לפרק הקודם

הבשורה על־פי מתי
פרק כו

מזימה נגד ישוע

1 וַיְהִ֗י כַּֽאֲשֶׁר֨ כִּלָּ֣ה יֵשׁ֔וּעַ אֵ֥ת כָּל־הָֽאֲמָרִ֖ים הָאֵ֑לֶּה וַיֹּ֖אמֶר אֶל־תַּלְמִידָֽיו : 2 אַתֶּ֣ם יֽוֹדְעִ֔ים כִּ֗י אַֽחֲרֵ֛י שְׁנֵ֥י יָמִ֖ים יִהְיֶ֣ה הַפֶּ֑סַח וּבֶ֨ן־הָֽאָדָ֔ם נִמְסָ֖ר לְהִצָּלֵֽב : 3 אָ֠ז נִקְהֲל֞וּ רָאשֵׁ֧י הַכֹּֽהֲנִ֛ים וְהַסּֽוֹפְרִ֖ים וְזִקְנֵ֣י הָעָ֑ם אֶל־חֲצַ֕ר הַכֹּהֵ֥ן הַגָּד֖וֹל הַנִּקְרָ֥א כַיְפָֽא : 4 וַיִּוָּ֣עַצ֔וּ לְמַ֜עַן יִתְפְּשׂ֧וּ אֶת־יֵשׁ֛וּעַ בְּעָרְמָ֖ה וִֽימִיתֽוּהוּ : 5 וַיֹּֽאמְר֖וּ לֹ֣א בֶחָ֑ג פֶּן־תִּהְיֶ֥ה מְהוּמָ֖ה בָּעָֽם :

המשיחה בבית עניה

6 וּבִהְי֤וֹת יֵשׁ֨וּעַ֨ בְּבֵֽית־עֲנְיָּ֔ה בְּבֵ֖ית שִׁמְע֥וֹן הַמְּצֹרָֽע : 7 וַתִּגַּ֤שׁ אֵלָיו֨ אִשָּׁ֔ה אֲשֶׁר־לָ֥הּ צַלַּ֛חַת שֶׁ֥מֶן מֹ֖ר יָקָ֣ר מְאֹ֑ד וַתִּצֹּ֥ק עַל־רֹאשׁ֖וֹ בַּֽהֲסִבּֽוֹ : 8 וּבִרְאוֹת֨ תַּלְמִידָ֔יו וַיֵּ֖רַע לָהֶ֑ם וַיֹּ֣אמְר֔וּ אֶל־מָ֖ה הָֽאִבּ֥וּד הַזֶּֽה : 9 כִּ֣י יָכֹל֩ שֶׁ֨מֶן הַמֹּ֤ר הַזֶּה֨ לְהִמָּכֵ֣ר בְּרָ֔ב וּלִהִנָּתֵ֖ן לַֽעֲנִיִּֽים : 10 וּבְדַ֤עַת יֵשׁ֨וּעַ֨ וַיֹּ֣אמֶר אֲלֵיהֶ֔ם לָ֛מָּה תִּתְּנ֥וּ תְלָאָ֖ה אֶל־הָֽאִשָּׁ֑ה כִּ֛י פְּעֻלָּ֥ה טוֹבָ֖ה פָּֽעֲלָ֥ה בִֽי : 11 כִּ֣י הָֽעֲנִיִּ֗ים יִהְי֥וּ לָכֶ֛ם תָּמִ֖יד אִתְּכֶ֑ם אַ֣ךְ אֲנִ֔י לֹ֥א תָּמִ֖יד אֶהְיֶ֥ה לָכֶֽם : 12 כִּ֡י אֲשֶׁר֩ הִ֨יא שָֽׁפְכָ֜ה אֶת־שֶׁ֨מֶן הַמֹּ֤ר הַזֶּה֨ עַל־גְּוִיָּתִ֔י לִקְבֹּ֥ר אֹתִ֖י עָשָֽׂתָה : 13 אָמְנָ֕ם אֲנִ֖י אֹמֵ֣ר לָכֶ֑ם בָּֽאֲשֶׁ֣ר אֵפוֹא֩ תִקָּרֵ֨א הַבְּשֹׂרָ֤ה הַזֹּאת֨ בְּכָל־הַתֵּבֵ֔ל יְדֻבַּ֗ר גַּ֠ם אֵ֣ת אֲשֶׁ֧ר עָֽשְׂתָ֛ה זֹ֖את לְזִכְרוֹנָֽהּ : 14 אָ֠ז הָלַ֞ךְ אֶחָ֣ד ׀ מִשְּׁנֵ֣ים הֶֽעָשָׂ֗ר הַנִּקְרָא֨ יְהוּדָ֣ה אִֽישׁ־קְרִיּ֔וֹת אֶל־רָאשֵׁ֖י הַכֹּֽהֲנִֽים : 15 וַיֹּ֗אמֶר מָה־תִּרְצוּ֨ לָתֵ֣ת לִ֔י וַֽאֲנִ֛י אַסְגִּ֥יר אֹת֖וֹ אֲלֵיכֶ֑ם וַיִּשְׁקְל֥וּ ל֖וֹ שְׁלוֹשִׁ֥ים כָּֽסֶף : 16 וּמִן־הָעֵ֣ת הַהִ֔יא בִּקֵּ֖שׁ עֵ֣ת כֹּ֑שֶׁר לְמַ֖עַן יַסְגִּ֥יר אֹתֽוֹ :

