1 שִׁמְע֣וֹן פֶּטְר֔וֹס עֶ֛בֶד יֵשׁ֥וּעַ הַמָּשִׁ֖יחַ וּשְׁלִיח֑וֹ לָאֵ֣לֶּה ׀ אֲשֶׁ֣ר הִשִּׂ֗יגוּ אֱמוּנָ֤ה יְקָרָה֨ שָׁוָה֨ לַֽאֲשֶׁ֣ר לָ֔נוּ בְּצִדְקַ֧ת אֱלֹהֵ֛ינוּ וּמֽוֹשִׁיעֵ֖נוּ יֵשׁ֥וּעַ הַמָּשִֽׁיחַ ׃ 2 חֵ֥ן וְשָׁל֖וֹם יִרְבֶּ֣ה לָכֶ֑ם בְּהַכָּרַ֥ת הָֽאֱלֹהִ֖ים וְיֵשׁ֥וּעַ אֲדֹנֵֽינוּ ׃
3 כְּפִ֡י אֲשֶׁר֩ גְּבֽוּרָת֨וֹ הָֽאֱלֹהִ֜ים זָֽבְדָ֥ה לָ֨נוּ֨ כָּל־דְּבָרִ֔ים אֲשֶׁ֥ר לְחַיִּ֖ים וּלְיִרְאַ֣ת אֱלֹהִ֑ים עַל־יְדֵ֧י הַכָּרַ֛ת הַקֹּרֵ֥א אֹתָ֖נוּ בְּכָב֥וֹד וּבְחָֽיִל ׃ 4 אֲשֶׁ֨ר עַל־יְדֵיהֶ֜ם נִזְבְּד֣וּ לָ֗נוּ הַֽהַבְטָח֛וֹת הַגְּדֹל֥וֹת עַד־מְאֹ֖ד וְהַיְקָר֑וֹת לְמַ֜עַן תִּהְי֣וּ עַל־יְדֵיהֶ֗ן מִתְחַבְּרֵי֨ הַטֶּ֣בַע הָֽאֱלֹהִ֔י כְּהִמָּֽלֶטְכֶ֛ם מִשַּׁ֥חַת הַתַּֽאֲוָ֖ה אֲשֶׁ֥ר בַּתֵּבֵֽל ׃ 5 וּבַֽעֲב֣וּר זֹ֗את בְּהַקְרִֽיבְכֶם֨ כָּל־זְרִיז֔וּת הָפִ֥יקוּ עַל־אֱמֽוּנַתְכֶ֖ם חָ֑יִל וְעַ֥ל הַחַ֖יִל דָּֽעַת ׃ 6 וְעַ֤ל הַדַּ֨עַת֨ כְּבִישַׁ֣ת הַיֵּ֔צֶר וְעַל־כְּבִישַׁ֥ת הַיֵּ֖צֶר הַתּוֹחָ֑לֶת וְעַ֥ל הַתּוֹחֶ֖לֶת יִרְאַ֥ת הָֽאֱלֹהִֽים ׃ 7 וְעַ֛ל יִרְאַ֥ת הָֽאֱלֹהִ֖ים אַֽהֲבַ֣ת הָֽאַחִ֑ים וְעַ֛ל אַֽהֲבַ֥ת הָֽאַחִ֖ים אֵ֥ת הָאַֽהֲבָֽה ׃ 8 כִּ֗י אִ֣ם הַדְּבָרִ֥ים הָאֵ֛לֶּה יִהְי֥וּ לָכֶ֖ם וְיִרְבּ֑וּ לֹֽא־יָשִׂ֨ימוּ אֶתְכֶ֤ם בְּטֵלִים֨ גַּם־לֹ֣א בְלִ֣י פְרִ֔י בְּהַכָּרַ֥ת אֲדֹנֵ֖ינוּ יֵשׁ֥וּעַ הַמָּשִֽׁיחַ ׃ 9 כִּ֗י אֲשֶׁ֨ר הַדְּבָרִ֤ים הָאֵ֨לֶּה֨ חֲסֵרִ֣ים ל֔וֹ ה֥וּא עִוֵּ֖ר וּקְצַ֣ר הָֽרְא֑וּת וְשָׁכַ֕ח אֶת־טָֽהֳרַ֖ת חֲטָאָ֥יו הָרִֽאשׁוֹנִֽים ׃ 10 לָכֵ֤ן אַחַי֨ חִרְצ֣וּ בְיוֹתֵ֔ר לַֽעֲשׂ֛וֹת אֶת־קְרִֽיאַתְכֶ֥ם וְאֶת־בְּחִֽירַתְכֶ֖ם נְכוֹנָ֑ה כִּ֚י בַּֽעֲשֽׂוֹתְכֶ֣ם אֶת־אֵ֔לֶּה לָנֶ֖צַח לֹ֥א תִנָּגֵֽפוּ ׃ 11 כִּ֣י כָ֠כָה יוּפַ֨ק לָכֶ֜ם בַּֽעֲתֶ֗רֶת הַמָּבוֹא֨ אֶל־מַלְכ֣וּת הָֽעוֹלָ֔ם