איכה פרק ג

א אֲנִי הַגֶּבֶר רָאָה עֳנִי בְּשֵׁבֶט עֶבְרָתוֹ׃    ב אוֹתִי נָהַג וַיֹּלַךְ חֹשֶׁךְ וְלֹא-אוֹר׃    ג אַךְ בִּי יָשֻׁב יַהֲפֹךְ יָדוֹ כָּל-הַיּוֹם׃   ס

ד בִּלָּה בְשָׂרִי וְעוֹרִי שִׁבַּר עַצְמוֹתָי׃    ה בָּנָה עָלַי וַיַּקַּף רֹאשׁ וּתְלָאָה׃    ו בְּמַחֲשַׁכִּים הוֹשִׁיבַנִי כְּמֵתֵי עוֹלָם׃   ס

ז גָּדַר בַּעֲדִי וְלֹא אֵצֵא הִכְבִּיד נְחָשְׁתִּי׃    ח גַּם כִּי אֶזְעַק וַאֲשַׁוֵּעַ שָׂתַם תְּפִלָּתִי׃    ט גָּדַר דְּרָכַי בְּגָזִית נְתִיבֹתַי עִוָּה׃   ס

י דֹּב אֹרֵב הוּא לִי אריה (אֲרִי) בְּמִסְתָּרִים׃    יא דְּרָכַי סוֹרֵר וַיְפַשְּׁחֵנִי שָׂמַנִי שֹׁמֵם׃    יב דָּרַךְ קַשְׁתּוֹ וַיַּצִּיבֵנִי כַּמַּטָּרָא לַחֵץ׃   ס

יג הֵבִיא בְּכִלְיֹתָי בְּנֵי אַשְׁפָּתוֹ׃    יד הָיִיתִי שְּׂחֹק לְכָל-עַמִּי נְגִינָתָם כָּל-הַיּוֹם׃    טו הִשְׂבִּיעַנִי בַמְּרוֹרִים הִרְוַנִי לַעֲנָה׃   ס

טז וַיַּגְרֵס בֶּחָצָץ שִׁנָּי הִכְפִּישַׁנִי בָּאֵפֶר׃    יז וַתִּזְנַח מִשָּׁלוֹם נַפְשִׁי נָשִׁיתִי טוֹבָה׃    יח וָאֹמַר אָבַד נִצְחִי וְתוֹחַלְתִּי מֵיְהוָה׃   ס

יט זְכָר-עָנְיִי וּמְרוּדִי לַעֲנָה וָרֹאשׁ׃    כ זָכוֹר תִּזְכּוֹר ותשיח (וְתָשׁוֹחַ) עָלַי נַפְשִׁי׃    כא זֹאת אָשִׁיב אֶל-לִבִּי עַל-כֵּן אוֹחִיל׃   ס

כב חַסְדֵי יְהוָה כִּי לֹא-תָמְנוּ כִּי לֹא-כָלוּ רַחֲמָיו׃    כג חֲדָשִׁים לַבְּקָרִים רַבָּה אֱמוּנָתֶךָ׃    כד חֶלְקִי יְהוָה אָמְרָה נַפְשִׁי עַל-כֵּן אוֹחִיל לוֹ׃   ס

כה טוֹב יְהוָה לְקֹוָו לְנֶפֶשׁ תִּדְרְשֶׁנּוּ׃    כו טוֹב וְיָחִיל וְדוּמָם לִתְשׁוּעַת יְהוָה׃    כז טוֹב לַגֶּבֶר כִּי-יִשָּׂא עֹל בִּנְעוּרָיו׃   ס

כח יֵשֵׁב בָּדָד וְיִדֹּם כִּי נָטַל עָלָיו׃    כט יִתֵּן בֶּעָפָר פִּיהוּ אוּלַי יֵשׁ תִּקְוָה׃    ל יִתֵּן לְמַכֵּהוּ לֶחִי יִשְׂבַּע בְּחֶרְפָּה׃   ס

לא כִּי לֹא יִזְנַח לְעוֹלָם אֲדֹנָי׃    לב כִּי אִם-הוֹגָה וְרִחַם כְּרֹב חֲסָדָיו׃    לג כִּי לֹא עִנָּה מִלִּבּוֹ וַיַּגֶּה בְּנֵי-אִישׁ׃   ס