סעודת הפסח

17 וּבָֽרִאשׁוֹן֨ לְחַ֣ג הַמַּצּ֔וֹת נִגְּשׁ֧וּ הַתַּלְמִידִ֛ים אֶל־יֵשׁ֖וּעַ וַיֹּֽאמְר֣וּ אֵלָ֑יו אֵיפֹ֣א תִרְצֶ֗ה כִּ֛י נָכִ֥ין לְךָ֖ לֶֽאֱכֹ֥ל אֶת־הַפָּֽסַח : 18 וַיֹּ֕אמֶר לְכ֨וּ לָכֶ֤ם הָעִ֨ירָה֨ אֶל־פְּלֹנִ֣י אַלְמוֹנִ֔י וְאִמְר֖וּ אֵלָ֑יו הַמּוֹרֶ֣ה אֹמֵ֔ר עִתִּ֣י קְרֹבָ֔ה אֶצְלְךָ֛ אֶֽעֱשֶׂ֥ה אֶת־הַפֶּ֖סַח עִ֥ם תַּלְמִידָֽי : 19 וַיַּֽעַשׁוּ֨ הַתַּלְמִידִ֔ים כַּֽאֲשֶׁ֛ר צִוּ֥ה אֹתָ֖ם יֵשׁ֑וּעַ וַיָּכִ֖ינוּ אֶת־הַפָּֽסַח : 20 וְכַֽאֲשֶׁר֨ הָ֣יָה עֶ֔רֶב וַיָּ֕סָב עִ֖ם שְׁנֵ֥ים־הֶֽעָשָֽׂר : 21 וּבְאָכְלָ֖ם אָמָ֑ר אָמְנָם֨ אֲנִ֣י אֹמֵ֣ר לָכֶ֔ם כִּ֛י אֶחָ֥ד מִכֶּ֖ם יַסְגִּ֥יר אֹתִֽי : 22 וַיִּתְעַצְּב֖וּ מְאֹ֑ד וְיָּחֵ֨לּוּ כָל־אֶחָ֤ד מֵהֶם֨ לֵאמֹ֣ר ל֔וֹ הַֽאֲנִ֥י ה֖וּא אֲדֹנָֽי  : 23 וַיַּ֖עַן וַיֹּאמַ֑ר הַטּוֹבֵ֨ל עִמִּ֤י אֶת־יָדוֹ֨ בַּקְּעָרָ֔ה זֶ֖ה יַסְגִּ֥יר אֹתִֽי : 24 אָכֵ֗ן בֶּן־הָֽאָדָם֨ הֹלֵ֣ךְ ל֔וֹ כַּֽאֲשֶׁ֥ר נִכְתַּ֖ב עָלָ֑יו אַ֞ךְ א֣וֹי ׀ לָאִ֣ישׁ הַה֗וּא אֲשֶׁ֤ר בֶּן־הָֽאָדָם֨ מָסְגָּ֣ר עַל־יָד֔וֹ ט֚וֹב הָ֣יָה ל֔וֹ אִם־לֹ֥א נוֹלַ֖ד הָאִ֥ישׁ הַהֽוּא : 25 וַיַּעַן֩ יְהוּדָ֨ה הַמַּסְגִּי֤ר אֹתוֹ֨ וַיֹּאמַ֔ר רַבִּ֖י הַֽאֲנִ֣י ה֑וּא וַיֹּ֣אמֶר אֵלָ֔יו אַתָּ֖ה אָמָֽרְתָּ : 26 וּבְאָכְלָ֗ם וַיִּקַּ֨ח יֵשׁ֤וּעַ אֶת־הַלֶּ֨חֶם֨ וַיְבָ֣רֶךְ וַיִּפְרֹ֔ס וַיִּתֵּ֖ן לַתַּלְמִידִ֑ים וַיֹּ֨אמֶר֨ קְח֣וּ אִכְל֔וּ זֶ֥ה ה֖וּא גְּוִיָּתִֽי : 27 וַיִּקַּ֤ח אֶת־הַכּוֹס֨ וַיּוֹדֶ֔ה וַיִּתֵּ֥ן לָהֶ֖ם לֵאמֹ֑ר שְׁת֥וּ מִמֶּ֖נָּה כֻּלְּכֶֽם : 28 כִּ֣י זֶ֥ה הוּא֨ דָּמִ֔י דַּ֖ם הַבְּרִ֣ית הַֽחֲדָשָּׁ֑ה הַנִּשְׁפָּךְ֨ בְּעַ֣ד רַבִּ֔ים לִסְלִיחַ֖ת חֲטָאִֽים : 29 וַֽאֲנִ֖י אוֹמֵ֣ר לָכֶ֑ם כִּי֩ לֹ֨א אֶשְׁתֶּ֜ה מֵֽעַתָּ֗ה מִתְּנוּבַ֤ת הַגֶּ֨פֶן֨ הַזֹּ֔את עַ֣ד ׀ הַיּ֣וֹם הַה֗וּא אֲשֶׁר֩ אֶשְׁתֶּ֨ה אֹת֧וֹ עִמָּכֶ֛ם חָדָ֖שׁ בְּמַלְכ֥וּת אָבִֽי :

