משלי פרק יח

א   לְתַאֲוָה יְבַקֵּשׁ נִפְרָד    בְּכָל-תּוּשִׁיָּה יִתְגַּלָּע׃   
ב   לֹא-יַחְפֹּץ כְּסִיל בִּתְבוּנָה    כִּי אִם-בְּהִתְגַּלּוֹת לִבּוֹ׃   
ג   בְּבוֹא-רָשָׁע בָּא גַם-בּוּז    וְעִם-קָלוֹן חֶרְפָּה׃   
ד   מַיִם עֲמֻקִּים דִּבְרֵי פִי-אִישׁ    נַחַל נֹבֵעַ מְקוֹר חָכְמָה׃   
ה   שְׂאֵת פְּנֵי-רָשָׁע לֹא-טוֹב     לְהַטּוֹת צַדִּיק בַּמִּשְׁפָּט׃   
ו   שִׂפְתֵי כְסִיל יָבֹאוּ בְרִיב    וּפִיו לְמַהֲלֻמוֹת יִקְרָא׃   
ז   פִּי-כְסִיל מְחִתָּה-לוֹ    וּשְׂפָתָיו מוֹקֵשׁ נַפְשׁוֹ׃   
ח   דִּבְרֵי נִרְגָּן כְּמִתְלַהֲמִים    וְהֵם יָרְדוּ חַדְרֵי-בָטֶן׃   
ט   גַּם מִתְרַפֶּה בִמְלַאכְתּוֹ     אָח הוּא לְבַעַל מַשְׁחִית׃   
י   מִגְדַּל-עֹז שֵׁם יְהוָה    בּוֹ-יָרוּץ צַדִּיק וְנִשְׂגָּב׃   
יא   הוֹן עָשִׁיר קִרְיַת עֻזּוֹ    וּכְחוֹמָה נִשְׂגָּבָה בְּמַשְׂכִּתוֹ׃   
יב   לִפְנֵי-שֶׁבֶר יִגְבַּהּ לֶב-אִישׁ    וְלִפְנֵי כָבוֹד עֲנָוָה׃   
יג   מֵשִׁיב דָּבָר בְּטֶרֶם יִשְׁמָע     אִוֶּלֶת הִיא-לוֹ וּכְלִמָּה׃   
יד   רוּחַ-אִישׁ יְכַלְכֵּל מַחֲלֵהוּ    וְרוּחַ נְכֵאָה מִי יִשָּׂאֶנָּה׃   
טו   לֵב נָבוֹן יִקְנֶה-דָּעַת    וְאֹזֶן חֲכָמִים תְּבַקֶּשׁ-דָּעַת׃   
טז   מַתָּן אָדָם יַרְחִיב לוֹ    וְלִפְנֵי גְדֹלִים יַנְחֶנּוּ׃   
יז   צַדִּיק הָרִאשׁוֹן בְּרִיבוֹ    יבא- (וּבָא-) רֵעֵהוּ וַחֲקָרוֹ׃   
יח   מִדְיָנִים יַשְׁבִּית הַגּוֹרָל    וּבֵין עֲצוּמִים יַפְרִיד׃   
יט   אָח נִפְשָׁע מִקִּרְיַת-עֹז    ומדונים (וּמִדְיָנִים) כִּבְרִיחַ אַרְמוֹן׃   
כ   מִפְּרִי פִי-אִישׁ תִּשְׂבַּע בִּטְנוֹ    תְּבוּאַת שְׂפָתָיו יִשְׂבָּע׃   
כא   מָוֶת וְחַיִּים בְּיַד-לָשׁוֹן    וְאֹהֲבֶיהָ יֹאכַל פִּרְיָהּ׃   
כב   מָצָא אִשָּׁה מָצָא טוֹב    וַיָּפֶק רָצוֹן מֵיְהוָה׃   
כג   תַּחֲנוּנִים יְדַבֶּר-רָשׁ    וְעָשִׁיר יַעֲנֶה עַזּוֹת׃   
כד   אִישׁ רֵעִים לְהִתְרֹעֵעַ    וְיֵשׁ אֹהֵב דָּבֵק מֵאָח׃