לפרק הקודם

הבשורה על־פי מתי
פרק ו

גמילות חסדים

1 הִשָּֽׁמְר֨וּ לָכֶ֜ם פֶּן־תַּֽעֲשׂ֤וּ נִדְבַתְכֶם֨ לִפְנֵי֨ בְּנֵ֣י הָֽאָדָ֔ם לְהֵֽרָא֖וֹת אֲלֵיהֶ֑ם וְאִם־לֹ֕א אֵ֤ין לָכֶם֨ שָׂכָ֔ר מֵֽאֲבִיכֶ֖ם אֲשֶׁ֥ר בַּשָּׁמָֽיִם : 2 לָכֵ֞ן בַּֽעֲשֽׂוֹתְךָ֣ נְ֠דָבָה לֹֽא־תָרִ֨יעַ בְּשׁוֹפָ֜ר לְפָנֶ֗יךָ כַּֽאֲשֶׁ֨ר הַֽחֲנֵפִ֤ים עֹשִׂים֨ בְּבָתֵּ֤י הַכְּנֵֽסִיּוֹת֨ וּבַֽחוּצ֔וֹת לְמַ֥עַן יִכָּֽבְד֖וּ מֵאֵ֣ת הָֽאֲנָשִׁ֑ים אָמְנָם֨ אֲנִ֣י אֹמֵ֣ר לָכֶ֔ם כִּ֥י לָֽקְח֖וּ אֶת־שְׂכָרָֽם : 3 א֥ךְ אַתָּ֖ה בַּֽעֲשֽׂוֹתְךָ֣ נְדָבָ֑ה אַל־תֵּדַע֨ שְׂמֹֽאלְךָ֔ אֶ֛ת אֲשֶׁ֥ר עֹשָׂ֖ה יְמִינֶֽךָ : 4 לְמַ֛עַן תִּהְיֶ֥ה נִדְבָֽתְךָ֖ בַּסֵּ֑תֶר וְאָבִ֨יךָ֨ הָֽרֹאֶ֣ה בַסֵּ֔תֶר ה֥וּא יִגְמָלְךָ֖ בַּגָּלֽוּי :

תפילה

5 וּבְהִתְפַּלֶּלְךָ֗ אַל־תְּהִי֨ כְּמ֣וֹ הַֽחֲנֵפִ֔ים כִּ֩י הֵ֨ם אֹֽהֲבִ֜ים לְהִתְפַּלֵּ֗ל בְּעָמְדָ֨ם בְּבָתֵּ֤י הַכְּנֵֽסִיּוֹת֨ וּבְפִנּ֣וֹת הָֽרְחוֹב֔וֹת לְמַ֥עַן יֵֽרָא֖וּ אֶל־בְּנֵ֣י הָֽאָדָ֑ם אָמְנָם֨ אֲנִ֣י אֹמֵ֣ר לָכֶ֔ם כִּ֥י לָֽקְח֖וּ אֶת־שְׂכָרָֽם : 6 וְ֠אַתָּה בְּהִתְפַּלֶּלְךָ֞ בֹּ֤א בַחֲדָֽרְךָ֨ וּסְגֹ֣ר דְּלָֽתְךָ֔ וְהִתְפַּלֵּ֥ל אֶל־אָבִ֖יךָ אֲשֶׁ֣ר בַּסֵּ֑תֶר וְאָבִ֨יךָ֨ הָֽרֹאֶ֣ה בַסֵּ֔תֶר יִגְמָלְךָ֖ בַּגָּלֽוּי : 7 וּבְהִ֨תְפַּלֶּלְכֶ֔ם אַל־תְּבַטְּא֥וּ הֶ֖בֶל כַּגּוֹיִ֑ם כִּ֥י הֵם֨ חֽוֹשְׁבִ֔ים אֲשֶׁ֛ר בְּהַרְבּ֥וֹת שִֽׂיחָתָ֖ם יִשָּׁמֵֽעוּ : 8 לָכֵ֖ן אַל־תִּדַּמּ֣וּ לָהֶ֑ם כִּ֗י יוֹדֵ֤עַ אֲבִיכֶם֨ אֶת־צָרְכֵיכֶ֔ם בְּטֶ֖רֶם תִּשְׁאֲל֥וּ מִמֶּֽנּוּ : 9 לָכֵ֕ן כֵּ֖ן הִתְפַּלְּל֣וּ אַתֶּ֑ם אָבִ֨ינוּ֨ אֲשֶׁ֣ר בַּשָּׁמַ֔יִם יִתְקַדֵּ֖שׁ שְׁמֶֽךָ : 10 תָּבֹ֖א מַלְכוּתֶ֑ךָ יֵֽעָשֶׂ֣ה רְצֽוֹנְךָ֗ כְּמוֹ֨ בַּשָּׁמַ֔יִם כֵּ֖ן גַּ֥ם בָּאָֽרֶץ : 11 תֵּ֥ן לָנ֛וּ הַ֖יּוֹם לֶ֥חֶם צָרְכֵּֽנוּ : 12 וּסְלַ֥ח לָ֨נוּ֨ אֶת־ח֣וֹבֹתֵ֔ינוּ כַּֽאֲשֶׁ֛ר אֲנַ֥חְנוּ סֽוֹלְחִ֖ים לְחַיָּבֵֽינוּ : 13 וְאַל־תְּבִיאֵ֨נוּ֨ לְמַסָּ֔ה כִּ֥י אִם־הַצִּילֵ֖נוּ מִן־הָרָ֑ע כִּ֣י לְךָ֗ הַמַּמְלָכָ֨ה וְהַגְּבוּרָ֧ה וְהַתִּפְאֶ֛רֶת לְעֽוֹלָמִ֖ים אָמֵֽן : 14 כִּ֛י אִם־תִּסְלְח֥וּ לִבְנֵי־הָֽאָדָ֖ם אֶת־פִּשְׁעֵיהֶ֑ם יִסְלַח֨ גַּ֣ם לָכֶ֔ם אֲבִיכֶ֖ם אֲשֶׁ֥ר בַּשָּׁמָֽיִם : 15 וְאִ֨ם לֹ֧א תִסְלְח֛וּ לִבְנֵ֥י הָֽאָדָ֖ם אֶת־פִּשְׁעֵיהֶ֑ם גַּ֧ם אֲבִיכֶ֛ם לֹ֥א יִסְלַ֖ח אֶת־פִּשְׁעֵיכֶֽם :