כיפא עתיד להתכחש לישוע

30 וְכַֽאֲשֶׁר֨ הִלְל֔וּ יָֽצְא֖וּ אֶל־הַ֥ר הַזֵּיתִֽים : 31 וַיֹּ֤אמֶר אֲלֵיהֶם֨ יֵשׁ֔וּעַ אַתֶּ֧ם כֻּלְּכֶ֛ם תִּכָּ֥שְׁלוּ בִ֖י בַּלַּ֣יְלָה הַזֶּ֑ה כִּ֣י כָת֔וּב אַכֶּה֨ אֶת־הָֽרֹעֶ֔ה וּתְפוּצֶ֖יןָ צֹ֥אן הָעֵֽדֶר : 32 וְאַֽחֲרֵ֖י אֲשֶׁ֣ר קָ֑מְתִּי אֲקַדֵּ֣ם אֶתְכֶ֔ם לָלֶ֖כֶת הַגָּלִֽילָה : 33 וַיַּ֥עַן פֶּטְר֖וֹס וַיֹּ֣אמֶר אֵלָ֑יו גַּ֣ם אִ֤ם הַכֹּל֨ יִכָּ֣שְׁלוּ בָ֔ךְ אֲנִ֕י לְעוֹלָ֖ם לֹ֥א אֶכָּשֵֽׁל : 34 וַיֹּ֤אמֶר אֵלָיו֨ יֵשׁ֔וּעַ אָמְנָ֕ם אֲנִ֖י אֹמֵ֣ר לָ֑ךְ כִּ֣י ׀ בַּלַּ֣יְלָה הַזֶּ֗ה בְּטֶ֨רֶם֨ יִקְרָ֣א תַרְנְגֹ֔ל תְּכַחֵ֥שׁ בִּ֖י שָׁלֹ֥שׁ פְּעָמִֽים : 35 וַיֹּ֨אמֶר֨ אֵלָ֜יו פֶּטְר֗וֹס אַ֠ף אִ֣ם צָרִ֤יךְ יִהְיֶה֨ כִּֽי־אָמ֣וּת אִתְּךָ֔ לֹ֥א אֲכַחֵ֖שׁ בָּ֑ךְ וּכְמוֹ־כֵ֕ן גַּ֥ם כָּל־הַתַּלְמִידִ֖ים אָמָֽרוּ :

