הבשורה על־פי מתי
פרק יב

בן האדם הוא אדון השבת

1 בָּעֵ֣ת הַהִ֔יא עָבַ֥ר יֵשׁ֛וּעַ בַּשַּׁבָּ֖ת בְּת֣וֹךְ הַזֵּֽרוּעִ֑ים וַיִּרְעֲבוּ֨ תַּלְמִידָ֔יו וַיָּחֵ֛לּוּ לִקְטֹ֥ף שִׁבֳּלִ֖ים וְלֶֽאֱכֹֽל ׃ 2 וְכִרְאוֹת֨ הַפְּרוּשִׁ֔ים אָֽמְר֖וּ אֵלָ֑יו הִנֵּה֨ תַּלְמִידֶ֣יךָ עֹשִׂ֔ים אֵ֗ת אֲשֶׁ֛ר אֵֽין־מֻתָּ֥ר לַֽעֲשׂ֖וֹת בַּשַּׁבָּֽת ׃ 3 וַיֹּ֖אמֶר אֲלֵיהֶ֑ם הַֽאִם־לֹ֣א קְרָאתֶ֗ם אֵת֩ אֲשֶׁ֨ר עָשָׂ֤ה דָוִד֨ בְּרָֽעֳב֗וֹ ה֕וּא וְאֵ֖לֶּה אֲשֶׁ֥ר אִתּֽוֹ ׃ 4 אֵ֣יךְ ה֥וּא בָא֨ אֶל־בֵּ֣ית הָֽאֱלֹהִ֔ים וַיֹּאכַ֖ל אֶת־לֶ֣חֶם הַפָּנִ֑ים אֲשֶׁר֩ לֹֽא־הָיָ֨ה מֻתָּ֥ר לוֹ֨ לֶֽאֱכֹ֔ל וְגַם־לֹא֨ לָאֵ֣לֶּה אֲשֶׁ֣ר אִתּ֔וֹ בִּלְתִּ֖י לַכֹּֽהֲנִ֥ים לְבַדָּֽם ׃ 5 א֠וֹ הַאִ֨ם לֹ֣א קְרָאתֶם֘ בַּתּוֹרָה֒ כִּ֚י בַּשַּׁבָּת֔וֹת הַכֹּֽהֲנִ֥ים בַּמִּקְדָּ֖שׁ מְחַלְלִ֣ים אֶת־הַשַּׁבָּ֑ת וּנְקִיִּ֖ים הֵֽמָּה ׃ 6 וַֽאֲנִ֖י אֹמֵ֣ר לָכֶ֑ם כִּ֛י גָּד֥וֹל מִן־הַמִּקְדָּ֖שׁ יֵ֥שׁ פֹּֽה ׃ 7 וְל֣וּ יְדַעְתֶּ֔ם מַה־ה֕וּא חֶ֥סֶד חָפַ֖צְתִּי וְלֹ֣א זָ֑בַח לֹ֥א הִרְשַׁעְתֶּ֖ם אֶת־הַנְּקִיִּֽים ׃ 8 כִּ֚י בֶּן־הָֽאָדָ֔ם אָד֥וֹן ה֖וּא גַּ֥ם עַל־הַשַּׁבָּֽת ׃

