1 אַ֣ךְ הָי֗וּ גַּ֣ם נְבִ֣יאֵי שֶׁקֶר֘ בָּעָם֒ כַּֽאֲשֶׁ֣ר ׀ גַּ֣ם בָּכֶ֗ם יִהְיוּ֙ מ֣וֹרֵי שֶׁ֔קֶר אֲשֶׁ֛ר יָבִ֥יאוּ בַסֵּ֖תֶר מַחְלְק֣וֹת אַבְדָ֑ן הָמְּכַֽחֲשִׁ֗ים בָּֽאָדוֹן֨ הַקֹּנֶ֣ה אֹתָ֔ם וְהַמְּבִיאִ֥ים עַל־נַפְשָׁ֖ם אָבְדַ֥ן פִּתְאֹֽם ׃ 2 וְרַבִּ֕ים יֵֽלְכ֖וּ אַֽחֲרֵ֣י זֽוֹלְלוֹתָ֑ם אֲשֶׁ֣ר עַל־יְדֵיהֶ֔ם יְגֻדַּ֖ף דֶּ֥רֶךְ הָֽאֱמֶֽת ׃ 3 וּבְחֶמְדַּ֤ת הַבֶּ֨צַע֨ בִּדְבָרִ֣ים בְּדוּיִ֗ים יִסְחֲר֥וּ אֶתְכֶ֖ם סְחֹרָ֑ה אֲשֶׁ֣ר דִּינָ֗ם מִקֶּ֨דֶם֨ אֵינֶ֣נּוּ נִרְפֶּ֔ה וְאַבְדָנָ֖ם אֵינֶ֥נּוּ נִרְדָּֽם ׃ 4 כִּ֗י אִ֤ם הָֽאֱלֹהִים֨ לֹ֣א חָ֔ס עַ֖ל הַמַּלְאָכִ֣ים הַחֹֽטְאִ֑ים כִּ֣י ׀ אִם־הִשְׁלִיכָ֣ם אֶל־הָֽאֲבַדּ֗וֹן וְהִסְגִּירָם֨ לְכַבְלֵ֣י אֹ֔פֶל לְהִשָּֽׁמְרָ֖ם לְמִשְׁפָּֽט ׃ 5 וְלֹ֥א חָ֖ס עַל־הַתֵּבֵ֣ל הַקַּדְמוֹנָ֑ה כִּ֠י אִם־שָׁמַ֨ר אֶת־נֹ֤חַ ׀ הַשְּׁמִינִי֨ קֹ֣רֵא צֶ֔דֶק בַּֽהֲבִיא֥וֹ מַבּ֖וּל עַל־תֵּבֵ֥ל רְשָׁעִֽים ׃ 6 וּבְשָׂרְפ֨וֹ לְאֵ֜פֶר אֶת־עָרֵ֤י סְדוֹם֨ וַֽעֲמֹרָ֔ה הִרְשִׁיעָ֖ן בְּמַהְפֵּכָ֑ה וַיָּ֤שֶׂם אֹתָן֨ לְמָשָׁ֔ל אֶל־הָֽעֲתִידִ֖ים לִרְשֽׁוֹעַ ׃ 7 וְהִצִּ֖יל אֶת־ל֣וֹט הַצַּדִּ֑יק הַנֶּֽחֱשָׁ֕ל עַל־יְדֵ֛י הִתְנַֽהֲג֥וּת הָֽרְשָׁעִ֖ים בְּזִמָּֽה ׃ 8 כִּ֣י ׀ בִּרְא֣וּת וּבִשְׁמִיעָ֗ה הַצַּדִּיק֨ בְּשִׁבְתּ֣וֹ בְקִרְבָּ֔ם עִנָּ֨ה י֥וֹם י֛וֹם אֶת־נַפְשׁ֥וֹ הַיְשָׁרָ֖ה בְּמַֽעֲשֵׂ֥י רִשְׁעָתָֽם ׃ 9 יוֹדֵ֣עַ יְהֹוָ֗ה לְהַצִּ֛יל יִרְאֵ֥י אֱלֹהִ֖ים מִמַּסָּ֑ה וְלִשְׁמ֧וֹר אֶת־הָֽרְשָׁעִ֛ים לְי֥וֹם הַמִּשְׁפָּ֖ט לְהֵֽעָנֵֽשׁ ׃ 10 וּבְיוֹתֵ֞ר אֶת־הַהֹֽלְכִ֨ים אַֽחֲרֵ֧י הַבָּשָׂ֛ר בְּתַֽאֲוַ֥ת הַשִּׁקּ֖וּץ וּבֹזִ֣ים הַמֶּמְשָׁלָ֑ה עַזֵּ֤י פָנִים֨ רְצוּיִ֣ים לְנַפְשָׁ֔ם אֵינָ֥ם חֲרֵדִ֖ים בְּגַדְּפָ֥ם אֶת־הַגְּדֻלּֽוֹת ׃ 11 אֲשֶׁר־שָׁ֠ם מַלְאָכִ֞ים הַגְּדוֹלִ֤ים מֵהֶם֨ בְּכֹ֣חַ וּבִגְבוּרָ֔ה אֵינָ֨ם מְבִיאִ֣ים נֶגְדָּ֛ם לִפְנֵ֥י יְהֹוָ֖ה מִשְׁפַּ֥ט גִּדּֽוּף ׃ 12 אַ֣ךְ אֵ֡לֶּה כְּמוֹ֩ בְהֵמ֨וֹת