לפרק הקודם

הבשורה על-פי מתי
פרק ח

ריפוי המצורע

1 וְכַאֲשֶׁ֥ר יָרַ֖ד מִן־הָהָ֑ר וַיֵּֽלְכ֥וּ אַֽחֲרָ֖יו הֲמוֹנִ֥ים רַבִּֽים : 2 וְהִנֵּה֨ מְצֹרָ֣ע בּ֔א וַיִּשְׁתַּ֥חוּ ל֖וֹ לֵאמֹ֑ר אֲדֹנָ֕י אִ֣ם תִּרְצֶ֔ה תּוּכַ֖ל לְטַהֵ֥ר אֹתִֽי : 3 וַיֵּט֩ יֵשׁ֨וּעַ אֶת־יָד֜וֹ וַיִּגַּ֥ע בּוֹ֨ וַיֹּ֔אמֶר רֹצֶ֥ה אֲנִ֖י טְהָ֑ר וּכְרֶ֖גַע נִטְהֲרָ֥ה צָֽרַעְתּֽוֹ : 4 וַיֹּ֤אמֶר אֵלָיו֨ יֵשׁ֔וּעַ רְאֵ֖ה אַל־תֹּאמַ֣ר לְאִ֑ישׁ רַ֣ק לֶךְ־לְךָ֗ הֵֽרָאֵ֤ה אֶל־הַכֹּהֵן֨ וְהַקְרֵ֤ב אֶת־הַקָּרְבָּן֨ אֲשֶׁ֣ר צִוָּ֣ה מֹשֶׁ֔ה לְעֵד֖וּת לָהֶֽם :

ריפוי הנער של שר-המאה

5 וְכַֽאֲשֶׁ֨ר בָּ֤א יֵשׁ֨וּעַ֨ אֶל־כְּפַר־נַח֔וּם וַיִּגַּ֥שׁ אֵלָ֖יו שַׂר־מֵאָ֑ה וַיִּתְחַנֵּ֖ן לֽוֹ : 6 וַיֹּאמַ֑ר אֲדֹנָ֗י נַֽעֲרִ֞י מֻשְׁכָּ֤ב בַּבַּ֨יִת֨ נְכֵ֣ה אֲבָרִ֔ים מְעֻנֶּ֖ה בְּמַכְאֹֽב : 7 וַיֹּ֥אמֶר אֵלָ֖יו יֵשׁ֑וּעַ אָב֖וֹא וְאֶרְפָּאֵֽהוּ : 8 וַיַּ֣עַן שַׂר־הַמֵּאָה֘ וַיֹּאמַר֒ אֲדֹנָ֕י אֵינֶ֣נִּי שֹׁוֶ֔ה כִּ֥י תָבֹ֖א אֶל־תַּ֣חַת גַּגִּ֑י אַ֗ךְ אֱמֹר֨ רַ֣ק דָּבָ֔ר וְיֵֽרָפֵ֖ה נַֽעֲרִֽי : 9 כִּ֗י גַּ֣ם אָֽנֹכִ֥י אִישׁ֨ תַּ֣חַת מֶמְשָׁלָ֔ה וְיֵ֛שׁ תַּ֥חַת יָדִ֖י אַנְשֵׁ֣י צָבָ֑א וַֽאֲנִ֞י אֹמֵ֨ר לָזֶ֥ה ׀ לֵךְ֨ וְה֣וּא הוֹלֵ֔ךְ וּלְאַחֵ֤ר | בֹּא֨ וְה֣וּא בָ֔א וּלְעַבְדִּ֛י עֲשֵׂ֥ה זֹא֭ת וְה֥וּא עֹשֶֽׂה : 10 וְכִשְׁמֹ֤עַ יֵשׁ֨וּעַ֨ וַיִּתְמַ֔הּ וַיֹּ֖אמֶר אֶל־הַהֹֽלְכִ֣ים אַֽחֲרָ֑יו אָמְנָם֨ אֲנִ֣י אֹמֵ֣ר לָכֶ֔ם אַ֣ף בְּיִשְׂרָאֵ֔ל לֹ֥א מָצָ֛אתִי אֱמוּנָ֥ה גְדוֹלָ֖ה כָּזֹֽאת : 11 וַֽאֲנִ֖י אֹמֵ֣ר לָכֶ֑ם כִּ֣י רַבִּ֣ים יָב֗וֹאוּ מִמִּזְרָח֨ וּמִמַּֽעֲרָ֔ב וְיָסֹ֜בּוּ עִם־אַבְרָהָ֧ם וְיִצְחָ֛ק וְיַֽעֲקֹ֖ב בְּמַלְכ֥וּת הַשָּׁמָֽיִם : 12 וּבְנֵ֣י הַמַּלְכ֔וּת יֻשְׁלְכ֖וּ אֶל־הַח֣שֶׁךְ הַֽחִיצ֑וֹן שָׁ֣ם יִהְיֶ֔ה בְּכִ֖י וַֽחֲרִיַ֥קת שִׁנָּֽיִם : 13 וַיֹּ֨אמֶר יֵשׁ֤וּעַ לְשַׂר־הַמֵּאָה֨ לֶךְ־לְךָ֔ וְכַֽאֲשֶׁ֥ר הֶֽאֱמַ֖נְתָּ יִהְיֶה־לָּ֑ךְ וַיֵּֽרָפֵ֥א נַֽעֲר֖וֹ בַּשָּׁעָ֥ה הַהִֽיא :

