לפרק הקודם

הבשורה על־פי מתי
פרק כז

ישוע לפני פילטוס

1 וּבִהְי֣וֹת הַבֹּ֗קֶר וַיַּֽעֲשׂ֨וּ עֵצָ֜ה כָּל־רָאשֵׁ֧י הַכֹּֽהֲנִ֛ים וְזִקְנֵ֥י הָעָ֖ם עַל־יֵשׁ֑וּעַ לְמַ֖עַן הָמִ֥ית אֹתֽוֹ ׃ 2 וַיַּֽאַסְר֣וּ אֹת֔וֹ וַיּֽוֹלִיכ֖וּהוּ מִשָּׁ֑ם וַיַּסְגִּיר֛וּהוּ אֶל־פָּנְטִיּ֥וֹס פִּֽילָט֖וֹס הַפֶּחָֽה ׃ 3 אָ֞ז יְהוּדָ֣ה ׀ הַמַּסְגִּ֣יר אֹת֗וֹ בִּרְאוֹת֛וֹ כִּ֥י נִרְשַׁ֖ע וַיִּנָּחֵ֑ם וַיָּ֨שֶׁב֨ אֶת־שְׁלֹשִׁ֣ים הַכֶּ֔סֶף אֶל־רָאשֵׁ֥י הַכֹּֽהֲנִ֖ים וְאֶל־הַזְּקֵנִֽים ׃ 4 וַיֹּ֨אמֶר֨ חָטָ֔אתִי בְּהַסְגִּירִ֖י דָּ֣ם נָקִ֑י אַ֣ךְ הֵ֤מָּה אָֽמְרוּ֨ מַה־זֹּ֣את לָ֔נוּ רְאֵ֖ה אָֽתָּה ׃ 5 וַיַּשְׁלֵ֧ךְ אֶת־הַכֶּ֛סֶף בַּֽהֵיכָ֖ל וַיָּ֣סַר מִשָּׁ֑ם וַיֵּ֥לֶךְ ל֖וֹ וַיֵּֽחָנֵֽק ׃ 6 וַיִּקְּח֛וּ רָאשֵׁ֥י הַכֹּֽהֲנִ֖ים אֶת־הַכָּ֑סֶף וַיֹּ֣אמְר֔וּ אֵ֣ין מֻתָּ֗ר לְהַשְׁלִ֤יךְ אֹתָם֨ אֶל־הָֽאוֹצָ֔ר בַּֽאֲשֶׁ֛ר מְחִ֥יר דָּ֖ם הֽוּא ׃ 7 וַיַּֽעֲשׂ֣וּ עֵצָ֔ה וַיִּקְנ֥וּ בָ֖ם אֶת־שְׂדֵ֣ה הַיּוֹצֵ֑ר לִקְבוּרָ֖ה לַגֵּרִֽים ׃ 8 עַל־כֵּ֗ן נִקְרָ֛א הַשָּׂדֶ֥ה הַה֖וּא שְׂדֵ֣ה דָ֑ם עַ֖ד הַיּ֥וֹם הַזֶּֽה ׃ 9 אָ֚ז הִתְמַלֵּ֔א הַנֶּֽאֱמָ֔ר בְּפִ֖י יִרְמְיָ֣הוּ הַנָּבִ֑יא הָֽאֹמֵ֕ר וַיִּקְּח֞וּ אֶת־שְׁלֹשִׁ֤ים הַכֶּ֨סֶף אֶ֣דֶר הַיָּקָ֔ר אֲשֶׁ֛ר הוֹקִ֥ירוּ אֹת֖וֹ מִבְּנֵ֥י יִשְׂרָאֵֽל ׃ 10 וַיִּתְּנ֣וּ אֹתָ֔ם בְּעַ֖ד שְׂדֵ֣ה הַיּוֹצֵ֑ר כַּֽאֲשֶׁ֥ר צִוַּ֖נִי יְהוָֹֽה ׃ 11 וַיַּֽעֲמֹ֣ד יֵשׁוּעַ֘ לִפְנֵ֣י הַפֶּחָה֒ וַיִּשְׁאַ֨ל אֹת֤וֹ הַפֶּחָה֨ לֵאמֹ֔ר הַֽאַתָּ֥ה ה֖וּא מֶ֣לֶךְ הַיְּהוּדִ֑ים וַיֹּ֤אמֶר אֵלָיו֨ יֵשׁ֔וּעַ אַתָּ֖ה אֹמֵֽר ׃ 12 וְכַֽאֲשֶׁר֩ דֻּבַּ֨ר עָלָ֜יו שִׂטְנָ֗ה בְּפִי֨ רָאשֵׁ֤י הַכֹּֽהֲנִים֨ וְהַזְּקֵנִ֔ים לֹ֥א עָנָ֖ה דָּבָֽר ׃ 13 וַיֹּ֥אמֶר אֵלָ֖יו פִּֽילָט֑וֹס הַאֵֽינְךָ֣ שֹׁמֵ֔עַ כַּמָּ֣ה דְבָרִ֔ים הֵ֥ם מְעִידִ֖ים בָּֽךְ ׃ 14 וְלֹֽא־עָנָ֤ה אֹתוֹ֨ עַל־זֹ֔את אַ֖ף דָּבָ֣ר אֶחָ֑ד עַ֛ד כִּֽי־תָמַ֥הּ הַפֶּחָ֖ה מְאֹֽד ׃

