לפרק הקודם

בראשית פרק כג

חיי שרה
(מלכים א', א' א' - לא')

א וַיִּֽהְיוּ֙ חַיֵּ֣י שָׂרָ֔ה מֵאָ֥ה שָׁנָ֛ה וְעֶשְׂרִ֥ים שָׁנָ֖ה וְשֶׁ֣בַע שָׁנִ֑ים שְׁנֵ֖י חַיֵּ֥י שָׂרָֽה׃    ב וַתָּ֣מָת שָׂרָ֗ה בְּקִרְיַ֥ת אַרְבַּ֛ע הִ֥וא חֶבְר֖וֹן בְּאֶ֣רֶץ כְּנָ֑עַן וַיָּבֹא֙ אַבְרָהָ֔ם לִסְפֹּ֥ד לְשָׂרָ֖ה וְלִבְכֹּתָֽהּ׃    ג וַיָּ֨קָם֙ אַבְרָהָ֔ם מֵעַ֖ל פְּנֵ֣י מֵת֑וֹ וַיְדַבֵּ֥ר אֶל⁠־בְּנֵי⁠־חֵ֖ת לֵאמֹֽר׃    ד גֵּר⁠־וְתוֹשָׁ֥ב אָֽנֹכִ֖י עִמָּכֶ֑ם תְּנ֨וּ לִ֤י אֲחֻזַּת⁠־קֶ֨בֶר֙ עִמָּכֶ֔ם וְאֶקְבְּרָ֥ה מֵתִ֖י מִלְּפָנָֽי׃    ה וַיַּֽעֲנ֧וּ בְנֵי⁠־חֵ֛ת אֶת⁠־אַבְרָהָ֖ם לֵאמֹ֥ר לֽוֹ׃    ו שְׁמָעֵ֣נוּ ׀ אֲדֹנִ֗י נְשִׂ֨יא אֱלֹהִ֤ים אַתָּה֙ בְּתוֹכֵ֔נוּ בְּמִבְחַ֣ר קְבָרֵ֔ינוּ קְבֹ֖ר אֶת⁠־מֵתֶ֑ךָ אִ֣ישׁ מִמֶּ֔נּוּ אֶת⁠־קִבְר֛וֹ לֹֽא⁠־יִכְלֶ֥ה מִמְּךָ֖ מִקְּבֹ֥ר מֵתֶֽךָ׃    ז וַיָּ֧קָם אַבְרָהָ֛ם וַיִּשְׁתַּ֥חוּ לְעַם⁠־הָאָ֖רֶץ לִבְנֵי⁠־חֵֽת׃    ח וַיְדַבֵּ֥ר אִתָּ֖ם לֵאמֹ֑ר אִם⁠־יֵ֣שׁ אֶֽת⁠־נַפְשְׁכֶ֗ם לִקְבֹּ֤ר אֶת⁠־מֵתִי֙ מִלְּפָנַ֔י שְׁמָע֕וּנִי וּפִגְעוּ⁠־לִ֖י בְּעֶפְר֥וֹן בֶּן⁠־צֹֽחַר׃    ט וְיִתֶּן⁠־לִ֗י אֶת⁠־מְעָרַ֤ת הַמַּכְפֵּלָה֙ אֲשֶׁר⁠־ל֔וֹ אֲשֶׁ֖ר בִּקְצֵ֣ה שָׂדֵ֑הוּ בְּכֶ֨סֶף מָלֵ֜א יִתְּנֶ֥נָּה לִּ֛י בְּתֽוֹכְכֶ֖ם לַֽאֲחֻזַּת⁠־קָֽבֶר׃    י וְעֶפְר֥וֹן יֹשֵׁ֖ב בְּת֣וֹךְ בְּנֵי⁠־חֵ֑ת וַיַּעַן֩ עֶפְר֨וֹן הַֽחִתִּ֤י אֶת⁠־אַבְרָהָם֙ בְּאָזְנֵ֣י בְנֵי⁠־חֵ֔ת לְכֹ֛ל בָּאֵ֥י שַֽׁעַר⁠־עִיר֖וֹ לֵאמֹֽר׃    יא לֹֽא⁠־אֲדֹנִ֣י שְׁמָעֵ֔נִי