ריפוי חולים רבים

14 וַיָּבֹ֥א יֵשׁ֖וּעַ בְּבֵ֣ית פֶּטְר֑וֹס וַיַּ֧רְא אֶת־חֲמוֹת֛וֹ מֻשְׁכָּבָ֖ה וְחֹלַ֥ת קַדָּֽחַת : 15 וַיִּגַּע֨ בְּיָדָ֔הּ וַתַּֽעַזְבֶ֖הָ הַקַּדָּ֑חַת וַתָּ֖קָם וַתְּשָׁ֥רֶת אֹתָֽם : 16 וְכַֽאֲשֶׁר֨ הָ֣יָה עֶ֔רֶב וַיָּבִ֣יאוּ אֵלָ֔יו אֲחֻזֵ֥י שֵׁדִ֖ים רַבִּ֑ים וַיְגָ֤רֶשׁ אֶת־הָֽרוּחוֹת֨ בִּדְבָר֔וֹ וַיִּרְפָּ֖א אֶת־כָּל־הַ֥חוֹלִֽים : 17 לְמַ֣עַן יִמָּלֵ֔ה הַנֶּֽאֱמָ֗ר בְּפִ֛י יְשַׁעְיָ֥הוּ הַנָּבִ֖יא לֵאמֹ֑ר חֳלָיֵ֨נוּ֨ ה֣וּא נָשָׂ֔א וּמַכְאֹבֵ֖ינוּ סְבָלָֽם :

ישוע משיב למבקשים ללכת אחריו

18 וְכִרְא֣וֹת יֵשׁ֔וּעַ הֲמוֹנִ֥ים רַבִּ֖ים סְבִיבָ֑יו וַיְצַ֕ו לָלֶ֥כֶת מִשָּׁ֖ם אֶל־הָעֵ֥בֶר הָֽאַחֵֽר : 19 וַיִּגַּשׁ֨ סוֹפֵ֣ר אֶחָ֔ד וַיֹּ֖אמֶר אֵלָ֑יו מוֹרֶ֕ה אֵלֵךְ֨ אַֽחֲרֶ֔יךָ אֶ֖ל אֲשֶׁ֥ר תֵּלֵֽךְ : 20 וַיֹּ֨אמֶר אֵלָ֜יו יֵשׁ֗וּעַ הַשּֽׁוּעָלִים֨ יֵ֤שׁ לָהֶם֨ חוֹרִ֔ים וּלְע֥וֹף הַשָּׁמַ֖יִם קִנִּ֑ים וּבֶן־הָֽאָדָם֨ אֵ֣ין ל֔וֹ אֵיפֹ֖ה יַנִּ֥יחַ רֹאשֽׁוֹ : 21 וְאַחֵ֥ר מִתַּלְמִידָ֖יו אָמַ֣ר אֵלָי֑ו אֲדֹנִ֗י הַנִּ֤יחָה לִּי֨ בָּרִֽאשׁוֹנָ֔ה לָלֶ֖כֶת וְלִקְבֹּ֥ר אֶת־אָבִֽי : 22 וַיֹּ֥אמֶר יֵשׁ֖וּעַ אֵלָ֑יו לֵ֚ךְ אַֽחֲרַ֔י וְהַנַּח֨ לַמֵּתִ֔ים לִקְבֹּ֖ר אֶת־מֵֽתֵיהֶֽם :