ישוע בגת שמנים

36 אָ֣ז בָּ֤א יֵשׁ֨וּעַ֨ עִמָּהֶ֔ם אֶל־מָק֖וֹם הַנִּקְרָ֣א גַת־שְׁמָנִ֑ים וַיֹּ֨אמֶר֨ אֶל־הַתַּלְמִידִ֔ים שְׁב֤וּ לָכֶם֨ פֹּ֔ה עַ֛ד כִּ֥י אֵלֵ֖ךְ וְהִתְפַּלַּ֥לְתִּי שָֽׁם : 37 וַיִּ֤קַּח אִתּוֹ֨ אֶת־פֶּטְר֔וֹס וְאֶת־שְׁנֵ֖י בְּנֵ֣י זַבְדָּ֑י וַיָּ֥חֶל לְהֵֽעָצֵ֖ב וּלְהִתְעַטֵּֽף : 38 אָ֚ז אָמַ֣ר אֲלֵיהֶ֔ם נֶֽעֱצָבָ֣ה נַפְשִׁ֛י מְאֹ֖ד עַד־מָ֑וֶת לִ֥ינוּ פֹ֖ה וְשִׁקְד֥וּ עִמִּֽי : 39 וַיַּֽעֲבֹ֨ר הָ֜לְאָה מְעַ֗ט וַיִּפֹּ֣ל עַל־פָּנָיו֘ וַיִּתְפַּלֵּ֣ל לֵאמֹר֒ אָבִ֞י אִם־יוּכַ֣ל לִהְי֗וֹת תַּֽעֲבֹ֥ר נָ֛א מִמֶּ֖נִּי הַכּ֣וֹס הַזֹּ֑את אֶ֗פֶס לֹ֣א כַֽאֲשֶׁ֤ר אֲנִי֨ רֹצֶ֔ה כִּ֖י אִם־כַּֽאֲשֶׁ֥ר אָֽתָּה : 40 וַיָּבֹא֨ אֶל־הַתַּלְמִידִ֔ים וַיִּמְצָאֵ֖ם יְשֵׁנִ֑ים וַיֹּ֣אמֶר אֶל־פֶּטְר֗וֹס הַֽאִם־כָּ֨כָה֨ לֹ֣א יְכָלְתֶּ֔ם לִשְׁק֥וֹד עִמִּ֖י שָׁעָ֥ה אֶחָֽת : 41 שִׁקְדוּ֨ וְהִתְפַּלְל֔וּ לְמַ֛עַן לֹ֥א תָבֹ֖אוּ לְמַסָּ֑ה אָמְנָם֨ הָר֣וּחַ חֲפֵצָ֔ה אַ֥ךְ הַבָּשָׂ֖ר רָפֶֽה : 42 וַיֵּ֨לֶךְ ל֥וֹ עוֹד֨ שֵׁנִי֔ת וַיִּתְפַּלֵּ֖ל לֵאמֹ֑ר אָבִ֡י אִם־לֹ֥א תוּכַל֩ הַכּ֨וֹס הַזֹ֜את לַֽעֲבֹ֣ר מִמֶּ֗נִּי בִּלְתִּי֨ אִם־אֶשְׁתֶּ֣ה אֹתָ֔הּ יְהִ֖י רְצוֹנֶֽךָ : 43 וַיָּבֹ֕א וַיִּמְצָאֵ֥ם ע֖וֹד יְשֵׁנִ֑ים כִּ֛י הָי֥וּ עֵֽינֵיהֶ֖ם כְּבֵדֽוֹת : 44 וַיַּֽעֲזֹ֖ב אֹתָ֑ם וַיֵּ֣לֶךְ ע֗וֹד וַיִּתְפַּלֵּל֨ פַּ֣עַם שְׁלִישִׁ֔ית אָמ֕וֹר עֶ֖צֶם הַדָּבָ֥ר הַזֶּֽה : 45 אָ֞ז בָּ֤א אֶל־תַּלְמִידָיו֨ וַיֹּ֣אמֶר אֲלֵיהֶ֔ם שְׁנ֥וּ מֵֽעַתָּ֖ה וְנ֑וּחוּ הִנֵּה֨ קָֽרְבָ֣ה הַשָּׁעָ֔ה וּבֶן־הָֽאָדָ֥ם מָסְגָּ֖ר בִּידֵ֥י חַטָּאִֽים : 46 ק֖וּמוּ וְנֵלֵ֑כָה הִנֵּ֕ה קָרֵ֖ב הַמַּסְגִּ֥יר אֹתִֽי :

