אגרת שאול השניה אל טימותיאוס
פרק ד

התמדה בָּאמת -- המשך

1 לָכֵ֗ן אֲנִ֤י מֵעִיד֨ לִפְנֵ֣י הָֽאֱלֹהִ֔ים וְהָֽאָד֖וֹן יֵשׁ֣וּעַ הַמָּשִׁ֑יחַ הֶֽעָתִ֨יד לִשְׁפּ֜וֹט אֵ֤ת הַֽחַיִּים֨ וְאֵ֣ת הַמֵּתִ֔ים בְּהוֹפָֽעָת֖וֹ וּבְמַלְכוּתֽוֹ ׃ 2 הַשְׁמִ֨יעַ֨ אֶת־הַדָּבָ֔ר הֱיֵ֣ה נָכ֔וֹן בְּעֵ֥ת כָּשֵׁ֖ר וּבְעֵ֣ת לֹֽא־כָשֵׁ֑ר הוֹכֵ֤חַ גְּעַר֨ הַזְהֵ֔ר בְּכֹ֛ל אֹ֥רֶךְ אַפַּ֖יִם וְלֶֽקַח ׃ 3 כִּ֣י ׀ תִּהְיֶ֣ה עֵ֗ת אֲשֶׁ֥ר בָּ֛הּ לֹ֥א יִסְבְּל֖וּ אֶת־הַלֶּ֣קַח הַשָּׁלֵ֑ם כִּ֞י אִם־כְּפִ֣י תַֽאֲוֹֽתֵיהֶ֗ם יִצְבְּר֤וּ לָהֶם֨ מְלַמְּדִ֔ים בְּחִכּ֖וּךְ אָזְנֵיהֶֽם ׃ 4 וּמִן־הָֽאֱמֶ֖ת יַפְנ֣וּ אֶת־הָאֹ֑זֶן וְאֶל־שְׁמוּע֥וֹת הֶ֖בֶל יֵֽהָפֵֽכוּ ׃ 5 וְאַתָּ֗ה שְׁקֹד֨ בְּכָל־הַדְּבָרִ֔ים סְבֹ֖ל רָעָ֑ה פְּעֻלַּ֤ת מְבַשֵּׂר֨ עֲשֵׂ֔ה אֶת־שֵׁרֽוּתְךָ֖ מַלֵּ֥א בְּבִטְחָֽה ׃ 6 כִּ֥י כְבָ֖ר אָֽנֹכִ֣י מֻסָּ֑ךְ וְעֵ֥ת פְּטִֽירָתִ֖י הִגִּֽיעָה ׃ 7 אֶת־הַמִּלְחָמָ֤ה הַטּוֹבָה֨ נִלְחַ֔מְתִּי אֶת־הַמְּרוּצָ֖ה כִּלֵּ֑יתִי אֶת־הָֽאֱמוּנָ֖ה שָׁמָֽרְתִּי ׃ 8 מֵֽעַתָּ֞ה צָפ֥וּן לִי֨ כֶּ֣תֶר הַצְּדָקָ֔ה אֲשֶׁר֩ יְשַׁלֵּ֨ם לִ֜י בַּיּ֥וֹם הַה֛וּא הָֽאָד֖וֹן שֹׁפֵ֣ט צֶ֑דֶק וְלֹ֤א לְבַד֨ לִ֔י כִּ֥י אִם־גַּ֛ם לְכֹ֥ל הָאֹֽהֲבִ֖ים אֵ֥ת הוֹפָֽעָתֽוֹ ׃

