א שִׁ֗יר הַֽמַּ֫עֲל֥וֹת
הַבֹּֽטְחִ֥ים בַּֽיהוָ֑ה כְּֽהַר־צִיּ֥וֹן לֹֽא־יִ֝מּ֗וֹט לְעוֹלָ֥ם יֵשֵֽׁב׃
ב יְֽרוּשָׁלִַ֗ם הָרִים֮ סָבִ֪יב לָ֥הּ
וַֽ֭יהוָה סָבִ֣יב לְעַמּ֑וֹ מֵֽ֝עַתָּ֗ה וְעַד־עוֹלָֽם׃
ג כִּ֤י לֹ֪א יָנ֡וּחַ שֵׁ֤בֶט הָרֶ֗שַׁע עַל֮ גּוֹרַ֪ל הַֽצַּדִּ֫יקִ֥ים
לְמַ֡עַן לֹֽא־יִשְׁלְח֖וּ הַצַּדִּיקִ֨ים בְּעַוְלָ֬תָה יְדֵיהֶֽם׃
ד הֵיטִ֣יבָה יְ֭הוָה לַטּוֹבִ֑ים וְ֝לִֽישָׁרִ֗ים בְּלִבּוֹתָֽם׃
ה וְהַמַּטִּ֤ים עֲֽקַלְקַלּוֹתָ֗ם יֽוֹלִיכֵ֣ם יְ֭הוָה אֶת־פֹּֽעֲלֵ֣י הָאָ֑וֶן
שָׁ֝ל֗וֹם עַל־יִשְׂרָאֵֽל׃