הבשורה על־פי מתי
פרק א

ספר היוחסין של ישוע המשיח

1 סֵ֕פֶר תּֽוֹלְד֖וֹת יֵשׁ֣וּעַ הַמָּשִׁ֑יחַ בֶּן־דָּוִ֖ד בֶּן־אַבְרָהָֽם : 2 אַבְרָהָם֨ הוֹלִ֣יד אֶת־יִצְחָ֔ק וְיִצְחָ֖ק הוֹלִ֣יד אֶת־יַֽעֲקֹ֑ב וְיַֽעֲקֹ֔ב הוֹלִ֥יד אֶת־יְהוּדָ֖ה וְאֶת־אֶחָֽיו : 3 וִֽיהוּדָ֥ה הוֹלִ֛יד אֶת־פֶּ֥רֶץ וְאֶת־זֶ֖רַח מִתָּמָ֑ר וּפֶ֨רֶץ֨ הוֹלִ֣יד אֶת־חֶצְר֔וֹן וְחֶצְר֖וֹן הוֹלִ֥יד אֶת־רָֽם : 4 וְרָ֤ם הוֹלִיד֨ אֶת־עַמִּ֣ינָדָ֔ב וְעַמִּֽינָדָ֖ב הוֹלִ֣יד אֶת־נַחְשׁ֑וֹן וְנַחְשׁ֖וֹן הוֹלִ֥יד אֶת־שַׂלְמֽוֹן : 5 וְשַׂלְמ֨וֹן הוֹלִ֤יד אֶת־בֹּ֨עַז֨ מְֽרָחָ֔ב וּבֹ֛עַז הוֹלִ֥יד אֶת־עוֹבֵ֖ד מֵר֑וּת וְעוֹבֵ֖ד הוֹלִ֥יד אֶת־יִשָֽׁי : 6 וְיִשַׁ֥י הוֹלִ֖יד אֶת־דָּוִ֣ד הַמֶּ֑לֶךְ וְדָוִ֥ד הַמֶּ֛לֶךְ הוֹלִ֥יד אֶת־שְׁלֹמֹ֖ה מֵאֵ֥שֶׁת אֽוּרִיָּֽה : 7 וּשְׁלֹמֹה֨ הוֹלִ֣יד אֶת־רְחַבְעָ֔ם וּרְחַבְעָ֖ם הוֹלִ֣יד אֶת־אֲבִיָּ֑ה וַֽאֲבִיָּ֖ה הוֹלִ֥יד אֶת־אָסָֽא : 8 וְאָסָא֚ הוֹלִיד֨ אֶת־יְה֣וֹשָׁפָ֔ט וִיהֽוֹשָׁפָט֭ הוֹלִ֣יד אֶת־יְהוֹרָ֑ם וִֽיהוֹרָ֖ם הוֹלִ֥יד אֶת־עֻזִּיָּֽהוּ : 9 וְעֻזִּיָּ֨הוּ֨ הוֹלִ֣יד אֶת־יוֹתָ֔ם וְיוֹתָ֖ם הוֹלִ֣יד אֶת־אָחָ֑ז וְאָחָ֖ז הוֹלִ֥יד אֶת־חִזְקִיָּֽהוּ : 10 וְחִזְקִיָּ֨הוּ֨ הוֹלִ֣יד אֶת־מְנַשֶּׁ֔ה וּמְנַשֶּׁ֖ה הוֹלִ֣יד אֶת־אָמ֑וֹן וְאָמ֖וֹן הוֹלִ֥יד אֶת־יֹֽאשִׁיָּֽהוּ : 11 וְיֹֽאשִׁיָּ֗הוּ הוֹלִ֤יד אֶת־יְכָנְיָ֨הוּ֨ וְאֶת־אֶחָ֔יו לְעֵת֭ הָגְלוֹתָ֥ם בָּבֶֽלָה : 12 וְאַֽחֲרֵי֨ הָגְלוֹתָ֣ם בָּבֶ֔לָה יְכָנְיָ֖הוּ הוֹלִ֣יד אֶת־שְׁאַלְתִּיאֵ֑ל וּשְׁאַ֨לְתִּיאֵ֔ל הוֹלִ֖יד אֶת־זְרֻבָּבֶֽל : 13 וּזְרֻבָּבֶ֙ל הוֹלִ֣יד אֶת־אֲבִיה֔וּד וַֽאֲבִיה֖וּד הוֹלִ֣יד אֶת־אֶלְיָקִ֑ים וְאֶלְיָקִ֖ים הוֹלִ֥יד אֶת־עָזֽוֹר : 14 וְעָזוֹר֨ הוֹלִ֣יד אֶת־צָד֔וֹק וְצָד֖וֹק הוֹלִ֣יד אֶת־יָכִ֑ין וְיָכִ֖ין הוֹלִ֥יד אֶת־אֱלִיהֽוּד : 15 וֶֽאֱלִיהוּד֨ הוֹלִ֣יד אֶת־אֶלְעָזָ֔ר וְאֶלְעָזָ֖ר הוֹלִ֣יד אֶת־מַתָּ֑ן וּמַתָּ֖ן הוֹלִ֥יד אֶת־יַֽעֲקֹֽב : 16 וִיַֽעֲקֹ֔ב הוֹלִ֥יד אֶת־יוֹסֵ֖ף בַּ֣עַל מִרְיָ֑ם אֲשֶׁ֤ר מִמֶּ֨נָּה֨ נוֹלַ֣ד יֵשׁ֔וּעַ הַנִּקְרָ֖א מָשִֽׁיחַ : 17 וּ֠בְכֵן כָּל־הַדּוֹר֞וֹת מֵֽאַבְרָהָם֚ עַד־דָּוִד֨ אַרְבָּעָ֣ה עָשָׂ֣ר דּוֹר֔וֹת וּמִדָּוִד֨ עַד־הָגְל֣וֹת בָּבֶ֔לָה אַרְבָּעָ֥ה עָשָׂ֖ר דּוֹר֑וֹת וּמִן־הָגְל֤וֹת בָּבֶ֨לָה֨ עַד־הַמָּשִׁ֔יחַ אַרְבָּעָ֥ה עָשָׂ֖ר דּוֹרֽוֹת :

