אגרת יעקב
פרק א

1 יַֽעֲקֹ֗ב עֶ֧בֶד הָֽאֱלֹהִ֛ים וְהָֽאָד֖וֹן יֵשׁ֣וּעַ הַמָּשִׁ֑יחַ לִשְׁנֵים֩ עָשָׂ֨ר הַשְּׁבָטִ֜ים אֲשֶׁ֥ר הֵ֛ם בַּתְּפוּצָ֖ה שְׁאֵלַ֥ת שָׂלֽוֹם ׃

אמונה וחכמה

2 לְכָל־שִׂמְחָ֥ה חִשְׁב֖וּ אֶחָ֑י כַּֽאֲשֶׁ֥ר תִּפְּל֖וּ בְּמַסּ֥וֹת שֹׁנֽוֹת ׃ 3 בְּדַעְתְּכֶ֕ם כִּ֛י בְּחִינַ֥ת אֱמֽוּנַתְכֶ֖ם פֹּעֶ֥לֶת תּוֹחָֽלֶת ׃ 4 אַ֣ךְ הַתּוֹחֶ֔לֶת פֹּ֥עַל שָׁלֵ֖ם יְהִ֣י לָ֑הּ לְמַ֤עַן תִּהְיוּ֨ שְׁלֵמִ֣ים וּכְלִילִ֔ים בִּמְא֖וּמָה בִּלְתִּ֥י חֲסֵרִֽים ׃ 5 וְאִם֩ אִ֨ישׁ מִכֶּ֜ם יֶחְסַ֣ר חָכְמָ֗ה יִשְׁאַל֨ מֵֽאֱלֹהִ֔ים הַנֹּתֵ֥ן לַכֹּ֛ל בִּתְמִימ֖וּת וְאֵינֶ֣נּוּ מְחָרֵ֑ף וְתִנָּתֵ֖ן לֽוֹ ׃ 6 אַ֚ךְ יִשְׁאַ֣ל בֶּֽאֱמוּנָ֔ה בִּבְלִ֥י סַפֵּ֖ק מְא֑וּמָה כִּ֣י הַמְּסַפֵּ֗ק דֹּ֤מֶה הוּא֨ לְגַ֣ל הַיָּ֔ם הַנִּדָּ֥ף מִן־הָר֖וּחַ וְנִדְחָֽף ׃ 7 כִּ֗י אַל־יַחְשֹׁב֨ הָאִ֣ישׁ הַה֗וּא כִּ֛י יִקַּ֥ח מְא֖וּמָה מֵאֵ֥ת יְהֹוָֽה ׃ 8 אִ֚ישׁ כְּפ֣וּל נֶ֔פֶשׁ מְסֹעָ֖ר בְּכָל־דְּרָכָֽיו ׃

עוני ועושר

9 אַ֧ךְ יִתְהַלֵּ֛ל הָאָ֥ח הַשָּׁפָ֖ל בְּרֽוֹמְמוּתֽוֹ ׃ 10 וְהֶֽעָשִׁ֖יר בְּשִׁפְלוּת֑וֹ כִּ֛י כְּצִ֥יץ חָצִ֖יר יַֽעֲבֹֽר ׃ 11 כִּ֠י יָצָ֨א הַשֶּׁ֤מֶשׁ בְּחַמָּתוֹ֨ וְיִבֵּ֣שׁ אֶת־הֶֽחָצִ֔יר וְצִיצ֣וֹ נָפַ֔ל וִיפִ֥י מַרְאֵ֖הוּ אָבָ֑ד כֵּ֣ן גַּ֧ם הֶֽעָשִׁ֛יר בְּמַסָּעָ֖יו יִבּֽוֹל ׃

עמידה בניסיון

12 אַשְׁרֵ֥י הָאִ֖ישׁ הַסֹּבֵ֣ל מַסָּ֑ה כִּ֞י בִּהְיוֹת֣וֹ בָח֗וּן יִקַּח֨ אֶת־עֲטֶ֣רֶת הַֽחַיִּ֔ים אֲשֶׁ֛ר הִבְטִ֥יחַ יְהֹוָ֖ה לְאֹֽהֲבָֽיו ׃ 13 אַל־יֹ֤אמַר אִישׁ֨ בְּנֻסּוֹת֔וֹ כִּ֥י מֵֽאֱלֹהִ֖ים אֲנִ֣י מְנֻסֶּ֑ה כִּ֣י הָֽאֱלֹהִ֗ים בִּלְתִּ֤י מְנֻסֶּה֨ בְּרָע֔וֹת וְה֛וּא אֵינֶ֥נּוּ מְנַסֶּ֖ה אִֽישׁ ׃ 14 אַ֣ךְ כָּל־אִ֗ישׁ מְנֻסֶּ֥ה ה֛וּא בְּהִמָּֽשְׁכ֥וֹ וּבְהִפָּֽתוֹת֖וֹ מִתַּֽאֲוָתֽוֹ ׃ 15 אָ֣ז הַתַּֽאֲוָ֔ה כַּֽהֲרוֹתָ֖הּ תּוֹלִ֣יד חֵ֑טְא וְהַחֵ֥טְא כְּהִשָּֽׁלְמ֖וֹ יוֹלִ֥יד מָֽוֶת ׃ 16 אַל־תִּתְע֖וּ אַחַ֥י הָֽאֲהוּבִֽים ׃ 17 כָּל־מַתָּ֨ן ט֜וֹב וְכָל־מַתָּנָ֤ה שְׁלֵמָה֨ מִלְמַ֣עְלָה הוּ֔א יוֹרֵ֖ד מֵֽאֲבִ֣י הַמְּאוֹר֑וֹת אֲשֶׁ֨ר אֵ֤ין אִתּוֹ֨ חִלּ֔וּף א֖וֹ צֵ֥ל הִפּֽוּךְ ׃ 18 בִּרְצוֹת֕וֹ הוֹלִ֥יד אֹתָ֖נוּ בִּדְבַ֣ר אֱמֶ֑ת לְמַ֣עַן נִהְיֶ֔ה רֵאשִׁ֥ית בְּרוּאָ֖יו אֶחָֽת ׃

