אגרת שאול השניה אל טימותיאוס
פרק א

1 פָּא֕וּל שְׁלִ֛יחַ יֵשׁ֥וּעַ הַמָּשִׁ֖יחַ בִּרְצ֣וֹן אֱלֹהִ֑ים כְּפִי֨ הַבְטָחַ֣ת הַֽחַיִּ֔ים אֲשֶׁ֥ר הֵ֖ם בְּיֵשׁ֥וּעַ הַמָּשִֽׁיחַ ׃ 2 אֶל־טִמֽוֹתִיּ֖וֹס הַבֵּ֣ן הָֽאָה֑וּב חֶ֣סֶד רַֽחֲמִ֞ים וְשָׁל֗וֹם מֵאֵ֤ת אֱלֹהִים֨ הָאָ֔ב וְיֵשׁ֥וּעַ הַמָּשִׁ֖יחַ אֲדֹנֵֽינוּ ׃

נאמנות לבשורה

3 אֲנִ֣י ׀ מוֹדֶ֣ה לָֽאֱלֹהִ֗ים אֲשֶׁ֨ר אֲנִ֜י עֹבֵ֥ד אֹת֛וֹ מֵֽהוֹרַ֖י בְּרַעְי֣וֹן טָה֑וֹר כִּ֚י בִּבְלִ֣י חֲדֹ֔ל יֵֽשׁ־לִ֧י זִכְרְךָ֛ בִּתְפִלּוֹתַ֖י לַ֥יְלָה וָיֽוֹם ׃ 4 בְּהִכָּֽסְפִי֨ לִרְאֽוֹתְךָ֔ בְּזָכְרִ֖י אֶת־דִּמְעוֹתֶ֑יךָ לְמַ֥עַן אֶמָּלֵ֖א שִׂמְחָֽה ׃ 5 בְּ֠קַחְתִּי זֵ֜כֶר הָֽאֱמוּנָ֣ה בִּלְתִּֽי־מְחֻנֶּפֶת֘ אֲשֶׁ֣ר בְּךָ֒ אֲשֶׁר֩ שָֽׁכְנָ֨ה בָרִֽאשׁוֹנָ֜ה בְּאֵ֤ם אִמְּךָ֨ לוֹאִ֔יס וּבְאִמְּךָ֖ אֽוּנִיקִ֑י וּבָט֣וּחַ אֲנִ֔י כִּ֖י גַּ֥ם בָּֽךְ ׃ 6 אֲשֶׁ֣ר בַּֽעֲבוּרָ֗הּ אֲנִי֨ מַזְכִּ֣יר אֹֽתְךָ֔ לְחַיּ֥וֹת ע֖וֹד אֶת־מַתְּנַ֣ת הָֽאֱלֹהִ֑ים אֲשֶׁ֛ר יֵ֥שׁ בְּךָ֖ בִּסְמִיכַ֥ת יָדָֽי ׃ 7 כִּ֠י לֹ֣א נָתַ֥ן לָ֛נוּ הָֽאֱלֹהִ֖ים ר֣וּחַ אֵימָ֑ה כִּ֣י אִם־ר֧וּחַ גְּבוּרָ֛ה וְאַֽהֲבָ֖ה וְתֹ֥ם שֵֽׂכֶל ׃ 8 לָכֵ֗ן אַל־תֵּבוֹשׁ֨ מֵֽעֵד֣וּת אֲדֹנֵ֔ינוּ וְגַ֛ם לֹ֥א מִמֶּ֖נִּי אֲסִיר֑וֹ כִּ֣י אִם־הֱיֵ֗ה חֲבֵר֨ עִנּוּיֵ֣י הַבְּשׂוֹרָ֔ה כְּפִ֖י גְּבוּרַ֥ת אֱלֹהִֽים ׃ 9 אֲשֶׁר֨ הוֹשִׁ֣יעַ אֹתָ֔נוּ וּקְרָאָ֖נוּ בִּקְרִיאָ֣ה קְדוֹשָׁ֑ה לֹ֣א ׀ כְּפִ֣י מַֽעֲשֵׂ֗ינוּ כִּ֣י