ישוע נידון למוות

15 וּמֵחָ֣ג לְחָ֗ג הָיָה֨ מִנְהַ֣ג הַפֶּחָ֔ה לְשַׁלַּ֥ח חָפְשִׁ֛י לָעָ֖ם אָסִ֣יר אֶחָ֑ד אֵ֖ת אֲשֶׁ֥ר חָפֵֽצוּ ׃ 16 וְאָ֗ז הָיָ֤ה לָהֶם֨ אָסִ֣יר נוֹדָ֔ע הַנִּקְרָ֖א בַּר־אַבָּֽא ׃ 17 לָכֵ֞ן כַּֽאֲשֶׁ֣ר נִקְהֲל֗וּ אָמַ֤ר אֲלֵיהֶם֨ פִּֽילָט֔וֹס אֶת־מִ֣י תִרְצ֔וּ כִּ֛י אֲשַׁלַּ֥ח לָכֶ֖ם חָפְשִׁ֑י אֵ֚ת בַּר־אַבָּ֔א א֥וֹ אֶת־יֵשׁ֖וּעַ הַנִּקְרָ֥א מָשִֽׁיחַ ׃ 18 כִּ֣י יָדַ֔ע כִּ֥י מִקִּנְאָ֖ה הִסְגִּ֥ירוּ אֹתֽוֹ ׃ 19 וּבְשִׁבְתּוֹ֨ עַל־כִּסֵּ֣א הַמִּשְׁפָּ֔ט וַתִּשְׁלַ֥ח אֵלָ֛יו אִשְׁתּ֖וֹ לֵאמֹ֑ר אַל־יִהְיֶה֩ לְךָ֨ דָבָ֜ר עִם־הַצַּדִּ֣יק הַה֗וּא כִּ֠י רַבּ֨וֹת עֻנֵּי֧תִי הַיּ֛וֹם בַּֽחֲל֖וֹם בַּֽעֲבוּרֽוֹ ׃ 20 אַ֠ךְ רָאשֵׁ֨י הַכֹּֽהֲנִ֜ים וְהַזְּקֵנִ֗ים פִּתּוּ֨ אֶת־הַֽהֲמוֹנִ֔ים כִּ֤י יִשְׁאֲלוּ֨ אֶת־בַּר־אַבָּ֔א וִֽיאַבְּד֖וּ אֶת־יֵשֽׁוּעַ ׃ 21 וַיַּ֨עַן הַפֶּחָ֜ה וַיֹּ֣אמֶר אֲלֵיהֶ֗ם אֶת־מִ֤י מִן־הַשְּׁנַ֨יִם֨ תִּרְצ֔וּ כִּ֛י אֲשַׁלַּ֥ח לָכֶ֖ם חָפְשִׁ֑י וַיֹּֽאמְר֖וּ אֵ֥ת בַּר־אַבָּֽא ׃ 22 וַיֹּ֤אמֶר אֲלֵיהֶם֨ פִּֽילָט֔וֹס וּמָ֨ה אֵפ֧וֹא אֶֽעֱשֶׂ֛ה לְיֵשׁ֖וּעַ הַנִּקְרָ֣א מָשִׁ֑יחַ וַיֹּֽאמְר֥וּ אֵלָ֛יו כֻּלָּ֖ם יִצָּלֵֽב ׃ 23 וַיֹּ֣אמֶר הַפֶּחָ֔ה לָ֕מָּה מָ֥ה רָעָ֖ה עָשָׂ֑ה