הבשורה על־פי מתי
פרק כ

הפועלים שנשכרו לעבוד בכרם

1 כִּ֗י דֹּמָה֨ מַלְכ֣וּת הַשָּׁמַ֔יִם אֶל־אִ֖ישׁ בַּ֣עַל בָּ֑יִת אֲשֶׁ֨ר יָצָ֤א בַבֹּ֨קֶר֨ הַשְׁכֵּ֔ם לִשְׂכֹּ֥ר פֹּֽעֲלִ֖ים לְכַרְמֽוֹ ׃ 2 וַיֵּאֹ֧ת עִם־הַפֹּֽעֲלִ֛ים בְּדִינָ֖ר לְי֑וֹם וַיְשַׁלְּחֵ֖ם אֶל־כַּרְמֽוֹ ׃ 3 וַיֵּצֵ֖א כַּשָּׁעָ֣ה הַשְּׁלִישִׁ֑ית וַיַּ֗רְא אֲחֵרִ֛ים עֹֽמְדִ֥ים בַּשּׁ֖וּק בְּטֵלִֽים ׃ 4 וַיֹּ֣אמֶר אֲלֵיהֶ֗ם לְכ֨וּ לָכֶ֤ם גַּם־אַתֶּם֨ אֶל־הַכֶּ֔רֶם וַֽאֲשֶׁ֛ר יִהְיֶ֥ה יָשָֽׁר אֶתֵּ֣ן לָכֶ֑ם וַיֵּֽלְכ֖וּ לָהֶֽם ׃ 5 וַיֵּצֵ֕א גַּ֛ם כַּשָּׁעָ֥ה הַשִּׁשִּׁ֖ית וְהַתְּשִׁיעִ֑ית וַיַּ֖עַשׂ כְּמוֹ־כֵֽן ׃ 6 וַיֵּצֵ֗א כַּשָּׁעָה֨ עַשְׁתֵּ֣י הָֽעֶשְׂרֵ֔ה וַיִּמְצָ֥א אֲחֵרִ֖ים עֹֽמְדִ֣ים בְּטֵלִ֑ים וַיֹּ֣אמֶר אֲלֵיהֶ֗ם לָ֠מָּה אַתֶּ֨ם עֹֽמְדִ֥ים פֹּ֛ה בְּטֵלִ֖ים כָּל־הַיּֽוֹם ׃ 7 וַיֹּֽאמְר֣וּ אֵלָ֔יו יַ֕עַן אִ֖ישׁ לֹֽא־שָׂכַ֣ר אֹתָ֑נוּ וַיֹּ֣אמֶר אֲלֵיהֶ֗ם לְכ֤וּ גַם־אַתֶּם֨ אֶל־הַכֶּ֔רֶם וַֽאֲשֶׁ֛ר יִהְיֶ֥ה יָשָׁ֖ר תִּקָּֽחוּ ׃ 8 וְכַֽאֲשֶׁר֨ הָ֣יָה עֶ֔רֶב וַיֹּ֛אמֶר אֲד֥וֹן הַכֶּ֖רֶם אֶל־סֹֽכְ֑נוֹ קְרָ֣א אֶת־הַפֹּֽעֲלִ֗ים וְשַׁלֵּ֤ם לָהֶם֨ אֶת־הַשָּׂכָ֔ר הָחֵ֥ל מִן־הָאַֽחֲרוֹנִ֖ים עַד־הָרִֽאשׁוֹנִֽים ׃ 9 וּבְב֣וֹא אֵ֗לֶּה אֲשֶׁר֨ כַּשָּׁעָ֣ה עַשְׁתֵּ֣י הָֽעֶשְׂרֵ֔ה וַיִּקְח֛וּ אִ֥ישׁ אִ֖ישׁ דִּינָֽר ׃ 10 וַיָּבֹ֨אוּ֨ הָרִֽאשׁוֹנִ֔ים וַיְדַמּ֕וּ כִּ֥י יִקְח֖וּ יוֹתֵ֑ר וַיִּקְח֥וּ גַם־הֵ֛ם אִ֥ישׁ אִ֖ישׁ דִּינָֽר ׃ 11 וּבְקַחְתָּ֕ם וַיִּלּ֖וֹנוּ עַל־בַּ֥עַל הַבָּֽיִת ׃ 12 וַיֹּאמֵ֑רוּ כִּ֣י ׀ הָאַֽחֲרוֹנִ֣ים הָאֵ֗לֶּה עָשׂוּ֨ שָׁעָ֣ה אַחַ֔ת וַתַּשְׁוֶ֤ה אֹתָם֨ אֵלֵ֔ינוּ אֲשֶׁ֥ר סָבַ֛לְנוּ אֶת־סֵ֥בֶל הַיּ֖וֹם וְאֶת־הַחֹֽם ׃ 13 וַיַּ֤עַן וַיֹּ֨אמֶר֨ לְאֶחָ֣ד מֵהֶ֔ם רֵעִ֕י אֵ֥ין אֲנִ֖י עֹשֵׁ֣ק אֹתָ֑ךְ הֲלֹ֛א נְאוֹתֹ֥תָ עִמִּ֖י בְּדִינָֽר ׃ 14 שָׂ֛א אֵ֥ת שֶׁלְּךָ֖ וְלֵ֣ךְ לָ֑ךְ אֲנִ֨י רֹצֶ֥א לָתֵ֛ת אֶל־זֶ֥ה הָאַֽחֲר֖וֹן כַּֽאֲשֶׁ֥ר אֵלֶֽיךָ ׃ 15 הַאֵ֨ין מֻתָּ֥ר לִי֨ לַֽעֲשׂ֣וֹת בְּשֶׁלִּ֔י אֵ֛ת אֲשֶׁ֥ר אֲנִ֖י רֹצֶ֑ה הַֽאִם־עֵֽינְךָ֣ רָעָ֔ה כִּ֥י אֲנִ֖י ט֥וֹב אָנֹֽכִי ׃ 16 כֵּ֗ן יִהְי֤וּ הָאַֽחֲרוֹנִים֨ רִֽאשׁוֹנִ֔ים וְהָרִֽאשׁוֹנִ֖ים אַֽחֲרוֹנִ֑ים כִּ֚י רַבִּ֣ים נִקְרָאִ֔ים וּמְעַטִּ֖ים נִבְחָרִֽים ׃

