אגרת שאול אל הקולוסים
פרק א

1 פָּא֕וּל שְׁלִ֛יחַ יֵשׁ֥וּעַ הַמָּשִׁ֖יחַ בִּרְצ֣וֹן אֱלֹהִ֑ים וְטִמֽוֹתִיּ֖וֹס הָאָֽח ׃ 2 אֶל־הָֽאַחִ֞ים הַקְּדוֹשִׁ֤ים וְהַנֶּֽאֱמָנִים֨ בַּמָּשִׁ֔יחַ אֲשֶׁ֥ר הֵ֖ם בְּקֽוֹלָסָּ֑י חֵ֤ן לָכֶם֨ וְשָׁל֔וֹם מֵאֵת֨ אֱלֹהִ֣ים אָבִ֔ינוּ וְהָֽאָד֖וֹן יֵשׁ֥וּעַ הַמָּשִֽׁיחַ ׃

תפילה והודיה

3 אֲנַ֤חְנוּ מוֹדִים֨ לָֽאֱלֹהִ֔ים אֲבִ֥י אֲדֹנֵ֖ינוּ יֵשׁ֣וּעַ הַמָּשִׁ֑יחַ וּמִתְפַּלְלִ֥ים תָּמִ֖יד בַּֽעַדְכֶֽם ׃ 4 כְּשָׁמְעֵ֥נוּ אֶת־אֱמֽוּנַתְכֶ֖ם בַּמָּשִׁ֣יחַ יֵשׁ֑וּעַ וְאֵת֨ אַֽהֲבַתְכֶ֔ם אֲשֶׁ֖ר לְכָל־הַקְּדוֹשִֽׁים ׃ 5 בַּֽעֲב֣וּר הַתִּקְוָ֔ה הַצְּפוּנָ֥ה לָכֶ֖ם בַּשָּׁמָ֑יִם אֲשֶׁ֤ר לְפָנִים֨ שְׁמַעְתֶּ֣ם אֹתָ֔הּ בִּדְבַ֖ר אֱמֶ֥ת הַבְּשׂוֹרָֽה ׃ 6 אֲשֶׁ֥ר בָּ֨אָה֨ אֲלֵיכֶ֔ם כְּמ֖וֹ גַּ֣ם בְּכָל־הַתֵּבֵ֑ל וְנֹשֵׂ֣את פְּרִ֗י כְּמוֹ֨ גַּ֣ם בָּכֶ֔ם מִן־הַ֠יּוֹם אֲשֶׁ֨ר שְׁמַעְתֶּ֧ם וְהִכַּרְתֶּ֛ם אֶת־חֶ֥סֶד הָֽאֱלֹהִ֖ים בֶּֽאֱמֶֽת ׃ 7 כַּֽאֲשֶׁ֣ר ׀ גַּ֣ם לְמַדְתֶּ֗ם מֵאֵ֧ת אֶפַּפְרַ֛ס חַבְרֵ֥נוּ בָֽעֲבוֹדָ֖ה הָֽאָה֑וּב אֲשֶׁ֨ר בַּֽעַדְכֶ֥ם ה֛וּא מְשָׁרֵ֥ת הַמָּשִׁ֖יחַ נֶֽאֱמָֽן ׃ 8 אֲשֶׁ֗ר גַּ֚ם הוֹדִ֣יעַ לָ֔נוּ אֵ֖ת אַֽהֲבַתְכֶ֥ם בָּרֽוּחַ ׃