וְהֵ֜מָּה ע֣וֹד יוֹתֵ֧ר צָֽעֲק֛וּ לֵאמֹ֖ר יִצָּלֵֽב ׃ 24 וּבִרְא֣וֹת פִּֽילָט֗וֹס כִּ֚י לֹֽא־הוֹעִ֣יל מְא֔וּמָה כִּ֥י אִם־בְּיוֹתֵ֖ר מְהוּמָ֣ה הָיָ֑תָה וַיִּקַּ֣ח מַיִם֩ וַיִּרְחַ֨ץ אֶת־יָדָ֜יו לִפְנֵ֤י הֶֽהָמוֹן֨ וַיֹּ֔אמֶר נָקִ֣י אָֽנֹכִ֗י מִדַּם֨ הַצַּדִּ֣יק הַזֶּ֔ה רְא֖וּ אַתֶּֽם ׃ 25 וַיַּ֤עַן כָּל־הָעָם֨ וַיֹּ֣אמְ֔רוּ דָּמ֥וֹ עָלֵ֖ינוּ וְעַל־בָּנֵֽינוּ ׃ 26 אָ֠ז שִׁלַּ֥ח לָהֶ֛ם חָפְשִׁ֖י אֵ֣ת בַּר־אַבָּ֑א וְאֶת־יֵשׁ֗וּעַ כְּיַסְּר֤וֹ אֹתוֹ֨ בְּשׁוֹטִ֔ים מָסַ֖ר לְמַ֥עַן יִצָּלֵֽב ׃ 27 אָ֠ז לָֽקְח֞וּ אַנְשֵׁ֨י חֵ֧יל הַפֶּחָ֛ה אֶת־יֵשׁ֖וּעַ אֶל־חֲצַ֣ר הַמִּשְׁפָּ֑ט וַיַּֽאַסְפ֥וּ עָלָ֖יו אֵ֥ת כָּל־הַגְּדֽוּד ׃ 28 וַיַּפְשִׁ֖יטוּ אֹת֑וֹ וַיָּשִׂ֣ימוּ עָ֔לָיו מְעִ֖יל תּוֹלַ֥עַת שָׁנִֽי ׃ 29 וַיֶּֽאֶרְג֥וּ כֶ֨תֶר֨ מִקּוֹצִ֔ים וַיָּשִׂ֥ימוּ עַל־רֹאשׁ֖וֹ וְקָנֶ֣ה בִֽימִינ֑וֹ וַיִּפְּל֨וּ עַל־בִּרְכֵיהֶ֜ם לְפָנָ֗יו וַיְהַתְּל֥וּ בוֹ֨ לֵאמֹ֔ר שָׁל֥וֹם לְךָ֖ מֶ֥לֶךְ הַיְּהוּדִֽים ׃ 30 וַיָּרֹ֖קּוּ בּ֑וֹ וַיִּקְּחוּ֨ אֶת־הַקָּנֶ֔ה וַיַּכּ֖וּהוּ עַל־רֹאשֽׁוֹ ׃ 31 וְכַֽאֲשֶׁר֨ הִתְּל֣וּ ב֔וֹ הִפְשִׁ֤יטוּ אֹתוֹ֨ אֶת־הַמְּעִ֔יל וַיַּלְבִּישׁ֖וּהוּ אֶת־בְּגָדָ֑יו וַיּֽוֹלִיכ֥וּהוּ מִשָּׁ֖ם לִצְל֥וֹב אֹתֽוֹ ׃

