הבשורה על־פי מתי
פרק יד

מות יוחנן המטביל

1 בָּעֵ֣ת הַהִ֗יא שָׁמַ֤ע הֽוֹרוֹדוֹס֨ שַׂ֣ר הָרֹ֔בַע אֵ֖ת שֵׁ֥מַע יֵשֽׁוּעַ ׃ 2 וַיֹּ֨אמֶר֨ אֶל־נְעָרָ֔יו זֶ֥ה ה֖וּא יֽוֹחָנָ֣ן הַמְּטַבֵּ֑ל ה֗וּא קָ֚ם מֵעִ֣ם הַמֵּתִ֔ים וְעַל־כֵּ֕ן הַגְּבוּר֖וֹת פֹּֽעֲל֥וֹת בּֽוֹ ׃ 3 כִּ֗י הֽוֹרוֹד֨וֹס תָּפַ֧שׂ אֶת־יֽוֹחָנָ֛ן וַיַּֽאַסְרֵ֖הוּ וַיְשִׂימֵ֣הוּ בְמִשְׁמָ֑ר בִּגְלַל֨ הוֹרֽוֹדְיָ֔ה אֵ֖שֶׁת פִּילִפּ֥וֹס אָחִֽיו ׃ 4 כִּ֛י אָמַ֥ר אֵלָ֖יו יֽוֹחָנָ֑ן אֵ֚ין מֻתָּ֣ר לְךָ֔ כִּ֥י תִהְיֶ֖ה לָֽךְ ׃ 5 וְכַֽאֲשֶׁ֤ר חָפֵץ֨ לַֽהֲמִית֔וֹ וַיִּירָ֖א אֶת־הֶֽהָמ֑וֹן כִּ֖י כְּנָבִ֥יא חֲשָׁבֽוּהוּ ׃ 6 וְכַֽאֲשֶׁ֣ר חוֹגַ֗ג י֤וֹם הֻלֶּ֣דֶת אֶת־הֽוֹרוֹד֔וֹס וַתְּרַקֵּ֥ד בַּת־הוֹרֽוֹדְיָ֖א בְּתוֹכָ֑ם וַתִּיטַ֖ב בְּעֵינֵ֥י הֽוֹרוֹדֽוֹס ׃ 7 עַל־זֹאת֨ נָדַ֥ר בִּשְׁבוּעָ֔ה לָ֣תֶת לָ֔הּ אֵ֖ת כָּל־אֲשֶׁ֥ר תִּשְׁאָֽל ׃ 8 וְהִ֗יא נִזְהָרָ֧ה מִקּוֹדֵ֛ם מֵאֵ֥ת אִמָּ֖הּ אָמָ֑רָה תְּנָ֨ה לִ֥י פֹה֨ בִּקְעָרָ֔ה אֶת־רֹ֖אשׁ יֽוֹחָנָ֥ן הַמְּטַבֵּֽל ׃ 9 וַיֵּֽעָצֵ֖ב הַמֶּ֑לֶךְ אֶ֗פֶס בַּֽעֲב֤וּר הַשְּׁבוּעָה֨ וְהַמְּסִבִּ֣ים עִמּ֔וֹ צִוָּ֖ה לְהִנָּ֥תֶן לָֽהּ ׃ 10 וַיִּשְׁלַ֗ח וַיִּכְרֹ֛ת אֶת־רֹ֥אשׁ יֽוֹחָנָ֖ן בַּמִּשְׁמָֽר ׃ 11 וַיּוּבָ֤א רֹאשׁוֹ֨ בִּקְעָרָ֔ה וַיִּנָּתֵ֖ן לַנַּֽעֲרָ֑ה וַתָּבֵ֖א אֶל־אִמָּֽהּ ׃ 12 וַיִגְּשׁוּ֨ תַּלְמִידָ֔יו וַיִּשְׂא֥וּ אֶת־הַגְּוִיָּ֖ה וַיִּקְבְּר֣וּ אֹתָ֑הּ וַיָּבֹ֖אוּ וַיַּגִּ֥ידוּ לְיֵשֽׁוּעַ ׃

