1 כָּל־הָֽעֲבָדִ֗ים אֲשֶׁ֥ר הֵ֨מָּה֨ תַּ֣חַת ע֔וֹל יַחְשְׁב֥וּ אֶת־אֲדֹֽנֵיהֶ֖ם שֹׁוִ֣ים לְכָל־כָּב֑וֹד לְמַ֗עַן לֹ֧א יְגֻדַּ֛ף שֵׁ֥ם הָֽאֱלֹהִ֖ים וְהַלֶּֽקַח ׃ 2 וְאֵ֡לֶּה אֲשֶׁ֣ר יֵֽשׁ־לָהֶם֩ אֲדֹנִ֨ים מַֽאֲמִינִ֜ים אַל־יִבְז֣וּ אֹתָ֗ם עַל־כִּי֘ אַחִ֣ים הֵמָּה֒ כִּ֣י ׀ אִם־בְּיוֹתֵ֣ר יַֽעַבְד֗וּם עַל־כִּ֞י נֶֽאֱמָנִ֥ים הֵם֨ וַֽאֲהוּבִ֔ים הַמְּקַבְּלִ֥ים חֵ֖לֶק בַּתַּגְמוּלָ֣ה הַזֹּ֑את
אֶת־אֵ֥לֶּה לַמֵּ֖ד וְהַזְהֵֽר ׃ 3 אִם־אִ֞ישׁ יְלַמֵּ֣ד ׀ שֹׁנֶ֣ה מִזֶּ֗ה וְלֹ֤א יִקְרַב֨ אֶל־הַדְּבָרִ֣ים הַשְּׁלֵמִ֔ים אֲשֶׁ֥ר לַֽאֲדֹנֵ֖ינוּ יֵשׁ֣וּעַ הַמָּשִׁ֑יחַ וְאֶל־הַלֶּ֕קַח אֲשֶׁ֥ר כְּפִ֖י יִרְאַ֥ת אֱלֹהִֽים ׃ 4 רְחַב־לֵ֣ב ה֗וּא וּמְא֨וּמָה֨ אֵינֶ֣נּוּ יוֹדֵ֔עַ כִּ֛י אִם־חֹלֵ֥ה שְׁאֵל֖וֹת וּמִלְחֶ֣מֶת מִלִּ֑ים אֲשֶׁ֨ר מֵהֶ֜ם נִהְיָ֗ה קִנְאָ֧ה ׀ מְרִיבָ֛ה גְּדֻפ֖וֹת חֲשָׁדִ֥ים רָעִֽים ׃ 5 מַצּ֨וֹת אֲנָשִׁ֜ים נִשְׁחָתֵ֤י הַדַּ֨עַת֨ וּשְׁכוּלֵ֣י הָֽאֱמֶ֔ת הַחֹֽשְׁבִ֧ים אֶת־הַבֶּ֛צַע לִהְי֖וֹת יִרְאַ֣ת אֱלֹהִ֑ים ס֖וּר מֵֽאֲנָשִׁ֥ים כָּאֵֽלֶּה ׃ 6 אַ֣ךְ יִרְאַ֤ת אֱלֹהִים֨ עִ֣ם הִסְתַּפְּק֔וּת בֶּ֥צַע גָּד֖וֹל הִֽיא ׃ 7 כִּ֣י מְא֔וּמָה לֹ֥א הֵבֵ֖אנוּ אֶל־הַתֵּבֵ֑ל וְגָל֕וּי כִּ֣י מְא֔וּמָה לֹ֥א נוּכַ֖ל לְהוֹצִֽיא ׃ 8 וּבִהְי֥וֹת לָ֖נוּ אֹ֣כֶל וּמַלְבּ֑וּשׁ נִסְתַּפֵּ֖ק בָּאֵֽלֶּה ׃ 9 אַ֣ךְ ׀ הַֽחֲפֵצִ֣ים לְהַֽעֲשִׁ֗יר נֹֽפְלִ֤ים בְּמַסָּה֨ וּבְמוֹקֵ֔שׁ וּבְתַֽאֲוֹ֥ת רַבּ֖וֹת כְּסִיל֣וֹת וּמַזִּיק֑וֹת הַמַּטְבִּיע֥וֹת אֶת־הָֽאֲנָשִׁ֖ים בְּשַׁ֥חַת וּבַֽאֲבַדּֽוֹן ׃ 10 כִּ֚י אַֽהֲבַ֣ת הַכֶּ֔סֶף הִ֖יא שֹׁ֣רֶשׁ כָּל־הָֽרָע֑וֹת אֲשֶׁ֨ר אֲחָדִ֜ים בְּעָרְגָ֣ם אֵלָ֗יו תָּעוּ֨ מִן־הָֽאֱמוּנָ֔ה וְדָֽקְר֥וּ אֶת־נַפְשָׁ֖ם בְּמַכְאֹבִ֥ים רַבִּֽים ׃