אִם־כְּפִ֤י עֲצָתוֹ֨ וְחַסְדּ֔וֹ הַנִּתָּ֥ן לָ֨נוּ֨ בַּמָּשִׁ֣יחַ יֵשׁ֔וּעַ לִפְנֵ֖י עִתּ֥וֹת עוֹלָֽם ׃ 10 אַ֤ךְ עַתָּה֨ נִגְלָ֔ה בְּהֽוֹפָעַ֥ת מֽוֹשִׁיעֵ֖נוּ יֵשׁ֣וּעַ הַמָּשִׁ֑יחַ אֲשֶׁ֤ר אָמְנָם֨ בִּטֵּ֣ל אֶת־הַמָּ֔וֶת וְהִגִּ֧יהַּ חַיִּ֛ים וְאַל־שַׁ֖חַת עַל־יְדֵ֥י הַבְּשׂוֹרָֽה ׃ 11 אֲשֶׁ֤ר אֵלֶ֨יהָ֨ הָפְקַ֔דְתִּי לְקֹרֵ֥א וּלְשָׁלִ֖יחַ וּלְמוֹרֵ֥ה גוֹיִֽם ׃ 12 אֲשֶׁ֣ר בַּֽעֲבוּרָ֗הּ גַּ֣ם אֲנִ֤י מְעֻנֶּה֨ בָּאֵ֔לֶּה אַ֖ךְ אֵינֶ֣נִּי ב֑וֹשׁ כִּ֤י יָדַ֨עְתִּי֨ לְמִ֣י הֶֽאֱמַ֔נְתִּי וּבָט֣וּחַ אֲנִ֗י כִּ֚י יָכ֣וֹל ה֔וּא לִשְׁמ֥וֹר אֶת־פִּקְדוֹנִ֖י לַיּ֥וֹם הַהֽוּא ׃ 13 אֲחֹ֗ז אֶת־תָּכְנִית֨ הַדְּבָרִ֣ים הַשְּׁלֵמִ֔ים אֲשֶׁ֥ר שָׁמַ֖עְתָּ מִמֶּ֑נִּי בֶּֽאֱמוּנָ֣ה וּבְאַֽהֲבָ֔ה אֲשֶׁ֖ר בַּמָּשִׁ֥יחַ יֵשֽׁוּעַ ׃ 14 אֶת־הַפִּקָּד֤וֹן הַטּוֹב֨ שְׁמ֔וֹר עַל־יְדֵ֛י ר֥וּחַ הַקֹּ֖דֶשׁ הַשּׁוֹכֵ֥ן בָּֽנוּ ׃ 15 אַתָּ֣ה ׀ יוֹדֵ֣עַ זֹ֗את כִּ֚י פָּנ֣וּ מִמֶּ֔נִּי כָּל־אֵ֖לֶּה אֲשֶׁ֣ר בְּאַסְיָ֑א אֲשֶׁ֣ר מֵהֶ֔ם פּֽוּגֶלּ֖וֹס וְהֶרְמֹֽגֶנֶֽס ׃ 16 יִתֵּ֧ן יְהֹוָ֛ה חֶ֖סֶד לְבֵ֣ית אֽוֹנֶסִֽפֹר֑וֹס כִּ֣י פְעָמִ֤ים רַבּוֹת֨ הֵשִׁ֣יב נַפְשִׁ֔י וּמֵֽרַתּוֹקִ֖י לֹ֥א בֽוֹשׁ ׃ 17 כִּ֚י אִם־בִּהְיוֹת֣וֹ בְרוֹמָ֔א בְּיֶ֧תֶר חֲרִיצ֛וּת בִּקֵּ֥שׁ אֹתִ֖י וּמָצָֽא ׃ 18 יִתֵּ֥ן לוֹ֨ יְהֹוָ֔ה לִמְצ֧וֹא רַֽחֲמִ֛ים מֵאֵ֥ת יְהֹוָ֖ה בַּיּ֣וֹם הַה֑וּא וְכַמָּ֗ה ה֤וּא שֵׁרֵת֨ בְּאֶֽפֶס֔וֹס אַתָּ֥ה יוֹדֵ֖עַ יוֹתֵֽר ׃