ריפוי בעל היד היבשה

9 וַיַּֽעֲבֹ֖ר מִשָּׁ֑ם וַיָּבֹ֕א אֶל־בֵּ֥ית הַכְּנֶ֖סֶת אֲשֶׁ֥ר לָהֶֽם ׃ 10 וְהִנֵּ֣ה אִ֔ישׁ אֲשֶׁ֛ר הָ֥יְתָה לּ֖וֹ יָ֣ד יְבֵשָׁ֑ה וַיִּשְׁאָל֣וּהוּ לֵאמֹ֗ר הֲמֻתָּר֨ לִרְפֹּ֣א בַשַּׁבָּ֔ת לְמַ֛עַן יָבִ֥יאוּ שִׂטְנָ֖ה עָלָֽיו ׃ 11 וַ֖יֹּאמֶר אֲלֵיהֶ֑ם מִ֣י ׀ אִ֣ישׁ מִכֶּ֗ם אֲשֶׁ֨ר תִּהְיֶ֥ה לוֹ֨ צֹ֣אן אַחַ֔ת וְאִם־תִּפֹּ֨ל זֹ֤את אֶל־בּוֹר֨ בַּשַּׁבָּ֔ת לֹא־יַֽחֲזִ֥יק בָּ֖הּ וְיַֽעֲלֶֽנָּה ׃ 12 כַּמָּ֣ה אֵפ֔וֹא יָקָ֥ר אָדָ֖ם מִצֹּ֑אן לָכֵ֕ן מֻתָּ֛ר לַֽעֲשׂ֥וֹת ט֖וֹב בַּשַּׁבָּֽת ׃ 13 אָ֞ז אָמַ֧ר אֶל־הָאִ֛ישׁ נְטֵ֥ה אֶת־יָֽדְךָ֖ וַיֵּ֑ט וַתּוּשַׁ֥ב שְׁלֵמָ֖ה כָּֽאַחֶֽרֶת ׃ 14 וַיֵּֽצְא֖וּ הַפְּרוּשִׁ֑ים וַיַּֽעֲשׂ֥וּ עֵצָ֛ה נֶגְדּ֖וֹ אֵ֥יךְ יְאַבְּדֽוּהוּ ׃ 15 וַיֵּ֤דַע זֹאת֨ יֵשׁ֔וּעַ וַיִּפְטַ֖ר מִשָּׁ֑ם וַיֵּֽלְכ֤וּ אַֽחֲרָיו֨ הֲמוֹנִ֣ים רַבִּ֔ים וַיִּרְפָּ֖א אֶת־כֻּלָּֽם ׃ 16 וַיִּגְעַ֣ר בָּ֔ם לְבִלְתִּ֖י יְגַלּ֥וּ אֹתֽוֹ ׃ 17 לְמַ֣עַן יִמָּלֵ֔א הַנֶּֽאֱמָ֗ר בְּפִ֛י יְשַׁעְיָ֥הוּ הַנָּבִ֖יא הָֽאֹמֵֽר ׃ 18 הֵ֤ן עַבְדִּי֨ בָּחַ֣רְתִּי ב֔וֹ יְדִידִ֕י בּ֖וֹ רָֽצְתָ֣ה נַפְשִׁ֑י אֶתֵּ֤ן רוּחִי֨ עָלָ֔יו וּמִשְׁפָּ֖ט לַגּוֹיִ֥ם יַגִּֽיד ׃ 19 לֹ֥א יָרִ֖יב וְלֹ֣א יִצְעָ֑ק וְלֹֽא־יִשְׁמַ֥ע אִ֛ישׁ בַּֽחוּצ֖וֹת קוֹלֽוֹ ׃ 20 קָנֶ֤ה רָצוּץ֨ לֹ֣א יִשְׁבּ֔וֹר וּפִשְׁתָּ֥ה כֵהָ֖ה לֹ֣א יְכַבֶּ֑ה עַ֛ד כִּֽי־יוֹצִ֥יא אֶת־הַמִּשְׁפָּ֖ט לְנִצָּחֽוֹן ׃ 21 וְלִשְׁמ֖וֹ גּוֹיִ֥ם יְיַחֵֽלוּ ׃

