1 יְהוּדַ֗ה עֶ֛בֶד יֵשׁ֥וּעַ הַמָּשִׁ֖יחַ וַֽאֲחִ֣י יַֽעֲקֹ֑ב אֶל־הַנֶּֽאֱהָבִים֨ בֵּֽאלֹהִ֣ים הָאָ֔ב וּבְיֵשׁ֥וּעַ הַמָּשִׁ֖יחַ נִשְׁמָרִ֥ים וּמְקֹֽרָאִֽים ׃ 2 חֵ֣ן לָכֶ֔ם וְשָׁל֥וֹם וְאַֽהֲבָ֖ה יִרְבֶּֽה ׃
3 אֲהוּבִ֗ים בַּֽעֲשׂוֹתִ֤י כָל־חֲרִיצוּת֨ לִכְתּ֣וֹב אֲלֵיכֶ֔ם עַל־אֹד֖וֹת הַיְשׁוּעָ֣ה הַכְּלָלִ֑ית הָיָ֨ה לִ֥י צֹ֨רֶךְ֨ לִכְתּ֣וֹב אֲלֵיכֶ֔ם וּלְהַזְהִ֨יר אֶתְכֶ֜ם לְהִלָּחֵ֣ם לָֽאֱמוּנָ֗ה הַנִּמְסָרָ֛ה פַּ֥עַם אַחַ֖ת אֶל־הַקְּדוֹשִֽׁים ׃ 4 כִּ֣י הִתְגַּנְּב֤וּ לָבוֹא֨ אֲנָשִׁ֣ים אֲחָדִ֔ים הַנִּכְתָּבִ֥ים מִקֶּ֖דֶם אֶל־הַמִּשְׁפָּ֣ט הַזֶּ֑ה רְשָׁעִ֗ים הַמְהַפְּכִ֞ים אֶת־חֶ֤סֶד אֱלֹהֵ֨ינוּ֨ לְזִמָּ֔ה וּמְכַֽחֲשִׁ֞ים בַּמֹּשֵׁ֤ל הַיָּחִיד֨ הָֽאֱלֹהִ֔ים וּבַֽאֲדֹנֵ֖ינוּ יֵשׁ֥וּעַ הַמָּשִֽׁיחַ ׃ 5 וַֽאֲנִ֗י חָפֵץ֨ לְהַזְכִּ֣יר אֶתְכֶ֔ם בְּדַעְתְּכֶ֥ם זֹ֖את כְּבָ֑ר כִּ֣י יְהֹוָ֗ה כְּהֽוֹשִׁיע֤וֹ אֶת־הָעָם֨ מֵאֶ֣רֶץ מִצְרַ֔יִם אַֽחֲרֵי־כֵ֕ן הֶֽאֱבִ֥יד אֶת־אֵ֖לֶּה אֲשֶׁ֥ר לֹא־הֶֽאֱמִֽינוּ ׃ 6 וְגַ֣ם אֶת־הַמַּלְאָכִ֗ים אֲשֶׁ֨ר לֹ֤א שָֽׁמְרוּ֨ אֶת־קַדְמָתָ֔ם כִּ֥י אִם־עָֽזְב֖וּ אֶת־זְבוּלָ֑ם שָׁמַ֞ר לְמִשְׁפַּ֨ט הַיּ֧וֹם הַגָּד֛וֹל תַּ֥חַת אֹ֖פֶל בְּמֽוֹסְר֥וֹת עוֹלָֽם ׃ 7 כִּסְד֨וֹם וַֽעֲמֹרָ֜ה וְהֶֽעָרִ֣ים סְבִיבֽוֹתֵיהֶ֗ן בִּזְנוֹתָ֞ן בְּדֶ֤רֶךְ דֹּמֶה֨ לָהֶ֔ם וּבְלֶכְתָּ֕ן אַֽחֲרֵ֖י בָּשָׂ֣ר אַחֵ֑ר מֽוּשָׂמ֥וֹת הֵן֨ לְמָשָׁ֔ל בְּסָבְלָ֥ן נִקְמַ֖ת אֵ֥שׁ עוֹלָֽם ׃ 8 כְּמוֹ־כֵ֣ן אֵפ֔וֹא גַּ֖ם הַחֹֽלְמִ֣ים