לפרק הקודם

הבשורה על-פי מתי
פרק ה

הדרשה על ההר

1 וְכִרְאוֹתוֹ֨ אֶת־הַֽהֲמוֹנִ֔ים וַיַּ֖עַל אֶל־הָהָ֑ר וְכַֽאֲשֶׁ֣ר יָשַׁ֔ב וַיִּגְּשׁ֥וּ אֵלָ֖יו תַּלְמִידָֽיו : 2 וַיִּפְתַּ֖ח אֶת־פִּ֑יו וַיְלַמֵּ֥ד אֹתָ֖ם לֵאמֹֽר :

אשרי

3 אַשְׁרֵ֖י עֲנִיֵּ֣י רוּ֑חַ כִּ֥י לָהֶ֖ם מַלְכ֥וּת הַשָּׁמָֽיִם : 4 אַשְׁרֵ֖י הָֽאֲבֵלִ֑ים כִּ֥י הֵ֖ם יְנֻחָֽמוּ : 5 אַשְׁרֵ֖י הָֽעֲנָוִ֑ים כִּ֥י הֵ֖ם יִֽירְשׁ֥וּ אֶת־הָאָֽרֶץ : 6 אַשְׁרֵ֕י הָֽרְעֵבִ֥ים וְהַצְּמֵאִ֖ים לִצְדָקָ֑ה כִּ֥י הֵ֖ם יִשְׂבָּֽעוּ : 7 אַשְׁרֵ֖י חַמְּרַֽחֲמִ֑ים כִּ֥י הֵ֖ם יְרֻחָֽמוּ : 8 אַשְׁרֵ֖י בָּרֵ֣י לֵבָ֑ב כִּ֣י הֵ֔ם יִרְא֖וּ אֶת־הָֽאֱלֹהִֽים : 9 אַשְׁרֵ֖י עֹשֵׂ֣י שָׁל֑וֹם כִּ֣י הֵ֔ם יִקָּֽרְא֖וּ בְּנֵ֥י הָֽאֱלֹהִֽים : 10 אַשְׁרֵ֕י הַנִּרְדָּפִ֖ים בִּגְלַ֣ל צְדָקָ֑ה כִּ֥י לָהֶ֖ם מַלְכ֥וּת הַשָּׁמָֽיִם : 11 אַשְׁרֵיכֶ֕ם אִם־יְחָֽרְפ֥וּ וְיִרְדְּפ֖וּ אֶתְכֶ֑ם וְיֹֽאמְר֣וּ בְשֶׁ֗קֶר כָּל־דָּבָ֥ר רָ֛ע עֲלֵיכֶ֖ם בִּגְלָלִֽי : 12 שִׂמְחוּ֨ וְגִ֣ילוּ מְאֹ֔ד כִּ֛י שְׂכַרְכֶ֥ם רַ֖ב בַּשָּׁמָ֑יִם כִּי־כֵן֨ רָֽדְפ֣וּ אֶת־הַנְּבִיאִ֔ים אֲשֶׁ֖ר הָי֥וּ לִפְנֵיכֶֽם :

מלח ואור

13 אַתֶּם֘ מֶ֣לַח הָאָרֶץ֒ וְאִם־הַמֶּ֨לַח֨ יִתָּפֵ֔ל בַּמֶּ֖ה יָמְלָ֑ח לֹֽא־יִצְלַ֨ח ע֜וֹד לִמְא֗וּמָה כִּ֚י אִם־לְהָשְׁלַ֣ךְ הַח֔וּצָה וּלְהֵֽרָמֵ֖ס מֵאֵ֥ת הָֽאֲנָשִֽׁים : 14 אַתֶּ֖ם א֣וֹר הָֽעוֹלָ֑ם עִ֚יר הַמֻּנַּ֣חַת עַל־הָ֔ר לֹ֥א תוּכַ֖ל לְהִסָּתֵֽר : 15 וְאֵֽין־מַדְלִיקִ֣ים נֵ֔ר וּמְשִׂימִ֥ים אֹת֖וֹ תַּ֣חַת הָֽאֵיפָ֑ה כִּ֚י אִם־עַ֣ל הַמְּנוֹרָ֔ה וְיָאִ֖יר לְכֹ֥ל אֲשֶׁר־בַּבָּֽיִת : 16 כֹּ֚ה יָאִ֣יר אֽוֹרְכֶ֔ם לִפְנֵ֖י בְּנֵ֣י הָֽאָדָ֑ם לְמַ֗עַן יִרְאוּ֨ אֶת־מַֽעֲשֵׂיכֶ֣ם הַטּוֹבִ֔ים וִֽיכַבְּד֥וּ אֶת־אֲבִיכֶ֖ם אֲשֶׁ֥ר בַּשָּׁמָֽיִם :