ישוע נגד בעל־זבול

22 אָ֗ז הוּבָ֨א אֵלָ֜יו אֲחֻ֥ז שֵׁ֛ד עִוֵּ֥ר וְאִלֵּ֖ם וַיִּרְפָּ֣א אֹת֑וֹ עַ֗ד כִּ֚י הָֽעִוֵּֽר־וְאִלֵּ֔ם גַּם־דִּבֵּ֖ר וְגַ֥ם רָאָֽה ׃ 23 וַיִּשְׁתּֽוֹמְמ֖וּ כָּל־הַֽהֲמוֹנִ֑ים וַיֹּ֣אמְר֔וּ הַֽאִם־לֹ֥א זֶ֖ה בֶּן־דָּוִֽד ׃ 24 וְכִשְׁמ֥וֹעַ הַפְּרוּשִׁ֖ים וַיֹּאמֵ֑רוּ זֶ֗ה אֵינֶנּ֤וּ מְגָרֵשׁ֨ אֶת־הַשֵּׁדִ֔ים בִּלְתִּ֛י אִם־בְּבַ֥עַל זְב֖וּב שַׂ֥ר הַשֵּׁדִֽים ׃ 25 וַיֵּ֧דַע יֵשׁ֛וּעַ אֶת־מַחְשְׁבֽוֹתֵיהֶ֖ם וַיֹּ֣אמֶר אֲלֵיהֶ֑ם כָּל־מַמְלָכָ֞ה הַנִּפְלָגָ֤ה בְעַצְמָהּ֨ תֵּֽחָרֵ֔ב וְכָל־עִ֥יר אוֹ־בַ֛יִת הַנִּפְלָ֥ג בְּעַצְמ֖וֹ לֹ֥א יִכּֽוֹן ׃ 26 וְאִ֤ם הַשָּׂטָן֨ מְגָרֵ֣שׁ אֶת־הַשָּׂטָ֔ן נִפְלָ֥ג ה֖וּא בְּנַפְשׁ֑וֹ אֵ֥יךְ אֵפ֖וֹא תִּכּ֥וֹן מַלְכוּתֽוֹ ׃ 27 וְאִם־אֲנִ֗י בְּבַ֨עַל זְב֜וּב מְגָרֵ֤שׁ אֲנִי֨ אֶת־הַשֵּׁדִ֔ים בְּנֵיכֶ֖ם בְּמִ֣י מְגָֽרְשִׁ֑ים עַל־כֵּ֕ן הֵ֖מָּה יִהְי֥וּ שֹֽׁפְטֵיכֶֽם ׃ 28 אַ֗ךְ אִם־אֲנִי֨ בְּר֣וּחַ אֱלֹהִ֔ים מְגָרֵ֥שׁ אֲנִ֖י אֶת־הַשֵּׁדִ֑ים הֲלֹ֛א הִגִּ֥יעָה אֲלֵיכֶ֖ם מַלְכ֥וּת הָֽאֱלֹהִֽים ׃ 29 א֠וֹ אֵ֞יךְ יוּכַ֨ל אִ֤ישׁ לָבוֹא֨ אֶל־בֵּ֣ית הַגִּבּ֔וֹר וְלָבֹ֖ז אֶת־כֵּלָ֑יו אִם־לֹ֗א בָּרִֽאשֹׁנָה֨ יֶֽאֱסֹ֣ר אֶת־הַגִּבּ֔וֹר וְאָ֖ז יָבֹ֥ז אֶת־בֵּיתֽוֹ ׃ 30 מִ֗י אֲשֶׁר֨ אֵינֶ֣נּוּ אִתִּ֔י לְנֶגְדִּ֖י ה֑וּא וּמִ֗י אֲשֶׁ֥ר אֵינֶנּ֛וּ מְאַסֵּ֥ף אִתִּ֖י מְפַזֵּֽר ׃ 31 עַל־כֵּ֗ן אֲנִי֨ אֹמֵ֣ר לָכֶ֔ם כָּל־חֵטְא֨ וּגְדוּפָ֔ה יִסָּלֵ֖חַ לִבְנֵ֣י הָֽאָדָ֑ם אַ֚ךְ גְּדוּפַ֣ת הָר֔וּחַ לֹ֥א תִסָּלֵ֖חַ לִבְנֵ֥י הָֽאָדָֽם ׃ 32 וּמִ֗י אֲשֶׁ֨ר יְדַבֵּ֥ר דָּבָ֛ר נֶ֥גֶד בֶּן־הָֽאָדָ֖ם יִסָּלַ֣ח ל֑וֹ וּמִי֩ אֲשֶׁ֨ר יְדַבֵּ֜ר נֶ֣גֶד ׀ ר֣וּחַ הַקֹּ֗דֶשׁ לֹ֤א יִסָּלַח֨ ל֔וֹ לֹ֚א בָּֽעוֹלָ֣ם הַזֶּ֔ה גַּ֥ם לֹ֖א בָּֽעוֹלָ֥ם הַבָּֽא ׃