ישוע מדבר פעם שלישית על מותו ותחייתו

17 וּבַֽעֲל֤וֹת יֵשׁ֨וּעַ֨ יְרֽוּשָׁלַ֔מֳה וַיִּקַּ֨ח אֵלָ֜יו אֶת־שְׁנֵ֨ים עָשָׂ֧ר הַתַּלְמִידִ֛ים לְבָדָ֖ד בַּדָּ֑רֶךְ וַיֹּ֖אמֶר אֲלֵיהֶֽם ׃ 18 הִנֵּ֛ה אֲנַ֥חְנוּ עֹלִ֖ים יְרֽוּשָׁלָ֑מֳה וּבֶן־הָֽאָדָ֣ם יָסְגַּ֗ר אֶל־רָאשֵׁ֤י הַכֹּֽהֲנִים֨ וְאֶל־הַסּֽוֹפְרִ֔ים וְיַרְשִׁיע֖וּהוּ לַמָּֽוֶת ׃ 19 וְיַסְגִּ֨ירוּ אֹת֤וֹ לַגּוֹיִם֨ לְהָתֵ֣ל בּ֔וֹ וּלְהַכּ֥וֹת אֹת֛וֹ בְּשׁוֹטִ֖ים וּלְהַצְלִיב֑וֹ וּבַיּ֥וֹם הַשְּׁלִישִׁ֖י יָקֽוּם ׃

