לפרק הקודם

תהילים פרק כג

א   מִזְמ֥וֹר לְדָוִ֑ד   יְהוָ֥ה רֹ֝עִ֗י לֹ֣א אֶחְסָֽר׃   
ב   בִּנְא֣וֹת דֶּ֭שֶׁא יַרְבִּיצֵ֑נִי   עַל⁠־מֵ֖י מְנֻח֣וֹת יְנַֽהֲלֵֽנִי׃   
ג   נַפְשִׁ֥י יְשׁוֹבֵ֑ב   יַֽנְחֵ֥נִי בְמַעְגְּלֵי⁠־צֶ֝֗דֶק לְמַ֣עַן שְׁמֽוֹ׃   
ד   גַּ֤ם כִּֽי⁠־אֵלֵ֨ךְ בְּגֵ֪יא צַלְמָ֡וֶת לֹֽא⁠־אִ֘ירָ֤א רָ֗ע   כִּֽי⁠־אַתָּ֥ה עִמָּדִ֑י
שִׁבְטְךָ֥ וּ֝מִשְׁעַנְתֶּ֗ךָ   הֵ֣מָּה יְנַֽחֲמֻֽנִי׃   
ה   תַּֽעֲרֹ֬ךְ לְפָנַ֨י ׀ שֻׁלְחָ֗ן   נֶ֥גֶד צֹֽרְרָ֑י
דִּשַּׁ֥נְתָּ בַשֶּׁ֥מֶן רֹ֝אשִׁ֗י   כּוֹסִ֥י רְוָיָֽה׃   
ו   אַ֤ךְ ׀ ט֤וֹב וָחֶ֣סֶד יִ֭רְדְּפוּנִי   כָּל⁠־יְמֵ֣י חַיָּ֑י
וְשַׁבְתִּ֥י בְּבֵית⁠־יְ֝הוָ֗ה   לְאֹ֣רֶךְ יָמִֽים׃   

לפרק הבא








להפעלת המסגרות
load frameset