העץ ופריו

33 א֠וֹ עֲשׂ֨וּ אֶת־הָעֵ֥ץ טוֹב֨ וּפִרְי֣וֹ ט֔וֹב א֗וֹ עֲשׂ֧וּ אֶת־הָעֵ֛ץ נִשְׁחָ֖ת וּפִרְי֣וֹ נִשְׁחָ֑ת כִּ֚י מִן־הַפְּרִ֔י הָעֵ֖ץ מִתְנַכֵּֽר ׃ 34 יְלִידֵ֣י צִפְעוֹנִ֔ים אֵ֣יךְ תּֽוּכְל֗וּ לְדַבֵּר֨ דְּבָרִ֣ים טוֹבִ֔ים בִּהְיֽוֹתְכֶ֖ם רָעִ֑ים כִּ֚י מִשְּׁפְעַ֣ת הַלֵּ֔ב הַפֶּ֖ה מְמַלֵּֽל ׃ 35 הָאִ֣ישׁ הַטּ֗וֹב מֵֽאוֹצַ֤ר הַלֵּב֨ הַטּ֔וֹב מוֹצִ֖יא דְּבָרִ֣ים טוֹבִ֑ים וְהָאִ֣ישׁ הָרָ֔ע מִן־הָֽאוֹצָ֥ר הָרָ֛ע מוֹצִ֖יא דְּבָרִ֥ים רָעִֽים ׃ 36 וַֽאֲנִ֖י אֹמֵ֣ר לָכֶ֑ם כִּי֩ כָל־מִלָּ֨ה בְטֵלָ֜ה אֲשֶׁ֣ר ׀ יְבַטְּא֣וּ בְנֵי־הָֽאָדָ֗ם יִתְּנ֥וּ עָלֶ֛יהָ חֶשְׁבּ֖וֹן בְּי֥וֹם הַמִּשְׁפָּֽט ׃ 37 כִּ֖י מִדְּבָרֶ֣יךָ תִצָּדֵ֑ק וּמִדְּבָרֶ֖יךָ תָּרְשָֽׁע ׃

בקשה לראות אות

38 אָ֗ז עָנ֧וּ אֲחָדִ֛ים מִן־הַסּֽוֹפְרִ֥ים וְהַפְּרוּשִׁ֖ים לֵאמֹ֑ר מוֹרֶ֕ה אֲנַ֧חְנוּ רֹצִ֛ים לִרְא֥וֹת מֵֽאִתְּךָ֖ אֽוֹת ׃ 39 וַיַּעַן֘ וַיֹּ֣אמֶר אֲלֵיהֶם֒ דּ֚וֹר רָ֣ע וּמְנָאֵ֔ף א֖וֹת ה֣וּא מְבַקֵּ֑שׁ וְאוֹת֨ לֹֽא־יִנָּתֵ֣ן ל֔וֹ זֽוּלָתִ֕י א֖וֹת יוֹנָ֥ה הַנָּבִֽיא ׃ 40 כִּ֗י כַּֽאֲשֶׁ֨ר הָיָ֤ה יוֹנָה֨ בִּמְעֵ֣י הַדָּ֔ג שְׁלֹשָׁ֥ה יָמִ֖ים וּשְׁלֹשָׁ֣ה לֵיל֑וֹת כֵּ֗ן יִהְיֶ֤ה בֶן־הָֽאָדָם֨ בְּלֵ֣ב הָאָ֔רֶץ שְׁלֹשָׁ֥ה יָמִ֖ים וּשְׁלֹשָׁ֥ה לֵילֽוֹת ׃ 41 אַנְשֵׁ֣י נִֽ֠ינְוֵה יָק֨וּמוּ בַמִּשְׁפָּ֜ט עִם־הַדּ֤וֹר הַזֶּה֨ וְיַרְשִׁיע֔וּהוּ כִּ֥י שָׁ֖בוּ בִּקְרִיאַ֣ת יוֹנָ֑ה וְהִנֵּ֕ה גָּד֥וֹל מִיּוֹנָ֖ה פֹּֽה ׃ 42 מַלְכַּ֣ת הַ֠נֶּגֶב תָּק֨וּם בַּמִּשְׁפָּ֜ט עִם־הַדּ֣וֹר הַזֶּה֘ וְתַרְשִׁיעֵהוּ֒ כִּי־בָ֨אָה֨ מִקְּצ֣וֹת הָאָ֔רֶץ לִשְׁמֹ֕עַ אֵ֖ת חָכְמַ֣ת שְׁלֹמֹ֑ה וְהִנֵּ֕ה גָּד֥וֹל מִשְּׁלֹמֹ֖ה פֹּֽה ׃