הַשָּׂדֶה֙ נָתַ֣תִּי לָ֔ךְ וְהַמְּעָרָ֥ה אֲשֶׁר⁠־בּ֖וֹ לְךָ֣ נְתַתִּ֑יהָ לְעֵינֵ֧י בְנֵֽי⁠־עַמִּ֛י נְתַתִּ֥יהָ לָּ֖ךְ קְבֹ֥ר מֵתֶֽךָ׃    יב וַיִּשְׁתַּ֨חוּ֙ אַבְרָהָ֔ם לִפְנֵ֖י עַ֥ם הָאָֽרֶץ׃    יג וַיְדַבֵּ֨ר אֶל⁠־עֶפְר֜וֹן בְּאָזְנֵ֤י עַם⁠־הָאָ֨רֶץ֙ לֵאמֹ֔ר אַ֛ךְ אִם⁠־אַתָּ֥ה ל֖וּ שְׁמָעֵ֑נִי נָתַ֜תִּי כֶּ֤סֶף הַשָּׂדֶה֙ קַ֣ח מִמֶּ֔נִּי וְאֶקְבְּרָ֥ה אֶת⁠־מֵתִ֖י שָֽׁמָּה׃    יד וַיַּ֧עַן עֶפְר֛וֹן אֶת⁠־אַבְרָהָ֖ם לֵאמֹ֥ר לֽוֹ׃    טו אֲדֹנִ֣י שְׁמָעֵ֔נִי אֶרֶץ֩ אַרְבַּ֨ע מֵאֹ֧ת שֶֽׁקֶל⁠־כֶּ֛סֶף בֵּינִ֥י וּבֵֽינְךָ֖ מַה⁠־הִ֑וא וְאֶת⁠־מֵֽתְךָ֖ קְבֹֽר׃    טז וַיִּשְׁמַ֣ע אַבְרָהָם֮ אֶל⁠־עֶפְרוֹן֒ וַיִּשְׁקֹ֤ל אַבְרָהָם֙ לְעֶפְרֹ֔ן אֶת⁠־הַכֶּ֕סֶף אֲשֶׁ֥ר דִּבֶּ֖ר בְּאָזְנֵ֣י בְנֵי⁠־חֵ֑ת אַרְבַּ֤ע מֵאוֹת֙ שֶׁ֣קֶל כֶּ֔סֶף עֹבֵ֖ר לַסֹּחֵֽר׃    [שני] יז וַיָּ֣קָם ׀ שְׂדֵ֣ה עֶפְר֗וֹן אֲשֶׁר֙ בַּמַּכְפֵּלָ֔ה אֲשֶׁ֖ר לִפְנֵ֣י מַמְרֵ֑א הַשָּׂדֶה֙ וְהַמְּעָרָ֣ה אֲשֶׁר⁠־בּ֔וֹ וְכָל⁠־הָעֵץ֙ אֲשֶׁ֣ר בַּשָּׂדֶ֔ה אֲשֶׁ֥ר בְּכָל⁠־גְּבֻל֖וֹ סָבִֽיב׃    יח לְאַבְרָהָ֥ם לְמִקְנָ֖ה לְעֵינֵ֣י בְנֵי⁠־חֵ֑ת בְּכֹ֖ל בָּאֵ֥י שַֽׁעַר⁠־עִירֽוֹ׃    יט וְאַֽחֲרֵי⁠־כֵן֩ קָבַ֨ר אַבְרָהָ֜ם אֶת⁠־שָׂרָ֣ה אִשְׁתּ֗וֹ אֶל⁠־מְעָרַ֞ת שְׂדֵ֧ה הַמַּכְפֵּלָ֛ה עַל⁠־פְּנֵ֥י מַמְרֵ֖א הִ֣וא חֶבְר֑וֹן בְּאֶ֖רֶץ כְּנָֽעַן׃    כ וַיָּ֨קָם הַשָּׂדֶ֜ה וְהַמְּעָרָ֧ה אֲשֶׁר⁠־בּ֛וֹ לְאַבְרָהָ֖ם לַֽאֲחֻזַּת⁠־קָ֑בֶר מֵאֵ֖ת בְּנֵי⁠־חֵֽת׃   ס

לפרק הבא








להפעלת המסגרות
load frameset