ישוע משקיט סערה

23 וַיֵּ֖רֶד בָּֽאֳנִיָּ֑ה וַיֵּֽלְכ֥וּ אַֽחֲרָ֖יו תַּלְמִידָֽיו : 24 וְהִנֵּ֞ה סַ֤עַר גָּדוֹל֨ נִהְיָ֣ה בַיָּ֔ם עַ֧ד אֲשֶׁר־כֻּסְּתָ֛ה הָֽאֳנִיָּ֖ה בַּגַּלִּ֑ים וְה֖וּא יָשֵֽׁן : 25 וַיִּגְּשׁוּ֨ תַּלְמִידָ֔יו וַיָּעִ֥ירוּ אֹת֖וֹ לֵאמֹ֑ר אֲדֹנָי֨ הֽוֹשִׁיעֵ֔נוּ אֲנַ֖חְנוּ אֹֽבְדִֽים : 26 וַיֹּ֨אמֶר֨ אֲלֵיהֶ֔ם לָ֚מָּה תִּֽירְא֔וּ קְטַנֵּ֖י הָֽאֱמוּנָ֑ה וַיָּ֗קָם וַיִּגְעַ֤ר בָּרוּחוֹת֨ וּבַיָּ֔ם וַתְּהִ֖י דְּמָמָ֥ה גְדוֹלָֽה : 27 וַיִּתְמְה֥וּ הָֽאֲנָשִׁ֖ים לֵאמֹ֑ר מִ֥י הוּא֨ זֶ֔ה אֲשֶׁ֨ר גַּ֧ם הָֽרוּח֛וֹת וְהַיָּ֖ם שֹֽׁמְעִ֥ים לֽוֹ :

גירוש שדים

28 וּ֠בְבֹאוֹ אֶל־הָעֵ֣בֶר הָֽאַחֵר֘ אֶל־אֶ֣רֶץ הַגִּרְגָּשִׁים֒ וַיִּפְגְּשׁ֜וּהוּ שְׁנֵ֤י אֲנָשִׁים֨ אֲחֻזֵ֣י שֵׁדִ֔ים יֹֽצְאִ֖ים מִבָּתֵּ֣י הַקְּבָרִ֑ים וְהֵ֣ם ׀ נֽוֹרָאִ֣ים מְֹא֗ד עַ֠ד אֲשֶׁ֨ר לֹֽא־יָכ֥וֹל אִ֛ישׁ לַֽעֲבֹ֖ר בַּדֶּ֥רֶךְ הַהֽוּא : 29 וְהִנֵּ֤ה צָֽעֲקוּ֨ לֵאמֹ֔ר מַה־לָּ֧נוּ וָלָ֛ךְ יֵשׁ֖וּעַ בֶּן־הָֽאֱלֹהִ֑ים הֲבָ֣אתָ הֲל֔וֹם לְעַנּ֥וֹת אֹתָ֖נוּ לִפְנֵ֥י הָעֵֽת : 30 וַיְהִי֨ מֵֽרָח֣וֹק לָהֶ֔ם עֵ֛דֶר חֲזִירִ֥ים רַבִּ֖ים רֹעֶֽה : 31 וַיִּתְחַנְ֥נוּ אֵלָ֛יו הַשֵּׁדִ֖ים לֵאמֹ֑ר אִם־תְּגָרֵשׁ֨ אֹתָ֔נוּ הַנַּח־לָ֕נוּ לָלֶ֥כֶת מִפֹּ֖ה אֶל־עֵ֥דֶר הַֽחֲזִירִֽים : 32 וַיֹּ֤אמֶר לָהֶם֨ לְכ֣וּ לָכֶ֔ם וַיֵּֽצְא֔וּ וַיֵּֽלְכ֥וּ לָהֶ֖ם אֶל־עֵ֣דֶר הַֽחֲזִירִ֑ים וְהִנֵּ֞ה כָּל־עֵ֣דֶר הַֽחֲזִירִ֗ים הִסְתָּעֵ֤ר בַּמוֹרָד֨ אֶל־הַיָּ֔ם וַיָּמ֖וּתוּ בַּמָּֽיִם : 33 וְהָֽרוֹעִים֨ נָ֔סוּ וַיֵּֽלְכ֥וּ לָהֶ֖ם הָעִ֑ירָה וַיְסַפְּרוּ֨ אֶת־הַכֹּ֗ל וְאֵ֛ת אֲשֶּׁ֥ר נִהְיָ֖ה לְֽאֲחֻזֵ֥י הַשֵּׁדִֽים : 34 וְהִנֵּ֧ה כָל־הָעִ֛יר יָֽצְאָ֖ה לִקְרַ֣את יֵשׁ֑וּעַ וּבִרְאוֹתָם֨ אֹת֔וֹ וַיִּתְחַנְנ֣וּ ל֔וֹ כִּ֥י יַֽעֲב֖וֹר מִגְּבֽוּלֵיהֶֽם :

לפרק הבא








להפעלת המסגרות
load frameset