שיבת הרוח הטמאה

43 וְכַֽאֲשֶׁ֞ר יָצָ֨א הָר֤וּחַ הַטָּמֵא֨ מֵֽאָדָ֔ם ה֗וּא מִתְהַלֵּךְ֨ בִּמְקוֹמ֣וֹת בְּלִי־מַ֔יִם מְבַקֵּ֖שׁ מְנוּחָ֑ה וְלֹ֖א יִמְצָֽא ׃ 44 אָ֣ז יֹאמַ֔ר אָשׁ֨וּבָה֨ אֶל־בֵּיתִ֔י אֲשֶׁ֥ר יָצָ֖אתִי מִשָּׁ֑ם וּכְבוֹאוֹ֨ ה֣וּא מֹצֵ֔א רֵ֥ק וּמְטֻאטָ֖א וּמְהֻדָּֽר ׃ 45 אָ֡ז ה֣וּא הוֹלֵךְ֩ וְלֹקֵ֨חַ אִתּ֜וֹ שֶׁ֣בַע רוּח֤וֹת אֲחֵרוֹת֨ רָע֣וֹת מִמֶּ֔נּוּ וְתָבֹ֣אנָה בוֹ֘ וְתִשְׁכֹּ֣נָּה שָּׁם֒ וְתִהְיֶ֗ינָה אַֽחֲרוֹנ֛וֹת הָאִ֥ישׁ הַה֖וּא רָע֣וֹת מִן־הָרִֽאשׁוֹנ֑וֹת כֵּ֣ן יִהְיֶ֔ה גַּ֛ם לַדּ֥וֹר הָרָ֖ע הַזֶּֽה ׃

אמו ואחיו של ישוע

46 ע֗וֹד ה֚וּא מְדַבֵּ֣ר אֶל־הַֽהֲמוֹנִ֔ים וְהִנֵּ֛ה אִמּ֥וֹ וְאֶחָ֖יו עָֽמְד֣וּ בַח֑וּץ מְבַקְשִׁ֖ים לְדַבֵּ֥ר אִתּֽוֹ ׃ 47 וַיֹּ֥אמֶר אֶחָ֖ד אֵלָ֑יו הִנֵּ֗ה אִמְּךָ֤ וְאַחֶ֨יךָ֨ עֹֽמְדִ֣ים בַּח֔וּץ מְבַקְשִׁ֖ים לְדַבֵּ֥ר אִתָּֽךְ ׃ 48 וַיַּ֕עַן וַיֹּ֖אמֶר אֶל־הַמְּדַבֵּ֣ר אֵלָ֑יו מִ֥י הִיא֨ אִמִּ֔י וּמִ֥י הֵ֖ם אֶחָֽי ׃ 49 וַיֵּ֧ט אֶת־יָד֛וֹ עַל־תַּלְמִידָ֖יו וַיֹּאמַ֑ר הִנֵּ֖ה אִמִּ֥י וְאֶחָֽי ׃ 50 כִּ֚י כָּל־אֲשֶׁ֣ר יַֽעֲשֶׂ֔ה אֶת־רְצ֥וֹן אָבִ֖י אֲשֶׁ֣ר בַּשָּׁמָ֑יִם זֶ֣ה ה֔וּא אָחִ֥י וַֽאֲחוֹתִ֖י וְאִמִּֽי ׃