ישוע מאכיל חמשת אלפים איש

13 וְכִשְׁמֹ֣עַ יֵשׁ֗וּעַ וַיֵּ֨לֶךְ מִשָּׁ֧ם בָּֽאֳנִיָּ֛ה אֶל־מָק֥וֹם חָרֵ֖ב לְבָדָ֑ד וְכַֽאֲשֶׁ֤ר שָֽׁמְעוּ֨ הַֽהֲמוֹנִ֔ים וַיֵּֽלְכ֧וּ אַֽחֲרָ֛יו בְּרַגְלֵיהֶ֖ם מִן־הֶֽעָרִֽים ׃ 14 וַיֵּצֵ֣א יֵשׁ֗וּעַ וַיַּרְא֨ הָמ֣וֹן רָ֔ב וַיִּכָּֽמְר֥וּ רַֽחֲמָ֖יו עֲלֵיהֶ֑ם וַיִּרְפָּ֖א אֶת־חֽוֹלֵיהֶֽם ׃ 15 וְכַֽאֲשֶׁר֘ הָ֣יָה עֶרֶב֒ וַיִּגְּשׁוּ֩ אֵלָ֨יו תַּלְמִידָ֜יו לֵאמֹ֗ר הַמָּקוֹם֨ ה֣וּא חָרֵ֔ב וְהַשָּׁעָ֖ה עַתָּ֣ה חָלָ֑פָה שַׁלַּח֨ אֶת־הַֽהֲמוֹנִ֔ים לְמַ֨עַן֨ יֵֽלְכ֣וּ אֶל־הַכְּפָרִ֔ים וְיִקְנ֥וּ לָהֶ֖ם אֹֽכֶל ׃ 16 וַיֹּ֤אמֶר אֲלֵיהֶם֨ יֵשׁ֔וּעַ אֵֽין־צֹ֥רֶךְ לָהֶ֖ם לָלֶ֑כֶת תְּנ֥וּ לָהֶ֛ם אַתֶּ֖ם לֶֽאֱכֹֽל ׃ 17 וַיֹּֽאמְר֖וּ אֵלָ֑יו אֵ֥ין לָ֨נוּ֨ פֹּ֔ה זֽוּלָתִ֛י חָמֵ֥שׁ לֶ֖חֶם וּשְׁנֵ֥י דָגִֽים ׃ 18 וַיֹּאמַ֑ר הֲבִיא֥וּם אֵלַ֖י הֵֽנָּה ׃ 19 וַיְצַו֨ אֶת־הַֽהֲמוֹנִ֔ים לָשֶׁ֖בֶת עַל־הֶֽחָצִ֑יר וַיִּקַּח֩ אֶת־חֲמֵ֨שֶׁת הַלֶּ֜חֶם וְאֶת־שְׁנֵ֣י הַדָּגִ֗ים וַיַּבֵּ֤ט הַשָּׁמַ֨יְמָה֨ וַיְבָ֣רֶךְ וַיִּפְרֹ֔ס וַיִּתֵּ֞ן אֶת־כִּכְּר֤וֹת הַלֶּ֨חֶם֨ אֶל־הַתַּלְמִידִ֔ים וְהַתַּלְמִידִ֖ים אֶל־הַֽהֲמוֹנִֽים ׃ 20 וַיֹּֽאכְל֥וּ כֻלָּ֖ם וַיִּשְׂבָּ֑עוּ וַיִּשְׂאוּ֨ אֶת־הַנּוֹתָ֣ר מִן־הַפִּתִּ֔ים שְׁנֵֽים־עָשָׂ֥ר סַלִּ֖ים מְלֵאִֽים ׃ 21 וְהָאֹֽכְלִים֨ הָי֔וּ כַּֽחֲמֵ֥שֶׁת אֲלָפִ֖ים אֲנָשִׁ֑ים מִלְּבַ֖ד נָשִׁ֥ים וָטָֽף ׃

