1 אַ֥ךְ זֹ֖את דָּ֑ע כִּ֚י בְּאַֽחֲרִ֣ית הַיָּמִ֔ים תָּקֹ֖מְנָה עִתּ֥וֹת קָשֽׁוֹת ׃ 2 כִּ֤י יִהְיוּ֨ הָֽאֲנָשִׁ֔ים אֹֽהֲבֵ֥י נַפְשָׁ֖ם אֹ֣הֲבֵי כָ֑סֶף יְהִירִ֨ים זֵדִ֤ים מְגַדְּפִים֨ מֹרִ֣ים לַֽאֲבוֹתָ֔ם חַסְרֵ֥י תוֹדָ֖ה בַּֽעֲלֵ֥י זִמָּֽה ׃ 3 חַסְרֵי֨ אַֽהֲבָ֣ה טִבְעִ֔ית בִּלְתִּ֥י מִתְרַצִּ֖ים מַלְשִׁינִ֑ים עַבְדֵ֧י הַתַּֽאֲו֛וֹת אַכְזָרִ֖ים שֹֽׂנְאֵ֥י טֽוֹב ׃ 4 מַסְגִּירִ֥ים ׀ פֹּֽחֲזִ֖ים רַחְבֵי־לֵ֑ב אֹֽהֲבֵ֣י עֹ֔נֶג יוֹתֵ֖ר מֵאֹֽהֲבֵ֥י אֱלֹהִֽים ׃ 5 אֲשֶׁ֣ר ׀ יֵ֣שׁ לָהֶ֗ם תַּבְנִית֨ יִרְאַ֣ת אֱלֹהִ֔ים אַ֥ךְ בִּגְבֽוּרָתָ֖הּ מְכַֽחֲשִׁ֑ים מֵאֵ֖לֶּה שְׂטֵֽה ׃ 6 כִּ֚י מֵאֵ֣לֶּה הֵ֔מָּה הַחֹֽדְרִ֖ים לַבָּתִּ֑ים וְשֹׁבִ֞ים נָשִׁ֤ים פְּתָיוֹת֨ עֲמוּס֣וֹת חֲטָאִ֔ים מֽוּבָל֖וֹת בְּתַֽאֲוֹ֥ת שֹׁנֽוֹת ׃ 7 הַלֹּֽמְד֖וֹת תָּמִ֑יד וְאֵינָ֣ן יְכֹל֔וֹת לְהַגִּ֖יעַ אֶל־הַכָּרַ֥ת הָֽאֱמֶֽת ׃ 8 וְכַֽאֲשֶׁ֞ר יַנִּ֤יס וְיַמְבְּרִיס֨ הִתְנַגְּד֣וּ לְמֹשֶׁ֔ה כֵּ֥ן גַּם־אֵ֖לֶּה מִתְנַגְּדִ֣ים אֶל־הָֽאֱמֶ֑ת אֲנָשִׁים֨ מָשְׁחָתֵ֣י הָר֔וּחַ נִמְאָסִ֖ים עַל־אֹד֥וֹת הָֽאֱמוּנָֽה ׃ 9 אוּלָ֕ם לֹ֥א יִצְלְח֖וּ יוֹתֵ֑ר כִּ֣י אִוָּלְתָּ֗ם תִּהְיֶ֤ה גְלוּיָה֨ לַכֹּ֔ל כַּֽ֠אֲשֶׁר גַּ֥ם זֹ֛את אֲשֶׁ֥ר לָהֶ֖ם נִהְיָֽתָה ׃
10 אַ֣ךְ ׀ אַתָּ֣ה מִלֵּ֗אתָ אַֽחֲרֵ֥י לִקְחִ֛י הִתְהַלְּכוּתִ֥י ׀ כַּוָּֽנָתִ֖י אֱמֽוּנָתִ֑י אֹֽרֶךְ־רוּחִ֥י ׀ אַֽהֲבָתִ֖י תּֽוֹחַלְתִּֽי ׃ 11 רְדִֽיפוֹתַי֨ עִנּוּיַ֔י אֲשֶׁ֨ר נִהְי֥וּ לִ֛י בְּאַנְטִיּֽוֹכִיָּ֥א בְאִקֹֽנִיּ֖וֹן בְּלוּסְטְרָ֑א אֲשֶׁ֞ר הָֽרְדִיפ֤וֹת כָּאֵ֨לֶּה֨ סָבַ֔לְתִּי וּמִכֻּלָּ֖ן הִצִּילַ֥נִי אֲדֹנָֽי ׃ 12 וְכָל־הַֽחֲפֵצִ֣ים לִחִי֗וֹת בְּיִרְאַ֥ת אֵל֨ בְּיֵשׁ֣וּעַ הַמָּשִׁ֔יחַ רָד֖וֹף יֵֽרָדֵֽפוּ ׃ 13 וַֽאֲנָשִׁ֤ים רָעִים֨ וּמַדִּיחִ֔ים יִצְלְח֖וּ לְיֶ֣תֶר רָ֑ע מַתְעִ֖ים וְנִתְעִֽים ׃ 14 וְאַתָּ֗ה עֲמ֧וֹד בַּדְּבָרִ֛ים אֲשֶׁ֥ר לָמַ֖דְתָּ וְנֶֽאֱמַ֣נְתָּ בָהֶ֑ם בְּדַעְתְּךָ֖ מִמִּ֥י לָמָֽדְתָּ ׃ 15 וְכִ֣י מִיַּלְדּ֔וּת יָדַ֖עְתָּ אֶת־כִּתְבֵ֣י הַקֹּ֑דֶשׁ הַיְכֹלִ֤ים לְהַחְכִּֽימְךָ֨ לִתְשׁוּעָ֔ה עַל־יְדֵ֣י הָֽאֱמוּנָ֔ה אֲשֶׁ֖ר בְּיֵשׁ֥וּעַ הַמָּשִֽׁיחַ ׃ 16 כָּל־כְּתָ֕ב הָשְׁפַּ֖ע בְּר֣וּחַ אֱלֹהִ֑ים וּמוֹעִ֞יל לְלֶ֤קַח לְתֽוֹכֵחָה֨ לְהַיְשָׁרָ֔ה לְמוּטָ֖ר אֲשֶׁ֥ר בְּצֶֽדֶק ׃ 17 לְמַ֧עַן יִהְיֶ֛ה אִ֥ישׁ הָֽאֱלֹהִ֖ים שָׁלֵ֑ם לְכָל־מַֽעֲשֶׂ֥ה ט֖וֹב מְתֻקָּֽן ׃
לפרק הבא