צום

16 וְכַֽאֲשֶׁ֣ר תָּצ֗וּמוּ אַל־תִּהְי֣וּ זֹֽעֲפִים֘ כְּמ֣וֹ הַֽחֲנֵפִים֒ כִּ֗י הֵ֤ם מַשְׁחִיתִים֨ אֶת־מַרְאֵ֣ה פְנֵיהֶ֔ם לְמַ֛עַן יֵֽרָא֥וּ לִבְנֵי־הָֽאָדָ֖ם צָמִ֑ים אָמְנָם֨ אֲנִ֣י אֹמֵ֣ר לָכֶ֔ם כִּ֥י לָֽקְח֖וּ אֶת־שְׂכָרָֽם : 17 אַ֥ךְ אַתָּ֖ה בְּצוּמֶ֑ךָ ס֤וּךְ אֶת־רֹֽאשְׁךָ֔ וּרְחַ֖ץ אֶת־פָּנֶֽיךָ : 18 לְמַעַן֩ לֹ֨א תֵֽרָאֶ֜ה לִבְנֵ֤י הָֽאָדָם֨ צָ֔ם כִּ֥י אִם־לְאָבִ֖יךָ אֲשֶׁ֣ר בַּסֵּ֑תֶר וְאָבִ֨יךָ֨ הָֽרֹאֶ֣ה בַסֵּ֔תֶר יִגְמָלְךָ֖ בַּגָּלוּֽי :

אוצר בשמים

19 אַל־תֹּֽאצְר֥וּ לָכֶ֛ם אֹֽצָר֖וֹת עַל־הָאָ֑רֶץ אֲשֶׁר־שָׁ֞ם עָ֤שׁ וָסָס֨ מַשְׁחִ֔ית וּבַֽאֲשֶׁ֛ר גַּנָּבִ֥ים חֹֽתְרִ֖ים וְגֹֽנְבִֽים : 20 כִּ֣י אִם־אִצְר֥וּ לָכֶ֛ם אֹֽצָר֖וֹת בַּשָּׁמָ֑יִם אֲשֶׁר־שָׁ֞ם לֹ֣א עָ֤שׁ וְלא־סָס֨ מַשְׁחִ֔ית וּבַֽאֲשֶׁ֗ר גַּנָּבִ֛ים אֵינָ֥ם חֹֽתְרִ֖ים וְאֵינָ֥ם גֹּֽנְבִֽים : 21 כִּ֗י בַּֽאֲשֶׁ֥ר יֵשׁ֨ אֽוֹצַרְכֶ֔ם שָׁ֥ם יִהְיֶ֖ה גַּם־לְבַבְכֶֽם :

אור הגוף

22 נֵ֣ר הַגְּוִיָּ֔ה הִ֖יא הָעָ֑יִן לָכֵ֗ן אִם־עֵֽינְךָ֨ תַּמָּ֣ה הִ֔יא כָּל־גְּוִיָּֽתְךָ֖ תִּהְיֶ֥ה בְהִירָֽה : 23 וְאִם־עֵֽינְךָ֨ רָעָ֔ה כָּל־גְּוִיָּֽתְךָ֖ תִּהְיֶ֣ה חֲשׁוּכָ֑ה וְ֠אִם הָא֨וֹר אֲשֶׁ֤ר בְּךָ֨ ח֣שֶׁךְ ה֔וּא הח֖שֶׁךְ מָה־רַ֥ב הֽוּא :