התורה והנביאים

17 אַל־תַּחְשְׁב֕וּ כִּ֣י בָ֔אתִי לְהָפֵ֥ר אֶת־הַתּוֹרָ֖ה א֣וֹ אֶת־הַנְּבִיאִ֑ים לֹ֥א בָ֨אתִי֨ לְהָפֵ֔ר כִּ֖י אִם־לְמַלֵּֽא : 18 כִּ֚י אָמְנָ֔ם אֲנִ֖י אֹמֵ֣ר לָכֶ֑ם עַ֠ד כִּ֣י יַֽעַבְר֞וּ הַשָּׁמַ֣יִם וְהָאָ֗רֶץ לֹ֣א תַֽעֲבֹר֩ י֨וּד אַחַ֜ת אֽוֹ־נְקֻדָּ֤ה אַחַת֨ מִן־הַתּוֹרָ֔ה עַד֛ אֲשֶׁ֥ר הַכֹּ֖ל יִמָּלֵֽא : 19 לָכֵ֗ן כָּל־אֲשֶׁ֣ר יָפֵ֡ר אַחַת֩ מִן־הַמִּצְוֹ֙ת הָאֵ֜לֶּה הַקְּטַנּ֗וֹת וִֽילַמֵּ֥ד כֵּן֨ אֶת־הָֽאֲנָשִׁ֔ים קָטֹ֣ן מִכֹּ֔ל יִקָּרֵ֖א בְּמַלְכ֣וּת הַשָּׁמָ֑יִם וְכָל־אֲשֶׁ֤ר יַֽעֲשֶׂה֨ וִֽילַמֵּ֔ד ה֛וּא יִקָּרֵ֥א גָד֖וֹל בְּמַלְכ֥וּת הַשָּׁמָֽיִם : 20 כִּ֥י אֲנִ֖י אֹמֵ֣ר לָכֶ֑ם כִּ֗י אִם־לֹ֨א תוֹתִ֤יר צִדְקַתְכֶם֨ עַל־צִדְקַת֨ הַסּֽוֹפְרִ֣ים וְהַפְּרוּשִׁ֔ים בּ֥וֹא לֹֽא־תָבֹ֖אוּ אֶל־מַלְכ֥וּת הַשָּׁמָֽיִם :

כעס והתפייסות

21 שְׁמַעְתֶּ֗ם כִּ֤י נֶֽאֱמַר֨ לַקַּדְמֹנִ֔ים לֹ֖א תִּרְצָ֑ח וַֽאֲשֶׁ֣ר יִרְצַ֔ח אָשֵׁ֥ם יִהְיֶ֖ה לַמִּשְׁפָּֽט : 22 וַֽאֲנִ֣י ׀ אֹמֵ֣ר לָכֶ֗ם כִּ֣י כָל־אֲשֶׁר֩ יִקְצֹ֨ף עַל־אָחִ֜יו חִנָּ֗ם אָשֵׁ֣ם יִהְיֶה֘ לַמִּשְׂפָּט֒ וַאֲשֶׁ֨ר יֹאמַ֤ר לְאָחִיו֨ רֵיקָ֔א אָשֵׁ֥ם יִהְיֶ֖ה לִפְנֵי֣ הַסַּנְהֶדְרִ֑ין וַֽאֲשֶׁ֤ר יֹאמַר֨ אַתָּ֣ה סָכָ֔ל אָשֵׁ֥ם יִהְיֶ֖ה לְאֵ֥שׁ גֵּֽיהִנֹּֽם : 23 לָכֵ֗ן אִם־תַּקְרִ֤יב קָרְבָּֽנְךָ֨ אֶל־הַמִּזְבֵּ֔חַ וְשָׁם֨ תִּזְכֹּ֔ר כִּי֣־יֵ֧שׁ לְאָחִ֛יךָ אֵיזֶ֥ה דָבָ֖ר נֶגְדֶּֽךָ : 24 הַנַּ֨ח שָׂ֧ם קָרְבָּֽנְךָ֛ לִפְנֵ֥י הַמִּזְבֵּ֖חַ וָלֵ֑ךְ בָּרִֽאשֹׁנָה֨ הִתְרַצֵּ֣ה אֶל־אָחִ֔יךָ וְאָ֣ז בֹּ֔א וְהַקְרֵ֖ב קָרְבָּנֶֽךָ : 25 הִתְרַצֵּ֗ה אֶל־אִי֚שׁ רִֽיבְךָ֨ מְהֵרָ֔ה בְּעֽוֹדְךָ֥ בַדֶּ֖רֶךְ עִמּ֑וֹ פֶּן־יַסְגִּ֨ירְךָ֜ אִ֤ישׁ רִֽיבְךָ֨ אֶל־הַשֹּׁפֵ֔ט וְהַשֹּׁפֵ֗ט יַסְגִּֽירְךָ֨ אֶל־הַשֹּׁטֵ֔ר וְתֻשְׁלַ֖ךְ אֶלְ־בֵּ֥ית הַכָּֽלֶא : 26 אָמְנָ֕ם אֲנִי֭ אֹמֵ֣ר לָ֑ךְ כִּ֣י לֹ֤א תֵצֵא֨ מִשָּׁ֔ם עַ֚ד אֲשֶׁ֣ר תְּשַׁלֵּ֔ם אֵ֖ת הַפְּרוּטָ֥ה הָאַֽחֲרוֹנָֽה :