מַלְכ֛וּת אֲדֹנֵ֥ינוּ וּמֽוֹשִׁיעֵ֖נוּ יֵשׁ֥וּעַ הַמָּשִֽׁיחַ ׃ 12 לָכֵן֨ לֹ֣א אֵֽרָפֶ֔ה לְהַזְכִּ֥יר אֶתְכֶ֛ם תָּמִ֖יד עַל־אֵ֑לֶּה אַ֚ף כִּֽי־אַתֶּ֣ם יֽוֹדְעִ֔ים וּמְכֽוֹנָנִ֖ים בָּֽאֱמֶ֥ת הַנֹּכָֽחַת ׃ 13 אַ֞ךְ לְיָשָׁ֣ר ׀ אֲנִ֣י חֹשֵׁ֗ב כָּל־ע֤וֹד אֲנִי֨ בַּמִּשְׁכָּ֣ן הַזֶּ֔ה לְהָעִ֥יר אֶתְכֶ֖ם בְּהַזְכָּרָֽה ׃ 14 בְּדַעְתִּ֕י כִּ֛י חִ֥ישׁ תִּהְיֶ֖ה חֲסָרַ֣ת מִשְׁכָּנִ֑י כַּֽאֲשֶׁ֞ר גַּ֧ם אֲדֹנֵ֛ינוּ יֵשׁ֥וּעַ הַמָּשִׁ֖יחַ גִּלָּ֥ה לִֽי ׃ 15 אַ֣ךְ אֶֽחֱרַ֡ץ כִּי֩ גַ֨ם תָּמִ֜יד יִהְיֶ֤ה לָכֶם֨ אַֽחֲרֵ֣י פְטִֽירָתִ֔י לַֽעֲשׂ֥וֹת זֵ֖כֶר הַדְּבָרִ֥ים הָאֵֽלֶּה ׃
16 כִּ֡י לֹ֣א בְלֶכֶת֩ אַֽחֲרֵ֨י שְׁמוּע֥וֹת הֶ֨בֶל֨ מְחֻכָּמ֔וֹת הוֹדַ֣עְנוּ אֶתְכֶ֔ם אֶת־גְּבוּרַ֧ת אֲדֹנֵ֛ינוּ יֵשׁ֥וּעַ הַמָּשִׁ֖יחַ וּבִֽיאָת֑וֹ כִּ֣י אִם־אַֽחֲרֵ֧י הֱיוֹתֵ֛נוּ עַצְמֵ֖נוּ רֹאֵ֥י גְדֻלָּתֽוֹ ׃ 17 כִּ֣י לָקַ֗ח מֵאֵ֛ת הָֽאֱלֹהִ֥ים הָאָ֖ב יְקָ֣ר וְכָב֑וֹד כַּֽאֲשֶׁר֩ הוּבָ֨ה אֵלָ֜יו ק֤וֹל כָּזֶה֨ מִגְּדֻלַּ֣ת הַכָּב֔וֹד זֶ֚ה בְּנִ֣י יְדִידִ֔י אֲשֶׁ֛ר רָֽצְתָ֥ה נַפְשִׁ֖י בּֽוֹ ׃ 18 וְאֵ֨ת הַקּ֥וֹל הַזֶּ֛ה אֲנַ֥חְנוּ שָׁמַ֖עְנוּ מוּבָ֣א מִן־הַשָּׁמָ֑יִם בִּהְיוֹתֵ֥נוּ עִמּ֖וֹ בְּהַ֥ר הַקֹּֽדֶשׁ ׃ 19 וְיֵ֨שׁ לָ֜נוּ יוֹתֵ֣ר חָזָק֘ דְּבַ֣ר הַנְּבוּאָה֒ אֲשֶׁ֨ר תֵּיטִ֤יבוּ לַֽעֲשׂוֹת֨ בְּהַקְשִֽׁיבְכֶ֣ם אֵלָ֔יו כְּמ֣וֹ אֶל־נֵ֔ר הַמֵּאִ֖יר בְּמָק֣וֹם אָפֵ֑ל עַ֚ד כִּֽי־יֵא֣וֹר הַיּ֔וֹם וְיַֽעֲלֶ֥ה הַשַּׁ֖חַר בְּלִבּֽוֹתֵיכֶֽם ׃ 20 בְּדַעְתְּכֶ֥ם זֹ֖את בָּרִֽאשׁוֹנָ֑ה כִּ֚י כָּל־נְבוּאַ֣ת הַכְּתָ֔ב מִפִּתְר֥וֹן מְיֻחָ֖ד אֵינֶ֥נָּה נִהְיָֽה ׃ 21 כִּ֗י לֹ֤א בִּרְצ֣וֹן אָדָ֔ם הֽוּבְאָ֥ה מֵֽעוֹלָ֖ם נְבוּאָ֑ה כִּ֣י אִם־דִּבְּר֗וּ אַנְשֵׁ֤י אֱלֹהִים֨ הַקְּדֹשִׁ֔ים בְּהִנָּ֣שְׂאָ֔ם מֵאֵ֖ת ר֥וּחַ הַקֹּֽדֶשׁ ׃
לפרק הבא