ישוע נעצר

47 וְעוֹד֘ ה֣וּא מְדַבֵּר֒ הִנֵּ֣ה יְהוּדָה֩ אֶחָ֨ד מִשְּׁנֵי֤ם הֶֽעָשָׂר֨ בָּ֔א וְעִמּ֕וֹ הָמ֥וֹן רָ֖ב בַּֽחֲרָב֣וֹת וּבְמַטּ֑וֹת מֵאֵ֛ת רָאשֵׁ֥י הַכֹּֽהֲנִ֖ים וְזִקְנֵ֥י הָעָֽם : 48 וְהַמַּסְגִּיר֨ אֹת֔וֹ נָתַ֥ן לָהֶ֛ם א֖וֹת לֵאמֹ֑ר מִ֠י אֲשֶׁ֨ר אֶשַּׁ֥ק אֹת֛וֹ זֶ֥ה ה֖וּא תִּפְשֽׂוּהוּ : 49 וּכְרֶ֗גַע נִגַּ֤שׁ אֶל־יֵשׁ֨וּעַ֨ וַיֹּאמַ֔ר שָׁל֥וֹם לְךָ֖ רַבִּ֑י וַיִּשַּׁ֖ק אֹתֽוֹ : 50 וַיֹּ֤אמֶר אֵלָיו֨ יֵשׁ֔וּעַ רֵ֖עַ עַל־מָ֣ה בָא֑תָ אָ֣ז נִגְּשׁ֗וּ וַיִּשְׁלְח֧וּ אֶת־יְדֵיהֶ֛ם בְּיֵשׁ֖וּעַ וַיִּתְפְּשֽׂוּהוּ : 51 וְהִנֵּה֩ אֶחָ֨ד מֵאֵ֜לֶּה אֲשֶׁ֣ר עִם־יֵשׁ֗וּעַ נָטָה֨ אֶת־יָד֔וֹ וַיִּשְׁל֖וֹף אֶת־חַרְבּ֑וֹ וַיַּ֗ךְ אֶת־עֶ֨בֶד֨ הַכֹּהֵ֣ן הַגָּד֔וֹל וַיָּ֖סַר אֶת־אָזְנֽוֹ : 52 וַיֹּ֤אמֶר יֵשׁ֨וּעַ֨ אֵלָ֔יו הָשֵׁ֥ב אֶת־חַרְבְּךָ֖ אֶל־מְקוֹמָ֑הּ כִּ֚י כָּל־אֹֽחֲזֵ֣י חֶ֔רֶב בְּחֶ֖רֶב יֹאבֵֽדוּ : 53 א֚וֹ הַתַּחְשֹׁ֔ב כִּ֣י לֹ֥א אוּכַ֛ל לִשְׁאֹ֥ל עַתָּ֖ה מֵאֵ֣ת אָבִ֑י וְיַצִּ֣יג לְפָנַ֔י יוֹתֵ֛ר מִשְּׁנֵ֥ים עָשָׂ֖ר מַֽחֲנ֥וֹת מַלְאָכִֽים : 54 וְאֵ֥יךְ אֵפ֖וֹא יִמָּֽלְא֣וּ הַכְּתָבִ֑ים כִּי־כֵ֖ן צָרִ֥יךְ לִהְיֽוֹת : 55 בַּשָׁעָ֣ה הַהִ֗יא אָמַ֣ר יֵשׁוּעַ֘ אֶל־הַֽהֲמוֹנִים֒ הַֽאִם־כְּעַ֨ל שֹׁדֵ֧ד יְצָאתֶ֛ם בַּֽחֲרָב֥וֹת וּבְמַטּ֖וֹת לִתְפֹּ֣שׂ אֹתִ֑י י֣וֹם י֗וֹם יָשַׁ֤בְתִּי עִמָּכֶם֙ מְלַמֵּ֣ד בַּֽהֵיכָ֔ל וְלֹ֥א הֶֽחֱזַקְתֶּ֖ם בִּֽי : 56 אַ֚ךְ כָּל־זֹ֣את הָֽיְתָ֔ה לְמַ֥עַן יִמָּלְ֖אוּ כִּתְבֵ֣י הַנְּבִיאִ֑ים אָ֕ז כָּל־הַתַּלְמִידִ֛ים עָֽזְב֥וּ אֹת֖וֹ וַיָּנֽוּסוּ :