ניאוף

27 שְׁמַעְתֶּ֗ם כִּ֤י נֶֽאֱמַר֨ לַקַּדְמֹנִ֔ים לֹ֖א תִּנְאָֽף : 28 וַֽאֲנִ֖י אֹמֵ֣ר לָכֶ֑ם כִּ֗י כָּל־הַמַּבִּ֤יט אֶל־אִשָּׁה֨ לַחְמֹ֣ד אֹתָ֔הּ כְּבָ֛ר נָאַ֥ף אֹתָ֖הּ בְּלִבּֽוֹ : 29 וְאִם־עֵֽינְךָ֤ הַיְמָנִית֨ תַּכְשִֽׁילְךָ֔ נַתֵּ֣ק אֹתָ֔הּ וְהַשְׁלִכָ֖הּ מִמֶּ֑ךָּ כִּ֣י ׀ מוֹעִ֣ל לְךָ֗ אֲשֶׁ֤ר יֹבַד֨ אַחַ֣ד אֲבָרֶ֔יךָ וְלֹֽא־תֻשְׁלַ֥ךְ כָּל־גְּוִיָּֽתְךָ֖ אֶל־גֵּיֽהִנֹּֽם : 30 וְאִם־יָֽדְךָ֤ הַיְמָנִית֨ תַּכְשִׁ֣ילְךָ֔ קַצֵּ֣ץ אֹתָ֔הּ וְהַשְׁלִיכָ֖הּ מִמֶּ֑ךָּ כִּ֣י מוֹעִ֣יל לְךָ֗ אֲשֶׁ֤ר יֹאבַד֨ אַחַ֣ד אֲבָרֶ֔יךָ וְלֹֽא־תֻשְׁלַ֥ךְ כָּל־גְּוִיָּֽתְךָ֖ אֶל־גֵּיֽהִנֹּֽם :

גירושין

31 נֶֽאֱמַ֕ר כִּ֣י כָל־אֲשֶׁ֤ר יְשַׁלַּח֨ אֶת־אִשְׁתּ֔וֹ יִתֵּ֥ן לָ֖הּ סֵ֥פֶר כְּרִיתֽוּת : 32 וַֽאֲנִי֘ אֹמֵ֣ר לָכֶם֒ כִּ֣י כָל־אִ֞ישׁ אֲשֶׁ֣ר ׀ יְשַׁלַּ֣ח אֶת־אִשְׁתּ֗וֹ זֽוּלָתִי֨ עַל־דְּבַ֣ר הַזְּנ֔וּת עֹשֶׂ֥ה אֹתָ֖הּ לִנְאֹ֑ף וְאִ֗ישׁ אֲשֶׁ֛ר יִשָּׂ֥א גְרוּשָׁ֖ה מְנָאֵ֥ף הֽוּא :

שבועה

33 ע֚וֹד שְׁמַעְתֶּ֔ם כִּ֤י נֶֽאֱמַר֨ לַקַּדְמֹנִ֔ים לֹ֥א תִּשָּׁבַ֖ע לַשָּׁ֑קֶר אַ֛ךְ תְּשַׁלֵּ֥ם לַֽיהוָֹ֖ה שְׁבֽוּעוֹתֶֽיךָ : 34 וַֽאֲנִי֨ אֹמֵ֣ר לָכֶ֔ם לֹ֥א תִשָּׁבְע֖וּ כָּלִ֑יל לֹ֚א בַּשָּׁמַ֔יִם כִּ֛י כִּסֵּ֥א הָֽאֱלֹהִ֖ים הֵֽמָּה : 35 וְלֹא֨ בָּאָ֔רֶץ כִּ֛י הֲד֥וֹם רַגְלָ֖יו הִ֑יא וְלֹא֨ בִּירֽוּשָׁלַ֔םִ כִּ֥י הִ֛יא קִרְיַ֖ת הַמֶּ֥לֶךְ הָרָֽב : 36 וְלֹ֥א תִשָּׁבַ֖ע בְּרֹאשֶׁ֑ךָ כִּ֠י לֹ֣א תוּכַ֧ל לְהַלְבִּ֛ין א֥וֹ לְהַשְׁחִ֖יר שֵׂעָ֥ר אֶחָֽד : 37 אַ֚ךְ יְהִ֣י דְבַרְכֶ֔ם כֵּ֥ן ׀ כֵּ֖ן לֹ֣א ׀ לֹ֑א כִּ֚י הַיּוֹתֵ֣ר מֵאֵ֔לֶּה מִ֥ן הָרָ֖ע הֽוּא :