11 אַ֤ךְ אַתָּה֨ אִ֣ישׁ הָֽאֱלֹהִ֔ים מִן־הַדְּבָרִ֥ים הָאֵ֖לֶּה נ֑וּסָה וּרְדֹ֗ף צְדָקָה֨ יִרְאַ֣ת אֱלֹהִ֔ים אֱמוּנָ֥ה ׀ אַֽהֲבָ֖ה תּוֹחֶ֥לֶת ׀ נְעִימֽוּת ׃ 12 הִלָּחֵ֛ם מִלְחֶ֥מֶת הָֽאֱמוּנָ֖ה הַטּוֹבָ֑ה הַֽחֲזֵ֣ק ׀ בְּחַיֵּ֣י עֽוֹלָמִ֗ים אֲשֶׁ֨ר גַּ֤ם נִקְרֵ֨אתָ֨ אֲלֵיהֶ֔ם וְהוֹדֵ֨יתָ֨ אֶת־הַהֽוֹדָאָ֣ה הַטּוֹבָ֔ה בִּפְנֵ֖י עֵדִ֥ים רַבִּֽים ׃ 13 אֲנִי֨ מְצַוֶּ֣ה אֹֽתְךָ֔ בִּפְנֵ֥י הָֽאֱלֹהִ֖ים הַמְּחַיֶּ֣ה הַכֹּ֑ל וּבִפְנֵי֨ הַמָּשִׁ֣יחַ יֵשׁ֔וּעַ אֲשֶׁ֣ר הֵעִ֗יד לִפְנֵ֛י פָּנְטִיּ֥וֹס פִּֽילָט֖וֹס אֶת־הַהֽוֹדָאָ֥ה הַטּוֹבָֽה ׃ 14 כִּ֤י תִשְׁמֹר֨ אֶת־הַפְּקֻדָּ֔ה בִּבְלִ֥י כֶ֖תֶם וּבִבְלִ֣י שִׁמְצָ֑ה עַ֛ד הֽוֹפָעַ֥ת אֲדֹנֵ֖ינוּ יֵשׁ֥וּעַ הַמָּשִֽׁיחַ ׃ 15 אֲשֶׁ֨ר בְּעִתּ֜וֹ יַרְאֶ֣ה אֹתָ֗הּ בַּ֤עַל הָאֹ֨שֶׁר֨ וְהָֽאַדִּ֣יר לְבַדּ֔וֹ מֶ֥לֶךְ הַמְּלָכִ֖ים וַֽאֲד֥וֹן הָֽאֲדֹנִֽים ׃ 16 אֲשֶׁר֩ ל֨וֹ לְבַדּ֜וֹ יֵ֣שׁ אַל־מָ֗וֶת שֹׁכֵ֞ן אוֹר֘ אֵֽין־הִתְקָֽרְב֣וּת אֵלָיו֒ אֲשֶׁ֣ר אִ֗ישׁ לֹ֤א רָאָה֨ אֹת֔וֹ וְגַ֛ם לֹ֥א יוּכַ֖ל לִרְא֑וֹת אֲשֶׁ֣ר ל֗וֹ כָּב֛וֹד וּגְבוּרַ֥ת עוֹלָ֖ם אָמֵֽן ׃ 17 אֵ֣ת הָֽעֲשִׁירִים֩ בָּֽעוֹלָ֨ם הַזֶּ֜ה צַ֗ו לְבִלְתִּי֨ הַשְׂכִּ֣יל גְּבֹהָ֔ה וּלְבִלְתִּ֥י בְט֖וֹחַ בְּהֶ֣בֶל הָעֹ֑שֶׁר כִּ֚י אִם־בֵּֽאלֹהִ֣ים חַיִּ֔ים הַמֵּפִ֨יק לָ֧נוּ בַֽעֲתֶ֛רֶת אֶת־הַכֹּ֖ל לַֽהֲנָאָֽה ׃ 18 וְלִפְעֹ֣ל ט֔וֹב לֶעְשַׁ֖ר בְּמַֽעֲשִׂ֣ים טוֹבִ֑ים לִהְי֛וֹת מְחַלְּקִ֥ים בְּרָצ֖וֹן וַֽחֲפֵצֵ֥י הִתְחַבְּרֽוּת ׃ 19 אֹֽצְרִ֧ים לְנַפְשָׁ֛ם יְס֥וֹד ט֖וֹב לֶֽעָתִ֑יד לְמַ֥עַן יַשִּׂ֖יגוּ חַיֵּ֥י עֽוֹלָמִֽים ׃ 20 הָ֣הּ טִמֽוֹתִיּ֔וֹס אֵ֥ת הַפִּקָּד֖וֹן שְׁמ֑וֹר בִּשְׂט֞וֹת מִמִּבְטָ֥א רֵיק֨ וְחֹ֔ל וּמִלִּמּוּדֵ֣י הַֽהִתְנַגְּד֔וּת הַנִּקְרָאִ֥ים בְּשֶׁ֖קֶר דָּֽעַת ׃ 21 אֲשֶׁ֤ר אֲחָדִים֨ בְּהַֽאֲמִירָ֣ם אֹתָ֔הּ תָּע֖וּ מִן־הָֽאֱמוּנָ֑ה חֵ֥ן עִמְּךָ֖ אָמֵֽן ׃
לאגרת שאול השניה אל טימותיאוס