לשמוע ולעשות

19 לָכֵ֖ן אַחַ֣י הָֽאֲהוּבִ֑ים יְהִ֤י כָל־אִישׁ֨ מָהִ֣יר לִשְׁמ֔וֹעַ מְאַחֵ֥ר לְדַבֵּ֖ר מְאַחֵ֥ר לְחָרֽוֹן ׃ 20 כִּ֚י חֲר֣וֹן אִ֔ישׁ אֵינֶ֥נּוּ פֹעֵ֖ל צִדְקַ֥ת אֱלֹהִֽים ׃ 21 עַל־כֵּ֕ן הָסִ֥ירוּ כָל־טִנֹּ֖פֶת וַֽעֲתֶ֣רֶת רָעָ֑ה וּבַֽעֲנָוָ֗ה קַבְּלוּ֨ אֶת־הַדָּבָ֣ר הַנָּט֔וּעַ הַיָּכֹ֥ל לְהוֹשִׁ֖יעַ אֶת־נַפְשֽׁוֹתֵטיכֶֽם ׃ 22 אַ֗ךְ הֱיוּ֨ עֹשֵׂ֣י הַדָּבָ֔ר וְלֹ֥א שֹֽׁמְעִ֖ים לְבָ֑ד מְרַמִּ֖ים אֶת־נַפְשְׁכֶֽם ׃ 23 כִּ֗י אִם־יִהְיֶ֥ה אִ֛ישׁ שֹׁמֵ֥עַ דָּבָ֖ר וְלֹ֣א ׀ עֹשֶׂ֑ה ה֣וּא ׀ דֹּמֶ֣ה לְאִ֗ישׁ הַמִּתְבּוֹנֵ֛ן אֶת־פְּנֵ֥י מֽוֹלַדְתּ֖וֹ בְּמַרְאָֽה ׃ 24 כִּ֛י הִתְבּוֹנֵ֥ן אֶת־עַצְמ֖וֹ וְהָ֣לָךְ ל֑וֹ וּכְרֶ֥גַע שָׁכַ֖ח אֵ֥יךְ הָיָֽה ׃ 25 אַ֠ךְ הַמַּבִּ֞יט אֶל־תּוֹרַ֧ת הַֽחָפְשׁ֛וּת הַשְּׁלֵמָ֖ה וְעֹמֵ֣ד בָּ֑הּ הוּא֩ אֲשֶׁ֨ר לֹֽא־הָיָ֜ה שֹׁמֵ֣עַ שָׁכֵ֗חַ כִּ֚י אִם־עֹשֵׂ֣ה הַפְּעֻלָּ֔ה ה֛וּא יִהְיֶ֥ה מְאֻשָּׁ֖ר בְּמַֽעֲשֵֽׂהוּ ׃ 26 וְאִ֣ם אִ֣ישׁ בָּ֠כֶם מְדַמֶּ֞ה לִהְי֣וֹת ׀ עֹבֵ֣ד אֱלֹהִ֗ים וְלֹ֨א יְנַהֵ֤ג בְּמֶ֨תֶג֨ אֶת־לְשׁוֹנ֔וֹ כִּ֥י אִם־מַתְעֶ֖ה אֶת־לְבָב֑וֹ עֲבוֹדַ֛ת הָאִ֥ישׁ הַזֶּ֖ה הָֽבֶל ׃ 27 עֲבוֹדַ֣ת אֱלֹהִ֡ים טְהוֹרָה֩ וּבִלְתִּ֨י נִכְתָּמָ֜ה לִפְנֵ֛י הָֽאֱלֹהִ֥ים הָאָ֖ב זֹ֣את הִ֑יא לְבַקֵּ֞ר יְתֹמִ֤ים וְאַלְמָנוֹת֨ בְּעָנְיָ֔ם וְלִשְׁמ֨וֹר אִ֧ישׁ אֶת־נַפְשׁ֛וֹ בִּבְלִ֥י כֶ֖תֶם מִן־הַתֵּבֵֽל ׃