הבשורה על־פי מתי
פרק יא

שכר -- המשך

1 וַיְהִ֗י כַּֽאֲשֶׁר֨ כִּלָּ֣ה יֵשׁ֔וּעַ לְצַוֹּ֛ת אֶת־שְׁנֵ֥ים עָשָׂ֖ר תַּלְמִידָ֑יו וַיַּֽעֲבֹ֣ר מִשָּׁ֔ם לְלַמֵּ֥ד וְלִקְרֹ֖א בְּעָֽרֵיהֶֽם ׃

שליחים מאת יוחנן המטביל

2 וְיֽוֹחָנָ֗ן כְּשָׁמְע֛וֹ בְּבֵ֥ית הָֽאֲסוּרִ֖ים אֶת־מַֽעֲשֵׂ֣י הַמָּשִׁ֑יחַ שָׁלַ֖ח שְׁנַ֥יִם מִתַּלְמִידָֽיו ׃ 3 וַיֹּ֖אמֶר אֵלָ֑יו הַֽאַתָּ֥ה הוּא֨ הֶֽעָתִ֣יד לָב֔וֹא א֖וֹ נְחַכֶּ֥ה לְאַחֵֽר ׃ 4 וַיַּ֥עַן יֵשׁ֖וּעַ וַיֹּ֣אמֶר אֲלֵיהֶ֑ם לְכוּ֨ וְהַגִּ֣ידוּ לְֽיוֹחָנָ֔ן אֶ֨ת־הַדְּבָרִ֔ים אֲשֶׁ֛ר אַתֶּ֥ם שֹֽׁמְעִ֖ים וְרֹאִֽים ׃ 5 עִוְרִ֨ים רֹאִ֜ים וּפִסְחִ֤ים מִתְהַלְּכִים֨ מְצֹֽרָעִ֣ים מְטֹֽהָרִ֔ים וְחֵֽרְשִׁ֖ים שֹֽׁמְעִ֑ים מֵתִ֣ים מֽוּקָמִ֔ים וַֽעֲנִיִּ֖ים מִתְבַּשְּׂרִֽים ׃ 6 וְאַשְׁרֵ֗י כֹּ֛ל אֲשֶׁ֥ר לֹֽא־יִכָּשֵׁ֖ל בִּֽי ׃ 7 וְכַֽאֲשֶׁר֨ הָ֣לְכוּ אֵ֔לֶּה הֵחֵ֥ל יֵשׁ֛וּעַ לְדַבֵּ֥ר אֶל־הַֽהֲמוֹנִ֖ים עַל־אֹד֣וֹת יֽוֹחָנָ֑ן מַה־יְּצָאתֶ֤ם הַמִּדְבָּ֨רָה֨ לִרְא֔וֹת אִם־קָנֶ֕ה הַנָּ֖ע מִפְּנֵ֥י הָרֽוּחַ ׃ 8 אַ֚ךְ מַה־יְּצָאתֶ֣ם לִרְא֔וֹת אִם־אִ֕ישׁ לָב֖וּשׁ בִּגְדֵ֣י עֹ֑נֶג הִנֵּה֨ לְבוּשֵׁ֣י עֹ֔נֶג בְּבָתֵּ֥י מְלָכִ֖ים הֵֽמָּה ׃ 9 אַ֖ךְ מַה־יְּצָאתֶ֣ם לִרְא֑וֹת אִם־נָבִ֕יא כֵּ֗ן אֲנִי֨ אֹמֵ֣ר לָכֶ֔ם וְיוֹתֵ֖ר מִנָּבִֽיא ׃ 10  