צליבת ישוע

32 וּבְצֵאתָ֗ם מָֽצְא֛וּ אִ֥ישׁ קֽוּרֵנִ֖י וּשְׁמ֣וֹ שִׁמְע֑וֹן אֶת־זֶ֣ה אִלְּצ֔וּ כִּ֥י יִשָּׂ֖א אֶת־צְלָבֽוֹ ׃ 33 וַיָּבֹ֨אוּ֨ אֶל־מָק֔וֹם הַנִּקְרָ֖א גֻּלְגָּלְתָּ֑א הַמְּתֻרְגָּ֖ם מְק֥וֹם הַגֻּלְגֹּֽלֶת ׃ 34 וַיִּתְּנ֥וּ לוֹ֨ לִשְׁתּ֔וֹת חֹ֖מֶץ מָה֣וּל בְּרֹ֑אשׁ וְכַֽאֲשֶׁ֣ר טָעַ֔ם לֹ֥א אָבָ֖ה לִשְׁתּֽוֹת ׃ 35 וְכַֽאֲשֶׁ֣ר ׀ צָֽלְב֣וּ אֹת֗וֹ חִלְּקוּ֨ אֶת־בְּגָדָ֔יו בְּהַפִּילָ֖ם גּוֹרָ֑ל לְמַ֣עַן יִמָּלֵ֗א הַנֶּֽאֱמָר֨ עַל־פִּ֣י הַנָּבִ֔יא יְחַלְּק֤וּ בְגָדַי֨ לָהֶ֔ם וְעַ֥ל לְבוּשִׁ֖י יַפִּ֥ילוּ גוֹרָֽל ׃ 36 וַיֵּ֣שְׁב֗וּ וַיִּשְׁמְר֥וּ אֹת֖וֹ שָֽׁם ׃ 37 וַיָּשִׂ֜ימוּ מֵעַ֧ל לְרֹאשׁ֛וֹ אֶת־דְּבַ֥ר אַשְׁמָת֖וֹ כָּת֑וּב זֶ֣ה ה֔וּא יֵשׁ֖וּעַ מֶ֥לֶךְ הַיְּהוּדִֽים ׃ 38 אָ֛ז נִצְלְב֥וּ אִתּ֖וֹ שְׁנֵ֣י שֹֽׁדְדִ֑ים אֶחָ֥ד מִֽימִינ֖וֹ וְאֶחָ֥ד מִשְּׂמֹאלֽוֹ ׃ 39 וְהָעֹֽבְרִ֥ים שָׁ֖ם גִּדְּפ֣וּ אֹת֑וֹ וַיָּנִ֖יעוּ אֶת־רָֽאשֵׁיהֶֽם ׃ 40 וַיֹּ֣אמְר֔וּ אַתָּ֞ה הַֽהֹרֵ֣ס אֶת־הַֽהֵיכָ֗ל וּבוֹנֶ֤ה אֹתוֹ֨ בִּשְׁלֹ֣שֶׁת יָמִ֔ים הוֹשִׁ֖יעָה אֶת־נַפְשֶׁ֑ךָ אִ֤ם בֶּן־הָֽאֱלֹהִים֨ אַתָּ֔ה רְדָ֖ה מִן־הַצְּלָֽב ׃ 41 וּכְמוֹ־כֵ֗ן גַּ֠ם רָאשֵׁ֨י הַכֹּֽהֲנִ֧ים הִתְּל֛וּ עִם־הַסּֽוֹפְרִ֥ים וְהַזְּקֵנִ֖ים וַיֹּאמֵֽרוּ ׃ 42 אֲחֵרִים֨ הוֹשִׁ֔יעַ אֶת־עַצְמ֕וֹ אֵינֶ֥נּוּ יָכ֖וֹל לְהוֹשִׁ֑יעַ אִם־מֶ֤לֶךְ יִשְׂרָאֵל֨ ה֔וּא יֵרֵ֨ד נָ֥א עַתָּ֛ה מִן־הַצְּלָ֖ב וְנַֽאֲמִ֥ין בּֽוֹ ׃ 43 בָּטַח֨ בֵּֽאלֹהִ֔ים יַצִּילֵ֣הוּ עַתָּ֔ה אִם־ה֥וּא חָפֵ֖ץ בּ֑וֹ כִּ֣י אָמַ֔ר כִּ֛י בֶּן־הָֽאֱלֹהִ֖ים אָנֹֽכִי ׃ 44 וְכָ֗כָה גַּ֧ם הַשֹּֽׁדְדִ֛ים הַנִּצְלָבִ֥ים עִמּ֖וֹ חֵֽרְפֽוּהוּ ׃