מידה כנגד מידה

38 שְׁמַעְתֶּם֨ כִּ֣י נֶֽאֱמַ֔ר עַ֚יִן תַּ֣חַת עַ֔יִן שֵׁ֖ן תַּ֥חַת שֵֽׁן : 39 וַֽאֲנִי֨ אֹמֵ֣ר לָכֶ֔ם כִּ֛י לֹ֥א תִתְנַגְּד֖וּ אֶל־הָרָ֑ע אַ֗ךְ כָּל־אִ֞ישׁ אֲשֶׁ֤ר יַכְּךָ֨ עַל־הַלְּחִ֣י הַיְמָנִ֔ית הַטֵּ֥ה אֵלָ֖יו גַּ֥ם הָֽאַחֶֽרֶת : 40 וְלָאִ֗ישׁ הֶֽחָפֵץ֨ לְהִשָּׁפֵ֣ט עִמְּךָ֔ וְלָקַ֖חַת כֻּתָּנְתֶּ֑ךָ עֲזֹ֣ב אִתּ֔וֹ גַּ֖ם אֶת־מְעִילֶֽךָ  : 41 וּמִ֗י אֲשֶׁ֨ר יְאַלֵּ֧ץ אֹֽתְךָ֛ לָלֶ֥כֶת עִמּ֖וֹ מִ֣יל אֶחָ֑ד לֵ֥ךְ עִמּ֖וֹ שְׁנָֽיִם : 42 לַשֹּׁאֵ֥ל מִמְּךָ֖ תֵּ֑ן וַֽאֲשֶׁ֤ר יַחְפֹּץ֨ לִלְו֣וֹת מִמְּךָ֔ אַל־תִּפְנֶ֖ה מִמֶּֽנּוּ :

אהבה לאויבים

43 שְׁמַעְתֶּם֨ כִּ֣י נֶֽאֱמַ֔ר וְאָֽהַבְתָּ֨ לְרֵֽעֲךָ֔ וְשָֽׂנֵאתָ֖ אֶת־אֹֽיְבֶֽךָ : 44 וַֽאֲנִ֖י אֹמֵ֣ר לָכֶ֑ם אֶֽהֱב֨וּ אֶת־אֽוֹיְבֵיכֶ֜ם בָּֽרְכ֣וּ מְקַלְלֵיכֶ֗ם הֵטִ֨יבוּ֨ לַשּֽׂנְאִ֣ים אֶתְכֶ֔ם וְהִתְפַּלְּל֔וּ בְּעַ֛ד הצֹּֽרְרִ֥ים וְהָרֹדְפִ֖ים אֶתְכֶֽם : 45 לְמַ֨עַן֨ תִּהְי֣וּ בָנִ֗ים לַֽאֲבִיכֶ֖ם אֲשֶׁ֣ר בַּשָּׁמָ֑יִם כִּ֣י ה֗וּא מַזְרִ֨יחַ אֶת־שִׁמְשׁ֜וֹ עַל֚ הָֽרָעִים֨ וְעַ֣ל הַטּוֹבִ֔ים וּמַמְטִ֛יר עַ֥ל יְשָרִ֖ים וְעַ֥ל מְעַוְּלִֽים : 46 כִּ֗י אִ֤ם תֶּאֶֽהֲבוּ֨ אֶת־אֹ֣הֲבֵיכֶ֔ם מַה־שָּׂכָ֖ר יֵ֣שׁ לָכֶ֑ם הֲלֹ֛א גַּ֥ם הַמּֽוֹכְסִ֖ים עֹשִׂ֥ים זֹֽאת : 47 וְאִ֨ם תִּשְׁאֲל֜וּ לִשְׁל֤וֹם אֲחֵיכֶם֨ לְבַ֔ד מַה־יִּתְרָ֖ה תַּֽעֲשׂ֑וּ הֲלֹ֛א גַּ֥ם הַמּֽוֹכְסִ֖ים עֹשִׂ֥ים כֵּֽן : 48 לָכֵ֕ן הֱי֥וּ אַתֶּ֖ם תְּמִימִ֑ים כַּֽאֲשֶׁ֛ר אֲבִיכֶ֥ם אֲשֶׁר־בַּשָּׁמַ֖יִם תָּמִ֥ים הֽוּא :

לפרק הבא








להפעלת המסגרות
load frameset