְחוּתָ֖ה מִשִּׁשִּׁ֣ים שָׁנָ֑ה וְהָ֣יְתָ֔ה אֵ֖שֶׁת אִ֥ישׁ אֶחָֽד ׃ 10 הַמּֽוּעָדָ֖ה בְּמַֽעֲשִׂ֣ים טוֹבִ֑ים אִם־גִּדְּלָ֨ה בָנִ֜ים אִם־קִבְּלָ֣ה גֵרִ֗ים אִם־רָֽחֲצָה֨ רַגְלֵ֣י הַקְּדוֹשִׁ֔ים אִם־הֵפִ֤יקָה עֵ֨זֶר֨ לַמְּעֻנִּ֔ים אִם־רָֽדְפָ֖ה כָּל־מַ֥עֲשֶׂה טּֽוֹב ׃ 11 אַ֛ךְ מֵֽאַלְמָנ֥וֹת צְעִיר֖וֹת הִשָּׁאֵ֑ל כִּ֗י כַּֽאֲשֶׁ֤ר תַּעְגַּ֨בְנָה֨ נֶ֣גֶד הַמָּשִׁ֔יחַ תַּחְפֹּ֖צְנָה לְהִנָּשֵֽׂא ׃ 12 וְיֵ֥שׁ לָהֶ֖ן הַרְשָׁעָ֑ה כִּ֛י אֶת־הָֽאֱמוּנָ֥ה הָרִֽאשׁוֹנָ֖ה נִאֵֽצוּ ׃ 13 וְיַ֣חַד עִ֣ם זֹ֗את גַּ֤ם עֲצֵלוֹת֨ הֵ֔ן וְלֹֽמְד֖וֹת לִסְבֹּ֣ב בַּבָּתִּ֑ים וְלֹ֨א לְבַ֜ד עֲצֵל֗וֹת כִּ֣י אִם־גַּ֤ם מְבַטְּאוֹת֨ וְרֹֽדְפ֣וֹת זָר֔וֹת מְמַלְל֕וֹת אֵ֥ת אֲשֶׁ֖ר אֵ֥ין רָאֽוּי ׃ 14 לָכֵ֣ן ׀ אֲנִ֣י רֹצֶ֗ה כִּ֣י הַצְּעִיר֤וֹת תִּנָּשֶׂ֨אנָה֨ וְתֵלַ֣דְנָה בָנִ֔ים וּתְנַהֵ֖לְנָה אֶת־הַבָּ֑יִת וְלֹ֨א תִתֵּ֧נָּה לַמִּתְנַגֵּ֛ד כָּל־עֲלִילָ֖ה לִגְדוּפָֽה ׃ 15 כִּ֣י אֲחָד֔וֹת כְּבָ֥ר הָֽפְכ֖וּ אַֽחֲרֵ֥י הַשָּׂטָֽן ׃ 16 אִם֩ אֵיזֶ֨ה מַֽאֲמִ֜ין א֣וֹ מַֽאֲמֶ֗נֶת יֵ֣שׁ לוֹ֘ אַלְמָנוֹת֒ יָפִ֤יק לָהֶן֨ עֵ֔זֶר וְלֹ֥א תָכְבַּ֖ד הַקְּהִלָּ֑ה לְמַ֗עַן תָּפִ֥יק עֵ֨זֶר֨ לָאֵ֔לֶּה אֲשֶׁ֥ר אָמְנָ֖ם אַלְמָנ֥וֹת הֵֽנָּה ׃ 17 הַזְּקֵנִים֨ הַמְּנַֽהֲלִ֣ים הֵיטֵ֔ב יֵחָֽשְׁב֥וּ שֹׁוִ֖ים לְמִשְׁנֵ֣ה כָב֑וֹד וּבְיוֹתֵ֣ר אֵ֔לֶּה הַמִּתְעַמְּלִ֥ים בַּדָּבָ֖ר וּבַלֶּֽקַח ׃ 18 כִּ֤י הַכְּתָב֨ אֹמֵ֔ר לֹֽא־תַחְסֹ֥ם שׁ֖וֹר בְּדִישׁ֑וֹ וְע֕וֹד הַפֹּעֵ֖ל שֹׁוֶ֥ה לִשְׂכָרֽוֹ ׃ 19 נֶ֣גֶד זָקֵ֔ן אַל־תְּקַבֵּ֖ל שִׂטְנָ֑ה זֽוּלָתִ֕י עַל־פִּ֛י שְׁנַ֥יִם אֽוֹ־שְׁלֹשָׁ֖ה עֵדִֽים ׃ 20 אֵ֚ת הַחֹ֣טְאִ֔ים בִּפְנֵ֥י הַכֹּ֖ל הוֹכֵ֑חַ לְ֠מַעַן גַּ֧ם הַנִּשְׁאָרִ֛ים תִּהְיֶ֥ה לָהֶ֖ם יִרְאָֽה ׃ 21 אֲנִ֨י מֵעִ֜יד לִפְנֵ֣י הָֽאֱלֹהִ֗ים וְהָֽאָד֛וֹן יֵשׁ֥וּעַ הַמָּשִׁ֖יחַ וְהַמַּלְאָכִ֣ים הַבְּחִירִ֑ים כִּ֣י ׀ תִּשְׁמ֣וֹר אֶת־אֵ֗לֶּה בִּבְלִי֨ קְדִימַ֣ת מִשְׁפָּ֔ט וְגַ֨ם בִּבְלִ֥י עֲשׂ֛וֹת מְא֖וּמָה לְפִ֥י הַנְּטִיָּֽה ׃ 22 אַל־תִּסְמֹ֨ךְ יָדַ֤יִם ׀ מַהֵר֨ עַל־אֵי־זֶ֣ה אִ֔ישׁ וְגַ֛ם לֹ֥א תִשְׁתַּתֵּ֖ף בַּֽחֲטָאֵ֣י אֲחֵרִ֑ים אֶת־עַצְמְךָ֖ טָה֥וֹר שְׁמֹֽר ׃ 23 אַל־תִּשְׁתֶּ֥ה ע֖וֹד מָ֑יִם כִּ֤י אִם־הִשְׁתַּמֵּשׁ֨ בִּמְעַ֣ט יַ֔יִן בַּֽעֲב֣וּר קֵבָֽתְךָ֔ וְרִפְיוֹנֶ֖יךָ אֲשֶׁ֥ר לִפְעָמִֽים ׃ 24 חֲטָאֵ֨י אֵי־זֶ֤ה אֲנָשִׁים֨ גְּלוּיִ֣ם מִקֶּ֔דֶם בְּקַדְּמָ֖ם לְמִשְׁפָּ֑ט אַ֣ךְ אֲחָדִ֔ים הֵ֥ם הֹֽלְכִ֖ים אַֽחֲרֵיהֶֽם ׃ 25 כְּמוֹ־כֵ֕ן גַּ֛ם הַמַּֽעֲשִׂ֥ים הַטּוֹבִ֖ים גְּלוּיִ֣ם מִקֶּ֑דֶם וַֽאֲשֶׁר֨ אֵינָ֣ם כֵּ֔ן לֹ֥א יֽוּכְל֖וּ לְהֵֽחָבֵֽא ׃