מותו וקבורתו

45 וּמִן־הַשָּׁעָ֣ה הַשִּׁשִּׁ֔ית חֹ֥שֶׁךְ הָיָ֖ה עַ֣ל כָּל־הָאָ֑רֶץ עַ֖ד הַשָּׁעָ֥ה הַתְּשִׁיעִֽית ׃ 46 וְכַשָּׁעָ֣ה הַתְּשִׁיעִ֗ית צָעַ֨ק יֵשׁ֜וּעַ בְּק֤וֹל גָּדוֹל֨ לֵאמֹ֔ר אֵלִ֥י ׀ אֵלִ֖י לְמָ֣ה שְׁבַקְתָּ֑נִי וְה֣וּא מְתֻרְגָּ֔ם אֵלִ֥י ׀ אֵלִ֖י לָ֥מָּה עֲזַבְתָּֽנִי ׃ 47 וַֽאֲחָדִים֨ מִן־הָעֹֽמְדִ֣ים שָׁ֔ם כְּשָׁמְעָ֖ם אָמָר֑וּ כִּ֛י אֶל־אֵֽלִיָּ֖הוּ קוֹרֵ֥א זֶֽה ׃ 48 וּכְרֶ֜גַע רָ֣ץ אֶחָ֤ד מֵהֶם֨ וַיִּקַּ֣ח סְפ֔וֹג וַיְמַלְּאֵ֖הוּ חֹ֑מֶץ וַיְשִׂימֵ֥הוּ עַל־קָנֶ֖ה וַיַּשְׁקֵֽהוּ ׃ 49 וְהַנִּשְׁאָרִ֖ים אָמָ֑רוּ הֶ֚רֶף וְנִרְאֶ֔ה אִם־יָבֹ֥א אֵֽלִיָּ֖הוּ לְהוֹשִׁ֥יעַ אֹתֽוֹ ׃ 50 וְיֵשׁ֕וּעַ צָ֥עַק ע֖וֹד בְּק֣וֹל גָּד֑וֹל וַיִּפַּ֖ח אֶת־רוּחֽוֹ ׃ 51 וְהִנֵּ֞ה פָּרֹ֤כֶת הַֽהֵיכָל֨ נִקְרְעָ֣ה לִשְׁתַּ֔יִם מִמַּ֖עְלָה עַ֣ד מָ֑טָּה וְהָאָ֣רֶץ רָעָ֔שָׁה וְהַסְּלָעִ֖ים נִבְקָֽעוּ ׃ 52 וְהַקְּבָרִ֖ים נִפְתָּ֑חוּ וְרַבּ֨וֹת גְּוִיּ֧וֹת הַקְּדוֹשִׁ֛ים אֲשֶׁ֥ר יָֽשְׁנ֖וּ קָֽמוּ ׃ 53 וַיֵּֽצְאוּ֨ מִן־הַקְּבָרִ֔ים אַֽחֲרֵ֖י תְּקֽוּמָת֑וֹ וַיָּבֹאוּ֨ אֶל־הָעִ֣יר הַקְּדֹשָׁ֔ה וַיֵּֽרָא֖וּ לָֽרַבִּֽים ׃ 54 וְשַׂ֣ר הַמֵּאָ֡ה וְאֵ֣לֶּה אֲשֶׁר֩ שָֽׁמְר֨וּ אִתּ֜וֹ אֶת־יֵשׁ֗וּעַ בִּרְאוֹתָ֤ם אֶת־הָרַ֨עַשׁ֨ וְאֵ֣ת הַדְּבָרִ֣ים הַנִּהְיִ֔ים יָֽרְא֖וּ מְאֹ֑ד וַיֹּ֣אמְר֔וּ אָמְנָ֕ם זֶ֥ה הָיָ֖ה בֶּ֥ן הָֽאֱלֹהִֽים ׃ 55 וַתִּהְיֶ֥ינָה שָּׁ֛ם נָשִׁ֥ים רַבּ֖וֹת מַבִּיט֣וֹת מֵֽרָח֑וֹק אֲשֶׁר֩ הָֽלְכ֨וּ אַֽחֲרֵ֤י יֵשׁ֨וּעַ֨ מִן־הַגָּלִ֔יל וְשֵֽׁרְת֖וּ אֹתֽוֹ ׃ 56 וּבְתוֹכָ֕ן הָֽיְתָ֖ה מִרְיָ֣ם הַמַּגְדַּלִּ֑ית וּמִרְיָ֗ם אֵ֚ם יַֽעֲקֹ֣ב וְיוֹסֵ֔י וְאֵ֖ם בְּנֵ֥י זַבְדָּֽי ׃ 57 וְכַֽאֲשֶׁר֨ הָ֣יָה עֶ֔רֶב וַיָּבֹ֨א אִ֥ישׁ עָשִׁ֛יר מִן־אֲרִימָֽתִיָּ֖ה וּשְׁמ֣וֹ יוֹסֵ֑ף אֲשֶׁ֥ר גַּם־ה֛וּא הָיָ֖ה תַּלְמִ֥יד יֵשֽׁוּעַ ׃ 58 ה֤וּא נִגַּ֣שׁ אֶל־פִּֽילָט֔וֹס וַיִּשְׁאַ֖ל אֶת־גְּוִיַּ֣ת יֵשׁ֑וּעַ אָ֚ז צִוָּ֣ה פִֽילָט֔וֹס כִּ֛י תִּמָּסֵ֥ר ל֖וֹ הַגְּוִיָּֽה ׃ 59 וַיִּקַּ֥ח יוֹסֵ֖ף אֶת־הַגְּוִיָּ֑ה וַיִּכְרַ֥ךְ אֹתָ֖הּ בְּסָדִ֥ין טָהֽוֹר ׃ 60 וַיָּ֤שֶׂם אֹתָהּ֨ בְּקִבְר֣וֹ הֶֽחָדָ֔שׁ אֲשֶׁ֥ר חָצֵ֖ב בַּסָּ֑לַע וַיָּ֜גֶל אֶ֧בֶן גְּדוֹלָ֛ה אֶל־פֶּ֥תַח הַקֶּ֖בֶר וַיֵּ֥לֶךְ לֽוֹ ׃ 61 וַתִּהְיֶ֥ינָה שָּׁ֛ם מִרְיָ֥ם הַמַּגְדַּלִּ֖ית וּמִרְיָ֣ם הָֽאַחֶ֑רֶת יֽשְׁב֖וֹת מִמּ֥וּל הַקָּֽבֶר ׃