משאלתם של בני זבדי

20 אָ֠ז נִגְּשָׁ֨ה אֵלָ֜יו אֵ֤ם בְּנֵֽי־זַבְדַּי֨ עִם־בָּנֶ֔יהָ וַתִּשְׁתַּֽחֲוֶ֖ה ל֑וֹ וַתִּשְׁאַ֥ל דָּבָ֖ר מֵֽאִתּֽוֹ ׃ 21 וַיֹּ֥אמֶר אֵלֶ֖יהָ מַה־תִּרְצִ֑י וַתֹּ֣אמֶר אֵלָ֗יו אֱמֹ֣ר נָא֩ אֲשֶׁ֨ר יֵֽשְׁב֜וּ שְׁנֵ֤י בָנַי֨ אֵ֔לֶּה אֶחָ֧ד לִימִֽינְךָ֛ וְאֶחָ֥ד לִשְׂמֹֽאלְךָ֖ בְּמַלְכוּתֶֽךָ ׃ 22 וַיַּ֨עַן יֵשׁ֜וּעַ וַיֹּ֗אמֶר לֹ֣א יְדַעְתֶּם֘ מָ֣ה אַתֶּ֣ם שֹֽׁאֲלִים֒ הֲתֽוּכְלוּ֩ לִשְׁתּ֨וֹת אֶת־הַכּ֜וֹס אֲשֶׁ֤ר אֲנִי֨ עָתִ֣יד לִשְׁתּ֔וֹת וּלְהִטָּבֵ֧ל בַּטְּבִילָ֛ה אֲשֶׁ֥ר אֲנִ֖י נִטְבָּ֣ל בָּ֑הּ וַיֹּֽאמְר֥וּ אֵלָ֖יו נוּכָֽל ׃ 23 וַיֹּ֣אמֶר אֲלֵיהֶ֗ם אָכֵן֨ אֶת־כּוֹסִ֣י תִשְׁתּ֔וּ וּבַטְּבִילָ֗ה אֲשֶׁ֥ר אֲנִ֛י נִטְבָּ֥ל בָּ֖הּ תִּטָּבֵ֑לוּ אַ֡ךְ שֶׁבֶת֩ לִֽימִינִ֨י וְלִשְׂמֹאלִ֜י לֹ֥א לִי֨ לָתֵ֔ת זֽוּלָתִי֨ לָאֵ֔לֶּה אֲשֶׁ֛ר הוּכַ֥ן לָהֶ֖ם מֵאֵ֥ת אָבִֽי ׃ 24 וְכַֽאֲשֶׁ֤ר שָֽׁמְעוּ֨ הָֽעֲשָׂרָ֔ה וַיֵּ֣רַע לָהֶ֔ם עַ֖ל שְׁנֵ֥י הָֽאַחִֽים ׃ 25 וַיִּקְרָ֥א יֵשׁ֛וּעַ אֲלֵיהֶ֖ם וַיֹּאמַ֑ר יְדַעְתֶּ֗ם כִּ֣י מֹֽשְׁלֵ֤י הַגּוֹיִם֨ רֹדִ֣ים אֹתָ֔ם וְהַגְּדוֹלִ֖ים שֹֽׁלְטִ֥ים עֲלֵיהֶֽם ׃ 26 אַ֕ךְ לֹֽא־יִהְיֶ֥ה כֵ֖ן בְּקִרְבְּכֶ֑ם כִּ֠י אִם־כָּל־הֶֽחָפֵ֞ץ לִהְי֤וֹת גָּדוֹל֨ בְּקִרְבְּכֶ֔ם יִהְיֶ֖ה מְשָֽׁרֶתְכֶֽם ׃ 27 וְכֹ֧ל הֶֽחָפֵ֛ץ לִהְי֥וֹת לְרֹ֖אשׁ בְּקִרְבְּכֶ֑ם יִהְיֶ֖ה עַבְדְּכֶֽם ׃ 28 כַּֽאֲשֶׁ֧ר בֶּן־הָֽאָדָ֛ם לֹ֥א בָ֖א לְמַ֣עַן יְשֹׁרָ֑ת כִּ֣י אִם־לְשָׁרֵ֔ת וְלָתֵ֧ת אֶת־נַפְשׁ֛וֹ כֹּ֖פֶר בְּעַ֥ד רַבִּֽים ׃

ריפוי שני העוורים

29 וּבְצֵאתָם֨ מִֽירִיח֔וֹ וַיֵּ֥לֶךְ אַֽחֲרָ֖יו הָמ֥וֹן רָֽב ׃ 30 וְהִנֵּ֞ה שְׁנֵ֣י עִוְרִ֗ים הַיּֽשְׁבִים֨ עַל־יַ֣ד הַדֶּ֔רֶךְ כְּשָׁמְעָ֞ם כִּ֤י יֵשׁ֨וּעַ֨ עֹבֵ֔ר וַיִּצְעֲק֖וּ לֵאמֹ֑ר רַחֵ֥ם עָלֵ֛ינוּ אֲדֹנָ֖י בֶּן־דָּוִֽד ׃ 31 וַיִּגְעַ֥ר בָּם֨ הֶֽהָמ֔וֹן לְמַ֖עַן יֶֽחֱשׁ֑וּ אַ֣ךְ הֵ֜מָּה צָֽעֲק֨וּ ע֤וֹד יוֹתֵר֨ לֵאמֹ֔ר רַחֵ֥ם עָלֵ֛ינוּ אֲדֹנָ֖י בֶּן־דָּוִֽד ׃ 32 וַיַּֽעֲמֹ֣ד יֵשׁ֔וּעַ וַיִּקְרָ֥א אֲלֵיהֶ֖ם וַיֹּאמַ֑ר מַה־תַּחְפְּצ֕וּ כִּ֖י אֶֽעֱשֶׂ֥ה לָכֶֽם ׃ 33 וַיֹּֽאמְר֖וּ אֵלָ֑יו אֲדֹנָ֕י אֲשֶׁ֖ר תִּפָּקַ֥חְנָה עֵינֵֽינוּ ׃ 34 וַיִּכָּֽמְרוּ֨ רַֽחֲמֵ֣י יֵשׁ֔וּעַ וַיִּגַּ֖ע בְּעֵֽינֵיהֶ֑ם וּכְרֶ֨גַע֨ רָא֣וּ ע֔וֹד וַיֵּלְכ֖וּ אַֽחֲרָֽיו ׃