אגרת שאול אל טיטוס
פרק ב

הלקח הבריא

1 וְאַתָּה֨ דַּבֵּ֣ר אֶת־הַדְּבָרִ֔ים הַנָּאוִ֖ים אֶל־הַלֶּקַ֥ח הַשָּׁלֵֽם ׃ 2 הַזְּקֵנִ֕ים כִּ֥י יִהְי֛וּ שֹֽׁקְדִ֥ים ׀ כְּבוּדִ֖ים נִזָּרִ֑ים שְׁלֵמִ֛ים בָּֽאֱמוּנָ֥ה ׀ בָּאַֽהֲבָ֖ה בַּתּוֹחָֽלֶת ׃ 3 וּכְמוֹ־כֵן֨ הַזְּקֵנ֔וֹת בְּהִתְהַלְּכ֖וּת נָאו֣וֹת לַקֹּ֑דֶשׁ לֹ֣א מַלְשִׁינ֗וֹת לֹ֧א נֶֽעֱבָד֛וֹת לְיַ֥יִן רַ֖ב מְלַמְּד֥וֹת טֽוֹב ׃ 4 לְמַ֥עַן תַּזֵּ֖רְנָה אֶת־הַנְּעָר֑וֹת לִהְיוֹת֨ אֹֽהֲב֣וֹת בַּֽעֲלֵיהֶ֗ן אֹֽהֲב֖וֹת בְּנֵיהֶֽן ׃ 5 נִזָּר֣וֹת ׀ נְקִיּ֗וֹת צוֹפוֹת֨ הֲלִיכ֣וֹת בַּ֔יִת טוֹב֖וֹת נִכְנָע֣וֹת לְבַֽעֲלֵיהֶ֑ן לְמַ֛עַן לֹ֥א יְגֻדַּ֖ף דְּבַ֥ר הָֽאֱלֹהִֽים ׃ 6 וּכְמוֹ־כֵ֛ן אֶת־הַנְּעָרִ֥ים הַזְהֵ֖ר לִהְי֥וֹת נִזָּרִֽים ׃ 7 בְּכָל־דָּבָר֙ הַרְאֵ֣ה עַצְמְךָ֔ תַּבְנִ֖ית מַֽעֲשִׂ֣ים טוֹבִ֑ים בַּלֶּ֕קַח לֹֽא־זִיּ֥וּף ׀ כֹּ֖בֶד זַכּֽוּת ׃ 8 אֹ֥מֶר שָׁלֵ֖ם בִּלְתִּ֣י נֶאְשָׁ֑ם לְמַ֤עַן יֵבוֹשׁ֨ בַּ֣עַל הָרִ֔יב מִבְּלִי֩ הֱי֨וֹת ל֥וֹ מְא֛וּמָה לְדַבֵּ֥ר בָּכֶ֖ם רָֽע ׃ 9 אֶת־הָֽעֲבָדִ֗ים לְהִכָּנֵ֨עַ֨ לַֽאֲדֹ֣נֵיהֶ֔ם לִהְי֥וֹת רְצוּיִ֖ים בַּכֹּ֑ל בִּלְתִּ֥י מְדַבְּרִ֖ים נֶגְדָּֽם ׃ 10 בִּלְתִּי֨ מְנַצְּלִ֣ים לָהֶ֔ם כִּ֥י אִם־מַרְאִ֖ים כָּל־אֱמוּנָ֣ה טוֹבָ֑ה לְמַ֣עַן יְפָֽאֲר֗וּ אֶת־לֶ֛קַח הָֽאֱלֹהִ֥ים מֽוֹשִׁיעֵ֖נוּ בְּכָל־דָּבָֽר ׃ 11 כִּ֣י הוֹפִ֜יעַ חֵ֧ן הָֽאֱלֹהִ֛ים הַמֵּבִ֥יא תְשׁוּעָ֖ה לְכָל־בְּנֵ֥י אָדָֽם ׃ 12 הַמְּיַסֵּ֣ר אֹתָ֔נוּ כִּ֧י נְכַחֵ֛שׁ בָּרֶ֖שַׁע וּבְתַֽאֲוֹ֣ת הַתֵּבֵ֑ל וְנִחְיֶ֗ה בִּנְזִיר֥וּת וּבְצֶ֛דֶק וּבְיִרְאַ֥ת אֱלֹהִ֖ים בָּֽעוֹלָ֥ם הַזֶּֽה ׃ 13 בְּצַפּוֹתֵ֨נוּ֨ אֶל־הַתִּקְוָ֣ה הַמְּאֻשָּׁרָ֔ה וְאֶל־הֽוֹפָעַ֗ת כְּב֨וֹד הָֽאֱלֹהִ֧ים הַגָּד֛וֹל וּמֽוֹשִׁיעֵ֖נוּ יֵשׁ֥וּעַ הַמָּשִֽׁיחַ ׃ 14 אֲשֶׁ֛ר נָתַ֥ן אֶת־נַפְשׁ֖וֹ בַּֽעֲדֵ֑נוּ לְמַעַן֩ יִפְדֶּ֨ה אֹתָ֜נוּ מִכָּל־עָוֹ֗ן וִֽיטַהֵ֤ר אֵלָיו֨ עַ֣ם סְגֻלָּ֔ה הַקַּנָּ֖א לְמַֽעֲשִׂ֥ים טוֹבִֽים ׃ 15 אֶת־אֵ֗לֶּה דַּבֵּ֛ר וְהַזְהֵ֥ר וְהוֹכִ֖יחַ בְּכָל־צִוּ֑וּי אִ֖ישׁ אַל־יִבְזֶ֥ה אֹתָֽךְ ׃