בקשות אישיות

9 חַרַ֛ץ לָב֥וֹא אֵלַ֖י מְהֵרָֽה ׃ 10 כִּ֣י ׀ דֶּמַ֣ס עֲזָבַ֗נִי בְּאָֽהֳבוֹ֨ אֶת־הָֽעוֹלָ֣ם הַזֶּ֔ה וְנָסַ֖ע לְתֶסָּלֽוֹנִיקִ֑י קְרֶסְקִ֥נְסְ לְגָלָֽטִיָּ֖ה טִיט֥וֹס לְדַלְמָֽטִיָּֽא ׃ 11 לוּקַ֛ס ה֥וּא לְבַדּ֖וֹ עִמִּ֑י קַ֤ח אֶת־מַרְקוֹס֨ וַֽהֲבִיאֵ֣הוּ עִמְּךָ֔ כִּ֥י ה֛וּא מוֹעִ֥יל לִ֖י לַשֵּׁרֽוּת ׃ 12 וְאֶת־טֽוּכִיק֖וֹס שָׁלַ֥חְתִּי אֶל־אֶֽפֶסֽוֹס ׃ 13 אֶת־הַמְּעִ֞יל אֲשֶׁ֨ר עָזַ֤בְתִּי בִטְרוֹאַס֨ אֵ֣צֶל קַרְפּ֔וֹס הָבֵ֖א בְּבוֹאֶ֑ךָ וְאֶ֨ת־הַסְּפָרִ֔ים וּבְיוֹתֵ֖ר אֶת־הַקְּלָפִֽים ׃ 14 אֲלֶכְסַנְדָּר֨ חָרַ֣שׁ נְחֹ֔שֶׁת גָּ֥מַל לִ֖י רָע֣וֹת רַבּ֑וֹת יְשַׁלֵּ֥ם ל֛וֹ יְהֹוָ֖ה כְּפָֽעֳלָֽיו ׃ 15 אֲשֶׁ֛ר גַּ֥ם אַתָּ֖ה הִשָּׁמֵ֣ר מִמֶּ֑נּוּ כִּ֛י מְאֹ֥ד הִתְנַגֵּ֖ד אֶל־דְּבָרֵֽינוּ ׃ 16 בְּהִתְנַצְּלוּתִ֣י הָרִֽאשׁוֹנָ֗ה אִ֚ישׁ לֹֽא־נִלְוָ֣ה אִתִּ֔י כִּ֥י אִם־הַכֹּ֖ל עָֽזְב֣וּ אֹתִ֑י אַל־יֵֽחָשֵׁ֖ב לָהֶֽם ׃ 17 אַ֡ךְ יְהֹוָה֩ נִצַּ֨ב עִמִּ֜י וַיְחַזְּקֵ֗נִי לְמַ֤עַן עַל־יָדִי֨ תְּשֻׁלַּ֣ם הַקְּרִיאָ֔ה וְיִשְׁמְע֖וּ כָּל־הַגּוֹיִ֑ם וְנִצַּ֖לְתִּי מִפִּ֥י אַרְיֵֽה ׃ 18 וַֽיהֹוָ֤ה יַצִּילֵ֨נִי֨ מִכָּל־מַֽעֲשֶׂ֣ה רָ֔ע וְיֽוֹשִׁיעֵ֖נִי אֶל־מַלְכוּת֣וֹ הַשָּֽׁמַיְמִ֑ית אֲשֶׁ֨ר ל֧וֹ הַכָּב֛וֹד לְעֽוֹלְמֵ֥י עֽוֹלָמִ֖ים אָמֵֽן ׃ 19 שְׁאַ֨ל לִשְׁל֧וֹם פְּרִסְקָ֛א וַֽאֲקוּלָ֖א וּבֵ֥ית אֽוֹנֶסִֽפֹרֽוֹס ׃ 20 אֶרַסְט֖וֹס יָשַׁ֣ב בְּקוֹרִ֑נְתְּ וְאֶת־טְרֹ֣פִימ֔וֹס עָזַ֥בְתִּי חֹלֶ֖ה בְּמִֽילֵטֽוֹס ׃ 21 חֲרַ֥ץ לָב֖וֹא לִפְנֵ֣י הַחֹ֑רֶף אֵֽבוּלוֹס֨ שֹׁאֵ֣ל לִשְׁלֽוֹמְךָ֔ וּפוּדֶ֧נְסְ וְלִינ֛וֹס וּקְלֽוֹדִיָּ֖ה וְכָל־הָֽאַחִֽים ׃ 22 הָֽאָד֛וֹן יֵשׁ֥וּעַ הַמָּשִׁ֖יחַ עִם־רוּחֶ֑ךָ חֵ֥ן עִמָּכֶ֖ם אָמֵֽן ׃