הבשורה על־פי מתי
פרק ב

הולדת ישוע המשיח -- המשך

1 וְכַֽאֲשֶׁ֨ר נוֹלַ֤ד יֵשׁ֨וּעַ֨ בְּבֵֽית־לֶ֣חֶם יְהוּדָ֔ה בִּימֵ֖י הֽוֹרוֹד֣וֹס הַמֶּ֑לֶךְ הִנֵּ֗ה חֲכָמִ֥ים בָּ֛אוּ מִקֶּ֖דֶם יְרֽוּשָׁלָֽמֳה ׃ 2 וַיֹּ֣אמְר֔וּ אַיֵּ֛ה מֶּ֥לֶךְ הַיְּהוּדִ֖ים הַנּוֹלָ֑ד כִּ֥י רָאִ֤ינוּ כֽוֹכָבוֹ֙ בַּקֶּ֔דֶם וַנָּבֹ֖א לְהִשְׁתַּֽחֲוֹ֥ת לֽוֹ ׃ 3 וְכִשְׁמֹ֖עַ הֽוֹרוֹד֣וֹס הַמֶּ֑לֶךְ וַיֶּֽחֱרַ֣ד ה֔וּא וְכָל־יְרֽוּשָׁלַ֖םִ עִמּֽוֹ ׃ 4 וַיַּקְהֵ֛ל אֶת־כָּל־רָאשֵׁ֥י הַכֹּֽהֲנִ֖ים וְסֽוֹפְרֵ֣י הָעָ֑ם וַיַּחְקֹ֣ר מֵֽאִתָּ֔ם אֵיפֹ֖ה יִוָּלֵ֥ד הַמָּשִֽׁיחַ ׃ 5 וַיֹּֽאמְר֣וּ אֵלָ֔יו בְּבֵֽית־לֶ֖חֶם יְהוּדָ֑ה כִּ֚י כֹּ֣ה כָת֔וּב בְּיַ֖ד הַנָּבִֽיא ׃ 6 וְאַתָּ֗ה בֵּֽית־לֶ֨חֶם֨ אֶ֣רֶץ יְהוּדָ֔ה אֵֽינְךָ֥ צָעִ֖יר בְּאַלּוּפֵ֣י יְהוּדָ֑ה כִּ֗י מִמְּךָ֨ יֵצֵ֣א מֹשֵׁ֔ל אֲשֶׁ֥ר יִרְעֶ֖ה אֶת־עַמִּ֥י יִשְׂרָאֵֽל ׃ 7 אָ֗ז קָרָ֧א הֽוֹרוֹד֛וֹס לְחַכְמֵ֥י הַקֶּ֖דֶם בַּסֵּ֑תֶר וַיַּחְקֹ֨ר הֵיטֵב֚ מֵהֶם֨ אֶת־הָעֵ֔ת אֲשֶׁ֛ר נִרְאָ֥ה בָהּ֭ הַכּוֹכָֽב ׃ 8 וַיִּשְׁלַ֥ח אֹתָ֛ם לְבֵֽית־לֶ֖חֶם וַיֹּאמַ֑ר לְ֠כוּ וְדִרְשׁ֨וּ הֵיטֵ֜ב עַל־הַיֶּ֗לֶד וְכַֽאֲשֶׁ֤ר תִּמְצָא֨וּהוּ֨ הֲשִׁיב֣וּנִי דָבָ֔ר לְמַ֛עַן אָב֥וֹא גַם־אָֽנֹכִ֖י וְאֶשְׁתַּֽחֲוֶ֥ה לֽוֹ ׃ 9 וְהֵ֗ם כַּֽאֲשֶׁ֛ר שָֽׁמְע֥וּ אֶת־הַמֶּ֖לֶךְ נָסָ֑עוּ וְהִנֵּ֣ה הַכּוֹכָ֡ב אֲשֶׁר֩ רָא֨וּ בַקֶּ֜דֶם הָלַ֣ךְ לִפְנֵיהֶ֗ם עַ֤ד אֲשֶׁר־בָּא֨ וַיַּֽעֲמֹ֔ד מִמַּ֕עַל לַֽאֲשֶׁ֛ר הָ֥יָה שָּׁ֖ם הַיָּֽלֶד ׃ 10 וְכִרְאוֹתָם֨ אֶת־הַכּוֹכָ֔ב שָֽׂמְח֛וּ שִׂמְחָ֥ה גְדוֹלָ֖ה עַד־מְאֹֽד ׃ 11 וּכְבֹאָ֣ם הַבַּ֗יְתָה מָֽצְא֤וּ אֶת־הַיֶּ֨לֶד֨ עִם־מִרְיָ֣ם אִמּ֔וֹ וַיִּפְּל֥וּ אַ֖רְצָה וַיִּשְׁתַּֽחֲו֣וּ ל֑וֹ וַיִּפְתְּחוּ֨ אֶת־אֽוֹצְר֣וֹתֵיהֶ֔ם וַיַּקְרִ֤יבוּ לוֹ֙ מְנָח֔וֹת זָהָ֥ב וּלְבוֹנָה֭ וּמֹֽר ׃ 12 וְכַֽאֲשֶׁ֨ר צֻוּ֤וּ מֵֽאֱלֹהִים֨ בַּֽחֲל֔וֹם לְבִלְתִּ֖י שׁ֣וּב אֶל־הֽוֹרוֹד֑וֹס וַיֵּֽלְכ֥וּ מִשָּׁ֛ם בְּדֶ֥רֶךְ אַחֵ֖ר לְאַרְצָֽם ׃