אלהים והממון

24 לֹא֩ יוּכַ֨ל אִ֜ישׁ לַֽעֲבֹד֘ שְׁנֵ֣י אֲדֹנִים֒ כִּ֡י אוֹ֩ יִשְׂנָ֨א אֶת־הָֽאֶחָ֜ד וְיֶֽאֱהַ֣ב אֶת־הָֽאַחֵ֗ר א֤וֹ יִדְבַּ֣ק בָּֽאֶחָ֔ד וְיִבְזֶ֖ה אֶת־הָֽאַחֵ֑ר לֹ֧א תֽוּכְל֛וּ לַֽעֲבֹ֥ד אֶת־הָֽאֱלֹהִ֖ים וְאֶת־הַמָּמֽוֹן :

אל דאגה

25 עַל־כֵּ֞ן אֲנִ֣י ׀ אֹמֵ֣ר לָכֶ֗ם לֹֽא־תִדְאֲג֤וּ לְנַפְשְׁכֶם֨ מַה־תֹּֽאכְל֣וּ וּמַה־תִּשְׁתּ֔וּ וְגַ֛ם לֹ֥א לִגְוֽיַּתְכֶ֖ם מַה־תִּלְבָּ֑שׁוּ הַאֵ֨ין הַנֶּ֤פֶשׁ יְתֵרָה֨ מִן־הָאֹ֔כֶל וְהַגְּוִיָּ֖ה מִן־הַמַּלְבּֽוּשׁ : 26 הַבִּיטוּ֘ אֶל־ע֣וֹף הַשָּׁמַיִם֒ כִּי֩ אֵינָ֨ם זֹֽרְעִ֜ים וְאֵינָ֣ם קֹֽצְרִ֗ים וְאֵינָ֣ם מְאַסְּפִים֨ לַֽאֲסָמִ֔ים וַֽאֲבִיכֶ֥ם אֲשֶׁר־בַּשָּׁמַ֖יִם מְכַלְכֵּ֣ל אֹתָ֑ם הַאִ֣ם אַתֶּ֗ם אֵֽינְכֶ֧ם יְתֵרִ֛ים הַרְבֵּ֖ה מֵהֶֽם : 27 וּמִ֤י מִכֶּם֨ בְּדָֽאֲג֔וֹ יוּכַ֧ל לְהוֹסִ֛יף עַל־קֽוֹמָת֖וֹ אַמָּ֥ה אֶחָֽת : 28 וְלָ֖מָּה תִּדְאֲג֣וּ לְמַלְבּ֑וּשׁ הִתְבּ֨וֹנְנ֜וּ אֶל־שֽׁוֹשַׁנֵּ֣י הַשָּׂדֶ֗ה אֵיכָה֨ יִגְדְּל֔וּ הֵ֛ם אֵינָ֥ם עֲמֵלִ֖ים וְאֵינָ֥ם טֹוִיֽם : 29 וַֽאֲנִ֖י אֹמֵ֣ר לָכֶ֑ם כִּ֣י גַ֤ם שְׁלֹמֹה֨ בְּכָל־הֲדָר֔וֹ לֹֽא־הָיָ֥ה לָב֖וּשׁ כְּאֶחָ֥ד מֵאֵֽלֶּה : 30 וְ֠אִם כָּ֣כָה עֹטֵ֤ף הָֽאֱלֹהִים֨ אֶת־עֵ֣שֶׂב הַשָּׂדֶ֔ה הַֽהוֶֹ֣ה הַיּ֗וֹם וּמָחָ֖ר הֽוּא־מֻשְׁלָ֣ךְ אֶל־תַּנּ֑וּר הַֽאִם־לֹ֨א הַרְבֵּ֤ה יוֹתֵר֨ אֶתְכֶ֔ם קְטַנֵּ֖י הָֽאֱמוּנָֽה : 31 לָכֵ֕ן אַל־תִּדְאֲג֖וּ לֵאמֹ֑ר מַה־נֹּאכַ֥ל וּמַה־נִּשְׁתֶּ֖ה וּמַה־נִּלְבָּֽשׁ : 32 כִּ֚י אַֽחֲרֵ֣י כָל־אֵ֔לֶּה הַגּוֹיִ֖ם מְבַקְּשִׁ֑ים וַאֲבִיכֶ֤ם אֲשֶׁר־בַּשָּׁמַ֨יִם֨ יוֹדֵ֔עַ כִּ֛י אַתֶּ֥ם צְרִיכִ֖ים לְכָל־אֵֽלֶּה : 33 וּבַקְּשׁ֧וּ בָרִֽאשׁוֹנָ֛ה אֶת־מַלְכ֥וּת הָֽאֱלֹהִ֖ים וְאֶת־צִדְקָת֑וֹ וְכָל־אֵ֖לֶּה יִוָּֽסְפ֥וּ לָכֶֽם : 34 לָכֵ֗ן אַל־תִּדְאֲגוּ֨ לְי֣וֹם מָחָ֔ר כִּ֚י י֣וֹם מָחָ֔ר יִדְאַ֖ג לַֽאֲשֶׁ֣ר ל֑וֹ דַּ֥י לַיּ֖וֹם רָֽעָתֽוֹ :

לפרק הבא








להפעלת המסגרות
load frameset