כִּ֚י זֶ֣ה ה֔וּא אֲשֶׁ֥ר כָּת֖וּב עָלָ֑יו הִֽנְנִ֨י שֹׁלֵ֤חַ מַלְאָכִי֨ לְפָנֶ֔יךָ אֲשֶׁ֛ר יְפַנֶּ֥ה דַרְכְּךָ֖ לְפָנֶֽיךָ ׃ 11 אָמְנָ֗ם אֲנִי֘ אֹמֵ֣ר לָכֶם֒ לֹא־קָם֨ בִּֽילוּדֵ֣י נָשִׁ֔ים גָּד֖וֹל מִיּֽוֹחָנָ֣ן הַמְּטַבֵּ֑ל אַ֗ךְ הַקָּטֹ֤ן מִכֹּל֨ בְּמַלְכ֣וּת הַשָּׁמַ֔יִם גָּד֥וֹל ה֖וּא מִמֶּֽנּוּ ׃ 12 וּמִימֵ֨י יֽוֹחָנָ֤ן הַמְּטַבֵּל֨ עַד־עַתָּ֔ה מַלְכ֥וּת הַשָּׁמַ֖יִם נֶֽאֱחָזָ֣ה בְחָזְקָ֑ה וְהַמַּֽחֲזִיקִ֥ים בָּ֖הּ חֹֽטְפִ֥ים אֹתָֽהּ ׃ 13 כִּ֣י כָל־הַנְּבִיאִ֧ים וְהַתּוֹרָ֛ה עַד־יֽוֹחָנָ֖ן נִבָּֽאוּ ׃ 14 וְאִם־תֹּאב֖וּ לְקַבֵּ֑ל זֶ֥ה הוּא֨ אֵֽלִיָּ֔הוּ הֶֽעָתִ֖יד לָבֽוֹא ׃ 15 מִ֣י אֲשֶׁ֥ר יֵֽשׁ־ל֛וֹ אָזְנַ֥יִם לִשֽׁמֹ֖עַ יִשְׁמָֽע ׃ 16 וְאֶל־מִ֕י אֲדַמֶּ֖ה אֶת־הַדּ֣וֹר הַזֶּ֑ה דֹּ֣מֶה ה֗וּא לִֽילָדִים֙ יֽשְׁבִ֣ים בַּשְּׁוָקִ֔ים וְקֹֽרְאִ֖ים אֶל־חַבְרֵיהֶֽם ׃ 17 וְאֹ֣מְרִ֔ים חִלַּ֧לְנוּ לָכֶ֛ם בַּֽחֲלִילִ֖ים וְלֹ֣א רִקַּדְתֶּ֑ם הֵילַ֥לְנוּ לָכֶ֖ם וְלֹ֥א סְפַדְתֶּֽם ׃ 18 כִּ֚י בָּ֣א יֽוֹחָנָ֔ן לֹ֥א אָכֹ֖ל וְלֹ֣א שָׁתֹ֑ה וְהֵ֣ם אֹֽמְרִ֔ים שֵׁ֖ד יֵ֥שׁ לֽוֹ ׃ 19 וּבֶן־הָֽאָדָ֣ם בָּא֘ אֹכֵ֣ל וְשֹׁתֶה֒ וְהֵ֣ם אֹֽמְרִ֗ים הִנֵּ֨ה אִ֤ישׁ זוֹלֵל֨ וְסוֹבֵ֣א יַ֔יִן וְאֹהֵ֥ב מֽוֹכְסִ֖ים וְחַטָּאִ֑ים וְנִצְדְּקָה֨ הַֽחָכְמָ֔ה מֵאֵ֖ת בָּנֶֽיהָ ׃

