1 לָכֵ֗ן אִ֤ם הֽוּקַמְתֶּם֨ עִם־הַמָּשִׁ֔יחַ בַּקְּשׁ֖וּ אֵ֣ת הָֽעִלִּיּ֑וֹת אֲשֶׁר־שָׁם֨ ה֣וּא הַמָּשִׁ֔יחַ יוֹשֵׁ֖ב לִימִ֥ין הָֽאֱלֹהִֽים ׃ 2 אֵ֥ת הָֽעִלִּיּ֖וֹת הַשְׂכִּי֑לוּ לֹ֕א אֶת־אֵ֖לֶּה אֲשֶׁ֥ר עַל־הָאָֽרֶץ ׃ 3 כִּ֖י מַתֶּ֑ם וְחַיֵּיכֶ֛ם נִטְמְנ֥וּ עִם־הַמָּשִׁ֖יחַ בָּֽאֱלֹהִֽים ׃ 4 כַּֽאֲשֶׁ֛ר יִגָּלֶ֥ה הַמָּשִׁ֖יחַ חַיֵּ֑ינוּ אָ֧ז גַּם־אַתֶּ֛ם תִּגָּל֥וּ עִמּ֖וֹ בְּכָבֽוֹד ׃ 5 לָכֵ֕ן מֽוֹתְת֥וּ אֶת־אֶבְרֵיכֶ֖ם אֲשֶׁ֣ר עַל־הָאָ֑רֶץ זְנ֞וּת טֻמְאָ֤ה עֲגָבָה֨ תְּשׁוּקָ֣ה רָעָ֔ה וְאֵת֨ חֶמְדַּ֣ת הַבֶּ֔צַע אֲשֶׁ֥ר הִ֖יא עֲבוֹדַ֥ת אֶלִילִֽים ׃ 6 אֲשֶׁ֣ר בִּגְלָלָ֔ם בָּ֛א חֲר֥וֹן אַף־הָֽאֱלֹהִ֖ים עַל־בְּנֵ֥י הַמֶּֽרִי ׃ 7 אֲשֶׁ֥ר בָּהֶ֛ם גַּ֥ם אַתֶּ֖ם הִתְהַלַּכְתֶּ֣ם אָ֑ז כַּֽאֲשֶׁ֖ר חֲיִיתֶ֥ם בָּהֶֽם ׃ 8 אַ֣ךְ עַתָּ֔ה הָסִ֥ירוּ גַם־אַתֶּ֖ם אֶת־כָּל־אֵ֑לֶּה כַּ֗עַס חֵמָ֤ה ׀ רִשְׁעָה֨ גְּדוּפָ֔ה שִׂיחַ֥ת נְבָלָ֖ה מִפִּיכֶֽם ׃ 9 אַל־תְּכַזְּב֖וּ אִ֣ישׁ לְרֵעֵ֑הוּ כְּהִתְפַּשֶּׁטְכֶ֛ם אֶת־הָֽאָדָ֥ם הַיָּשָׁ֖ן עִם־פָּֽעֳלָֽיו ׃ 10 וּלְבַשְׁתֶּ֖ם אֶת־הֶֽחָדָ֑שׁ הַמְּחֻדָּשׁ֨ אֶל־הַכָּרָ֔ה כְּפִ֥י צֶ֖לֶם הַבֹּרֵ֥א אֹתֽוֹ ׃ 11 אֲשֶׁ֣ר שָׁם֩ לֹ֨א יֵ֜שׁ יְוָנִ֤י וִֽיהוּדִי֨ מוּלָ֣הּ וְעָרְלָ֔ה לֹעֵ֥ז ׀ סְכוּתִ֖י עֶ֣בֶד ׀ חָפְשִׁ֑י כִּ֥י אִם־הַמָּשִׁ֖יחַ הַכֹּ֥ל וּבַכֹּֽל ׃ 12 לָכֵ֣ן ׀ לִבְשׁ֗וּ כִּבְחִירֵ֤י הָֽאֱלֹהִים֨ קְדוֹשִׁ֣ים וַֽאֲהוּבִ֔ים מְעֵ֨י הָרַֽחֲמִ֜ים חֲנִינָ֗ה שִׁפְל֥וּת ר֛וּחַ נְעִימ֖וּת אֹ֥רֶךְ אַפָּֽיִם ׃ 13 וְסִבְל֣וּ ׀ אִ֣ישׁ אֶת־רֵעֵ֗הוּ וְסִלְחוּ֨ אִ֣ישׁ לְאָחִי֔ו אִם־יִהְיֶ֥ה לְאִ֛ישׁ רִ֖יב עַל־אֵי־זֶ֣ה אִ֑ישׁ וְכַֽאֲשֶׁ֤ר