1 הָ֥בָה עַתָּ֖ה הָֽעֲשִׁירִ֑ים בְּכ֤וּ וְהֵילִילוּ֙ עַל־צָרֽוֹתֵיכֶ֔ם אֲשֶׁ֖ר תָּב֥וֹאנָה עֲלֵיכֶֽם ׃ 2 עָשְׁרְכֶ֖ם נִרְקָ֑ב וּבִגְדֵיכֶ֥ם נִהְי֖וּ אֲכ֥וּלֵי עָֽשׁ ׃ 3 זְהַבְכֶ֣ם וְכַסְפְּכֶם֘ נֶחְלְדוּ֒ וַֽחֲלֽוּדָתָ֞ם תִּהְיֶ֤ה לְעֵדוּת֨ בָּכֶ֔ם וְתֹאכַ֥ל אֶת־בְּשַׂרְכֶ֖ם כָּאֵ֑שׁ אֲצַרְתֶּ֥ם אוֹצָ֖ר בְּאַֽחֲרִ֥ית הַיָּמִֽים ׃ 4 הִנֵּה֩ שְׂכַ֨ר הַפֹּֽעֲלִ֜ים קֹֽצְרֵ֧י שְׂדֽוֹתֵיכֶ֛ם הַנִּגְרָ֥ע עַל־יְדֵיכֶ֖ם זוֹעֵ֑ק וְצַֽעֲק֣וֹת הַקֹּֽצְרִ֔ים בָּ֛אוּ בְּאָזְנֵ֖י יְהֹוָ֥ה צְבָאֽוֹת ׃ 5 הִתְעַדַּנְתֶּ֥ם עַל־הָאָ֖רֶץ וְהִתְעַנַּגְתֶּ֑ם כִּלְכַּלְתֶּם֨ אֶת־לִבּֽוֹתֵיכֶ֔ם כְּמ֖וֹ בְּי֥וֹם טִבְחָֽה ׃ 6 הִרְשַׁעְתֶּ֥ם הֲרַגְתֶּ֖ם אֶת־הַצַּדִּ֑יק וְאֵינֶ֥נּוּ מִתְנַגֵּ֖ד לָכֶֽם ׃
7 לָכֵ֗ן הַֽאֲרִ֤יכוּ ר֨וּחַ֨ אַחַ֔י עַ֖ד בִּיאַ֣ת הָֽאָד֑וֹן הִנֵּ֣ה הָֽאִכָּ֡ר מְחַכֶּה֩ לִפְרִ֨י הָֽאֲדָמָ֜ה הַיָּקָ֗ר בְּהַֽאֲרִ֥יךְ ר֨וּחַ֨ עָלָ֔יו עַ֧ד כִּֽי־יִקַּ֛ח גֶּ֖שֶׁם יוֹרֶ֥ה וּמַלְקֽוֹשׁ ׃ 8 הַֽאֲרִ֤יכוּ ר֨וּחַ֨ גַּ֣ם אַתֶּ֔ם כּֽוֹנְנ֖וּ אֶת־לִבּֽוֹתֵיכֶ֑ם כִּ֛י בִּיאַ֥ת הָֽאָד֖וֹן קָרֵֽבָה ׃ 9 אַל־תֵּאָ֨נְח֜וּ אִ֣ישׁ נֶ֤גֶד רֵעֵ֨הוּ֨ אַחַ֔י לְמַ֖עַן לֹ֣א תָרְשָׁ֑עוּ הִנֵּ֥ה הַשֹּׁפֵ֖ט לַפֶּ֥תַח עֹמֵֽד ׃ 10 קְח֨וּ אַחַ֜י לְתַבְנִ֤ית הַתְּלָאָה֨ וְאֹ֣רֵךְ הָר֔וּחַ אֶ֨ת־הַנְּבִיאִ֔ים אֲשֶׁ֥ר דִּבְּר֖וּ בְּשֵׁ֥ם יְהֹוָֽה ׃ 11 הִנֵּ֛ה אֲנַ֥חְנוּ מְאַשְּׁרִ֖ים אֶת־הַמְּיַֽחֲלִ֑ים אֶת־תּוֹחֶ֨לֶת אִיּ֜וֹב שְׁמַעְתֶּ֗ם וְאֵ֨ת תַּכְלִ֤ית