הָאֵ֑לֶּה אָמְנָ֗ם מְטַנְּפִ֤ים אֶת־הַבָּשָׂר֨ וּבֹזִ֣ים אֶת־הַמֶּמְשָׁלָ֔ה וּמְגַדְּפִ֖ים אֶת־הַגְּדוּלֽוֹת ׃ 9 אַ֣ךְ מִֽיכָאֵ֞ל רֹ֣אשׁ הַמַּלְאָכִ֗ים כַּֽאֲשֶׁ֤ר הֵרִיב֨ עִ֣ם הַשָּׂטָ֔ן וְהִתְוַכַּ֕ח עַל־אֹד֖וֹת גְּוִיַּ֣ת מֹשֶׁ֑ה לֹ֣א הִתְעָרֵ֗ב לְהָבִ֤יא עָלָיו֨ מִשְׁפַּ֣ט גִּדּ֔וּף כִּ֣י אִם־אָמַ֔ר יִגְעַ֥ר בְּךָ֖ יְהֹוָֽה ׃ 10 אַ֣ךְ אֵ֔לֶּה אֵ֣ת כָּל־הַדְּבָרִ֗ים אֲשֶׁ֛ר אֵינָ֥ם יֽוֹדְעִ֖ים מְגַדְּפִ֑ים אַ֡ךְ כֹּ֣ל אֲשֶׁר֩ הֵ֨ם יֽוֹדְעִ֤ים בְּטֶ֨בַע֨ כַּבְּהֵמ֣וֹת בְּלִֽי־תְבוּנָ֔ה בָּאֵ֖לֶּה הֵ֥ם נִשְׁחָתִֽים ׃ 11 א֣וֹי לָהֶ֗ם כִּ֣י בְדֶ֤רֶךְ קַ֨יִן֨ הָ֣לְכ֔וּ וְאֶל־תּוֹעַ֛ת שְׂכַ֥ר בִּלְעָ֖ם הִשְׁתַּפָּ֑כוּ וּבְמֶ֥רֶד קֹ֖רַח אָבָֽדוּ ׃ 12 אֵ֠לֶּה כְּתָמִ֨ים הֵ֜ם בִּסְעוּד֤וֹת אַֽהֲבַתְכֶם֨ בַּֽהֲסִבָּ֣ם עִמָּכֶ֔ם בִּבְלִ֥י יִרְאָ֖ה רֹעִ֣ים אֶת־עַצְמָ֑ם עֲנָנִ֣ים בְּלִי־מַ֗יִם נִשָּׂאִ֞ים הֵ֤נָּה וָהֵ֨נָּה֨ מֵֽרוּח֔וֹת עֲצֵ֤י בַצֹּ֨רֶת֨ בְּלִ֣י פְרִ֔י פַּֽעֲמַ֥יִם מֵתִ֖ים מְשֹֽׁרָשִֽׁים ׃ 13 גַּלֵ֥י יָם֨ זֹֽעֲפִ֔ים קֹֽצְפִ֖ים אֶת־בָּשְׁתָּ֑ם כּֽוֹכָבִ֣ים תֹּעִ֔ים אֲשֶׁר֨ אֹ֣פֶל הַחֹ֔שֶׁךְ נִשְׁמַ֥ר לָהֶ֖ם לְעוֹלָֽם ׃ 14 וְהִֽתְנַבֵּ֣א עַל־אֵ֗לֶּה חֲנ֛וֹךְ הַשְּׁבִ֥יעִי מֵֽאָדָ֖ם לֵאמֹ֑ר הִנֵּ֛ה בָּ֥א יְהֹוָ֖ה בְּרִבְב֥וֹת קְדוֹשָּֽׁיו ׃ 15 לַֽעֲשׂ֨וֹת מִשְׁפָּ֜ט עַל־הַכֹּ֗ל וּלְהוֹכִ֨יחַ֨ אֵ֣ת כָּל־רִשְׁעֵיהֶ֔ם עַ֛ל כָּל־פָּֽעֳלֵ֥י רִשְׁעָתָ֖ם אֲשֶׁ֣ר רָשָׁ֑עוּ וְעַל֨ כָּל־הַקָּשׁ֔וֹת