לד לְדַכֵּא תַּחַת רַגְלָיו כֹּל אֲסִירֵי אָרֶץ׃    לה לְהַטּוֹת מִשְׁפַּט-גָּבֶר נֶגֶד פְּנֵי עֶלְיוֹן׃    לו לְעַוֵּת אָדָם בְּרִיבוֹ אֲדֹנָי לֹא רָאָה׃   ס

לז מִי זֶה אָמַר וַתֶּהִי אֲדֹנָי לֹא צִוָּה׃    לח מִפִּי עֶלְיוֹן לֹא תֵצֵא הָרָעוֹת וְהַטּוֹב׃    לט מַה-יִּתְאוֹנֵן אָדָם חָי גֶּבֶר עַל-חֲטָאָו׃   ס

מ נַחְפְּשָׂה דְרָכֵינוּ וְנַחְקֹרָה וְנָשׁוּבָה עַד-יְהוָה׃    מא נִשָּׂא לְבָבֵנוּ אֶל-כַּפָּיִם אֶל-אֵל בַּשָּׁמָיִם׃    מב נַחְנוּ פָשַׁעְנוּ וּמָרִינוּ אַתָּה לֹא סָלָחְתָּ׃   ס

מג סַכּוֹתָה בָאַף וַתִּרְדְּפֵנוּ הָרַגְתָּ לֹא חָמָלְתָּ׃    מד סַכּוֹתָה בֶעָנָן לָךְ מֵעֲבוֹר תְּפִלָּה׃    מה סְחִי וּמָאוֹס תְּשִׂימֵנוּ בְּקֶרֶב הָעַמִּים׃   ס

מו פָּצוּ עָלֵינוּ פִּיהֶם כָּל-אֹיְבֵינוּ׃    מז פַּחַד וָפַחַת הָיָה לָנוּ הַשֵּׁאת וְהַשָּׁבֶר׃    מח פַּלְגֵי-מַיִם תֵּרַד עֵינִי עַל-שֶׁבֶר בַּת-עַמִּי׃   ס

מט עֵינִי נִגְּרָה וְלֹא תִדְמֶה מֵאֵין הֲפֻגוֹת׃    נ עַד-יַשְׁקִיף וְיֵרֶא יְהוָה מִשָּׁמָיִם׃    נא עֵינִי עוֹלְלָה לְנַפְשִׁי מִכֹּל בְּנוֹת עִירִי׃   ס

נב צוֹד צָדוּנִי כַּצִּפּוֹר אֹיְבַי חִנָּם׃    נג צָמְתוּ בַבּוֹר חַיָּי וַיַּדּוּ-אֶבֶן בִּי׃    נד צָפוּ-מַיִם עַל-רֹאשִׁי אָמַרְתִּי נִגְזָרְתִּי׃   ס

נה קָרָאתִי שִׁמְךָ יְהוָה מִבּוֹר תַּחְתִּיּוֹת׃    נו קוֹלִי שָׁמָעְתָּ  אַל-תַּעְלֵם אָזְנְךָ לְרַוְחָתִי לְשַׁוְעָתִי׃    נז קָרַבְתָּ בְּיוֹם אֶקְרָאֶךָּ אָמַרְתָּ אַל-תִּירָא׃   ס

נח רַבְתָּ אֲדֹנָי רִיבֵי נַפְשִׁי גָּאַלְתָּ חַיָּי׃    נט רָאִיתָה יְהוָה עַוָּתָתִי שָׁפְטָה מִשְׁפָּטִי׃    ס רָאִיתָה כָּל-נִקְמָתָם כָּל-מַחְשְׁבֹתָם לִי׃   ס

סא שָׁמַעְתָּ חֶרְפָּתָם יְהוָה כָּל-מַחְשְׁבֹתָם עָלָי׃    סב שִׂפְתֵי קָמַי וְהֶגְיוֹנָם עָלַי כָּל-הַיּוֹם׃    סג שִׁבְתָּם וְקִימָתָם הַבִּיטָה אֲנִי מַנְגִּינָתָם׃   ס

סד תָּשִׁיב לָהֶם גְּמוּל יְהוָה כְּמַעֲשֵׂה יְדֵיהֶם׃    סה תִּתֵּן לָהֶם מְגִנַּת-לֵב תַּאֲלָתְךָ לָהֶם׃    סו תִּרְדֹּף בְּאַף וְתַשְׁמִידֵם מִתַּחַת שְׁמֵי יְהוָה׃   פ