הַמָּשִׁ֨יחַ֨ סָלַ֣ח לָכֶ֔ם כֵּ֖ן גַּ֥ם אַתֶּֽם ׃ 14 וְעַ֥ל כָּל־אֵ֖לֶּה אַֽהֲבָ֑ה אֲשֶׁ֥ר הִ֖יא אֲגֻדַּ֥ת הַשְּׁלֵמֽוּת ׃ 15 וּשְׁל֤וֹם הָֽאֱלֹהִים֨ יִמְלֹ֣ךְ בְּלִבּֽוֹתֵיכֶ֔ם אֲשֶׁ֥ר אֶל־זֶ֛ה גַּ֥ם נִקְרֵאתֶ֖ם בִּגְוִיָּ֣ה אֶחָ֑ת וִהְי֖וּ בַּֽעֲלֵ֥י תוֹדָֽה ׃ 16 דְבָ֣ר הַמָּשִׁ֗יחַ יִשְׁכֹּ֥ן בָּכֶ֛ם בַּֽעֲתֶ֖רֶת בְּכָל־חָכְמָ֑ה וְלַמְּד֨וּ וְהַזְהִ֜ירוּ אִ֣ישׁ אֶת־רֵעֵ֗הוּ בִּתְהִלּ֤וֹת וּבְמִזְמוֹרִים֨ וְשִׁירִ֣ים רֽוּחֲנִיִּ֔ים מְשֽׁוֹרְרִ֥ים בַּחֵ֛ן בְּלִבּֽוֹתֵיכֶ֖ם לַֽיהֹוָֽה ׃ 17 וְכֹ֣ל ׀ אֲשֶׁ֣ר תַּֽעֲשׂ֗וּ בְּמִלָּה֨ א֣וֹ בְּפֹ֔עַל הַכֹּ֕ל בְּשֵׁ֖ם הָֽאָד֣וֹן יֵשׁ֑וּעַ בְּהוֹדֽוֹתְכֶ֛ם לָֽאֱלֹהִ֥ים הָאָ֖ב עַל־יָדֽוֹ ׃
18 הַנָּשִׁ֖ים הִכָּנַ֣עְנָה לְבַֽעֲלֵיכֶ֑ן כַּֽאֲשֶׁ֛ר נָכ֥וֹן ה֖וּא בָּֽאָדֽוֹן ׃ 19 הָֽאֲנָשִׁ֖ים אֶֽהֱב֣וּ אֶת־נְשֵׁיכֶ֑ם וְאַל־תִּתְמַרְמְר֖וּ אֲלֵיהֶֽן ׃ 20 הַבָּנִ֕ים שִׁמְע֥וּ אֶל־יֽוֹלְדֵיכֶ֖ם בַּכֹּ֑ל כִּ֛י זֶ֥ה ה֖וּא נִרְצֶ֥ה לַֽיהֹוָֽה ׃ 21 הָֽאָב֖וֹת אַל־תַּכְעִ֣יסוּ אֶת־בְּנֵיכֶ֑ם לְמַ֖עַן לֹ֥א יֵחָֽתּוּ ׃ 22 הָֽעֲבָדִ֕ים שִׁמְע֣וּ בַכֹּ֔ל אֶל־אֲדֹֽנֵיכֶ֖ם כְּפִ֣י הַבָּשָׂ֑ר לֹ֞א בַּֽעֲבוֹד֣וֹת עַ֗יִן כְּמוֹ֨ רְצוּיֵ֣י אֲנָשִׁ֔ים כִּ֚י אִם־בְּתֻמַּ֣ת לֵ֔ב יְרֵאִ֖ים אֶת־הָֽאֱלֹהִֽים ׃ 23 וְכֹל֨ אֲשֶׁ֣ר תַּֽעֲשׂ֔וּ מִנֶּ֖פֶשׁ פְּעָ֑לוּ כְּמוֹ֨ אֶל־הָֽאָד֔וֹן וְלֹ֖א לַֽאֲנָשִֽׁים ׃ 24 בְּדַעְתְּכֶ֗ם כִּ֣י מֵאֵ֧ת יְהֹוָ֛ה תִּקְּח֖וּ אֶת־גְּמ֣וּל הַיְרֻשָּׁ֑ה כִּ֛י אֶת־הָֽאָד֥וֹן הַמָּשִׁ֖יחַ אַתֶּ֥ם עֹֽבְדִֽים ׃ 25 אַ֣ךְ הַמְּעַוֵּ֔ל יִקַּ֕ח אֵ֖ת אֲשֶׁ֣ר עִוֵּ֑ל וְאֵ֖ין מַשֹּׂ֥א פָנִֽים ׃
לפרק הבא