הליכה על פני המים

22 וּכְרֶ֗גַע אִלֵּ֨ץ יֵשׁ֤וּעַ אֶת־תַּלְמִידָיו֨ לָב֣וֹא בָֽאֳנִיָּ֗ה וּלְקַדֵּ֥ם אֹת֛וֹ לָלֶ֖כֶת אֶל־הָעֵ֣בֶר הָֽאַחֵ֑ר עַ֥ד כִּֽי־יְשַׁלַּ֖ח אֶת־הַֽהֲמוֹנִֽים ׃ 23 וְכַֽאֲשֶׁ֤ר שִׁלַּח֨ אֶת־הַֽהֲמוֹנִ֔ים וַיַּ֧עַל אֶל־הָהָ֛ר בָּדָ֖ד לְהִתְפַּלֵּ֑ל וְכַֽאֲשֶׁר֨ הָ֣יָה עֶ֗רֶב ה֥וּא לְבַדּ֖וֹ הָ֥יָה שָּֽׁם ׃ 24 וְהָֽאֳנִיָּ֗ה הָֽיְתָ֤ה עַתָּה֨ בְּת֣וֹךְ הַיָּ֔ם מְסֹֽעָרָ֖ה מֵאֵ֣ת הַגַּלִּ֑ים כִּ֥י הָר֖וּחַ לְנֶ֥גֶד הָיָֽה ׃ 25 וּבְאַשְׁמֹ֥רֶת הַלַּ֖יְלָה הָֽרְבִיעִ֑ית הָלַ֨ךְ יֵשׁ֤וּעַ מִשָּׁם֨ אֲלֵיהֶ֔ם מִתְהַלֵּ֖ךְ עַל־הַיָּֽם ׃ 26 וּבִרְאוֹת֩ אֹת֨וֹ הַתַּלְמִידִ֜ים מִתְהַלֵּ֣ךְ עַל־הַיָּ֗ם וַיִּבָּֽהֲלוּ֨ לֵאמֹ֔ר כִּ֛י מַרְאֵ֥ה ר֖וּחַ ה֑וּא וַיִּצְעֲק֖וּ מִן־הַפָּֽחַד ׃ 27 וּכְרֶ֗גַע דִּבֶּ֧ר אֲלֵיהֶ֛ם יֵשׁ֖וּעַ לֵאמֹ֑ר חִזְק֕וּ אֲנִ֥י ה֖וּא אַל־תִּירָֽאוּ ׃ 28 וַיַּ֧עַן אֹת֛וֹ פֶּטְר֖וֹס וַיֹּאמַ֑ר אֲדֹנָי֨ אִם־אַתָּ֣ה ה֔וּא צַוֵּ֕נִי לָב֥וֹא אֵלֶ֖יךָ עַל־הַמָּֽיִם ׃ 29 וַיֹּ֖אמֶר בֹּ֑א וַיֵּ֨רֶד פֶּטְר֤וֹס מִן־הָֽאֳנִיָּה֨ וַיִּתְהַלֵּ֣ךְ עַל־הַמַּ֔יִם לָב֖וֹא אֶל־יֵשֽׁוּעַ ׃ 30 וּבִרְאֹת֧וֹ אֶת־הָר֛וּחַ חֲזָקָ֖ה וַיִּירָ֑א וְכַֽאֲשֶׁ֨ר הֵחֵ֤ל לִטְבֹּ֨עַ֨ וַיִּצְעַ֣ק לֵאמֹ֔ר אֲדֹנָ֖י הֽוֹשִׁיעֵֽנִי ׃ 31 וּכְרֶ֗גַע שָׁלַ֥ח יֵשׁ֛וּעַ אֶת־יָד֖וֹ וַיַּֽחֲזֶק־בּ֑וֹ וַיֹּ֣אמֶר אֵלָ֗יו קְטֹן֨ הָֽאֱמוּנָ֔ה לָ֖מָּה סִפָּֽקְתָּ ׃ 32 וְכַֽאֲשֶׁ֥ר בָּ֖אוּ אֶל־הָֽאֳנִיָּ֑ה וַיִּשְׁתֹּ֖ק הָרֽוּחַ ׃ 33 וְאֵ֗לֶּה אֲשֶׁ֨ר הָי֤וּ בָֽאֳנִיָּה֨ בָּ֔אוּ וַיִּשְׁתַּֽחֲו֥וּ ל֖וֹ לֵאמֹ֑ר אָמְנָ֕ם בֶּן־אֱלֹהִ֖ים אָֽתָּה ׃

ריפוי חולים בגינוסר

34 וַיַּ֣עַבְר֔וּ וַיָּבֹ֖אוּ אֶל־אֶ֥רֶץ גְּנֵיסָֽר ׃ 35 וְכַֽאֲשֶׁ֨ר הִכִּי֤רוּ אוֹתוֹ֨ אַנְשֵׁ֣י הַמָּק֣וֹם הַה֔וּא וַיְשַׁלְּח֖וּ אֶל־כָּל־הַכִּכָּ֣ר הַהִ֑יא וַיָּבִ֥יאוּ אֵלָ֖יו אֵ֥ת כָּל־הַֽחוֹלִֽים ׃ 36 וַיִּתְחַנְנ֣וּ ל֔וֹ כִּ֣י יִגְּע֔וּ אַ֖ךְ בְּשׁוּלֵ֣י בִגְדּ֑וֹ וְכֹ֛ל אֲשֶׁ֥ר נָֽגְע֖וּ נוֹשָֽׁעוּ ׃