הבשורה על-פי מתי
פרק יז

ישוע לובש הדר

(מרקוס ט' 13-2;לוקס ט' 36-28)

1 וּמִקֵּץ שֵׁשֶׁת יָמִים לָקַח לוֹ יֵשׁוּעַ אֶת-פֶּטְרוֹס וְאֶת-יַעֲקֹב וְאֶת-יוֹחָנָן אָחִיו וַיַּעֲלֵם בָּדָד עַל-הַר גָּבוֹהַּ׃ 2 וַיִּשְׁתַּנֶּה לְעֵינֵיהֶם וַיַּזְהִירוּ פָנָיו כַּשֶׁמֶשׁ וּבְגָדָיו כָּאוֹר הִלְבִּינוּ׃ 3 וְהִנֵּה נִרְאוּ אֲלֵיהֶם משֶׁה וְאֵלִיָּהוּ וְהֵם מִדַּבְּרִים אִתּוֹ׃ 4 וַיַּעַן פֶּטְרוֹס וַיֹּאמֶר אֶל-יֵשׁוּעַ אֲדֹנִי טוֹב לָנוּ לִהְיוֹת פֹּה אִם-טוֹב בְּעֵינֶיךָ נַעֲשֶׂה פֹּה שָׁלשֹׁ סֻכּוֹת לְךָ אַחַת וּלְמשֶׁה אַחַת וּלְאֵלִיָּהוּ אֶחָת׃ 5 עוֹדֶנּוּ מְדַבֵּר וְהִנֵּה עֲנַן-אוֹר הֵצַל עֲלֵיהֶם (שמות כד' טז') וְהִנֵּה קוֹל מִתּוֹךְ הֶעָנָן אֹמֵר זֶה-בְּנִי יְדִידִי אֲשֶׁר רָצִיתִי (תהילים ב' ז'; ישעיהו מב' א') בוֹ אֵלָיו תִּשְׁמָעוּן׃(דברים יח' טו') 6 וַיְהִי כִּשְׁמֹעַ הַתַּלְמִידִים וַיִּפְּלוּ עַל-פְּנֵיהֶם וַיִּירְאוּ מְאֹד׃ 7 וַיִּגַּשׁ יֵשׁוּעַ וַיִּגַּע-בָּם וַיֹּאמַר קוּמוּ אַל-תִּירָאוּ׃ 8 וַיִּשְׂאוּ עֵינֵיהֶם וְלֹא רָאוּ אִישׁ בִּלְתִּי יֵשׁוּעַ לְבַדּוֹ׃ 9 וּבְרִדְתָּם מִן-הָהָר צִוָּה עֲלֵיהֶם יֵשׁוּעַ לֵאמֹר לֹא תַגִּידוּ לְאִישׁ אֶת-דְּבַר הַמַּרְאֶה עַד אִם-קָם בֶּן-הָאָדָם מֵעִם הַמֵּתִים׃ 10 וַיִּשְׁאָלֻהוּ תַלְמִידָיו לֵאמֹר מַה-זֶּה אֹמְרִים הַסּוֹפְרִים אֵלִיָּהוּ בּוֹא יָבוֹא בָּרִאשׁוֹנָה׃ 11 וַיַּעַן יֵשׁוּעַ וַיֹּאמֶר אֲלֵיהֶם אָכֵן אֵלִיָּהוּ יָבֹא (בָרִאשׁוֹנָה) וְהֵשִׁיב אֶת-הַכֹּל׃(מלאכי ג' כג') 12 אֲבָל אֹמֵר אֲנִי לָכֶם אֵלִיָּהוּ כְּבָר בָּא וְלֹא הִכִּירֻהוּ וַיַּעֲשׂוּ-בוֹ כִּרְצוֹנָם וְכֵן גַּם-בֶּן-הָאָדָם יְעֻנֶּה עַל-יָדָם׃ 13 אָז הֵבִינוּ הַתַּלְמִידִים כִּי עַל-יוֹחָנָן הַמַּטְבִּיל דִּבֶּר אֲלֵיהֶם׃

ריפוי נער אחוז שד

(מרקוס ט' 29-14;לוקס ט' 43-37)