הילד ישוע ניצל ממות

13 וְכַֽאֲשֶׁר֨ הָֽלְכ֣וּ מִשָּׁ֔ם הִנֵּה֩ מַלְאַ֨ךְ יְהוָֹה֜ נִרְאָ֨ה אֶל־יוֹסֵ֣ף בַּֽחֲלוֹם֘ לֵאמֹר֒ ק֠וּם קַ֣ח אֶת־הַיֶּלֶ֚ד וְאֶת־אִמּוֹ֨ וּבְרַ֣ח מִצְרַ֔יְמָה וֶֽהְיֵ֣ה שָׁ֔ם עַ֥ד אֲשֶׁר־אֹמַ֖ר אֵלֶ֑יךָ כִּ֣י עָתִ֧יד הֽוֹרוֹד֛וֹס לְבַקֵּ֥שׁ אֶת־הַיֶּלֶ֭ד לְאַבְּדֽוֹ ׃ 14 וַיָּ֗קָם וַיִּקַּ֧ח אֶת־הַיֶּ֛לֶד וְאֶת־אִמּ֖וֹ בַּלָּ֑יְלָה וַיֵּ֥לֶךְ ל֖וֹ מִצְרָֽיְמָה ׃ 15 וַיְהִ֣י שָׁ֗ם עַ֚ד מ֣וֹת הֽוֹרוֹד֔וֹס לְמַ֣עַן יִמָּלֵ֗א הַנֶּֽאֱמָ֨ר עַל־פִּ֧י יְהוָֹ֛ה בְּיַ֥ד הַנָּבִ֖יא לֵאמֹ֑ר מִמִּצְרַ֖יִם קָרָ֥אתִי לִבְנִֽי ׃ 16 אָ֣ז הֽוֹרוֹד֗וֹס בִּרְאוֹת֞וֹ כִּ֤י הוּתַל֨ מֵאֵת֨ חַכְמֵ֣י הַקֶּ֔דֶם קָצַ֖ף מְאֹ֑ד וַיִּשְׁלַ֡ח וַיָּ֣מֶת אֶת־כָּל־הַ֠יְלָדִים אֲשֶׁ֨ר בְּבֵֽית־לֶ֤חֶם וּבְכָל־גְּבוּלֶ֨יהָ֨ מִבֶּן־שְׁנָתַ֣יִם וּלְמַ֔טָּה כְּפִ֣י הָעֵ֔ת אֲשֶׁ֥ר חָקַ֛ר הֵיטֵ֖ב מֵֽחַכְמֵ֥י הַקֶּֽדֶם ׃ 17 אָ֚ז הִתְמַלֵּ֔א הַנֶּֽאֱמָ֗ר בְּפִ֛י יִרְמְיָ֥הוּ הַנָּבִ֖יא לֵאמֹֽר ׃ 18 ק֣וֹל בְּרָמָ֤ה נִשְׁמָע֨ נְהִ֤י וּבְכִי֨ וְתַמְרוּרִ֔ים רָחֵ֖ל מְבַכָּ֣ה עַל־בָּנֶי֑הָ וּמֵֽאֲנָ֥ה לְהִנָּחֵ֖ם כִּ֥י אֵינָֽם ׃ 19 וְכַֽאֲשֶׁר֨ מֵ֣ת הֽוֹרוֹד֔וֹס הִנֵּה֩ מַלְאַ֨ךְ יְהוָֹה֝ נִרְאָ֧ה בַֽחֲל֛וֹם אֶל־יוֹסֵ֥ף בְּמִצְרַ֖יִם לֵאמֹֽר ׃ 20 ק֣וּם קַ֤ח אֶת־הַיֶּ֨לֶד֨ וְאֶת־אִמּ֔וֹ וְלֵ֖ךְ אֶל־אֶ֣רֶץ יִשְׂרָאֵ֑ל כִּ֣י מֵ֔תוּ הַמְבַקְּשִׁ֖ים אֶת־נֶ֥פֶשׁ הַיָּֽלֶד ׃ 21 וַיָּ֕קָם וַיִּקַּ֥ח אֶת־הַיֶּ֖לֶד וְאֶת־אִמּ֑וֹ וַיָּבֹ֖א אֶל־אֶ֥רֶץ יִשְׂרָאֵֽל ׃ 22 וּ֠כִשָׁמְעוֹ כִּֽי־מָלַ֨ךְ אַרְכֶלָא֜וֹס בִּֽיהוּדָ֗ה תַּ֚חַת הֽוֹרוֹד֣וֹס אָבִ֔יו וַיִּירָ֖א לָלֶ֣כֶת שָׁ֑מָּה וְכַֽאֲשֶׁ֨ר צֻוָּ֤ה מֵֽאֱלֹהִים֨ בַּֽחֲל֔וֹם וַיֵּ֥לֶךְ מִשָּׁ֖ם אֶל־חֶלְק֥וֹת הַגָּלִֽיל ׃ 23 וַיָּבֹ֕א וַיֵּ֛שֶׁב בְּעִ֖יר הַנִּקְרֵ֣את נָצָ֑רֶת לְמַ֣עַן יִמָּלֵ֗א הַנֶּֽאֱמָר֨ עַל־פִּ֣י הַנְּבִיאִ֗ים נֹֽצְרִ֖י יִקָּרֵֽא ׃