אֲשֶׁ֛ר דִּבְּר֥וּ נֶגְדּ֖וֹ חַטָּאִ֥ים רְשָׁעִֽים ׃ 16 אֵ֤לֶּה הֵ֨מָּה֨ מִתְלֽוֹנְנִ֣ים מִתְרַֽעֲמִ֔ים מִתְהַלְּכִ֖ים כְּפִ֣י תַֽאֲוֹֽתֵיהֶ֑ם וּפִיהֶם֨ מְדַבֵּ֣ר גְּבוֹה֔וֹת מְהַדְּרֵ֥י פָנִ֖ים לְמַ֥עַן בָּֽצַע ׃
17 אַ֥ךְ אַתֶּ֖ם אֲהוּבִ֑ים זִכְר֤וּ אֶת־הַדְּבָרִים֨ הַנֶּֽאֱמָרִ֣ים מִקֶּ֔דֶם עַל־פִּ֛י שְׁלִיחֵ֥י אֲדֹנֵ֖ינוּ יֵשׁ֥וּעַ הַמָּשִֽׁיחַ ׃ 18 כִּ֖י אָֽמְר֣וּ אֲלֵיכֶ֑ם כִּ֚י בְּאַֽחֲרִ֣ית הַיָּמִ֔ים יִהְי֣וּ לֵצִ֔ים הַמִּתְהַלְּכִ֛ים כְּפִ֖י תַּֽאֲוֹ֥ת רִשְׁעוֹתֵיהֶֽם ׃ 19 אֵ֥לֶּה הֵ֖מָּה הַמַּבְדִּילִ֣ים אֶת־עַצְמָ֑ם נַפְשִׁיִּ֕ים אֲשֶׁ֛ר ר֖וּחַ אֵ֥ין לָהֶֽם ׃ 20 אַ֤ךְ אַתֶּם֨ אֲהוּבִ֔ים הִבָּנ֥וּ בֶֽאֱמֽוּנַתְכֶ֖ם הַקְּדוֹשָׁ֣ה עַל־יָ֑תֶר וְהִתְפַּלְל֖וּ בְּר֥וּחַ הַקֹּֽדֶשׁ ׃ 21 וְשִׁמְר֥וּ אֶת־נַפְשְׁכֶ֖ם בְּאַֽהֲבַ֣ת הָֽאֱלֹהִ֑ים בְּצַפּ֗וֹת אֶל־חֶ֧סֶד אֲדֹנֵ֛ינוּ יֵשׁ֥וּעַ הַמָּשִׁ֖יחַ לְחַיֵּ֥י עֽוֹלָמִֽים ׃ 22 וַֽאֲחָדִ֥ים אָמְנָ֛ם רַֽחֲמ֖וּ בְּהַבְדִּֽילְכֶֽם ׃ 23 וַֽאֲחָרִים֨ הוֹשִׁ֣יעוּ בְיִרְאָ֔ה בְחָטְפְכֶ֥ם אֹתָ֖ם מִן־הָאֵ֑שׁ בִּשְׂנֹא֨ גַּ֣ם אֶת־הַכֻּתֹּ֔נֶת הַנִּכְתָּמָ֖ה מֵאֵ֥ת הַבָּשָֽׂר ׃ 24 וְאֶל־הַיָּכֹ֛ל לִשְׁמֹ֥ר אֶתְכֶ֖ם בִּבְלִ֣י הִכָּשֵׁ֑ל וּלְהַֽעֲמִ֣יד אֶתְכֶ֗ם לִפְנֵ֧י כְבוֹד֛וֹ בִּבְלִ֥י מ֖וּם בְּגִילָֽה ׃ 25 לָֽאֱלֹהִ֨ים הֶֽחָכָ֤ם לְבַדּוֹ֨ מֽוֹשִׁיעֵ֔נוּ הַכָּב֥וֹד וְהַגְּדֻלָּ֖ה וְהַגְּבוּרָ֣ה וְהַשָּׁלְטָ֑ן גַּ֥ם עַתָּ֛ה וּלְכָל־הָעֽוֹלָמִ֖ים אָמֵֽן ׃
להתגלות