המשיח ופעלו

9 בַּֽעֲב֣וּר זֹאת֩ גַּ֨ם אֲנַ֜חְנוּ מִן־הַיּ֣וֹם ׀ אֲשֶׁ֣ר שָׁמַ֗עְנוּ אֵ֥ין אֲנַ֛חְנוּ חֲדֵלִ֖ים לְהִתְפַּלֵּ֣ל בַּֽעַדְכֶ֑ם וְלִשְׁאֹ֞ל כִּ֤י תִמָּֽלְאוּ֨ דַּ֣עַת רְצוֹנ֔וֹ בְּכָל־חָכְמָ֖ה וּתְבוּנָ֥ה רֽוּחֲנִֽית ׃ 10 לְהִתְהַלֶּכְכֶ֛ם כְּשֹׁוֶ֥ה לָֽאָד֖וֹן אֶ֣ל כָּל־חֵ֑ן בְּשֵֽׂאתְכֶ֤ם פְּרִי֨ בְּכָל־מַ֣עֲשֶׂה ט֔וֹב וּגְדֵלִ֖ים בְּדַ֥עַת הָֽאֱלֹהִֽים ׃ 11 ומְגֻבָּרִים֨ בְּכָל־גְּבוּרָ֔ה כְּפִ֖י עֹ֣ז כְּבוֹד֑וֹ לְכָל־תּוֹחֶ֛לֶת וְאֹ֥רֶךְ אַפַּ֖יִם עִם־שִׂמְחָֽה ׃ 12 נֹֽתְנִ֣ים תּוֹדָ֔ה לָאָ֣ב ׀ הַמַּסְפִּ֣יק אֹתָ֗נוּ לְחֵ֛לֶק נַֽחֲלַ֥ת הַקְּדוֹשִׁ֖ים בָּאֽוֹר ׃ 13 אֲשֶׁ֥ר הִצִּילָ֖נוּ מִשָּׁלְטַ֣ן הַחֹ֑שֶׁךְ וְהֶעְתִּ֣יק אֹתָ֗נוּ אֶל־מַלְכ֖וּת בֶּ֥ן אַֽהֲבָתֽוֹ ׃ 14 אֲשֶׁר־בּ֞וֹ יֵ֥שׁ לָ֛נוּ הַפְּד֖וּת עַל־יְדֵ֣י דָמ֑וֹ סְלִיחַ֖ת הַֽחֲטָאִֽים ׃ 15 אֲשֶׁ֣ר ה֔וּא צֶ֖לֶם הָֽאֱלֹהִ֣ים בִּלְתִּֽי־נִרְאֶ֑ה בְּכ֖וֹר כָּל־יְצֽוּר ׃ 16 כִּ֣י בוֹ֩ נִבְרְא֨וּ הַכֹּ֜ל אֵ֣לֶּה ׀ אֲשֶׁ֣ר בַּשָּׁמַ֗יִּם וְאֵ֨לֶּה֨ אֲשֶׁ֣ר בָּאָ֔רֶץ הַנִּרְאִ֣ים וּבִלְתִּֽי־נִרְאִ֔ים אִם־כִּסְא֧וֹת אִם־מֶמְשָׁל֛וֹת אִם־שְׂרָר֖וֹת אִם־שָׁלְטָנ֑וֹת הַכֹּ֛ל בְּיָד֥וֹ וְאֵלָ֖יו נִבְרָֽאוּ ׃ 17 וְה֥וּא הוֶֹ֖ה לִפְנֵ֣י הַכֹּ֑ל וְהַכֹּ֖ל בּ֥וֹ קַיָּמִֽים ׃ 18 וְהוּא֩ רֹ֨אשׁ הַגְּוִיָּ֜ה הַקְּהִלָּ֗ה אֲשֶׁ֥ר הוּא֨ הָֽרֵאשִׁ֔ית הַבְּכ֖וֹר מִן־הַמֵּתִ֑ים לְמַ֨עַן יִהְיֶ֥ה ה֛וּא הַנַּֽעֲלֶ֖ה בַּכֹּֽל ׃ 19 כִּ֥י בוֹ֨ רָצָ֔ה כָּל־הַמְּלֹ֖א לִשְׁכֹּֽן ׃ 20 וְעַל־יָד֗וֹ לְרַצּ֞וֹת אֵ֤ת כָּל־הַדְּבָרִים֨ אֶל־עַצְמ֔וֹ כַּֽעֲשׂוֹת֣וֹ שָׁל֔וֹם עַל־יְדֵ֖י דַּ֣ם צְלָב֑וֹ עַל־יָד֕וֹ אִם־הֵ֥ם עַל־הָאָ֖רֶץ אִם־הֵ֥ם בַּשָּׁמָֽיִם ׃ 21 וְאֶתְכֶ֗ם אֲשֶׁ֤ר לְפָנִים֨ הֱיִיתֶ֣ם מֽוּזָרִ֔ים וְאֹֽיְבִ֛ים בְּיֵ֥צֶר הַמַּֽחֲשָׁבָ֖ה בַּמַּֽעֲשִׂ֥ים הָֽרָעִֽים ׃ 22 אַ֣ךְ עַתָּ֗ה רִצָּ֛ה בִּגְוִיַּ֥ת בְּשָׂר֖וֹ עַל־יְדֵ֣י הַמָּ֑וֶת לְהַצִּ֣יג אֶתְכֶ֗ם קְדוֹשִׁ֛ים וּבְלִי־מ֥וּם וּבְלִֽי־שִׁמְצָ֖ה לְפָנָֽיו ׃ 23 אִ֣ם אַךְ֩ תַּֽעַמְד֨וּ בָֽאֱמוּנָ֜ה מְיֻסָּדִ֣ים וּנְכוֹנִ֗ים וּבִלְתִּ֨י נְמוֹטִ֜ים מִתִּקְוַ֤ת הַבְּשׂוֹרָה֨ אֲשֶׁ֣ר שְׁמַעְתֶּ֔ם הַנִּקְרָאָה֙ לְכָל־יְצ֔וּר אֲשֶׁ֖ר תַּ֣חַת הַשָּׁמָ֑יִם אֲשֶׁ֧ר מְשָֽׁרְתָ֛הּ נִהְיֵ֖יתִי אֲנִ֥י פָאֽוּל ׃

