1 וְהָר֖וּחַ מְפֹרָ֣שׁ מְדַבֵּ֑ר כִּ֣י ׀ בָּֽעִתּ֣וֹת הָאַֽחֲרוֹנ֗וֹת יִסּ֤וֹגוּ אֲחָדִים֙ מִן־הָֽאֱמוּנָ֔ה בְּהַקְשִׁיבָ֛ם לְרוּח֥וֹת מְתַעְתְּע֖וֹת וּלְלִקְחֵ֥י שֵׁדִֽים ׃ 2 הַדֹּֽבְרִ֥ים שֶׁ֖קֶר בַּֽחֲנֻפָ֑ה אֲשֶׁ֥ר צֵֽרְב֖וּ רַעְיוֹנָֽם ׃ 3 הַמֹּֽנְעִ֖ים לְהִתְאַחֵ֣ד בְּנִשּׂוּאִ֑ים וּלְהִנָּזֵ֣ר מִמַּֽאֲכָלִ֗ים אֲשֶׁר֩ בָּרָ֨א הָֽאֱלֹהִ֤ים ׀ לַֽהֲנָאָה֨ עִ֣ם תּוֹדָ֔ה לַמַּֽאֲמִינִ֖ים וְלַמַּכִּירִ֥ים אֶת־הָֽאֱמֶֽת ׃ 4 כִּ֛י כָּל־בְּרִיאַ֥ת אֱלֹהִ֖ים טוֹבָ֑ה וּמְאוּמָה֨ אֵ֣ין לְהִמָּאֵ֗ס אִ֥ם בְּתוֹדָ֖ה יְקֻבָּֽל ׃ 5 כִּ֚י ה֣וּא מְקֻדָּ֔שׁ בִּדְבַ֥ר אֱלֹהִ֖ים וּבִתְפִלָּֽה ׃
6 אִם־תָּשִׂ֞ים אֶת־הַדְּבָרִ֤ים הָאֵ֨לֶּה֨ לִפְנֵ֣י הָֽאַחִ֔ים תִּהְיֶ֗ה מְשָׁרֵ֛ת יֵשׁ֥וּעַ הַמָּשִׁ֖יחַ ט֑וֹב מְגֻדָּל֨ בְּדִבְרֵ֣י הָֽאֱמוּנָ֔ה וְהַלֶּ֥קַח הַטּ֖וֹב אֲשֶׁ֥ר רָדָֽפְתָּ ׃ 7 אַ֗ךְ מִסִּפּוּרֵ֥י הַחֹ֛ל וְהַהֶ֖בֶל הִשָּׁאֵ֑ל וְהַרְגֵּ֥ל אֶת־עַצְמְךָ֖ בְּיִרְאַ֥ת אֱלֹהִֽים ׃ 8 כִּ֚י הַֽהַרְגֵּ֣ל הַגּוּפִ֔י ה֥וּא מוֹעִ֖יל לִמְעָ֑ט אַךְ֩ יִרְאַ֨ת אֱלֹהִ֜ים מוֹעֶ֤לֶת הִיא֨ לַכֹּ֔ל בִּהְי֣וֹת לָ֗הּ הַבְטָחַ֛ת הַֽחַיִּ֥ים הַֽהוִֹ֖ים וְהָֽעֲתִידִֽים ׃ 9 נָֽאֱמָ֣ן הַדָּבָ֔ר וְשֹׁוֶ֖ה לְכֹ֥ל קַבָּלָֽה ׃ 10 כִּ֣י לָזֹ֔את אֲנַ֛חְנוּ גַּ֥ם מִתְעַמְּלִ֖ים גַּ֣ם מְחֹֽרָפִ֑ים כִּ֤י קִוִּ֨ינוּ֨ אֶל־אֱלֹהִ֣ים חַיִּ֔ים אֲשֶׁ֣ר ה֗וּא מוֹשִׁ֨יעַ֨ כָּל־בְּנֵ֣י אָדָ֔ם וּבְיוֹתֵ֖ר הַמַּֽאֲמִינִֽים ׃ 11 צַ֥ו אֶת־אֵ֖לֶּה וְלַמֵּֽד ׃ 12 אִ֖ישׁ אַל־יִבְזֶ֣ה אֶת־נְעוּרֶ֑יךָ כִּ֤י אִם־הֱיֵה֨ תַּבְנִ֣ית הַמַּֽאֲמִינִ֔ים בְּדָבָ֧ר ׀ בְּהִתְהַלְּכ֛וּת בְּאַֽהֲבָ֥ה ׀ בְּר֖וּחַ בֶּֽאֱמוּנָ֥ה ׀ בְּטָֽהֳרָֽה ׃ 13 עַ֣ד אָב֔וֹא הַקְשֵׁ֛ב לַקְּרִיאָ֥ה ׀ לַֽהַזְהָרָ֖ה וְלַלֶּֽקַח ׃ 14 אַל־תִּטֹּ֕שׁ אֵ֥ת הַֽחֲנִינָ֖ה אֲשֶׁ֣ר בָּ֑ךְ אֲשֶׁ֨ר נִתְּנָ֤ה לְךָ֨ עַל־פִּ֣י נְבוּאָ֔ה בִּסְמִיכַ֥ת יְדֵ֖י בַּֽעֲלֵ֥י הַזִּקְנָֽה ׃ 15 בָּאֵ֣לֶּה הֲגֵ֔ה בָּאֵ֖לֶּה הֱיֵ֑ה לְמַ֛עַן תְּגֻלֶּ֥ה צְלִיחָֽתְךָ֖ לַכֹּֽל ׃ 16 הַשְׂכֵּ֤ל עַל־עַצְמְךָ֨ וְעַ֣ל הַלֶּ֔קַח עֲמֹ֖ד בָּהֶ֑ם כִּ֚י בַּֽעֲשֽׂוֹתְךָ֣ זֹ֔את תּוֹשִׁ֛יעַ גַּ֥ם אֶת־נַפְשְׁךָ֖ וְגַ֥ם אֶת־שֹֽׁמְעֶֽיךָ ׃
לפרק הבא