14 וַיְהִי כְּבוֹאָם אֶל-הֲמוֹן הָעָם וַיִּגַּשׁ אֵלָיו אִישׁ וַיִּכְרַע עַל-בִּרְכָּיו לְנֶגְדּוֹ׃ 15 וַיֹּאמַר אֲדֹנִי רַחֵם-נָא עַל-בְּנִי כִּי-מֻכֵּה יָרֵחַ הוּא וְחָלְיוֹ רָע כִּי-פְעָמִים רַבּוֹת הוּא נֹפֵל בָּאֵשׁ וּפְעָמִים רַבּוֹת אֶל-תּוֹךְ הַמָּיִם׃ 16 וָאָבִיא אֹתוֹ אֶל-תַּלְמִידֶיךָ וְלֹא יָכְלוּ לִרְפֹּא לוֹ׃ 17 וַיַּעַן יֵשׁוּעַ וַיֹּאמֶר הוֹי דּוֹר חֲסַר אֱמוּנָה וּפְתַלְתֹּל עַד-מָתַי אֶהְיֶה עִמָּכֶם עַד-מָתַי אֶשָּׂא אֶתְכֶם (במדבר יד' יא') הָבִיאוּ אוֹתוֹ אֵלַי הֵנָּה׃ 18 וַיִּגְעַר-בּוֹ יֵשׁוּעַ וַיֵּצֵא הַשֵׁד מִמֶּנּוּ וַיֵּרָפֵא הַנַּעַר מִן-הַשָׁעָה הַהִיא׃ 19 וַיִּגְּשׁוּ הַתַּלְמִידִים אֶל-יֵשׁוּעַ וְהוּא לְבַדּוֹ וַיֹּאמְרוּ מַדּוּעַ אֲנַחְנוּ לֹא יָכֹלְנוּ לְגָרֲשׁוֹ׃ 20 וַיֹּאמֶר יֵשׁוּעַ אֲלֵיהֶם מִפְּנֵי חֹסֶר אֱמוּנַתְכֶם כִּי אָמֵן אֹמֵר אֲנִי לָכֶם אִם-יֵשׁ בָּכֶם אֱמוּנָה כְּגַרְגַּר הַחַרְדָּל וַאֲמַרְתֶּם אֶל-הָהָר הַזֶּה הֵעָתֵק מִזֶּה שָׁמָּה וְנֶעְתַּק מִמְּקוֹמוֹ וְאֵין דָּבָר אֲשֶׁר יִבָּצֵר מִכֶּם׃ [ 21 וְהַמִּין הַזֶּה לֹא יֵצֵא כִּי אִם-בִּתְפִלָּה וּבְצוֹם׃]

ישוע מדבר שנית על מותו ותחייתו

(מרקוס ט' 32-30;לוקס ט' 45-43)

22 וַיְהִי בְּעָבְרָם בְּאֶרֶץ הַגָּלִיל וַיֹּאמֶר אֲלֵיהֶם יֵשׁוּעַ עָתִיד בֶּן-הָאָדָם לְהִמָּסֵר בִּידֵי אֲנָשִׁים׃ 23 וַיַהַרְגֻהוּ וּבַיּוֹם הַשְׁלִישִׁי קוֹם יָקוּם וַיִּתְעַצְּבוּ מְאֹד׃

מס מחצית השקל לבית המקדש

24 וַיְהִי כְּבוֹאָם אֶל-כְּפַר-נַחוּם וַיִּגְּשׁוּ אֶל-פֶּטְרוֹס גַּבָּאֵי מַחֲצִית הַשָׁקֶל וַיֹּאמְרוּ הֲלֹא יִתֵּן רַבְּכֶם אֶת-מַחֲצִית הַשָׁקֶל׃(שמות ל' יב'-טו') 25 וַיֹּאמֶר יִתֵּן וּבְבוֹאוֹ הַבַּיְתָה קִדֵּם אֹתוֹ יֵשׁוּעַ לִשְׁאֹל וַיֹּאמַר מַה-דַּעְתְּךָ שִׁמְעוֹן מַלְכֵי הָאָרֶץ מִמִּי יִקְחוּ מֶכֶס וּמַס מֵאֵת בְּנֵיהֶם אוֹ מֵאֵת הַזָּרִים׃ 26 וַיֹּאמֶר פֶּטְרוֹס אֵלָיו מֵאֵת הַזָּרִים וַיֹּאמֶר לוֹ יֵשׁוּעַ אִם-כֵּן אֵפוֹא הַבָּנִים פְּטוּרִים הֵמָּה׃ 27 וְאוּלָם לְמַעַן אֲשֶׁר-לֹא-נִהְיֶה לָהֶם לְמִכְשׁוֹל לֵךְ אֶל-הַיָּם וְהִשְׁלַכְתָּ חַכָּה אֶל-תּוֹכוֹ וְאֶת-הַדָּג הָרִאשׁוֹן אֲשֶׁר יַעֲלֶה שָׂאֵהוּ וְכַאֲשֶׁר תִּפְתַּח אֶת-פִּיו תִּמְצָא בוֹ מַטְבֵּעַ אוֹתוֹ קַח וְשָׁקַלְתָּ עַל יָדִי וְעַל יָדֶךָ׃