שרותו של שאול למען הקהילה

24 וְעַתָּ֛ה שָׂמֵ֥חַ אֲנִ֖י בְּעִנּוּיַ֣י בַּֽעֲבֽוּרְכֶ֑ם וּמְמַלֵּ֣א אֲנִ֗י אֶת־מַחְסוֹרֵ֞י מְצוּק֨וֹת הַמָשִׁ֤יחַ ׀ בִּבְשָׂרִי֨ בְּעַ֣ד גְּוִיָּת֔וֹ אֲשֶׁ֥ר הִ֖יא הַקְּהִלָּֽה ׃ 25 אֲשֶׁ֤ר מְשָֽׁרְתָהּ֨ אֲנִ֣י נִהְיֵ֔יתִי כְּפִי֨ סֽוֹכְנ֣וּת הָֽאֱלֹהִ֔ים הַנִּתָּנָ֥ה לִ֖י אֲלֵיכֶ֑ם לְמַלֵּ֖א אֶת־דְּבַ֥ר הָֽאֱלֹהִֽים ׃ 26 אֶת־הַסּ֧וֹד הַנִּסְתָּ֛ר מִן־הָעֽוֹלָמִ֖ים וּמִן־הַדּוֹר֑וֹת אַ֥ךְ עַתָּ֖ה נִגְלָ֥ה לִקְדוֹשָֽׁיו ׃ 27 אֲשֶׁ֨ר לָהֶ֜ם חָפֵ֤ץ הָֽאֱלֹהִים֨ לְהוֹדִ֔יעַ מָ֣ה ה֗וּא עֹ֧שֶׁר כְּב֛וֹד הַסּ֥וֹד הַזֶּ֖ה בַּגּוֹיִ֑ם אֲשֶׁ֥ר הוּא֨ הַמָּשִׁ֣יחַ בָּכֶ֔ם תִּקְוַ֖ת הַכָּבֽוֹד ׃ 28 אֲשֶׁ֤ר אֲנַ֨חְנוּ֨ מַגִּידִ֣ים אֹת֔וֹ מַזְהִירִ֧ים כָּל־אָדָ֛ם וּמְלַמְּדִ֥ים כָּל־אָדָ֖ם בְּכָל־חָכְמָ֑ה לְמַ֗עַן נַצִּ֧יג כָּל־אָדָ֛ם תָּמִ֖ים בַּמָּשִׁ֥יחַ יֵשֽׁוּעַ ׃ 29 אֲשֶׁ֣ר לָזֹ֗את גַּ֖ם אֲנִ֣י עָמֵ֑ל בְּהִלָּֽחֲמִי֨ כְּפִ֣י פְעֻלָּת֔וֹ הַפֹּעֶ֥לֶת בִּ֖י בִּגְבוּרָֽה ׃