הולדת ישוע המשיח

18 וְהֻלֶּ֨דֶת֨ יֵשׁ֣וּעַ הַמָּשִׁ֔יחַ כֹּ֖ה הָיָ֑תָה בִּהְיוֹת֩ מִרְיָ֨ם אִמּ֜וֹ מְאֹֽרָשָׂ֤ה לְיוֹסֵף֨ בְּטֶ֣רֶם יִתְאַֽחֲד֔וּ נִמְצְאָ֥ה הָרָ֖ה מֵר֥וּחַ הַקֹּֽדֶשׁ : 19 וְיוֹסֵ֤ף אִישָׁהּ֙ בִּהְיוֹת֣וֹ צַדִּ֔יק וְלֹ֥א רָצָ֛ה לָשׂ֥וּם אֹתָ֖הּ לְמָשָׁ֑ל יָעַץ֭ לְשַׁלְּחָ֥הּ בַּסָּֽתֶר : 20 וּבְחָשְׁבֹו֮ אֶת־אֵלֶּה֒ הִנֵּה֩ מַלְאַ֨ךְ יְהוָֹה֜ נִרְאָ֥ה אֵלָי֛ו בַּֽחֲל֖וֹם לֵאמֹ֑ר יוֹסֵ֣ף בֶּן־דָּוִ֔ד אַל־תִּירָ֗א מִקַּ֤חַת אֵלֶ֨יךָ֨ אֶת־מִרְיָ֣ם אִשְׁתֶּ֔ךָ כִּ֚י הַנּוֹלָ֣ד בָּ֔הּ מֵר֥וּחַ הַקֹּ֖דֶשׁ הֽוּא : 21 וְיָֽלְדָ֣ה בֵ֔ן וְקָרָ֥אתָ אֶת־שְׁמ֖וֹ יֵשׁ֑וּעַ כִּ֥י ה֛וּא יוֹשִׁ֥יעַ אֶת־עַמּ֖וֹ מֵֽחַטֹּֽאתֵיהֶֽם : 22 וְכָל־זֹ֖את הָיָ֑תָה לְמַ֣עַן יִמָּלֵ֗א הַנֶּֽאֱמָ֨ר עַל־פִּ֧י יְהוָֹ֛ה בְּיַ֥ד הַנָּבִ֖יא לֵאמֹֽר : 23 הִנֵּ֣ה הָֽעַלְמָ֗ה הָרָה֨ וְיֹלֶ֣דֶת בֵּ֔ן וְקָֽרְא֥וּ שְׁמ֖וֹ עִמָּ֣נוּאֵ֑ל לֵאמֹ֖ר אֵ֥ל עִמָּֽנוּ : 24 וַיָּ֤קָם יוֹסֵף֨ מִשְּׁנָת֔וֹ וַיַּ֕עַשׂ כַּֽאֲשֶׁ֛ר צִוָּ֥ה אֹת֖וֹ מַלְאַ֣ךְ יְהוָֹ֑ה וַיִּקַּ֥ח אֵלָ֖יו אֶת־אִשְׁתּֽוֹ : 25 וְלֹֽא־יָדַ֣ע אֹתָ֔הּ עַ֥ד כִּי־יָֽלְדָ֖ה אֶת־בְּנָ֣הּ הַבְּכ֑וֹר וַיִּקְרָ֥א אֶת־שְׁמ֖וֹ יֵשֽׁוּעַ :

לפרק הבא








להפעלת המסגרות
load frameset