1 אַל־תִּהְי֛וּ מוֹרִ֥ים רַבִּ֖ים אֶחָ֑י בְּדַעְתְּכֶ֗ם כִּ֥י מִשְׁפָּ֛ט גָּד֥וֹל יֶ֖תֶר נִקָּֽח ׃ 2 כִּ֣י בְרַבּ֔וֹת אֲנַ֥חְנוּ נֹֽגְפִ֖ים כֻּלָּ֑נוּ וְאִם־אִישׁ֩ אֵינֶ֨נּוּ נֹגֵ֜ף בְּאֹ֗מֶר זֶ֥ה הוּא֨ גֶּ֣בֶר שָׁלֵ֔ם יָכֹ֛ל לְנַהֵ֥ג בְּמֶ֣תֶג אֵ֥ת כָּל־הַגְּוִיָּֽה ׃ 3 הִ֠נֵּה בְּפִיּ֨וֹת הַסּוּסִ֜ים אֲנַ֤חְנוּ מְשִׂימִים֨ מְתָגִ֔ים לְמַ֖עַן יִשָּׁ֣מְעוּ לָ֑נוּ וְאֵ֥ת כָּל־גְּוִיָּתָ֖ם אֲנַ֥חְנוּ מְסִבִּֽים ׃ 4 הִנֵּ֣ה ׀ גַּ֣ם הָֽאֳנִיּ֗וֹת אֲשֶׁ֥ר הֵ֨נָּה֨ גְּדוֹל֣וֹת כָּ֔כָה וְנִדְחָפ֖וֹת מֵֽרוּח֣וֹת קָשׁ֑וֹת מֽוּסַבּ֥וֹת הֵן֨ מִמָּשׁ֣וֹט מִצְעָ֔ר אֶל־אֲשֶׁ֛ר רְצ֥וֹן הַמַּנְהִ֖יג יַחְפֹּֽץ ׃ 5 כֵּ֣ן ׀ גַּ֣ם הַלָּשׁ֗וֹן אֵ֤בֶר קָטֹן֨ הִ֔יא וּמַגְבִּיהָ֖ה לְהִתְהַלֵּ֑ל הִנֵּה֨ אֵ֣שׁ מִצְעָ֔ר יַ֥עַר מַה־גַּד֖וֹל הִ֥יא מַצִּיתָֽה ׃ 6 וְהַלָּשׁ֕וֹן אֵ֥שׁ הִ֖יא עוֹלַ֣ם הָֽעַוְלָ֑ה כָּ֠כָה הֽוּשְׂמָ֨ה הַלָּשׁ֜וֹן בֵּ֣ין אֲבָרֵ֗ינוּ הַמַּכְתִּימָה֨ אֵ֣ת כָּל־הַגְּוִיָּ֔ה וּמְלַהֶ֨טֶת֨ אֶת־גַּלְגַּ֣ל הַתּֽוֹלָדָ֔ה וּמְלֻהֶ֖טֶת מֵאֵ֥ת גֵּֽיהִנֹּֽם ׃ 7 כִּ֗י כָּל־טֶ֜בַע חַיּ֨וֹת וְעוֹפ֤וֹת וּרְמָשִׂים֨ וְשֹֽׁכְנֵ֣י הַיָּ֔ם מוּשַׁ֥ךְ הוּא֨ וְהוּשַׁ֔ךְ עַל־יְדֵ֖י הַטֶּ֥בַע הָֽאֲנוֹשִֽׁי ׃ 8 אַ֣ךְ אֶת־הַלָּשׁ֗וֹן אֵ֥ין אֶחָ֛ד מִבְּנֵ֥י אָדָ֖ם יָכֹ֣ל לְהָשֵׁ֑ךְ רָעָ֣ה הִ֗יא אֲשֶׁר֨ לֹ֣א תֵֽעָצֵ֔ר מְלֵאָ֖ה חֲמַ֥ת מָֽוֶת ׃ 9 בָּ֛הּ מְבָֽרְכִ֥ים אֲנַ֖חְנוּ אֶת־הָֽאֱלֹהִ֣ים הָאָ֑ב וּבָ֗הּ מְקַלְלִ֤ים אֲנַ֨חְנוּ֨ אֶת־הָֽאֲנָשִׁ֔ים אֲשֶׁ֥ר נַֽעֲשׂ֖וּ בְּצֶ֥לֶם אֱלֹהִֽים ׃ 10 מֵעֶ֨צֶם֨ הַפֶּ֣ה הַה֔וּא יוֹצֵ֖את בְּרָכָ֣ה וּקְלָלָ֑ה לֹ֤א רָאוּי֨ אַחַ֔י לִהְי֥וֹת אֵ֖לֶּה כָּֽכָה ׃ 11 הֲיַבִּ֣יעַ הַמַּעְיָ֗ן מֵעֶ֨צֶם֨ הַנִּקְרָ֣ה הַהִ֔יא אֵ֥ת הַמָּת֖וֹק וְאֵ֥ת הַמָּֽר ׃ 12 הֲתוּכַ֨ל תְּאֵנָ֤ה ׀ אַחַי֨ לַֽעֲשׂ֣וֹת זֵיתִ֔ים א֥וֹ גֶ֖פֶן תְּאֵנִ֑ים כֵּ֗ן גַּ֣ם אֵ֤ין מַעְיָן֨ יָכֹ֣ל לְהוֹצִ֔יא מַ֥יִם מְלוּחִ֖ים וּמְתוּקִֽים ׃
13 מִ֛י חָכָ֥ם וְנָב֖וֹן בָּכֶ֑ם יַרְאֶ֗ה מִן־הַֽהִתְהַלְּכ֧וּת הַטּוֹבָ֛ה אֶת־מַֽעֲשָׂ֖יו בְּעַנְוַ֥ת הַֽחָכְמָֽה ׃ 14 אַ֗ךְ אִ֣ם קִנְאָ֥ה מָרָ֛ה יֵ֥שׁ בָּכֶ֖ם וּמְרִיבָ֣ה בִלְבַבְכֶ֑ם אַל־תִּתְהַלְל֥וּ וּתְשַׁקְר֖וּ נֶ֥גֶד הָֽאֱמֶֽת ׃ 15 אֵ֛ין הַֽחָכְמָ֥ה הַזֹּ֖את יוֹרֶ֣דֶת מִמָּ֑עַל כִּ֥י אִם־הִ֛יא אַרְצִ֥ית נַפְשִׁ֖ית שֵׁדִֽית ׃ 16 כִּ֗י בַּֽאֲשֶׁ֤ר קִנְאָה֨ וּמְרִיבָ֔ה שָׁ֚ם מְהוּמָ֔ה וְכֹ֖ל פֹּ֥עַל רָֽע ׃ 17 אַ֗ךְ הַֽחָכְמָה֨ אֲשֶׁ֣ר מִמַּ֔עַל בָּרִֽאשֹׁנָ֖ה טְה֣וֹרָה הִ֑יא אַֽחֲרֵי־כֵ֠ן שְׁלֵמָ֨ה ׀ סַלָּחָ֜ה קַלָּ֣ה לְהִוָּכֵ֗חַ מְלֵאָ֤ה רַֽחֲמִים֨ וּפְרִ֣י ט֔וֹב בִּבְלִ֛י הַכָּרַ֥ת פָּנִ֖ים וּבִבְלִ֥י חֹֽנֶף ׃ 18 וּפְרִ֧י הַצְּדָקָ֛ה נִזְרָ֥ע בְּשָׁל֖וֹם לְעֹשֵׂ֥י הַשָּׁלֽוֹם ׃
לפרק הבא