טִבְעִיּ֜וֹת חַסְר֣וֹת תְּבוּנָ֗ה הַנּֽוֹלָדוֹת֨ לְלֶ֣כֶד וּלְשַׁ֔חַת מְגַדְּפִ֣ים בִּדְבָרִ֔ים אֲשֶׁ֖ר אֵינָ֣ם יֽוֹדְעִ֑ים וּבְשַׁחְתָּ֖ם יִשָּׁחֵֽתוּ ׃ 13 וְיִקְחוּ֨ שְׂכַ֣ר רִשְׁעָ֔ה בְּחַשְּׁבָ֣ם לְשַֽׁעֲשׁוּעִ֖ים אֶת־הָעֹ֣נֶג ׀ יוֹמָ֑ם כְּתָמִ֨ים וּמוּמִ֜ים הֵ֗ם הַמִּתְעַנְּגִים֨ בְּהַדָּֽחוֹתָ֔ם בַּֽהֲסִבָּ֖ם עִמָּכֶֽם ׃ 14 עֵינַ֨יִם לָהֶ֜ם מְלֵא֣וֹת נִא֗וּף וּבִלְתִּי֨ חֲדֵ֣לֵי חֵ֔טְא מַשִּׁיאִ֖ים נְפָשׁ֣וֹת לֹֽא־קַיָּמ֑וֹת לֵ֞ב מָרְגָּ֨ל בְּחֶמְדּ֥וֹת בֶּ֨צַע֨ יֵ֣שׁ לָהֶ֔ם בְּנֵ֖י מְאֵרָֽה ׃ 15 אֲשֶׁ֧ר עָֽזְב֛וּ אֶת־הַדֶּ֥רֶךְ הַיָּשָׁ֖ר וְתָע֑וּ וְהָֽלְכ֗וּ אַֽחֲרֵ֥י דֶ֨רֶךְ֨ בִּלְעָ֣ם בֶּן־בְּע֔וֹר אֲשֶׁ֥ר אָהַ֖ב שְׂכַ֥ר רִשְׁעָֽה ׃ 16 אַ֛ךְ הָ֥יְתָה לּ֖וֹ תּוֹכַ֣חַת מִרְדּ֑וֹ אָת֣וֹן דֹּֽמֵמָ֗ה בְּהַבִּיעָהּ֨ בְּק֣וֹל אֲנוֹשִׁ֔י מָֽנְעָ֖ה אֶת־שִׁגְע֥וֹן הַנָּבִֽיא ׃ 17 הֵ֚ם מַעְיְנֵ֣י בְלִי־מַ֔יִם עֲנָנִ֖ים נִדָּפִ֣ים מִסְּעָרָ֑ה אֲשֶׁר֙ אֹ֣פֶל הַחֹ֔שֶׁךְ נִצְפַּ֥ן לָהֶ֖ם לְעוֹלָֽם ׃ 18 כִּ֞י בְּהַבִּיעָ֣ם ׀ גְּבֹה֣וֹת הֶ֗בֶל הֵ֣ם מַ֠שִּׁיאִים בִּתַֽאֲו֨וֹת הַבָּשָׂ֤ר וּבְזֽוֹלְלוֹת֨ אֶת־אֵ֔לֶּה אֲשֶׁ֛ר אָמְנָ֥ם נִמְלְט֖וּ מִן־הַמִּתְהַלְּכִ֥ים בְּתוֹעָֽה ׃ 19 הֵ֣ם מַבְטִיחִ֤ים לָהֶם֨ חָפְשׁ֔וּת בִּהְיוֹתָ֥ם הֵ֖ם עַבְדֵ֣י שָׁ֑חַת כִּ֗י מִמָּ֞ה אֲשֶׁ֥ר אִישׁ֨ נֻצַּ֔ח ל֖וֹ גַּ֥ם הָֽעֳבָֽד ׃ 20 כִּ֞י אִם־כְּהִמָּֽלְטָ֣ם ׀ מִשִּׁקּוּצֵ֣י הַתֵּבֵ֗ל בְּהַכָּרַ֨ת הָֽאָד֤וֹן וְהַמּוֹשִׁ֨יעַ֨ יֵשׁ֣וּעַ הַמָּשִׁ֔יחַ אַ֣ךְ סֻבְּכ֥וּ ע֛וֹד בָּהֵ֖ן וְנֻצָ֑חוּ נִהְי֥וּ לָהֶ֛ם הָאַֽחֲרוֹנ֖וֹת רָע֥וֹת מִן־הָרִֽאשׁוֹנֽוֹת ׃ 21 כִּ֗י ט֤וֹב הָיָ֣ה לָהֶ֔ם אִם־לֹ֥א הִכִּ֖ירוּ אֶת־דֶּ֣רֶךְ הַצְּדָקָ֑ה מֵאַֽחֲרֵ֣י הַכִּירָ֗ם לָשׁ֛וּב מִן־הַמִּצְוָ֥ה הַקְּדוֹשָׁ֖ה הַנִּמְסָרָ֥ה לָהֶֽם ׃ 22 וְקָרָ֣ה לָהֶ֔ם דְּבַ֖ר הַמָּשָׁ֣ל הָֽאֲמִתִּ֑י כֶּ֚לֶב שָׁ֣ב עַל־קִיא֔וֹ וַֽחֲזִ֥יר מְרֻחָ֖ץ לְהִתְגּוֹלֵ֥ל בָּרָֽפֶשׁ ׃
לפרק הבא