משמר על הקבר

62 וּבְי֨וֹם הַמָּֽחֳרָ֜ת אֲשֶׁר־ה֣וּא ׀ אַֽחֲרֵ֣י הַֽהֲכָנָ֗ה נִקְהֲל֞וּ רָאשֵׁ֧י הַכֹּֽהֲנִ֛ים וְהַפְּרוּשִׁ֖ים אֵ֥צֶל פִּֽילָטֽוֹס ׃ 63 לֵאמֹ֑ר אֲדֹנֵ֗נוּ זָכַ֜רְנוּ כִּֽי־הַמַּתְעֶ֨ה הַה֤וּא אָמַר֨ בְּעוֹדֶ֣נּוּ חַ֔י אַֽחֲרֵ֛י שְׁלֹ֥שֶׁת יָמִ֖ים אָֽקוּם ׃ 64 לָכֵ֣ן ׀ צַ֗ו כִּ֣י הַקֶּ֜בֶר יֵֽעָשֵׂ֣ה בָטוּחַ֘ עַד־הַיּ֣וֹם הַשְּׁלִישִׁי֒ פֶּן־יָבֹ֨אוּ תַלְמִידָ֥יו לַ֨יְלָה֨ וְיִגְנְב֣וּ אֹת֔וֹ וְיֹֽאמְרוּ֨ אֶל־הָעָ֔ם קָ֖ם מֵעִ֣ם הַמֵּתִ֑ים וְתִהְיֶה֙ הַמִּרְמָ֣ה הָאַֽחֲרוֹנָ֗ה רָעָ֖ה מִן־הָרִֽאשׁוֹנָֽה ׃ 65 וַיֹּ֤אמֶר אֲלֵיהֶם֨ פִּֽילָט֔וֹס יֵ֥שׁ לָכֶ֖ם מִשְׁמָ֑ר לְכ֣וּ לָכֶ֔ם עֲשׂ֥וּהוּ בָט֖וּחַ כַּֽאֲשֶׁ֥ר תֵּדָֽעוּ ׃ 66 וְהֵ֣מָּה הָֽלְכ֔וּ וַיַּֽעֲשׂ֧וּ אֶת־הַקֶּ֛בֶר בָּט֖וּחַ בַּמִּשְׁמָ֑ר אַֽחֲרֵ֛י אֲשֶׁ֥ר חָֽתְמ֖וּ אֶת־הָאָֽבֶן ׃

לפרק הבא








להפעלת המסגרות
load frameset