ישוע לפני הסנהדרין

57 וְאֵ֜לֶּה אֲשֶׁ֣ר ׀ תָּֽפְשׂ֣וּ אֶת־יֵשׁ֗וּעַ הֽוֹלִיכ֨וּהוּ֨ מִשָּׁ֔ם אֶל־כַּיְפָ֖א הַכֹּהֵ֣ן הַגָּ֑דוֹל אֲשֶׁ֣ר שָׁ֔ם הַסּֽוֹפְרִ֥ים וְהַזְּקֵנִ֖ים הָ֥יוּ נִקְהָלִֽים : 58 וּפֶטְר֞וֹס הָלַ֤ךְ אַֽחֲרָיו֨ מֵֽרָח֔וֹק עַד־חֲצַ֖ר הַכֹּהֵ֣ן הַגָּד֑וֹל וַיָּבֹ֣א פְּנִ֗ימָה וַיֵּ֨שֶׁב֨ עִם־הַמְּשָׁ֣רְתִי֔ם לִרְא֖וֹת אֶת־הַסּֽוֹף : 59 וְרָאשֵׁ֨י הַכֹּֽהֲנִ֤ים והַזְּקֵנִים֨ וְכָל־הַסַּנְהֶדְרִ֔ין בִּקְּשׁ֛וּ עֵד֥וּת שֶׁ֖קֶר נֶ֣גֶד יֵשׁ֑וּעַ לְמַ֖עַן יְמִיתֽוּהוּ : 60 וְלֹ֣א מָצָ֔אוּ גַּ֠ם כַּֽאֲשֶׁ֨ר בָּ֜אוּ עֵ֥דֵי שֶׁ֛קֶר רַבִּ֖ים לֹ֣א מָצָ֑אוּ וּבָאַ֣חֲרוֹנָ֔ה נִגְּשׁ֕וּ שְׁנֵ֖י עֵ֥דֵי שָֽׁקֶר : 61 וַיֹּאמֵ֑רוּ זֶ֣ה אָמַ֗ר אוּכַ֤ל לַֽהֲרֹס֨ אֶת־הֵיכַ֣ל הָֽאֱלֹהִ֔ים וְלִבְנוֹת֖וֹ בִּשְׁלֹ֥שֶׁת יָמִֽים : 62 וַיָּ֛קָם הַכֹּהֵ֥ן הַגָּד֖וֹל וַיֹּ֣אמֶר אֵלָ֑יו הַאִם֨ לֹא־תַֽעֲנֶ֣ה מְא֔וּמָה מַ֕ה אֵ֖לֶּה מְעִידִ֥ים בָּֽךְ : 63 אַ֥ךְ יֵשׁ֖וּעַ הֶֽחֱרִ֑ישׁ וְיַּעַן֩ הַכֹּהֵ֨ן הַגָּד֜וֹל וַיֹּ֣אמֶר אֵלָ֗יו אֲנִ֤י מַשְׁבִּֽיעֲךָ֨ בֵּֽאלֹהִ֣ים חַיִּ֔ים כִּ֚י תֹּאמַ֣ר לָ֔נוּ אִם־אַתָּ֥ה ה֛וּא הַמָּשִׁ֖יחַ בֶּן־הָֽאֱלֹהִֽים : 64 וַיֹּ֤אמֶר אֵלָיו֨ יֵשׁ֔וּעַ אַתָּ֖ה אָמָ֑רְתָּ אֶ֗פֶס אֲנִי֨ אֹמֵ֣ר לָכֶ֔ם מֵֽעַתָּ֡ה תִּרְאוּ֩ אֵ֨ת בֶּן־הָֽאָדָ֤ם יֹשֵׁב֨ לִימִ֣ין הַגְּבוּרָ֔ה וּבָ֖א בְּעַנְנֵ֥י הַשָּׁמָֽיִם : 65 אָ֗ז קָרַ֞ע הַכֹּהֵ֨ן הַגָּד֤וֹל אֶת־בְּגָדָיו֨ וַיֹּ֔אמֶר אָכֵן֨ ה֣וּא גִדֵּ֔ף מַה־צֹּ֥רֶךְ לָ֛נוּ ע֖וֹד לְעֵדִ֑ים הִנֵּ֕ה עַתָּ֖ה שְׁמַעְתֶּ֥ם אֶת־גְּדֽוּפָתֽוֹ : 66 מַה־תַּֽחֲשֹׁ֑בוּ וַיַּֽעֲנוּ֨ וַיֹּֽאמְר֔וּ אָשֵׁ֥ם לַמָּ֖וֶת הֽוּא : 67 אָ֚ז יָֽרְק֣וּ בְּפָנָ֔יו וְהִכּ֖וּהוּ בְּאֶגְרֹ֑ף וַֽאֲחָדִ֕ים הִכּ֥וּהוּ בַכַּ֖ף עַל־הַלֶּֽחִי : 68 וַיֹּאמֵ֑רוּ הִנָּ֤בֵא לָ֨נוּ֨ הַמָּשִׁ֔יחַ מִ֥י ה֖וּא הַמַּכֶּ֥ה אֹתָֽךְ :