יְהֹוָה֨ רְאִיתֶ֔ם כִּ֣י רַ֥ב חֶ֛סֶד וְרַח֖וּם יְהֹוָֽה ׃ 12 אַ֠ךְ לִפְנֵ֨י כָל־דְּבָרִ֜ים אַחַ֗י אַל־תִּשָּׁ֨בְע֜וּ לֹ֤א בַּשָּׁמַ֨יִם֨ וְלֹ֣א בָאָ֔רֶץ גַּם־לֹ֖א בְּכָל־שְׁבוּעָ֣ה אַחָ֑רֶת אַ֣ךְ יְהִ֞י הַכֵּ֨ן שֶׁלָּכֶ֤ם ׀ כֵּן֨ וְהַלֹּ֣א ׀ לֹ֔א לְמַ֛עַן לֹ֥א תִפְּל֖וּ בְּהַרְשָׁעָֽה ׃ 13 אִם־אִ֥ישׁ בָּכֶ֛ם מְעֻנֶּ֥ה בִתְלָאָ֖ה יִתְפַּלֵּ֑ל אִם־אִ֛ישׁ ט֥וֹב לֵ֖ב יְזַמֵּ֥ר תְּהִלּֽוֹת ׃ 14 אִם־חֹ֤לֶה אִישׁ֨ בָּכֶ֔ם יִקְרָ֥א אֵלָ֖יו אֶת־זִקְנֵ֣י הַקְּהִלָּ֑ה וְיִתְפַּלְל֣וּ עָלָ֔יו בְּמָשְׁחָ֥ם אֹת֛וֹ בְּשֶׁ֖מֶן בְּשֵׁ֥ם יְהֹוָֽה ׃ 15 וּתְפִלַּ֤ת הָֽאֱמוּנָה֨ תּוֹשִׁ֣יעַ אֶת־הַֽחֹלֶ֔ה וְיָקִ֥ים אֹת֖וֹ יְהֹוָ֑ה וְאִ֥ם הָיָ֛ה עֹשֵׂ֥ה חֲטָאִ֖ים יִסָּ֥לַח לֽוֹ ׃ 16 הִתְוַדּ֞וּ אִ֤ישׁ לְרֵעֵ֨הוּ֨ אֶת־הַפְּשָׁעִ֔ים וְהִתְפַּלְל֗וּ אִ֛ישׁ בְּעַ֥ד רֵעֵ֖הוּ לְמַ֣עַן תֵּֽרָפֵ֑אוּ תְּפִלַּ֥ת צַדִּ֛יק חֲזָקָ֖ה תּוּכַ֥ל הַרְבֵּֽה ׃ 17 אֵֽלִיָּ֗הוּ הָיָ֨ה אִ֤ישׁ חַלָּשׁ֨ דֹּ֣מֶה לָּ֔נוּ וַיִּתְפַּלֵּ֣ל בִּתְפִלָּ֔ה לְבִלְתִּ֖י הִמָּטֵ֑ר וְלֹ֤א הִמְטִיר֨ עַל־הָאָ֔רֶץ שָׁלֹ֥שׁ שָׁנִ֖ים וְשִׁשָּׁ֥ה חֳדָשִֽׁים ׃ 18 וְהִתְפַּלֵּ֖ל ע֑וֹד וְהַשָּׁמַ֨יִם֨ נָֽתְנ֣וּ מָטָ֔ר וְהָאָ֖רֶץ הִצְמִ֥יחָה אֶת־פִּרְיָֽהּ ׃ 19 אַחַ֕י אִם־אִ֥ישׁ בָּכֶ֖ם יִתְעֶ֣ה מִן־הָֽאֱמֶ֑ת וִֽישׁוֹבֵ֥ב אֹת֖וֹ אִֽישׁ ׃ 20 יֵדַ֗ע כִּ֣י הַמְשׁוֹבֵ֤ב חַטָּא֨ מִתּוֹעַ֣ת דַּרְכּ֔וֹ יוֹשִׁ֥יעַ נֶ֖פֶשׁ מִן־הַמָּ֑וֶת וִֽיכַסֶּ֖ה הֲמ֥וֹן חֲטָאִֽים ׃
לאגרת פטרוס הראשונה