אוי לאדישים ומנוח ליגעים

20 אָ֗ז הֵחֵל֨ לְהוֹכִ֣יחַ אֶת־הֶֽעָרִ֔ים אֲשֶׁ֛ר נַֽעֲשׂ֥וּ בָהֵ֖ן רֹ֣ב גְּבֽוּרֹתָ֑יו יַ֖עַן לֹ֥א שָֽׁבוּ ׃ 21 א֥וֹי לָךְ֨ כֹּֽרָזִ֔ין א֥וֹי לָ֖ךְ בֵּֽית־צַיְדָ֑ה כִּ֠י אִם־בְּצ֨וֹר וּבְצִיד֜וֹן נִהְי֤וּ הַגְּבוּרוֹת֨ הַנִּהְי֣וֹת בָּכֶ֔ן כְּבָ֥ר שָׁ֖בוּ בְּשַׂ֥ק וָאֵֽפֶר ׃ 22 אֶ֕פֶס אֲנִ֖י אֹמֵ֣ר לָכֶ֑ם לְצֹ֨ר וּלְצִיד֥וֹן יֵקַ֛ל בְּי֥וֹם הַמִּשְׁפָּ֖ט מֵֽאֲשֶׁ֥ר לָכֶֽן ׃ 23 וְאַ֣תְּ כְּפַר־נַח֗וּם הַמְרֽוֹמָמָה֨ עַד־הַשָּׁמַ֔יִם אֶל־שְׁא֖וֹל תּוּרָ֑דִי כִּ֡י אִם־בִּסְדֹ֞ם נִהְי֤וּ הַגְּבוּרוֹת֨ הַנִּהְי֣וֹת בָּ֔ךְ עָֽמְדָ֖ה עַד־הַיּ֥וֹם הַזֶּֽה ׃ 24 אֶ֕פֶס אֲנִ֖י אֹמֵ֣ר לָכֶ֑ם כִּי֩ לְאֶ֨רֶץ סְדֹ֥ם יֵקַ֛ל בְּיוֹ֥ם הַמִּשְׁפָּ֖ט מֵֽאֲשֶׁ֥ר לָֽךְ ׃ 25 בָּעֵ֣ת הַהִ֔יא עָנָ֥ה יֵשׁ֖וּעַ וְאָמָ֑ר אֲנִ֣י מוֹדֶה֩ לְךָ֨ אָבִ֜י אֲד֣וֹן ׀ הַשָּׁמַ֣יִם וְהָאָ֗רֶץ כִּֽי־הִסְתַּ֨רְתָּ אֶת־הַדְּבָרִ֤ים הָאֵ֨לֶּה֨ מֵֽחֲכָמִ֣ים וּנְבוֹנִ֔ים וְגִלִּ֥יתָ אֹתָ֖ם לְעוֹלְלִֽים ׃ 26 כֵּ֖ן אָבִ֑י כִּ֣י כָ֔כָה הָיָ֥ה רָצ֖וֹן לְפָנֶֽיךָ ׃ 27 הַכֹּ֛ל נִמְסַ֥ר לִ֖י מֵאֵ֣ת אָבִ֑י וְאֵ֣ין אִישׁ֩ מַכִּ֨יר אֶת־הַבֵּ֜ן זֽוּלָתִ֣י הָאָ֗ב וְגַם֩ אֵ֨ין אִ֜ישׁ מַכִּ֤יר אֶת־הָאָב֨ זֽוּלָתִ֣י הַבֵּ֔ן וְזֶ֕ה אֲשֶׁ֥ר הַבֵּ֛ן יַחְפֹּ֖ץ לְגַלּוֹ֥ת לֽוֹ ׃ 28 בֹּ֣אוּ אֵלַ֔י כָּל־הָֽעֲמֵלִ֖ים וְהַמְּסֻבָּלִ֑ים וַֽאֲנִ֖י אָנִ֥יחַ לָכֶֽם ׃ 29 שְׂא֨וּ אֶת־עֻלִּ֤י עֲלֵיכֶם֨ וְלִמְד֣וּ מִמֶּ֔נִּי כִּ֛י עָנָו֥ אָֽנֹכִ֖י וְשָׁפֵ֣ל בַּלֵּ֑ב וְתִמְצְא֥וּ מְנוּחָ֖ה לְנַפְשֹֽׁתֵיכֶֽם ׃ 30 כִּ֖י עֻלִּ֣י נָעִ֑ים וּמַשָּׂאִ֖י קַ֥ל הֽוּא ׃