כיפא מתכחש לישוע

69 וּפֶטְר֕וֹס יָשַׁ֥ב מִח֖וּץ בֶּחָצֵ֑ר וַתִּגַּ֨שׁ אֵלָ֜יו נַֽעֲרָ֤ה אַחַת֨ וַתֹּאמַ֔ר גַּם־אַתָּ֣ה הָיִ֔יתָ עִ֖ם יֵשׁ֥וּעַ הַגְּלִילִֽי : 70 אַ֣ךְ ה֥וּא כִחֵ֛שׁ בִּפְנֵ֥י הַכֹּ֖ל לֵאמֹ֑ר לֹ֣א יָדַ֔עְתִּי מָ֖ה אַ֥תְּ אֹמָֽרֶת : 71 וּכְצֵאתוֹ֘ אֶל־הָֽאוּלָם֒ וַתֵּ֤רֶא אֹתוֹ֨ אַחֶ֔רֶת וַתֹּ֕אמֶר לַֽאֲשֶׁ֖ר הָ֣יוּ שָׁ֑ם גַּ֥ם זֶה֙ הָיָ֔ה עִ֖ם יֵשׁ֥וּעַ הַנֹּֽצְרִֽי : 72 וַיּ֥וֹסֶף ע֛וֹד לְכַחֵ֣שׁ בִּשְׁבוּעָ֑ה כִּ֛י לֹ֥א יָדַ֖עְתִּי אֶת־הָאִֽישׁ : 73 וְאַֽחֲרֵ֞י מְעַ֣ט מִזְעָ֗ר נִגְּשׁוּ֨ הָעֽוֹמְדִ֣ים שָׁ֔ם וַיֹּֽאמְר֖וּ אֶל־פֶּטְר֑וֹס אָמְנָ֗ם גַּם־אַתָּה֨ מֵהֶ֣ם אַתָּ֔ה כִּ֛י גַּ֥ם לְשֽׁוֹנְךָ֖ מְגַלָּ֥ה אֹתָֽךְ : 74 אָ֗ז הֵחֵ֤ל לְהַחֲרִים֨ וּלְהִשָּׁבֵ֔עַ כִּ֛י לֹ֥א יָדַ֖עְתִּי אֶת־הָאִ֑ישׁ וּכְרֶ֖גַע קָרָ֥א תַרְנְגֹֽל : 75 וַיִּזְכֹּ֨ר פֶּטְר֜וֹס אֶת־דְּבַ֣ר יֵשׁ֗וּעַ אֲשֶׁר֨ אָמַ֣ר אֵלָ֔יו כִּ֗י טֶ֚רֶם יִקְרָ֣א תַרְנְגֹ֔ל תִּכַחֵ֥שׁ בִּ֖י שָׁלֹ֣שׁ פְּעָמִ֑ים וַיֵּצֵ֣א הַח֔וּצָה וַיֵּ֖בְךְּ בְּכִ֥י תַמְרוּרִֽים :

לפרק הבא








להפעלת המסגרות
load frameset